Lára ∞ Móar

29/03/2026

24/03/2026

Jörðin kallar á mig
Hún biður mig að sjá sig
Komdu nær – komdu nær
Heyrðu mig!

♥️ 🌏

23/03/2026

Lára býður í samveru með cacao, raddopnun, möntrum, slökun og tónheilun í reyr studio laugardaginn 28. mars frá kl. 11-13.

Eins og blandan af möntruhádegi & laugardagsslökun í Móum.

Verð: 4.900.-
skráning: moarheima@gmail.com

18/03/2026

Með tímanum verða allar möntrurnar aðgengilegar inn á Móar Heima.

Ég er að klára að smíða nýja heimasíðu & tryggja skilvirkt & notendavænt kerfi.

Síðan opnum við dyrnar.

Ég minni á að það er ennþá hægt að forskrá sig í áskriftaleið 2 sem inniheldur ekki bara tíma á netinu heldur einnig 2 viðburði í raunheimum á mánuði.

(Sönghringur, dekurstund, möntrugusa, kirtan og margt fleira).

Sendu mér skilaboð ef þú vilt tryggja þér pláss. Alveg að fyllast 😊

Hlakka til að vera með ykkur,
X
L

17/03/2026

Þá daga sem ég vakna inn í miðjum spíral neikvæðra hugsana.

Í nótt dreymdi mig part af mér sem ég á erfitt með að sættast við.
Í dag situr hann með mér.

Ég ætla að hlusta á hann – því hann hefur sögu að segja.

Síðan ætla ég að bjóða inn öðrum pörtum.

Sérstaklega þessum uppátækjasama, blíða og fyndna.
Þessum sem finnst lífið snilld.

Og þessum sem er góður í praktík –
því ég þarf að klára heimasíðuna í dag.

X
L

16/03/2026

Stillur morguns ❄️🏔️🏞️

Stilla hugans — stilltur hugur.
Leyfir mér að njóta hins smáa.

Æfi mig í að vingast við viðbrögð líkamans við eigin hugsunum.
Finnst það áhrifameira en að temja hugann.
Markmiðið er að uppskera meiri nánd við andartakið.

Nýt einveru og finn næringu vináttu.

Sakna þess besta — fjölskyldunnar.

Plana ævintýri til fjarlægra landa.
Plana ævintýri heim og inn í eigið land.

Hlakka til alls.

X
L

12/03/2026

Innilega velkomnar í ævintýri á VORJAFNDÆGUM með konum í náttúrunni föstudaginn 20.mars. Lára og María leiða stundina.

Vorjafndægur
þegar jafnvægi ríkir milli ljóss & myrkurs
vorið færist nær

Við sitjum með eldinum úti í fegurðinni, hlustum á náttúruna, öndum dýpra. Kakóathöfn inni í hlýjunni, konur í hring, vekjum & virkjum með öndun, raddopnun & mjúkri hreyfingu. Innra ferðalag & tenging með hugleiðslu, tónabaði, djúpslökun.

Hér verður rýmið til þess að tengjast frumkröftunum, nærast í náttúrunni, spegla sig í vorjafndægrum. Jarðtengja. Finna fræin vakna. Endurtengja við líkama sál.
Upplifa nærandi samveru með konum.

Hvar: Mosfellssveit. Staðsetning verður send út við skráningu.

Hvenær: Föstudagur 20.mars frá kl 12-15.

Annað: Við mætum klæddar eftir veðri fyrir eldinn, tromma / hrista er velkomin með. Gott að hafa vatnsflösku, dagbók, púða & teppi með.

Verð: 5.900 - kr.

Skráning: konurinatturunni@gmail.com

. . . .

KONUR í náttúrunni er lifandi viðburðaröð sem slær í takt við árstíðir og náttúru landsins: Serimóníur og ævintýri úti í villtri náttúru, í nánd við jörðina, í nærandi samveru með konum. Ræktandi innri tengingu, frelsið & tengslin við náttúruna. Hugmyndin kviknaði árið 2022 hjá Maríu Carrasco og Láru Rúnarsdóttur og hafa þær haldið úti ýmsum formum af viðburðum, hlédrögum, og námskeiðum með konum í náttúrunni.

Lára er jógakennari, tónlistarkona & kynjafræðingur með menntun í sjamanisma & höfuðbeina- & spjaldhryggsjöfnun.
María er dansari, sjúkraþjálfari, jóga nidra kennari & doula með menntun í höfuðbeina- & spjaldhryggsjöfnun. María elskar að halda rými fyrir fólk að dýpka tengslin við sig sjálft, náttúruna & lífið.

11/03/2026

Iðkun dagsins 🍑🧡🍊

Hreyfa hrygg, liði. Teygja, mæta, nudda. Þakka.

Drekka, vökva. Næra.

Finna. Skrifa. Pæla. Faðma. Leyfa.

Takk fyrir það sem er núna.

L

08/03/2026

Dm fyrir skráningu 🍃🌀

11/02/2026

Hjartað mitt er fullt af þakklæti ❤️

Móar kveðja í þeirri mynd sem það tók sér í fjögur og hálft ár. Móa-andinn er frjáls undan steypu og þungum rekstri, og ég finn hann glaðan og frjálsan. Hann vinnur nú án landamæra, hvert þangað sem hann er kallaður. Hann er hér til þess að minna okkur á virði okkar og kalla okkur heim þegar við týnum okkur um stund.

Ég finn sorg og söknuð — sem er ljúft að finna í brjóstinu. Þá veit ég að það sem við byggðum var einhvers virði. Stundum þarf ég að styðja mig við borð þegar öldur sorgar ferðast um mig. Ég leyfi því.

Ég finn létti yfir því að bera bara sjálfa mig í smá stund. Ég ber ekki lengur yfirbyggingu rekstrarins. Ég hef oft framleitt meira en ég hef átt orku til, og þess vegna er þetta allt í lagi — að við séum komin hingað. Ég fékk hjálp frá heilbrigðiseftirlitinu og leigusala, þar sem ég mætti mótlæti sem ég átti ekki roð í, til þess að velja sjálfa mig.

En sýnin mín lifir áfram, sterk innra með mér… og ég veit að henni finn ég nú nýjan farveg. Draumurinn minn hefur alltaf verið að skapa rými sem er áfallamiðað og ber djúpa virðingu fyrir vegferð hvers og eins. Rými sem styður fólk til ábyrgðar á eigin lífi, þar sem allar tilfinningar eru velkomnar og við æfum okkur að ferðast frá drama og inn í upplifun á andartakinu nákvæmlega eins og það er. Það er svo mikill styrkur í því.

Ég hef átt svooooo margar fallegar stundir með ykkur inn í Móum. Þær lifa djúpt í frumunum mínum. Ég hlakka til að finna þróttinn koma aftur til þess að skapa meðvitað næstu skref í góðu samstarfi við okkar góða fólk og ykkur.

Öll ástin,
Lára Rúnarsdottir