https://www.facebook.com/201041923093672/

Dr.Farhad Fuad Sherwany, As Sulaymaniyah (2025)

03/12/2024

دەرهێنانی پاتریک لە بۆڕی خواردنی منداڵێکی ۱ ساڵ کە ماوەی ٦ سەعات لە بۆڕی خواردنی مابۆوە تاکو هێنابوویان بۆ نەخۆشخانە ، بە هۆی ئەوەی کە ئەم ماوە زۆرە مابۆوە بۆڕی خواردنی زیانی بەرکەوتبوو مەترسی دڕانی هەبوو ، خۆشبەختانە پاتریەکەمان دەرکرد و منداڵەکە بۆ ڕۆژی دوای نێردرایەوە ماڵەوە .
تکایە ئاگاداری منداڵەکانتان بن تاکو دوور بن لە حاڵەتی نەخوازراو . بە هیوای تەندروست باشی بۆ هەموو لایەک .

30/08/2024

دەوالی قاچەکان چیە‌؟
دەوالی بە شیوەیەکی گشتی بریتیە لە فراوانبوونی خوێنهێنەرەکان ، کە خوێن دەگەڕێننەوە بۆ دڵ لە زۆر شوێنی جەستەدا ڕوودەدات وەک (پەلەکان، توورەکەی گون، سک ، سنگ، کۆم کە پێشی دەوترێت مایەسیری بەڵام لەم حاڵەتەدا هەوکردنیشی لەگەڵە).
بەڵام دەوالی پەلەکان بریتیە لە فراوانبوون و لوولخواردنی خوێنهێنەرەکان کە ڕووکەشن یان ژێر پێستن و کۆبوونەوەی خوێن کە وەک کیس دەردەکەون لە قۆناغە پێشکەوتووەکاندا. و بە باشی نەگەڕانەوەی خوێن بۆ خوێنهێنەرە قوڵەکان بە ئاڕاستەی دڵ.................
دەتوانین بیکەین بە دوو بەشەوە :
جۆرێکیان کە سەرەتاییە و نەخۆشەکە هیچ کێشەیەکی تری نیە تەنها خوێنهێنەرەکانی قاچی فراوان بوون .
جۆرێکیان دووەمیە کە بە هۆکاری جیاواز لە بەشی سەرەوەی پەلەکان بەربەست درووست دەبێت بۆ خوێنهێنەرەکانی کە خوێن دەگەڕێننەوە لەو هۆکارانە وەک ‌‌‌(پەستانی دەرەکی بە هۆی خوێنبەرەکانەوە کە ئەمەش ناڕێکیەکی توێکاریە لە هەندێک نەخۆشدا هەیە ، یاخود بوونی گرێ لە ڕێڕەوی خوێنهێنەرەکان لە ژێر ڕان یان سک، یان گەورە بوونی لیمفە گرێکانی ژێر ڕان، یان دووگیانی ).................
بە پێی سروشتی نەخۆشیەکە چەند بۆچوونێک هەیە کە هۆکاری دروستبوونیەتی .
ئافرەتان زیاتر تووشی دەبن،
یەکێک لە بۆچوونەکان ئەوەیە کە زۆر بە پێوەوەستان و نەجوڵان بۆ ماوەیەکی زۆر ، یاخود کێشەیەک لە پێکهاتەی دیواری خوێنهێنەرەکە هەیە بە هۆکاری بۆماوەیی ، یاخود شلبوونی زمانەکانی ناو خوێنهێنەرەکان بە ئاڕاستەی پێچەوانە. ................
