https://youtube.com/channel/UCXBNh89Q2oT93qInHIxSrWg

Pharmactivity, Lucknow (2026)

24/12/2025

Ko Meyasa Idan Mutum Yayi Qiba Mutane Ke Tunanin Kamar Wata Alamace Ta Jindadi ko Ni'ima?

Mutane da dama idan sunga mutum ya canza yayi qiba sai su fara tunanin wani nau'in jindadi ne, ko ni'ima tasa yayi wannan qibar duk da qiba natare da nata qalubalen a lafiyar dan Adam wanda mai ita zai iya fuskanta.

Tabbas akwai qiba ta azaliya (biological: genetic, hormonal changes), akwai qiba wadda mutum zai iyayi sanadiyar canjin muhalli, cin abinci dayawa fiye qima, cin sarrafaffen abinci (processed foods), cin abinci mai suga sosai, rashin motsa jiki, hutu dayawa batareda yin wani aiki ba.

Akwai kuma wanda zai samu qibar sa tun yana jinjiri saboda shayar dashi nono fiye da qima (overfeeding).

Haka kuma akwai qiba wadda wasu rashin lafiyoyi ke iya kawowa misali, polycystic ovarian syndrome (PCOS), Cushing's syndrome dss.

Bayan wadannan nau'ukan qiba akwai kuma qiba wadda ita bata azaliya ba, bata sauyin muhalli ba, haka kuma bata rashin lafiya ko kuma daya daga cikin abubuwanda na missafa a sama.

Ko wacce irin qiba wannan?

Ita ce qiba yar kanti.

Eh, yar kanti.

Wacece qiba yar kanti?

Qiba yar kanti itace qibar da mutum zaiyi wadda batada alaqa da daya daga cikin abubuwanda na lissafa a sama.

Misali masu amfani da magunguna iri-iri domin suyi qiba.

Haqiqa akwai mutane da dama qibar su irin wannan ce __ ta shan magunguna, ko meye suke canza halittar su zuwa wannan? Oho.

Wataqil ko maganganu mutane ne na cewa idan mutum yayi qiba shine nau'in jindadi, walwala ko ni'ima. Wannan amsar dai banda ita.

Wannan dabi'ar tana qoqarin zama ruwan dare acikin al'umma. Haka kawai can idan aka fito kasan mutum gashinan dai alhamdulillah amma kawai bayan kwana biyu kaganshi kamar wani buhu.🤔

Wannan dabi'ar tafara yawa musamman acikin yan mata __ dayawa daga cikin su ba qibar gaskiya bace.

Abun yanzu bama akan yan matan kawai ya tsaya ba har maza su sun fara.

Nayi ta samun tambayoyi dayawa daga mutane dadama akan wai sunason suyi qiba in gayamusu maganin da zasu sha.🤔

Toh ki/kasan idan kana cikin su ilar da wannan qibar zata kawoma tafi duk wani buri daka/kike qoqarin cimma da wannan qibar. Toh Allah na tuba wani buri kuma?

Masu qibar azaliyar ma s**an iya fuskantar matsalolin rashin lafiyar dadama kamar su hawan jini (hypertension), ciwon sugar (diabetes), ciwon daji (cancer), minshari a lokacin bacci (sleep apnea), matsalolin zuciya, ciwon ga'bo'bi, matsalolin ciwon hanta dss.

Sai a kiyaye.

Shawarata anan shine gama su qiba ta azaliya yanada kyau su kula sosai da irin nau'in abincin da suke ci, rage cin abinci mai suga sosai, rage shan lemunan kwalba (soft drinks), samun isasshen bacci, motsa jiki, rage cin abinci mai qice.

Haka kuma ku masu qiba yar kanti damasu niyar yi, ina baku shawarar daku daina, illar da wannan zaiyiwa lafiyar ku tanada yawa. Akwai cututuka dayawan gaske da wannan zata iya haifarwa.

Nr. Abdullahi Musa.

21/12/2025

Kwana biyu da s**a wuce, ina gida sai na ji ihu mai qarfi na wani yaro daga makwabta da mu. Bayan yan mintuna kaɗan, mahaifiyarsa ta aiko a kira ni.

Da na isa, sai na tarar da wani yaro yana matse qafafunsa a wajen gwiwa, yana ihu yana cewa a yanke masa qafafun gaba daya.😥 Abin ya taba zuciya ƙwarai.

