24/01/2026
समस्या लपवून ठेवण्यापेक्षा बोलायला शिका - डॉ. चंद्रशेखर हळींगळे
शिरोळ कोल्हापूर ता- २४ : ब्रिलियंट इंग्लिश मिडियम स्कूल, शिरोळ येथे विद्यार्थ्यांच्या सर्वांगीण विकासासाठी मानसिक आरोग्य, व्यसनमुक्ती व ताणतणाव व्यवस्थापन या विषयांवर विशेष मार्गदर्शनपर व्याख्यानाचे आयोजन करण्यात आले. या कार्यक्रमात मानसोपचार तज्ञ व व्यसनमुक्ती तज्ञ डॉ. चंद्रशेखर हळींगळे यांनी विद्यार्थ्यांशी संवाद साधला.
आजच्या स्पर्धात्मक युगात विद्यार्थ्यांवर अभ्यास, परीक्षा, करिअर, पालकांच्या अपेक्षा आणि सामाजिक दबाव यामुळे मोठ्या प्रमाणावर मानसिक ताण येत असल्याचे डॉ. हळींगळे यांनी नमूद केले. मानसिक आरोग्य म्हणजे केवळ मानसिक आजार नव्हे, तर भावनिक स्थैर्य, सकारात्मक विचारसरणी आणि जीवनातील समतोल राखणे महत्वाचे आहे असे त्यांनी स्पष्ट केले.
विद्यार्थ्यांमध्ये आढळणारी चिडचिड, भीती, एकाग्रतेचा अभाव, झोप न येणे, आत्मविश्वास कमी होणे ही मानसिक ताणतणावाची सुरुवातीची लक्षणे असून, वेळेवर योग्य मार्गदर्शन व संवाद आवश्यक असल्याचे त्यांनी सांगितले. समस्या लपवून ठेवण्यापेक्षा पालक, शिक्षक किंवा तज्ञांशी बोलणे हेच खरे धैर्य असल्याचे त्यांनी अधोरेखित केले.
व्याख्यानात त्यांनी मोबाईल, सोशल मीडिया, तंबाखू, दारू व इतर नशेच्या पदार्थांच्या वाढत्या सवयींबाबत विद्यार्थ्यांना सतर्क केले. नशा ही सवय नसून एक आजार आहे आणि त्यावर उपचार शक्य आहेत, हा महत्त्वाचा संदेश त्यांनी दिला. चुकीच्या संगतीपासून दूर राहणे, सकारात्मक मित्रपरिवार निवडणे व वेळेचे योग्य नियोजन करणे आवश्यक असल्याचे त्यांनी सांगितले.
ताणतणाव व्यवस्थापनासाठी नियमित व्यायाम, योग, ध्यान, पुरेशी झोप, संतुलित आहार, छंद जोपासणे व अभ्यासासाठी नियोजनबद्ध वेळापत्रक याबाबत त्यांनी उपयुक्त टिप्स दिल्या. सकारात्मक विचारसरणी आणि आत्मविश्वास यामुळेच यश मिळते, असे त्यांनी नमूद केले.
या कार्यक्रमाला शाळेचे शिक्षकवर्ग, विद्यार्थी व कर्मचारी मोठ्या संख्येने उपस्थित होते. विद्यार्थ्यांनी विचारलेल्या प्रश्नांना डॉ. हळींगळे यांनी समर्पक उत्तरे देत त्यांना मानसिकदृष्ट्या सक्षम होण्याचा संदेश दिला. या उपक्रमामुळे विद्यार्थ्यांमध्ये मानसिक आरोग्याविषयी जागरूकता निर्माण होऊन निरोगी व व्यसनमुक्त जीवनशैलीकडे वाटचाल करण्याची प्रेरणा मिळाल्याचे शाळा प्रशासनाने सांगितले.
#मानसिक_आरोग्य
#ताणतणाव_व्यवस्थापन #व्यसनमुक्ती