نیشانەکان:
فراوان بوون و لوولخواردنی خوێنهێنەرەکان .
ئازاری قاچ .
ئاوسانی قاچەکە.
خوێنبەربوون لەو شوێنانەی کە وەک کیس خوێن کۆدەبێتەوە.
خوران و گۆڕانی ڕەنگی پێست .
لە قۆناغە پێشکەوتووەکاندا جار هەیە برین درووست دەبێت.................
قۆناغەکانی:
تەنها خوێنهێنەرە زۆر ووردەکانی ژێر پێست شین دەبنەوە و شێوازێکی ناشرینی هەیە .
گەر خوێنهێنەرە ڕووکەشەکان بگرێتەوە وەک کرمیکی لوولپێچ دەردەکەوێت لە ژێر پێستەکە .
جار هەیە ئاوسانی لەگەڵە .
جار هەیە گۆڕێنی ڕەنگی پێستەکەی لەگەڵە .
لە هەندێک حاڵەتدا برینی لەگەڵە جار هەیە برینەکە چاکبۆتەوە جار هەیە برینەکە چاک نەبۆتەوە و چالاکە . ..................
دیاریکردنی نەخۆشیەکە: ‌
سەرەتا بە پێی قسەکانی نەخۆش .
ئینجا پشکنینی سەریری بۆ دەکرێت .
دوای ئەوە دەنێردرێت بۆ سۆنەری ملەوەنی پەلەکان .
وە پێویستە کە حاڵەتی سەرەتایی و دووەمی لە یەک جیا بکرێتەوە چونکە چارەسەرەکانیان جیاوازە ..................
هۆکارەکانی دەوالی پەلەکان
گەر لە خێزانەکەیدا نەخۆش باوانی هەیانبێت.
جۆری ئیشەکەی کە زۆر بە پێوە بوەستێ وەک سەرتاشخانە و شێف یان زۆر دانیشتن و قاچ شۆرکردنەوە ...................
چارەسەر:
چارەسەرەکان بە پێی ئەوەی کە سەرەتایی یا دووەمیە دەگۆڕێت .
گەر سەرەتایی بێت بە پێی قۆناغەکە چارەسەر دەکرێت لە قۆناغی سەرەتاکاندا تەها گۆڕێنی شێوازی ژیان و کارکردن و زۆر بە پێوە نەوەستان و جوڵە، و گۆرەوی دەوالی.
یاخود تەنها بە دەرزی بۆ ئەو حاڵەتانەی کە خوێنهێنەرەکان زۆروردن و لە ژێر پێست و ناشرین دەردەکەون کە پێی دەوترێت sclerotherapy.
یان لە حاڵەتی قۆناغی دووەم وە، و زیاتر چەند ڕێگایەکی چارەسەرمان هەیە، وەک چارەسەر کردن بە لێزەر یان بە شەپۆلی دەنگی یان بە سیکۆتین .
بە کرانەوەش دەتوانرێت بکرێت بە شێوازە کۆنەکە گەر نەخۆش خۆی بیەوێت .
لە هەموو ڕێگاکاندا نەخۆش تاکو ۲ حەفتە قاچی دەپێچرێت بە باندج.
بەڵام لەو حاڵەتانەی کە دووەمین بێت دەبێت سەرەتا چارەسەری هۆکارە دووەمیەکە بکرێت ئینجا دەوالیەکە چارەسەری بۆ بکرێت .
بە هیوای سوود بینین