Da farko, na d'auka wata irin halayyar yara ce ta fushi ko rashin jin dadi, amma cikin sauri na fahimci cewa wannan ba wasa ba ne, kuma ba halin yaro na yau da kullum ba ne.

Na duba yaron a hankali, kuma abin da na lura shi ne babban qorafinsa kawai shi ne tsananin ciwo a wajen gabobin jikinsa (joints). Saboda haka, na fara zargin wata babbar matsala ta lafiya.

Daga nan, sai mahaifiyar yaron ta sanar da ni cewa an gano yana da cutar amosanin jini kimanin shekara 1 zuwa 2 da s**a wuce. Wannan bayani ya qara tabbatar min da zargina: yaron yana fama da daya daga cikin matsalolin da aka fi sani da masu cutar amosanin jini ke fuskanta, wato vaso-occlusive crisis (tsananin ciwo da ke faruwa sakamakon toshewar qananan jijiyoyin jini, wanda ke rage isar jini zuwa gabobi da sassan jiki).

Ya kai mai karatu, ban san ko ka taba jin wani irin nau'in ciwo ba?

Wannan ciwo daban yake, wallahi daban yake kwarai da sauran ciwoka.

Wannan ciwon mai tsanani na iya faruwa ne sakamakon yanayin sanyi da ake, wanda ke shafar kaurin jini (blood viscosity). Sanyi yana sa jijiyoyin jini su matse (constriction), hakan kuma yana rage gudanawar jini, wanda ke qara yiwuwar kwayoyin jinin mai amosanin jini (sickle red blood cells) su toshe jijiyoyin jini.

Na ba mahaifiyar shawara kan abin da ya kamata ta yi, sannan na ba ta shawarar ta garzaya da yaron asibiti domin samun kulawa ta musamman.

Don taqaita bayani, vaso-occlusive crisis na yawan faruwa a lokacin sanyi ko damuna ga mutanen da ke da cutar amosanin jini.

Iyayaye da masu kula da yara masu amosanin jini ya kamata su dauki matakan kariya domin rage faruwa da tsananin wannan matsala saboda yanayin sanyi da muke cikin a yanzu.

Wadannan matakai sun haɗa da:

• Gujewa zama a sanyi na dogon lokaci.
• Sanya tufafi masu kauri da dumi kamar su rigar sanyi, da safar ƙafa.
• Rage amfani da fanka da na’urar sanyaya iska (AC).
• Ƙokarin samar da yanayi mai dumi a gida.
• Yin wanka da ruwan dumi.
• Tabbatar da shan ruwa sosai domin gujewa bushewar jiki, saboda rashin ruwa yana qara kaurin jini kuma yana tsananta matsalar.
• Samar da abinci mai gina jiki.
• Yin tausa (massage) a wuraren da ke ciwo a hankali.
• Gane alamomin vaso-occlusive crisis da garzayawa zuwa mafi kusan cibiyar lafiya (asibiti).

A qarshe, vaso-occlusive crisis na daga cikin manyan ciwukan da masu cutar amosanin jini ke fuskanta. Duk da haka, ana iya rage tsanani da yawan faruwarsa ta hanyar gujewa sanyi, kasancewa a dumi, da daukar matakan kariya.

Ya ku jaruman amosanin jini (sickle cell warriors), tabbas ku jarumai ne!

Nr. Abdullahi Musa,
Mai ba da shawara kan cutar amosanin jini.

14/12/2025

Akwai wani maganin hawan jini da ake yawan bayarwa a asibitoci saboda yana aiki sosai wajen saukar da jini. Wannan magani shi ne AMLODIPINE.

Duk da ingancinsa, Amlodipine na iya haifar da kumburin kafa, musamman daga ijiyar sahu (ankle) zuwa k’asa. Wannan kumburi ba cuta ba ce, kuma ba alamar gazawar zuciya ba ce ko k’oda a mafi yawan lokuta.

Wannan yana faruwa ne saboda irin aikin maganin, wanda ke sa jini ya yawaita shiga ƙananan jijiyoyin kafa, har ruwa ya taru a wajen. Yakan fi bayyana ne idan:

💊An dade ana shan maganin
💊Ana shan shi kullum
💊Ana shan babban kaso wato (dose)

Muhimman abubuwan da za’a kiyaye:

💡 Kada a daina shan Amlodipine da kai idan
an ga kumburi.

💡A tuntubi likita (Doctor of Medicine) ko likitan magunguna (Doctor of Pharmacy).

