24/09/2023
शरीरात पित्त कसे तयार होते आणि ते बाहेर कसे पाडावे?
पित्त किंवा बाईल हे तत्त्व आपल्या यकृतात तयार होते. दिवसभरात साधारणतः 700 ते 800 ml पित्त यकृत तयार करते.
पित्त तयार होण्याची प्रक्रिया ही यकृतात सतत होत असते. हे पित्त यकृतातून पित्ताशयात येते. पित्ताशयात हे पित्त साठवले व concentrate होते. ज्या वेळेला आपण जेवतो विशेषतः आपल्या जेवणात स्निग्ध पदार्थ येतात त्या वेळेला पित्ताशय आकुंचन पावते व हे पित्त आपल्या छोटया आतडीत येते.
पित्ताचे मुख्य काम लिपीड्स किंवा चरबीचे पचन करण्याचा असतो. पित्त मुख्यतः पाणी, बाईल सॉल्ट व कोलेस्टेरॉल ह्याने बनलेले असते.
काही लोकांना वेळीअवेळी खाल्ल्याने वा तेलकट तुपकट खाल्ल्याने त्रास होतो. अश्यावेळेला पोटात दुखणे, जळजळ होणे, उलटीची भावना होणे, ढेकर येत राहणे या सारख्या तक्रारी उद्भवू शकतात. अश्या वेळेला उलटी द्वारा पित्त काढणे हा एक पर्याय राहू शकतो. उलटी काढतांना ही काळजी घेणे गरजेचे राहते की घश्याल व अन्ननलिकेला इजा होणार नाही. असे झाल्यास रक्तस्त्राव होऊ शकतो.
सोपी पद्धत अशी आहे की 2 ते 4 ग्लास पाणी प्यायल्यानंतर आपल्या बोटाने आपल्या पडजीभेला हलक्याने स्पर्श करणे, त्याने उलटी होण्याची प्रक्रिया होते.
