بەڕێوەبەرایەتی خۆپاراستنی تەندروستی سلێمانی

19/08/2025

08/08/2025

لە درێژەی کاروچالاکیەکانی بەڕێوەبەرایەتی خۆپاراستنی تەندروستی سلێمانی

لە هەفتەی جیهانی شیرپێدانی سروشتی دا هۆبەی پتەوکردنی تەندروستی لە بەڕێوەبەرایەتی خوپاراستنی تەندروستی دوو سیمیناری ئەنجامدا لە ڕۆژانی چوارشەممە و پێنجشەممە دا، کە لە لایەن بەڕێوەبەری خوپاراستنی تەندروستی (دکتۆر ڕزگار) و لێپرسراوی هوبەی پتەوکردنی تەندروستی (رفیق نصرالدین) پسپۆری خۆپاراستنی تەندروستی وترایەوە.

سیمینارەکە‌ بۆ کارمەندانی نەخۆشخانە کانی منداڵ بوون و منداڵان و کارمەندانی مەلبەندە تەندروستیەکان، کادرانی یەکێتیی ژنان و کارمەندانی منداڵ پارێزانی کوردستان پێشکەشکرا.

ڕاگەیاندنی خۆپاراستنی تەندروستی سلێمانی

04/08/2025

شیری دایک یەکەمین و نایابترین خۆراکە بۆ کۆربەکەت

بەسەرپەرشتی بەڕێوەبەرایەتی گشتی تەندروستی سلێمانی و هۆبەی پتەوکردنی تەندروستی لە بەڕێوەبەرایەتی خۆپاراستنی تەندروستی سلێمانی بە پاڵپشتی ڕێکخراوی یونسێف هەفتەی شیرپێدانی تەندروستیان ڕاگەیاند..

ئەمڕۆ دووشەمە ۲۰۲٥/٨/٤ لە نەخۆشخانەی مناڵبونی فێرکاری سلێمانی سیمینارێک لە ژێر دروشمی (پێشەنگی بەشیردانی سروشتی بدەین، بە دانانی پاڵپشتی بەردەوام) بۆ کارمەندانی مەڵبەندە تەندروستیەکان ڕێکخرا، بە مەبەستی هاندانی دایکان بدرێت بە شیرپێدانی سروشتی کۆرپەکانیان، لە پێناو تەندروستیەکی باش بۆیان..

ڕاگەیاندنی خۆپاراستنی تەندروستی سلێمانی

05/07/2025

٦/٧ ڕۆژی نەخۆشیە مرۆژەڵیەکان

هەموو ئەو نەخۆشیانە کەلە ئاژەڵەوە دەگوازرێتەوە بۆ مرۆڤ ڕاستەوخۆ یان ناڕاستەوخۆ، یان بە پێچەوانەوە لە مرۆڤەوە بۆ ئاژەڵ دەگرێتەوە.

ڕێکخراوی تەندروستی جیهانی who و ڕێکخراوی تەندروستی ئاژەڵان OIE زیاتر لە ٢٠٠ جۆر نەخۆشی مرۆژەڵی دەسنیشانکراون لەوانە
نەخۆشییە هاوبەشەکانی نێوان مرۆڤ و ئاژەڵ کە هۆکارەکەی ڤایرۆسە(virus ). وەک نەخۆشی تا ی خوێنبەربوون کە لەڕێگەی گەنەوە دەگوازرێتەوە، ئاوڵەی مەیموون کە لەڕێگەی ماچکردن و سێکس و کەوڵکردن و دەستلێدان دەگوازرێتەوە...
یان نەخۆشییە هاوبەشەکانی نێوان مرۆڤ و ئاژەڵ کە هۆکارەکەی بەکتریایە(bacteria ). وەک نەخۆشی تای ماڵتا (حمی ماڵتا کە لەڕێگەی شیرەوە دەگوازرێتەوە، نەخۆشی سپڵ anthrax، نەخۆشی سیل،
وە هەروەها زۆر نخۆشی تر وەک نەخۆشی دەردە پشیلە(Toxoplasmosis)،
نەخۆشی لشمانیا بەهۆی مێشوولەی لمەوە، نەخۆشی تورەکەی ئاوی(Hydatid cyst)، نەخۆشی کرمی جگەر کە هۆکارەکەی(F.hypatica)، نەخۆشی دەردە تووتی (Psittacosis) بەهۆی کلامیدیا(Chlamydia )، نەخۆشی گەڕی (Manage)
کە لەڕێگەی کێچ و ئەسپێ و جومگەدارەکانی ترەوە دەگوازرێتەوە بۆ مرۆڤ.