💡Ana iya rage “dose”, ko sauya magani, ko had’a shi da wani magani domin rage kumburin.

Magani yana da amfani, amma sanin illolinsa kariya ce.

13/12/2025

Yawancin Magunguna Ba Su Warkar da Cuta Kai Tsaye, Sai Dai Suna Gyara ko Taimakawa Jiki Wajen Gyara Wasu Abubuwa ko Sinadarai da Sunkayi Yawa ko Kadan a Jikin Dan Adam.

Mutane da yawa suna tunanin cewa duk lokacin da s**a sha magani, cuta ta warke. Toa wannan dai ba gaskiya ba ne!!

A gaskiyar zance, ta fuskar yanda magani yake aiki ajiki, yawancin magunguna ba sa warkar da cuta kai tsaye. Daga cikin misalan abinda da suke yi shi ne:

Maganin hawan jini yana saukar da hawan jini, amma idan an daina shi, hawan jinin na iya dawowa.

Maganin sikari yana rage sikari a jini, amma cutar sikari tana nan.

Maganin rage zafi ko ciwon jiki yana rage radadi, amma baya gyara ko warkar da abin da ya jawo ciwon.

Wannan yana nuna cewa maganin yana sarrafa cutar ne, ba ya warkar da ita gaba d’aya.

Magunguna kala biyu zuwa hudu ne kadai suke warkar da cutar da tashiga cikin jikin mutum kamar:

1. Magungunan kashe kwayoyin cuta wanda muke kira da ANTIMICROBIAL AGENTS

2. Maganin cutar daji (Antineoplastic ko Anticancer agents kenan)

3. Maganin Guba wato (Antidotes) a turance.

Dangane da yadda magani ke aiki a cikin jiki wannan sune nau’in magunguna dake maganin cuta ko fitar da ita waje. Sauran kuma suna iya kwantar da cuta na tsawon lokaci mai yawa.

Dan haka akiyaye shan magunguna barkatai ba tare da shawarar likita ba.

❌Magani ba abinci ba ne‼️ Shan sa saboda “ya taba min aiki a baya” na iya cutar da kai yau.

11/12/2025

Mata masu juna biyu da aka tabbatar suna da cutar HIV ko Hepatitis B suna bukatar kulawa ta musamman a lokacin ciki, lokacin haihuwa, da kuma bayan sun haihu domin kare jariransu daga kamuwa da cutar.

Saboda haka, yin rajista da zuwa asibiti tun farkon juna biyu (antenatal care) yana da matuƙar muhimmanci. Ta haka ne za a gano irin wad'annan matsaloli da wuri, sannan a d'auki matakan kariya da s**a dace don tabbatar da lafiyar uwa da jariri.

07/12/2025

Da Kun Fahimci Wannan Zaku Rage Dayawa Daga Cikin Matsalolin da Matayen ku ke Fuskanta a Lokacin da Suke Dauke da Juna Biyu.

Yan ku ma'aurata,

Ku qarfafawa matayen ku gurin zuwa asibiti a lokacin da suke dauke da juna biyu (ciki).

Bawai sai lokacin da s**aji wata matsala ta taso ba, ko lokacin da s**a ji basu da lafiya.

A'a.

Zuwan masu juna biyu asibiti zuwa ne na musamma da ake kira da Antenatal Care (ANC), wato ma'ana kulawan da ake bawa mace a lokacin da take dauke da juna biyu da kuma shi abunda take dauke dashi daga lokacin da ta samu shi wannan juna biyun zuwa lokacin haihuwar sa.

Hakan yana taimakawa sosai gurin kare ita mai juna biyun (jiki) da kuma abunda take dauke dashi daga wasu matsalolin da ke iya faruwa a lokacin da ake dauke da juna biyun, lokacin naquda da kuma bayan haihuwa saboda ta wannan ne ake iya ganin duk wata matsala da zata iya shafuwar mai juna biyun ko abinda take dauke shi domin magancewa da wuri ko daukan matakin gaggawa.

Haqiqa wasu matsalolin da ake fuskanta a lokacin da ake dauke da juna biyu, naquda da kuma jim kadan bayan haihuwa sun samo asaline a bisa rashin zuwa asibiti a lokacin ake dauke da ciki, wanda haka zai iya haifarda babar matsala ga mai juna biyun, abunda take dauke shi kai harma rasa rayuwar daya daga cikin su ko dukan su.😥

Zuwa asibiti lokacin ake dauke da juna biyu yana da matuqar muhimmanci ga lafiyar uwar da shi abunda ke cikin ta.

