Reykjalundur endurhæfing ehf

14/02/2026

Þingsályktunartillaga um málefni offitu

Drög að þingsályktun um aðgerðaáætlun í málefnum offitu hafa verið birt í samráðsgátt stjórnvalda og verða lögð fyrir Alþingi á vorþingi að loknu samráði. Í tillögunni er lagt til að offita verði skilgreind og meðhöndluð sem langvinnur sjúkdómur, líkt og aðrir langvinnir sjúkdómar innan heilbrigðiskerfisins, með það að markmiði að tryggja heildræna, faglega og samfellda þjónustu sem byggir á gagnreyndri þekkingu.

Í janúar 2025 tók Svava Björk Jónasdóttir, hjúkrunarfræðingur á Reykjalundi, að sér að verkefnastýra drögum að þyngsályktunartillögu í um málefni offitu sem nú eru í samráðsgátt í heilbrigðisráðuneytinu. Hlutverk hennar var að taka saman niðurstöður skýrslu starfshóps um offitu, holdafar, heilsu og líðan sem skilað var til heilbrigðisráðherra í febrúar 2024, skipuleggja þverfaglega vinnustofu með þátttöku fagfólks og annarra haghafa og vinna drög að þingsályktun um aðgerðaáætlun í málaflokknum. Við þá vinnu var einnig stuðst við leiðbeiningar Alþjóðaheilbrigðismálastofnunarinnar (WHO) um meðferð offitu sem og klínískar leiðbeiningar. Þátttaka hennar endurspeglar mikilvægi þekkingar og reynslu starfsfólks Reykjalundar á sviði endurhæfingar og meðferðar langvinnra sjúkdóma.

Aðgerðaáætlunin er hugsuð til fimm ára og miðar að markvissum forvörnum, snemmtækri íhlutun og bættri meðferð við offitu.

Drögin eru nú til umsagnar og má kynna sér þau nánar hér:
https://www.stjornarradid.is/efst-a-baugi/frettir/stok-frett/2026/02/11/Til-umsagnar-Drog-ad-thingsalyktunartillogu-um-malefni-offitu/

Hér má einnig lesa frétt á mbl

Heilbrigðisráðuneytið birtir til umsagnar drög að þingsályktun heilbrigðisráðherra um aðgerðaáætlun um málefni offitu. Áætlunin er unnin upp úr tillögum starfshóps um offitu, holdafar, heilsu og líðan sem skilaði skýrslu til heilbrigðisráðherra í febrúar 2024, en byggir...

13/02/2026

Til hamingju Guðrún Þuríður - Mosfellingur.

Guðrún Þuríður Höskuldsdóttir, yfirlæknir efnaskipta- og offitusviðs Reykjalundar, segir einstaklinga með offitu oft mæta fordómum Offita er algengur sjúkdómur sem er afleiðing flókins samspils erfða-, efnaskipta-, hegðunar- og umhverfisþátta. Nýlega kom út skýrslan Norrænt e...

09/02/2026

Svana Helen Björnsdóttir forstjóri Reykjalundar.

Svana Helen Björnsdóttir hefur verið ráðin forstjóri Reykjalundar. Hún hefur gegnt starfi forstjóra tímabundið frá því í lok nóvember síðasta árs, þegar fyrrum forstjóri sagði starfi sínu lausu. Svana Helen var áður formaður stjórnar Reykjalundar.

Samhliða ráðningu Svönu Helenar hefur Sólveig Hildur Björnsdóttir verið kjörin formaður stjórnar Reykjalundar. Sólveig hefur setið í stjórn SÍBS, eiganda Reykjalundar, frá árinu 2014.

Svana Helen Björnsdóttir hefur verið ráðin forstjóri Reykjalundar. Hún hefur gegnt starfi forstjóra tímabundið frá því í lok nóvember síðasta árs, þegar fyrrum forstjóri sagði starfi sínu lausu. Svana Helen var áður formaður stjórnar Reykjalundar.