(ڕێگاکانی خۆپاراستن لە نەخۆشییە مرۆژەڵیەکان)

١- بڵاوکردنەوەی ڕێنمایی و ڕۆشنبیری تەندروستی سەبارەت بە نەخۆشیە مرۆژەڵیەکان.
٢- دورکەوتنەوە لە ئاژەڵی بێلانە و کێوی وە گرنگیدان بە دەست شۆردن لەکاتی دەستلێدان و بەرکەوتن بە ئاژەڵ.
٤- ڤاکسین کردنی ئاژەڵان و بایەخدان بە ڕێنماییەکانی پزیشکی ڤێتیرنەریەکان.
٥- ڤەڵاچۆکردنی گوێزەرەوەی نەخۆشییە هاوبەشەکان. وەک مێشولە ، گەنە و ئەسپێ.
٦- پێکهێنانی لیژنەی تایبەت لە نێوان تەندروستی و ڤێتیرنەری بۆ بەدواداچوونی نەخۆشییە مرۆژەڵیەکان.
٧- پشکنینی هەموو بەروبومێکی ئاژەڵ کەدەکەوێتە بازاڕە وە، وە گرنگیدان بەسەربرینخانەکانی ئاژەڵ و پەلەوەر وە جێبەجێکردنی ڕێنمایی پزیشکی ڤێتیرنەریەکان.

د. شۆڕش غريب رشيد

ڕاگەیاندنی خۆپاراستنی تەندروستی سلێمانی

10/06/2025

هەڵمەتی ساڵانەی ڕشاندنی دەرمانی مێروو ..

بەمەبەستی کۆنتڕۆڵکردنی گوێزەرەوەی نەخۆشی بۆ ساڵی ۲۰۲٥ .

دەستکرا بە هەڵمەتی ڕشاندنی دەرمانی (دژەمێرو) بۆ قەڵاچۆکردنی مێروە زیان بەخشەکان، وەک مێشولەی گوێزەرەوەی نەخۆشی مەلاریا و لیشمانیا و مێشی ناوماڵ...
ئەم هەڵمەتە ساڵانە لە بەهارو پایزدا ئەنجامدەدرێت، جێی ئاماژەیە لە ڕۆژانی جەژنی قورباندا هەڵمەتەکە بەردەوام بووە.

ڕاگەیاندنی خۆپاراستنی تەندروستی سلێمانی

02/06/2025

هەڵمەتی هۆشیارکردنەوەی هاوڵاتیان

تیمەکانی هۆبەی پتەوکردنی تەندروستی لە بەڕێوەبەرایەتی خۆپاراستنی تەندروستی، بەردەوامن لە ڕێنمایکردنی هاوڵاتیان لە مەترسیەکانی نەخۆشی ( تای خوێن بەربوون ) لەڕێی هەڵواسینی پۆستەرو دابەشکردنی پڕوشەر.
تیمەکان لە پێش جەژنی قوربانەوە بەردەوام دەبن لە گەڕان بۆ ڕێنمایکردنی هاوڵاتیان لە شوێنە گشتیەکان و قەسابخانەکان.
جێی ئاماژەیە تۆڕی (هیومان بۆ تەندروستی کاری مرۆی ) بەچاپ گەیاندنی بڵاوکراوەکانی لە ئەستۆ گرتووە.