Wannan saqo ne daga malamin jinya kuma ungwan zoma.

Abdullahi Musa.

20/11/2025

Wani zai iya tambaya, meyasa babu maganin zazzabin kwayar cutar DENGUE na musamman?

Ko kuma meyasa akace kar ayi amfani da magungunan rage radadi da zafin jiki kamar su IBUPROFEN, DICLOFENAC, ASPIRIN etc alokacinda mutum ya kamu da cutar?

Lokacinda muke makaranta a wata shidan farko da muke posting a bangaren General Medicine nayi irin wannan tambayar wa kaina. Ganin cewa a duk lokacinda akayi admitting marasa lafiya musamman tsakanin watan JUNE-DEC. zaka samu patients 10 cikin 20 toa NS1 Positive ne. Wato sunada zazzabin kwayar cutar DENGUE. Kuma saidae muyita bayarda supportive care har zuwa lokacin sallamar su.

To meyasa a irin k’asa ta India 🇮🇳 wacce likitocinta sunada qwarewa akan harkan lafiya da magani amma basu samar da maganin wannan cutar wacce mafi yawa kuma shine zazzabin da yake damun su a wannan kasar?

Daga cikin dalilan:
💡Dengue qwayar cutar VIRUS ce mai wahalar magani saboda tanada nau’o’i dayawa kuma kowanne nau’i yanada banbanci musamman tayanda yake shiga qwayoyin jiki.

⚠️Magani da zaiyi aiki akan qwayar cuta daya na iya rashin tasiri sosai akan wani. Don haka yin magani d’aya da zai kashe dukkan nau’o’in gaba daya yana da wahala sosai.

💡Dalili na biyu shine, kasancewar ita Dengue qwayar cutar virus ce, tana iya canza yanayin halitta nan take. Wannan kuma shi yake haifar da “resistance” wato qwayar cuta tafi karfin magani. Dan haka idan ma an samar da magani toa abu mai wahala ne zai kashe virus din saboda canzawar halitta.

Akwai dalilai da dama, amma wannan sune s**afi shahara.

⭕️Yanzu kuma bari muji takaitaccen bayani akan me yasa ba a son a yi amfani da magungunan rage radadi ko ciwon jiki irin su Diclofenac, Ibuprofen, Aspirin da sauran (NSAIDs) a lokacin cutar dengue!

1. Akwai sinadarai acikin jiki wanda suke taimakawa wajan hana jini ya zuba (clotting factors) kenan.

💡Ita wannan cutar da take haifar da zazzabin na Dengue tana rage yawan wadannan sinadaran ajikin dan Adam. Adalilin hakan zai iya haifar da zunab jin daga hanci ko kuma cikin kwakwalwa.

💡 Su ma NSAIDs wato magunguna da suke rage radadin jiki musamman ASPIRIN yana toshe ko hana aikin wani sinadari da muke kira THROMBOXANE-A2; wanda yanada matukar amfani wajen tsayar da zubar jini daga jiki.

Idan ya kasance babu wannan sinadarin kuma itama Dengue tana qara rage yawan wadannan sinadaran toa hadarin zubar jini daga hanci ko kwakwalwa zai qaru sosai.

🅰️ Shiyasa a duk lokacin da muke da masu dauke da zazzabin Dengue a unit dinmu duk bayan 12hrs sai munduba PLATELET Count nasu domin kiyaye afkuwar hadarin zubar jini.

Wannan dae sune kadan daga cikin abubuwanda yakamata musani wanda s**a shafi magani a wannan cutar ta Dengue wacce tafi yawa a kasashen Asia irin su Indiya yanzu kuma ta bullo a jahar mu ta Sakkwato.

Allaah Yayi mana tsari daga kowanne irin curutoci. Aameen!

17/11/2025

A lokacin da sauro (mosquito) ke qara yawa, DANGUE FEVER na samun damar kai hari batareda gargadi ba.

Wannan rubutun zai muna bayani dalla-dalla akan banbance-banbance dake tsakanin zazzabin cizon sauro da kuma zazzabin dangue.

Duk da halitta daya ce ke daukan wayannan cututuka guda biyu (vector) daga mutunen da ke dauke da su zuwa wani wato sauro (mosquito), amma sun sha banban a tsakanin su.

Ga banbance-banbancen kamar haka:

• Abu na farko shine, dangue fever cutace wadda kwayoyin halittar bairos ke kawowa (virus), ita kuma zazzabin cizon sauro farasit (parasite) ne ke kawo ta wato nau'ukan falasmodiyon (plasmodium species).

