14/10/2025
بۆچی بەرگریی ئەنسۆلین گرینگە؟
مەبەست لە بەرگری ئەنسۆلین ئەوەیە کە ئەنسۆلین (ئەو هۆڕمۆنەی ڕێژەی شەکرە ڕێک دەخات) لە لەشی مرۆڤ هەیە، بەڵام کار ناکات، وەرگرەکان بەرگرییان هەیە بەرامبەر بە کاری ئەنسۆلین، واتە شەکری ناو خوێن بە بەرزی دەمێنێتەوە هەرچەندە ئەنسۆلین هەیە.
گرنگییەکەی لە چیدایە ؟
بەرگری ئەنسۆلین قۆناخێکە لە قۆناخەکانی توش بونی شەکرە، چونکە بەردەوام بەرزبوونەوەی شەکری ناو خوێن دەبێتە هۆی ئەوەی خانەکانی پەنکریاس بە شەکر ژاراوی ببن، ژاراوی بوونی خانەکانی پەنکریاس بە دوو شت ڕوو دەدات، بە چەوری زۆر، وە بە شەکری زۆر، ئەو ژاراوی بونەیە وادەکات خانە ئەنسۆلین ڕێژەکانی پەنکریاس کە پێیان دەگوترێت خانەکانی بێتا بپوکێنەوەو ئەنسۆلین بڕ ببن، ئیتر ئەنسۆلین کەم دەبێتەوە و شەکرەیەکی ترسناک ڕو دەدات،
وە هەبونی بەرگری ئەنسۆلین ئاگادارکەرەوەیە بۆ هاتنی نەخۆشی شەکرە.
بەرگریی ئەنسۆلین لە کوێوە دێت ؟
بەرگریی ئەنسۆلین لە چەورییەوە دێت، لە بەزی ناو سک و ئەندامەکانی ناو لەشەوە پەیدا دەبێت، هەروەها لە قەڵەوییەوە دێت و سەر هەڵدەدات، بەرگریی ئەنسۆلین لە کۆنیشانی زیندەپاڵ (metabolic syndrome) ەوە دێت، کە بریتییە لە زەخت و بەرزە چەوری و تێکچونی ڕێژەی شەکری ناو خوێن کە لەگەڵ قەڵەوی سک ئەو حاڵەتە دروست دەکەن.
چارەسەری بەرگریی ئەنسۆلین چییە ؟
نەشتەرگەریی بچووک کردنەوەی گەدە چەند جۆرێکی هەیە، بۆ ئەوانەی کە زۆر قەڵەون، دەرزی وی گۆڤی، مۆنجاڕۆ، ئۆزێمپیک، بۆ ئەوانەیە کە قەڵەون، ئەوانەیش کە کێشی لەشیان زیادە دەتوانن سود لە حەبەکانی ئۆڕلیستات و مێتفۆرمین وەربگرن، هەروەها دەرمانی تریش هەن بۆ ئەم مەبەستە،
چی تریش؟!
لە هەمو ئەو قۆناخانەی چارەسەرکردن کە باسکران پێویستە لەگەڵیا ستایلی ژیان گۆڕانکاری تێدا بکرێت، بەو ئاڕاستەیەی کە کێشی لەش کەم بکرێتەوە، بەڕاستی داهاتوو چەڵنجێکی زۆر گەورەی لەگەڵ خۆی هەڵگرتوە کە مرۆڤایەتی بە دەستیەوە بناڵێت ،ئەویش کێشەی کێش زێدەبوون و قەڵەوییە، هەستی پێبکەین، کاری بۆ بکەین و پێشگیری لێ بکەین باشە.
تەندروست بمێنن.
دکتۆر یوسف بەهائەدین خەتی
پسپۆڕی ڕاوێژکاری شەکرە و هۆڕمۆنەکان
#تەندروستی #قەڵەوی #خواردن #ئەنسۆلین #هەولێر #کوردستان