ڕاگەیاندنی خۆپاراسنتی تەندروستی سلێمانی

26/05/2025

سیمینارێک بۆ بەرنامەی گەشەکردنی سەرەتای منداڵیی(ECD)

لەپێناو خزمەت بە منداڵانی خوار تەمەن پێنج ساڵان لەمەڵبەندە تەندروستیەکاندا، ئەمڕۆ دووشەمە بەرواری ٢٠٢٥/٥/٢٦ هۆبەی خۆراک و گەشەی منداڵ لە بەڕێوەبەرایەتی خۆپاراستنی تەندروستی سلێمان هەستان بە ئەنجامدانی سیمینارێک بۆ ۱۰ لە مەڵبەندە تەندروستیەکانی سلێمان و هەڵەبجەو گەرمیان و ڕاپەڕین، لە سەر دەسپێکی بەرنامەیەکی نوێ بەناوی (ECD)، (گەشەکردنی سەرەتای منداڵیی) ئەم بەرنامەیە هاوشانی بەرنامەی چاودێری گەشەی جەستەی و لێهاتوی و جوڵە و پەیوەندی کردنی منداڵ دەکات بۆ ئەو منداڵانەی تەمەنیان خوار پێنج ساڵانە و سەردانی مەڵبەندە تەندروستیەکان دەکەن.

ڕاگەیاندنی خۆپاراستنی تەندروستی سلێمانی

21/05/2025

بەڕێوەبەرایەتی خۆپاراستنی تەندروستی سلێمانی پێزانین و ڕێزلێنانی پێشکەش بەو کارمەندانە کرد کەئەمساڵ لەخزمەتکردن خانەنشین بوون.

ئەمڕۆ بەرواری (٢٠٢٥/٥/٢١) لەمەراسیمێکی شایستەدا بەئامەدەبوونی بەڕێوەبەرو بەرپرسانی هۆبەکانی خۆپاراستنی تەندروستی، ڕێزگیرا لەتەمەنێک هەوڵ و ماندبوون و خزمەتی ٣٤ کارمەندی تەندروستی کەئەمساڵ فەرمانی خانەنشین بوونیان بۆ دەرچووە .

لایخۆشیانەوە کارمەندانی خانەنشین خۆشحاڵی خۆیان دەربڕی لەپای ئەو پێزانین و ڕێزلێنانەی پێشکەشیان کراوە، هەروەها سوپاسی بەڕێوەبەرو بەرپرسی بەشەکانیان کرد و هیوای سەرکەوتنیان لەکارەکانیان بۆ خواستن.

ڕاگەیاندنی خۆپاراستنی تەندروستی سلێمانی

19/05/2025

چاودێری تەندروستی سلێمانی بەردەوامە لەهەوڵەکانی بۆ هۆشیارکردنەوەی هاوڵاتیان، بەمەبەستی خۆپاراستن لەهۆکارەکانی توشبوون بەنەخۆشی ناسراو بە پەتای (خوێن بەربوون). ‌ هەر لەو چوارچێوەیەدا هۆبەی پتەوکردنی تەندروستی بەمەبەستی پاراستنی تەندروستی گشتی، لەڕێگەی لیژنەکانی مەڵبەندە تەندروستییەکانەوە سەردانی چەندین ناوەندی خوێندن و باخچەی ساوایان کردو ڕێنمایی پێویستییان دەربارەی هۆکارەکانی بڵاوبوونەوەی نەخۆشی تای خوێنبەربوون پێدان . پێشتریش بەڕێوەبەرایەتی چاودێری تەندروستی چەند چالاکییەکی هۆشیاری لەوبارەیەوە ئەنجامداوە و بەردەوامن لە گەڕانی چڕوپر بەسەر گۆشتفرۆشەکان و قەسابخانەکان، بە پابەندبونیان بە ڕێنماییە تەندروستیەکان و هۆشداریشیان پێداون لەفرۆشتنی هەر گۆشتێک کە لەڕوی تەندروستیەوە گونجاو پەسەند کراو نیە.