• Na biyu, dukan su sauro ne ke daukan su daga mutunen da ke dauke da wayannan kwayoyin cutar zuwa wadadan basa dauke dasu domin su kamu, amma duk da haka, nau'ukan saurayen sun sha banban. Ita cutar dangue fever nau'in Aedes mosquito (Aedes Aegypti & Aedes Albopictus) ke daukan ta, ita kuma zazzabin cizon sauro macen anofiles (female anopheles) ke daukanta.

• Akwai banbanci na lokutan da wayannan cututukan ke dauka a cikin jikin mutum kafin bayanar alamomin kamuwa dasu a jiki (incubation period). Na dangue fever yafi zama matsakaici (short incubation period) wanda yake daukan kwanaki 4 zuwa 7 inda ita kuma zazzabin cizon sauron ke daukan kwanaki 7 zuwa 30 kafin bayyanar alamomin (long incubation period).

• Cutar dangue fever nasaka zubar jini ta hanci wato habo (epistaxis), zubar jini ta dasashin baki (gum bleeding) ko zubar jini ta gurin da akayi amfani dashi domin dibar jini ayi wani kwaji (venipuncture). Inda ita kuma zazzabin cizon sauron ke haifar da rashin isasshen jini a cikin jiki (anaemia).

• Idan anyi kwajin Rapid Diagnostic Test (RDT) ga mara lafiyan da ke dauke da dangue fever zai nuna babu (negative), amma zazzabin cizon sauron zai nuna akwai (positive).

• Mara lafiyan da ke dauke da dangue fever zai iya zuwa da alamomin ciwon jiki, ciwon ga'bo'bi da kuma ciwon a bayan idanuwa (retro-ocular pain), wanda a zazzabin cizon sauro babu ciwon bayan idanuwa.

• Dangue tana daga nau'ukan cututuka da sauraye masu cizon mutane da sassafe ko kuma idan yamma ta fara yi ke haifarwa saboda a irin wannan lokutan ne akafi samun wayannan nau'ukan saurayen, ita kuma zazzabin cizon sauro yana faruwa ne daga nau'ukan saurayen da ke cizon mutane a cikin dare.

Wayannan sune yan banbance-banbancen da ke tsakanin zazzabin cizon sauron da kuma zazzabin dangue.

Daga qarshe, dukan su ba cututtuka bane da ake iya tsalkawa daga wanda ya ke dauke da su ba zuwa wanda baya dauke dasu ba sai dai idan wayannan nau'in saurayen ne s**a ciji mai wannan cutar daga baya kuma s**a ciji wanda bayada sai s**a zuba masa wannan kwayoyin cutar.

Ma'aikatan lafiya sai a kula.

Mutane sai a kula da tsaftace muhalli da kuma magudanun ruwa.

Abdullahi Musa,
Malamin jinya.

15/11/2025

Malaria shekarar nan akwai ban mamaki. Da yawan mutane sunyi zazzabin amma kuma yasake dawo musu karo na biyu, wasu kuma har karo na ukku.

Kamar Ni, dawowata daga makaranta nayi treatment na malaria, naje exams a can din ma nasake treatment kuma duka Artemether ne both Tab. & Inj., toa bayan nadawo daga exams tasake dawowa sai nayi treatment da Artesunate toa har yanzu dae lafiya kalau.

Na lura da cewa mafi yawan mutane Tab. Coartem ne ake basu ko Inj. Artemether daga asibitoci ko kuma a gida, akwai abu biyu da nake tunani kuma nakeso nayi bincike akai:

1. Ko dai munyi “abusing” wannan maganin sundaina aiki ga “P. falciparum” wacce itace kwayar cutar da take haifar da zazzabin cizon sauro a yankin mu na nan Africa. Ko ita cutar tayi developing resistance dakanta.

2. Ko kuma akwai sabon specie na “Plasmodium spp” da ya b’ullo mana a yankunan mu daga wata kasar saboda shige da fice da akeyi ana samun baqi daga wasu qasashe.

Abin Lura:

1. Idan muka dauki maganar farko, zai iya zama gaskiya saboda, mafi yawan gwajin da akeyi na malaria na RDT yana nuna akwai “P.falciparum”.