03/05/2024

پچڕانی شا خوێن بەری قاچی ڕاستی نەخۆشێک بە هۆی فیشەک ، نەشتەرگەری بۆ کرا بە چاندنی پارچەیەک لە خوێن هێنەری هەمان قاچ بۆ ئەو شوێنە کە بە هۆی فیشەکەکەوە شێوابوو.
Superficial Femoral artery injury by bullet with segment loss and repaired with GSV interposition graft .

19/01/2024

پڕژانی تەنی نامۆ بۆ بۆری هەناسەی منداڵی بچوک کە زۆرتر لە تەمەنی ٦ ساڵ کەمتر ڕوودەدات. Foreign body inhalation
ڕۆژانە نەخۆشی لەم جۆرە سەردانی فریاکەوتنەکان دەکەن .بە جۆرێک لە جۆرەکان تەنێک دەپڕژێتە بۆری هەناسەی منداڵەکە ئەم تەنانە زیاتر گوڵەبەڕۆژە و چەرەسە لە کاتی هەناسە داندا دەچێتە بۆڕی هەناسەوە هەندێک جار لاستیکی دوگمەی کۆنترۆڵ ی تیڤی . هەندێک جار سنجاق و هەتا دوای .
********************
هۆکارەکانی:
لەبەر ئەوەی کە منداڵی بچوک ددانەکانی دواوەی نەهاتوون و ناتوانێت بە جوانی شتەکان وورد بکات ، یاخود توانای قووتدانی بە تەواوی گەشەی نەکردووە، جار هەیە لەگەڵ هەناسە هەڵکێشانەوەدا پارچەکە دەچێتە بۆری هەناسەی .
زۆر جار منداڵ لە کاتی یاریکردندا شت دەخوات کە مەترسی پڕژانی تەنی نامۆ لە کاتانەدا زۆرترە .
گەر پێشتر تەنی نامۆ چووبێتە بۆری هەناسەوە ئەگەری تووشبوونی زیاترە.
********************
ڕێگاکانی خۆ پارێزی .
پێویستە لەسەر دایک و باوک کە تەنی نامۆ بە دەستی مناڵەوە نەبێت یان لە عەرزەکە شتی وورد فڕێ نەدرێ کە منداڵەکە نەیخاتە دەمی .
هەوڵدەن زیاتر منداڵەکانیان لە ژێر چاودێری خۆیان بن لە کاتی شت خواردندا و جێیان نەهێڵن .
********************
چەند قۆناغێکی هەیە کە دایک و باوکەکە لە کاتی پرژانی تەنی نامۆ هەستی پێ دەکەن لە منداڵەکەدا :
دەبینن منداڵەکە دەکۆکێ و تەنگە نەفەس دەبێ خەریکە دەخنکێت .
دوای ماوەیەک گەر ئەم قۆناغە تێپەڕێنێت تەنەکە لەوەیە بێتە دەرەوە یاخود زیاتر دەچێتە بەشی خوارەوەی بۆڕی هەناسە.
گەر بچێتە خوارەوە دوای ماوەیەک لەوەیە بێ نیشانە بێت ئەمیش بە پێی قەبارەی تەنە نامۆکە دەگۆڕێت . کە ئایا ڕێژەی بۆری هەناسەی تا چەند گیراوە.
گەر تەنە نامۆکە بمێنێتەوە تا ماوەیەک زیاتر لە ٣ ڕۆژ ئەوە منداڵەکە تووشی ئیلتیهاباتێکی زۆری سیەکان دەبێت بە هەناسە توندی و کۆکە بەرزبوونەوەی پلەی گەرمی جەستە دەست پێ دەکات .
********************
بۆ دیاریکردنی پێویستە منداڵەکە گەر گومانی بوونی تەنی نامۆ هەبوو لە لایەن باوک و دایکی، پێویستە زوو بە زوو بیگەیەنێتە نەخۆشخانە .
منداڵەکە پشکنینی پزیشکی بۆ دەکرێت .
دوای دەنێردرێت بۆ تیشکی سیەکان . کە گەر تەنەکە لە تیشک (اشیعە) دیار بێت شوێنەکەی دیاری دەکرێت کە چ شوێنێکی گرتووە ، بەڵام گەر دیارنەبێت کە زۆربەی کات دیار نیە چەند نیشانەیەکی دەردەکەوێت لە تیشکەکە کە دکتۆر دەتوانێت دیاری بکات کە چ شوێنێکی سیەکان گیراوە و هەوای بۆ ناچێت.
********************
بۆ چارەسەر نەخۆشەکە پێویستی بە ناوبینی ڕەقی سیەکان(Rigid bronchoscopy) دەبێت بۆ دەرهێنانی تەنە نامۆکە لە ژێر بەنجی عام.
وە ڕێنمایەکی بچوک بۆ باوک و دایکان گەر گومانی تەنی نامۆت کرد لە منداڵەکەت و ئەو نیشانانەی هەبوو کە لە سەرەوە نوسراوە تاکو دەگاتە نەخۆشخانە دەتوانی چەند تەکنیکێک هەیە بیکەی کە منداڵەکە نەخنکێ بەو ئومێدەی تەنەکە بێتە دەرەوە یاخود بڕواتە خوارەوە و لە بۆری سەرەکی هەناسەیدا نەمێنێت چونکە گەر لە بۆری سەرەکی هەناسەی دا بێت مەترسی خنکانی منداڵەکە زۆر بەرزە .
پێویستە منداڵەکە سەرەوە ژێر بکرێت واتا سەری بۆ خوارەوە و قاچی بۆ سەرەوە لەسەر دەم دابنرێت لەسەر دەستی چەپ . ئینجا بە لەپە دەستی ڕاست دەکێشێت بە نێوانی هەردوو دەفەی شانی .
وە بە هیچ شێوەیەک پەنجە نەکەن بە قوڕگی منداڵەکەدا چونکە منداڵی بچووک تووشی ئاوسان و بریندار بوونی بەشی پشتەوەی ناو دەمی دەبێت و حالەتەکە زیاتر مەترسیدار دەکات .
بە هیوام دایکان و باوکان ئاگاداری منداڵەکانیان بن . سوودی لێ ببینن.

14/01/2024

دروستکردنی ناسۆر(AV-fistulae )بۆ نەخۆشێک کە سستبوونی درێژخایەنی گورچیلەی هەیە بۆ مەبەستی شوشتنی گورچیلە لە دەستی ڕاستی .