ڕاگەیاندنی خۆپاراستنی تەندروستی سلێمانی

18/05/2025

ئەمڕۆ ٢٠٢٥/٥/١٨ لەڕۆژی جیهانی (فشاری خوێندا)

هۆبەی نەخۆشیە نەگوازراوەکان بە هاوکاری مەڵبەندی تەندروستی سەروەری، سیمینارێک پێشکەش بە کارمەندانی تەندروستی مەڵبەندەکە کرا، سەبارەت بە هۆکارەکانی توشبون بە نەخۆشیەکە و چۆنیەتی خۆپاراستن و پێدانی ڕێنمای تایبەت لە سەر چۆنیەتی پشکنینی فشاری خوێن.

ڕاگەیاندنی خۆپاراستنی تەندروستی سلێمانی

05/05/2025

كۆبوونەوەو هەڵمەتی پشكنین
ئەمڕۆ دووشەمە ڕێکەوتی ۲۰۲٥/٥/٥ لە چوارچێوەی کارو چالاکییەکانی بەڕێوەبەرایەتی خۆپاراستنی تەندروستی سلێمانی
لەپێناو پاراستنی تەندروستی هاوڵاتیان لە نەخۆشی ( تای خوێنبەربوون )
بەڕێوەبەری چاودێری تەندروستی لە لەگەڵ سەرجەم تیمەكانی چاودێری تەندروستیدا كۆبویەوە.
لەکۆبونەوەکەدا باسی ڕێوشوێنی گونجاوو تەندروستیان كرد بۆ ڕێگری لە بڵاو بوونەوەی ئەم نەخۆشییە، وە تیمەكان ئاڕاستەكران بۆ پشكنینی سەرجەم گۆشتفرۆشەكانی ناو شارو دەرەوەی شار بۆ پێدانی ڕێنمایی تەندروستی و دەستبەسەراگرتنی ئەو گۆشتانەی كە مۆری پزیشكی فێرتەرنەریان پێوە نیەو یاسایی نین.

ڕاگەیاندنی خۆپاراستنی تەندروستی سلێمانی

30/04/2025

🔴تــای خـــوێن بەربوون چیەو هوکارو نیشانەو ڕێگاکانی خۆپارێزی چین...؟

‎ ✅دکتۆر هێمن محمود محمد
‎ــ پسپۆڕی نەشتەرگەری گشتی و نەشتەرگەری بەهەناوبین

ــــ نەخۆشییەکی ڤایرۆسییە کەلەنێوان ئاژەڵی توشبو بۆ مــرۆڤ،وە لەنێوان مــرۆڤێکی توشبو بۆ کەسێکی ساغ ئەگوازرێتەوە.

ــــ ئەم نەخۆشییە زیاتر لە وڵاتە هەژارنشینەکانی وەک باشوری ئەمریکا و ئەفریقا و ڕۆژهەڵاتی ئاسیا بڵاوە بەڵام ئەم ماوەیە لە عێراق و کوردستانیش چەن حاڵەتێک دەستنیشان کراون.

🔻نیشانەکانی بەشێوەیەکی گشتی وەک نیشانەی پەتا وایە کە بەپێی بەرگری لەشی کەسەکە ئەگۆڕێت لەوەیە نیشانەکان سوک بن یان مام ناوەند یان بە قورسی دەرکەون لەسەر لەشی کەسەکە،
🔻نیشانەکانیش وەک:
تا ،قوڕگ ئێشە ،بێهێزی، سەرگێژخواردن،ئازاری ماسولکەکانی لەش و بێتاقەتی،ئازاری سک و ڕشانەوە،کەمی ئیشتیهای خواردن،لەوەیە کەسی توشبو توشی خوێن بەربون(نزیف)ببێت لەژێر پێستی یان لە ئەندامەکانی ناولەشی یان لە ناوپۆشی دەم و ددانی یان ناوچاو و پێڵووی چاوی.