06/02/2026

“...og hvað svo?”
Samstarf og samfella í verkjaendurhæfingu á Íslandi
Ráðstefnudagur Reykjalundar 2026

Skráning hér https://reykjalundur.is/product/radstefnudagur-reykjalundar/

05/02/2026

Heilsan okkar.
Föstudaginn 30. janúar fór fram fyrsti fundur ársins í fundaröðinni Heilsan okkar. Heilsan okkar er fundaröð Háskóla Íslands og Landspítala sem hefur það að markmiði að varpa ljósi á áríðandi mál líðandi stundar er varða heilsu og heilbrigðisþjónustu. Þessir mánaðarlegu upplýsingafundir eru öllum opnir og verða á dagskrá síðasta föstudag hversmánaðar.
Markmið fundarins í þetta sinn var að veita yfirsýn yfir stöðu vísindalegrar þekkingar tengt meðferð offitu hjá fullorðnum.

Dagskrá:

Erla Gerður Sveinsdóttir, heimilislæknir og lýðheilsufræðingur – Meðferð offitu í heilsugæslu
Guðrún Þuríður Höskuldsdóttir, yfirlæknir á Reykjalundi – Sérhæfð meðferð við offitu
Bjarni Geir Viðarsson, sérfræðilæknir í skurðlækningum efra kviðarhols - Efnaskiptaaðgerðir á Íslandi
Sólveig Óskarsdóttir, lyfjafræðingur hjá Lyfju - Þyngdarstjórnunarlyf - ávinningur, áhætta & ábyrg notkun
Dögg Guðmundsdóttir, klínískur næringarfræðingur – Að byggja um heilbrigt samband við mat í offitumeðferð
Guðlaug Ingvadóttir talsmaður einstaklinga sem lifa með offitu. Situr í stjórn SFO og er fulltrúi í sjúklingaráði ECPO - Þegar líffræði, umhverfi og kerfi mætast: líf með offitu

Hlekkur á upptöku á streymi frá fundinum:

Heilsan okkar – Meðferð við offitu hjá fullorðnum Fyrsti fundur í fundaröðinni Heilsan okkar árið 2026 fer…

04/02/2026

Pétur Bjarnason, Mosfellingur, fv. fræðslustjóri og varaþingmaður, lést 30. janúar síðastliðinn, 84 ára að aldri.
Pétur ritaði merka sögu Reykjalundar í 80 ár sem kom út í árslok 2025. Bókin er yfirgripsmikið rit um hið mikla og góða starf sem unnið hefur verið á Reykjalundi í margar kynslóðir.
Reykjalundur sendir fjölskyldu og aðstandendum Péturs Bjarnasonar innilegar samúðarkveðjur vegna fráfalls hans og þakkar velvild og hlýhug í garð Reykjalundar í gegnum árin.
Guð blessi minningu Péturs.

Pétur Bjarnason, fv. fræðslustjóri og varaþingmaður, lést 30. janúar síðastliðinn, 84 ára að aldri.

07/01/2026

Reykjalundur hefur um árabil sinnt heildstæðri endurhæfingu fyrir fólk með langvinna lungnasjúkdóma og aðra sjúklingahópa, með áherslu á þverfaglega teymismeðferð sem eykur færni, lífsgæði og sjálfstæði í daglegu lífi. Lungnaendurhæfing er þar einn lykilþáttur, þar sem meðferð og fræðsla styrkja einstaklinga til að takast á við lungnasjúkdóma með auknu öndunarþoli og betri líðan.

Í útgáfu fréttablaðsins Lungu er að finna fjölbreytt efni, fræðslugreinar, reynslusögur og upplýsingar um nýjustu rannsóknir. Í blaðinu er grein eftir Guðrúnu Nínu Óskarsdóttur, formann Félags íslenskra lungnalækna og yfirlækni á lungnasviði Reykjalundar og Jónínu Sigurgeirsdóttur, formann Fagdeildar lungnahjúkrunar og sérfræðing í endurhæfingarhjúkrun á lungnasviði Reykjalundar. Einnig er viðtal við Berg Heimi Bergsson, íþróttafræðing á Reykjalundi Endurhæfingarstofnun ásamt örðum áhugaverðum greinum.

Blöð útgefin af Lungnasamtökunum frá 2007 til dagsins í dag

06/01/2026

Gjöf til Reykjalundar – ferðasúrefnistæki.
Fyrir rúmu ári síðan hóf Pétur Hanssen söfnun fyrir lungnasúrefnistækjum með því að útbúa barmmerki og selja. Með elju og þrautseigju seldi hann merki fyrir 3 milljónir á þessu einu ári og safnaði fyrir 6 tækjum. Oft plataði Pétur konu sína í skemmtilegan ísbíltúr en undirtónninn var að fara með merki á sölustaði.