13/01/2024

گیرانی کتووپری خوێنبەری پەلەکان .
Acute limb ischaemia
بریتیە لە گیرانی کتووپری خوێنبەری پەلەکانی قاچ یاخود دەست کە دەبێتە هۆکاری نەچوونی خوێن بۆ پەلەکان و نەگەیشتنی ئۆکسجینی پێویست بە خانە و شانەکان . کە ئەمەش دەبێتە هۆی ئازارێکی زۆر لەو پەلە کە تووشی دەبێت و بە بەراوورد لەگەڵ پەلەکەی تر سارد دەبێت ڕەنگی پێستەکە کاڵ دەبێتەوە و لەگەڵ کات بەرەو شین بوونەوە و ڕەش بوون دەڕوات .
********************
نیشانەکانی :
ئازارێکی زۆر لە پەلەکانی خوارەوە یاخود سەرەوە بە مەرجێک کەمتر بێت لە ١٤ ڕۆژ تووشی نەخۆشەکە بووبێت .
ڕەنگی پەلەکە دەگۆڕێت کاڵ دەبێتەوە و بە پێی کات بەرەو شین بوونەوە و ڕەش بوون دەڕوات .
پلەی گەرمی پەلەکە سارد دەبێت بە بەراورد لەگەڵ پەلەکەی تر .
گەر ماوەکەی لە ٦ سەعات زیاتر بێت لە کاتی گیرانەکەوە ئەو کاتە هەست کردنیش لە دەست دەدات و ناتوانێت جوڵە بە پەلەکە بکات.
********************
هۆکارەکانی کە مەترسی گیرانی خوێن بەری پەلەکان زیاد دەکەن :
جگەرە کێشان.
بوونی نەخۆشی درێژ خایەن وەک زەخت و شەکرە .
بەرزی چەوری سیانی. کە کە ئەمانە خۆیان هۆکارن بۆ دروست بوونی پارچەی چەوری نیشتوو لە نێوان چینەکانی دیواری بۆری خوێنبەرەکان.
بوونی کڵۆی خوێن لە ناو دڵ .
پێشتر نەخۆشەکە تووشی جەڵدەی دڵ یان مێشک بووبێت .
تێکچوونی کارەبایی دڵ.
دووتوێبوونی شاخوێنبەر.
پێشتر نەشتەرگەری بۆریەکانی خوێنی بۆ کرابێت .
گەر خوێنبەری پەلەکانی توشی زەبرێکی دەرەکی بووبێت . بە هەر هۆکارێک وەک رووداوی سەیارە و ماتۆر و چەقۆ و فیشەک ،هتد .
********************
دیاریکردنی نەخۆشیەکە کە ئایا تا چەند خوێنبەری پەلەکانی گیراوە ڕێژەی گیرانەکەی چەندە. پێویستی بە بینینی دکتۆری پسپۆر هەیە لەم بوارەدا و زیاتر بە پشکنینی کلینیکی جەستەیی دیاریدەکرێت .
********************
گیرانی کتووپری خوێنبەری پەلەکان لە زۆربەی حاڵەتەکان بە زووترین کات پێویستی بە نەشتەرگەری هەیە .بۆیە لە هەر حاڵەتێکی هاوشێوەدا پێویستە نەخۆش بە زووترین کات پەیوەندی بکات بە دکتۆرێکی پسپۆری نەشتەرگەری سنگ و دڵ و بۆری خوێن وا باشترە کە پێش ٦ سەعات لە دروستبوونی نیشانەکانەوە پەیوەندی بکات بە دکتۆری پسپۆڕ . چونکە جۆری چارەسەرەکە بە پێی ئەو ماوەی کە نیشانەکان ڕوودەدەن تاکو دیاریکردنی حالەتەکە دەگۆرێت، وە ئەگەری لەدەستدانی پەلەکە تا دەگاتە مەترسی لەسەر ژیانی نەخۆشەکە دروست دەبێت تا دەگاتە ئەوەی نەخۆشەکە گیان لەدەست بدات گەر نەخۆشەکە زۆر دواکەوێت لە بینینی دکتۆری پسپۆر و دیاریکردنی نەخۆشیەکە .

بە هیوای سوود بینین .

13/01/2024

دەرهێنانی موکێشێک لە بۆری هەوای نەخۆشێکی ٦٠ ساڵ بە ناضور (flexible bronchoscopy) . کە کەوتبووە بۆری هەوای سی ڕاستی نەخۆشەکە .

Dr.Farhad Fuad Sherwany

03/12/2024

30/08/2024

03/05/2024

19/01/2024

14/01/2024

13/01/2024

13/01/2024

Address

Website

Alerts

Contact The Practice

Shortcuts

Share

Category