ــــ خۆپاراستن لەم نەخۆشییە باشترین چارەسەرە بۆی بەتــایبەت لــەم کــاتەیا کە نزیکـی بەرەجــەژنانە هاونیشتیمانیانی بەڕێز خەریکی قوربانیکردن و سەربڕینی ئاژەڵ و وڵاخ ئەبن.

🔻باشترین خۆپاراستنیش ئەمانەن:

۱- سەربڕینی ئاژەڵ پێویستە لەناو ئەو سەربڕینخانانەدا بێت کەڕێگە پێدراون و پزیشکی ڤێتێرنەری سەرپەرشتی ئەکات.

۲- لەکاتی سەربڕینی ئاژەڵدا وە کەوڵکردن وە یان پارچە پارچەکردنی گۆشتەکەیدا پۆشینی جل وبەرگی خۆپارێزی وك ( دەستکێش ،جزمە ،سەدریەی پلاستیك و ماسکی دەمووچاو ) پێویستە لەبەربکرێن.

۳- نابێت قەرەباڵخی و کۆبونەوەی خەڵک بکرێت لەچواردەوری قەسابەکە وە نابێت بەناوی هاوکارییەوە نزیک بنەوە لەکاتی سەربڕینی ئاژەڵەکە و پارچە پارچە کردنی گۆشتەکەی.

٤- بەبێ دەستکێش مامەڵە کردن لەگەڵ جەستەی ئاژەڵی سەربڕاو مەکە وە دوای پۆشینی دەستکێش و کەلوپەلی خۆپارێزی گۆشتەکە پارچەپارچە بکە و پاشان دەستت بەشێوەیەکی تەندروست بشۆ .

٥- لابردنی پاشماوەی ئاژەڵە سەربڕاوەکان ودانانی کیسی داخراو وە فڕێدانی بۆشوێنی تایبەت .

٦- بەکارهێنانی چەقۆ و تەختەی پارچەپارچەکردنی تایبەت بەگۆشت وە شتن و پاکژکردنەوەی تەختە و چەقۆکان دوای بەکارهێنان.

۷-پاککردنەوەی ئەو شوێنەی ئاژەڵەکەی لێ سەردەبڕێت و بەتایبەت ئەوشوێنانەی خوێنی لێیە بەماددەی کلۆریین (موعجیزە)ی ڕونکراوە..

۸ - باشتر وايە گۆشت دواى سەربڕينى ئاژەڵ بۆ ماوەى نيو كاتژمێر لە پلەى (٤ - ٨ )پلەى سەدى هەڵبگيرێت پاشان بەكاربهێنريێت ،بەڵام گۆشتی کوڵاو هیچ کێشەی نیەو سەلامەتە ونابێتە هۆی توشبوون بەنەخۆشی تای خوێن بەربوون گەر بەجوانی بکوڵێنرێت.

۹- ئەگەر ئاژەڵ گەنە يان مێرووى ترى هەبوو باشتر وايە نەيكڕيت يان سەری نەبڕیت بۆ دوربوون لەم پەتایە، وەک وتمان ئەم نەخۆشیە لەنێوان ئاژەڵەکان دەگوازرێتەوە، وە بۆ مرۆڤیش بەهۆی گەنە و مێروەکان کەلەسەر ئاژەڵەکان دەژین،وەبەهۆی خوێن و گۆشتی ئاژەڵەکەوە ئەگوازرێتەوە .

🔻لەکاتی دەرکەوتنی هەریەک لەو نیشانانە بە زووی سەردانی نەخۆشخانە و پزیشک بکە بۆ زوو وەرگرتنی چارەسەر.

ــــــ بەهیوای سەلامەتی و تەندروستی باش بۆ هەمولایەک🌹
ڕاگەیاندنی خۆپاراستنی تەندروستی سلێمانی