Pétur nefnir að upphafshvatann að þessu öllu megi rekja til Elfu Drafnar Ingólfsdóttur, hjúkrunarfræðings á lungnadeild Reykjalundar, sem segja má að sé „sökudólgur“ þessa alls, að hans sögn. Elfa Dröfn hvatti hann til þess að fara á kynningarfund hjá Reykjalundi í upphafi sinnar meðferðar, þar sem hann komst að því að svona tæki kostar um 700.000 krónur. Þá kviknaði hugmyndin að safna sérstaklega fyrir slíkum tækjum.

Þróunin á lungnasúrefnistækjum hefur verið mikil, sérstaklega með tilkomu minni og fullkomnari tækja eins og Inogen ferðasúrefnistækjanna. Slík tæki ættu að vera við hvert rúm á lungnadeildum Reykjalundar, því þau spara vinnu starfsfólks og dregur úr þörf á sífelldum áfyllingum á súrefniskútum.

Pétur er maður framkvæmda og vill Reykjalundur þakka hans framlag og þá miklu vinnu sem hann og kona hans lögðu á sig til þess að ná markmiðinu sem hann setti sér.
Magnús Hlynur Hreiðarsson skrifaði grein á Vísi um þessa raunalegu gjöf, hér má lesa greinina.

Lungnadeild Landspítalans í Fossvogi og lungnadeild Reykjalundar var að berast höfðingleg gjöf frá skjólstæðingi deildanna en hann safnaði þremur milljónum króna og gaf deildunum s*x ferðasúrefnistæki.

06/01/2026

Heilsuræktin opnar 12. janúar!

Heilsuræktin opnar aftur mánudaginn 12. janúar.
Í þessari viku fá allir skráðir þátttakendur tölvupóst með nánari upplýsingum um opnun, skráningu og reglur.
Fylgstu með hér á heimasíðunni og á Facebook fyrir frekari tilkynningar.

Við hlökkum til að sjá ykkur!

05/01/2026

Nýárskveðja

Ég óska starfsfólki, sjúklingum, hollvinum Reykjalundar og landsmönnum öllum gleðilegs og heillaríks nýs árs!

Nú, þegar sól er tekin að hækka á lofti á nýjan leik, horfi ég björtum augum til þeirra verkefna sem bíða okkar á Reykjalundir á árinu 2026. Þau eru af ýmsu tagi.

Reykjalundur fagnaði á síðasta ári 80 ára afmæli með útgáfu bókar um merkilega sögu endurhæfingar og heilbrigðisþjónustu á Reykjalundi. Þar kemur m.a. fram að húsakostur og starfsemi hefur frá upphafi byggst á happdrætti SÍBS. Nú er svo komið að verulegar lagfæringar þarf að gera á húsnæði og áframhaldandi uppbygging er nauðsynleg til að mæta þörfum nú og til framtíðar litið. Fjárhagslegur stuðningur í gegnum happdrætti SÍBS nægir ekki til að fjármagna þau verkefni sem nauðsynlega þarf að vinna.

Nú í janúar er brýnt að endurnýja þjónustusamning Reykjalundar við Sjúkratryggingar Íslands. Nánast allar tekjur Reykjalundar koma í gegnum þennan samning við Sjúkratryggingar. Sá samningur rann út á síðasta ári en var framlengdur til janúarloka 2026. Sá samningur gerir aðeins ráð fyrir að greitt sé fyrir heilbrigðis- og endurhæfingarþjónustu, en gerir ekki ráð fyrir húsaleigu eða afnotum af húsnæði Reykjalundar. Þessu verður að breyta og meðal markmiða í fyrirliggjandi samningaviðræðum okkar við Sjúkratryggingar er að fá samþykktar húsnæðisgreiðslur til að við getum endurnýjað húsnæði og byggt nýtt sem uppfyllir kröfur samtímans.

Fjárhagslegur rekstur Reykjalundar hefur ekki gengið nægilega vel á síðustu árum og það er mikil áskorun fyrir okkur öll að rétta reksturinn við og ná að gera hann sjálfbæran. Skiptir þar miklu að við skipuleggjum starfsemina í samræmi við kröfur sem gerðar eru til starfsemi Reykjalundar í samningi við Sjúkratryggingar. Eftir mikla greiningarvinnu sem fram fór í lok árs 2025 er komið í ljós að það er gerlegt með endurskipulagningu á nær allri þjónustu og teymisvinnu. Við munum á árinu 2026 einbeita okkur að því að vinna skv. samningskröfum SÍ en í komandi samningsviðræðum erum við einnig með hugmyndir um breytingar á tilhögun og uppbyggingu sem mun efla Reykjalund á margvíslegan hátt.