2. Idan muka dauki magana ta biyu kuma zamu iya cewa ita wannan kwayar cutar ba kamar P. vivax da P. ovale take ba, ita batada “domant stage” wato bata “relapsing” bayan an warke. Kenan idan anga tasake dawowa zai iya zama ba P. falciparum bace saidae wata Malaria ta daban indae ba an sake gwajin an tabbatar ba.

Ina ma’aikata lafiya, ataimaka mana da wannan bincike “data” akan gwaji da magunguna da akayi amfani dasu.

Allaah Yaqara bamu lafiya!

13/11/2025

Da mun kula da abincinmu tare da yin motsa jiki a kai a kai, da ba mu sha wahalar wasu cututtuka da dama ba.

13/11/2025

A d’an lokacin nan ana samun yawaitar Ciwon Tari (Cutar Tuberculosis) acikin mutane musamman a tsakanin matasa da tsofaffi a Najeriya.

Yawanci kuma masu cutar basa nuna alamomin cutar wato (Latent TB kenan) har sai cutar ta tsananta ko kuma idan tafara yaduwa a wasu sassan jiki— ita muke kira da ( Extra-Pulmonary TB).

Amma ana iya warkewa gaba daya idan anyi saurin ganota da wuri.

Wannan cutar tana yaduwa ne ta hanyar iskar da muke shaqa yanzu da kullum a duk lokacinda mai cutar yayi TARI, ATISHAWA, ko MAGANA, ko MAJINAR DA ZAYA ZUBAR da sauransu.

Amma bata yaduwa ta hanyar gaisawa (handshake), cin abinci a plate daya, etc. sai dai kuma akwai bukatar kiyaye tsafta.

Wasu mutane zasu ga kamar lafiya kalau suke a lokacin da suke TARI na tsawon lokaci amma yanada kyau su lura da wadannan abubuwa ko alamomi:

-Idan mutum yana TARI fiye sati biyu zuwa wata ukku

-ramar jiki (ramewa) ba tare da wani dalili ba

-mutum yariqa jin masassara (fever) da dare ko gajiya

-jin zafi da gumi kullum da dare

-fitar da jini ko majina a lokacin da ake wannan tarin da akeyi

💡Duka wadannan alamomi ne da yakamata idan mutum yanada su toa yanada kyau yaje asibiti domin yin gwaji wanda yake kyauta akeyin shi a asibitocin gwamnati.

💡 Shima maganin kuma kyauta ne a asibitocin gwamnati

Mutanen da s**afi kamuwa da wannan cutar kuma sun hada da;

—Masu zama a wajen da yake ya cunkushe kuma babu isashen iska mai shiga da fice

—Masu ciwon Sugar, Masu shan taba Sigari, HIV da sauransu

—Wanda suke da qaramcin cin abinci mai gina jiki

—Ma’aikatan lafiya da kuma Tsofaffi

Menene abubuwanda yakamata muyi domin rage yaduwar wannan cutar acikin al’umma.

💡Wayar da kai kamar wannan da nakeyi a yanzu. Kowa zai iya yin wannan gwargwadon abinda yasani.

💡Gwajin TB wanda akeyi kyauta idan dae mutum yana yawan tari fiye da sati biyu ko wata. Kar ajira har sai abin ya tsananta❗️

💡Rufe baki lokacin da mutum yake TARI. Dan Allaah adaina sakin baki ana cutar da al’umma.

💡Gujewa cunkusashshen majalisi ko daki wanda babu iska dake shige da fice.

💡Cin abinci mai gina jiki dan qarfafawa garkuwan jiki

💡Bin umarnin likita wajen shan magani idan aka tabbatar da cutar.

Cutar Tari (TB) ana warketa gaba daya, kuma maganinta kyauta ne a asibitocin gwamnati.
Gano ta da wuri yana ceto rai da kuma rayukan al’umma.

Allaah Yatsaremu da wannan cutar, wanda suke da ita, Allaah Yabasu lafiya.

09/11/2025

Iskan sanya ya fara kad'awa ko ince zai fara kad'awa nan gaba kadan, idan kana da yaro mai matsalan amosanin jini (sickle cell disease) ayi masa tanadin kayan sanya hakan zai taimaka sosai wurin rage faruwan wasu matsalolin a lokacin hunturu (sanyi).

Pharmactivity

24/12/2025

21/12/2025

14/12/2025

13/12/2025

11/12/2025

07/12/2025

20/11/2025

17/11/2025

15/11/2025

13/11/2025

13/11/2025

09/11/2025

Address

Website

Alerts

Shortcuts

Share

Category