02/03/2026
आज (२ मार्च) होळी पौर्णिमा...
होळी हा पवित्र सण देशभरात सर्वधर्मीय लोकांकडून उत्साहाने साजरा केला जातो. अनेक राज्यांमध्ये तो वेगवेगळ्या पद्धतीने साजरा केला जातो. फाल्गुन महिन्यातील पौणिमेला साजरा होणारा हा सण. याला ‘शिमगा’ असेही म्हणतात. होळीमध्ये वाईट गोष्टींचे दहन करतात आणि पुरणपोळीचा नैवेद्य दाखवतात, अशी परंपरा महाराष्ट्रात आहे. तर उत्तर भारतात या दिवशी रंगपंचमी खेळण्याची परंपरा आहे.
होळी साजरा करण्याच्या परंपरेलाही पौराणिक कथेचा आधार आहे. राक्षसांचा राजा हिरण्यकशिपूने श्री विष्णूची भक्ती करणाऱ्या आपल्या पुत्राला – प्रल्हादाला ठार मारण्याचे अनेक प्रयत्न केले. मात्र श्रीविष्णूंनी त्याला वाचवले. अखेर हिरण्यकशिपूने बहीण - ‘होलिका’ जिला अग्नीपासून भय नाही, असा वर होता, तिला प्रल्हादास मारण्यास पाठवले. तिने प्रल्हादाला मांडीवर बसवून चितेत प्रवेश केला. विष्णूकृपेने प्रल्हाद वाचला मात्र, वरदानाचा दुरुपयोग केल्याने होलिकेचाच जळून मृत्यू झाला. तेव्हापासून अग्नीमध्ये वाईट गोष्टींचे दहन करून चांगल्या गोष्टी स्वीकारण्यासाठी ‘होळी’ हा उत्सव साजरा करण्यास सुरुवात झाली, असे मानले जाते.
या दिवसांमध्ये गव्हाचे पीक तयार होते. त्यामुळे होळीच्या अग्नीत गव्हाच्या ओंब्या आणि नारळ भाजण्याची प्रथा आहे. होळीमध्ये दुर्भावना, दुर्वासना, समस्या, दारिद्र्य यांचे दहन होवो. सद्विचार, प्रेम, शांती भावनेचा प्रसार होवो, अशी प्रार्थना...
होळी पौर्णिमेनिमित्त सर्वांना मंगलमय शुभेच्छा...
#होळी #होळीपौर्णिमा #शिमगा #शुभेच्छा