Loks má nefna að Hollvinasamtök Reykjalundar eru mikilvægur bakhjarl starfseminnar, bæði í fjárhagslegu tilliti og til að varðveita sögu og góða ímynd starfseminnar. Við viljum að sem flestir, ekki aðeins útskrifaðir sjúklingar, viti um tilvist Hollvinasamtakanna. Við viljum að öll íslenska þjóðin sjái hag sinn í því að leggja Reykjalundi lið, bæði með stuðningi við Hollvinasamtökin og happdrætti SÍBS. Þessir aðilar munu á árinu 2026 sameina krafta sína í undirbúningi landssöfnunar fyrir Reykjalund, sem fara mun fram á vegum RÚV næsta haust.

Verkefnalistinn er langur, en við höfum orðið sammála um að setja endurnýjun sjúkraþjálfunargangsins í forgang. Við munum á þessu ári fara í gagngerar endurbætur á húsnæði, aðstöðu og búnaði sjúkraþjálfunar á Reykjalundi. Við stefnum einnig að því að endurnýja og endurbyggja sólskálabyggingu á þremur hæðum þar sem tréverk í gluggum er orðið fúið og gluggar ónýtir. Þá þarfnast sundlaugin kostnaðarsamrar viðgerðar.

Ég vona innilega að við verðum samstíga í störfum okkar fyrir Reykjalund á komandi ári. Það er mikilvægt að við róum öll í sömu átt og kappkostum öll að gera eins vel og við getum til heilla Reykjalundi og þeim sjúklingum sem okkur er falið að sinna.

Með einlægri ósk um að árið 2026 verði okkur öllum gott og farsælt,

Svana Helen Björnsdóttir,
starfandi forstjóri Reykjalundar

22/12/2025

18/12/2025

Reykjalundur fagnaði 80 ár afmæli og útgáfu bókar með notalegri samveru í Hlégarði

Þriðjudagskvöldið 16. desember 2025 var Hlégarður í Mosfellsbæ fylltur hlýju og hátíðlegu andrúmslofti þegar Reykjalundur fagnaði 80 ára afmæli sínu og útkomu nýrrar bókar um sögu og starfsemi staðarins. Tilefnið var einstakt og markaði mikilvægan áfanga í sögu Reykjalundar, sem í átta áratugi hefur gegnt lykilhlutverki í endurhæfingu og þjónustu við fólk víðs vegar að af landinu.

Svana Helen Björnsdóttir, starfandi forstjóri og stjórnarformaður Reykjalundar, setti hátíðina með ávarpi þar sem hún fór yfir mikilvægi stofnunarinnar fyrir íslenskt samfélag, bæði fyrr og nú. Í ávarpi Svönu kom einnig fram björt framtíðarsýn. Í kjölfarið sagði Bjarki Bjarnason, riststjóri bókarinnar, Reykjalundur endurhæfing í 80 ár, frá bókinni. Fjallar bókin um sögu Reykjalundar, starfsemina og þær miklu breytingar sem orðið hafa í gegnum árin.

Á meðan dagskrá stóð yfir birtust myndir úr starfi og sögu Reykjalundar á skjá og vöktu myndirnar bæði minningar og áhuga gesta. Boðið var upp á léttar veitingar og notalega samveru þar sem gestir nutu þess að spjalla saman í hlýlegu umhverfi.

Bókin var til sölu á staðnum og vakti mikla athygli meðal gesta, enda er hún bæði fróðleg heimild og dýrmætur minjagripur fyrir alla sem tengjast Reykjalundi eða hafa áhuga á sögu hans. Bókin er og verður áfram til sölu í móttöku Reykjalundar, skrifstofu SÍBS og helstu bókaverslunum.

Kvöldið í Hlégarði varð þannig litrík og eftirminnileg hátíð til heiðurs Reykjalundi og því mikilvæga hlutverki sem stofnunin hefur gegnt á Íslandi í samfellt 80 ár.

Ljósmyndari: Árni Rúnarsson