Grund, hjúkrunarheimili

24/02/2026

Við byrjuðum vikuna hér á Grund á söngstundum með Bjarna Hall að venju. Baddi mætti með gítarinn sinn í hátíðasalinn í gær og færði sig svo eftir þá söngstund beint yfir á Litlu og Minni Grund spilaði og söng þar með heimilisfólki.

Á miðvikudag er morgunstund á sínum stað í hátíðasal frá 9:30 – 11:00. Gestur stundarinnar í þessari viku er Sunna Dís Másdóttir rithöfundur og ljóðskáld. Í morgunstund er lesið af fréttamiðlum, sungið, gerðar léttar æfingar, tekið á móti góðum gestum og boðið uppá kaffisopa.

Þessi miðvikudagur er sá seinasti í mánuðinum og höldum við áfram með vöfflukaffið. Seldar verða nýbakaðar vöfflur á kaffihúsinu frá klukkan 14:00.

Kóræfing er í hátíðasal, einnig á miðvikudag klukkan 14:00-15:00, en kórinn æfir á þeim tíma í viku hverri. Það skal ítrekað að aðstandendur eru hjartanlega velkomnir með fólkinu sínu á kóræfingu.

Á föstudag verður Jón Ólafur með söngstundirnar sínar eins og aðra föstudaga. Jón byrjar á Litlu og Minni Grund fyrir hádegismatinn og heldur svo út í hátíðasal og tekur þar á móti söngelskum gestum kl. 13:30.

Dagur einstakra barna er einnig núna á föstudaginn kemur og við hvetjum okkar fólk til að sýna samstöðu með börnum með sjaldgæfa sjúkdóma og glitra, en það er hægt með því að draga fram pallíettur og glimmer og skarta því þann daginn.

Á sunnudag er messað í hátíðasal. Prestur er sr. Guðbjörg Jóhannsdóttir.

Auk alls þessa verða aðrir fastir liðir eins og tómstundavagn, boccia, stólaleikfimi ofl. á sínum stað samkvæmt stundaskrám og við minnum á að Grund er heimili fólksins sem hér býr og eru aðstandendur alltaf velkomnir.

12/02/2026

Tvisvar í mánuði ómar salsatónlist á Grund. Það er þegar gleðigjafinn og sjálfboðaliðinn Zulay Viciet mætir í hús.

Hún er dansþerapisti frá Venezuela sem dansar við dunandi salsatónlist og fær okkur öll til að dansa með.

Takk kæra Zulay fyrir að koma til okkar á Grund með birtu, yl og umfram allt gleðina. 🥰

11/02/2026

Lífssagan mikilvæg

Skiptir máli að þekkja til sögu heimilismanns

Þegar fólk flytur á Grundarheimilin er afar hjálplegt að fá upplýsingar um heimilismanninn sem veita innsýn í líf hans áður en flutt var á Grund, Mörk eða í Ás.

Oft er minnið farið að svíkja þegar flutt er á hjúkrunarheimili og þá er frábært fyrir starfsfólk að geta flett myndaalbúmi þar sem svipmyndum er brugðið upp af ævi viðkomandi með texta þar sem fram koma nöfn fólks sem er á myndum og skyldleiki eða frekari upplýsingar um það sem myndin hefur að geyma.

Þannig getur ágrip af sögu heimilismanns oft verið kveikja að umræðum og starfsmenn geta kynnst heimilismanninum ögn betur en ella með því að sjá myndir af honum frá liðnum árum eða fjölskyldunni. Hvaðan er hann, hverjir skipta hann máli, hver var starfsvettvangur, hvaða áhugamál hafði hann og svo framvegis.

Veggspjald hefur reynst vel

Líklega miklar fólk stundum fyrir sér að útbúa lífssögu.+Á netinu er hægt að útbúa skemmtilegar myndabækur. En veggspjöld eru líka viðráðanleg og oft eru skemmtilegustu lífssögunar einmitt þannig. Þá er hægt að ljósrita myndir úr ævi heimilismanns og líma á veggspjald með stuttum texta.

Við heyrðum sögu frá fjölskyldu eins heimilismanns. Barnabörnin fengu það hlutverk að útbúa lífssögu ömmu til að hengja upp á vegg. Börnin áttu dýrmætar stundir með ömmu sem rifjaði upp með þeim gamla tíma og afraksturinn varð persónulegt veggspjald um ömmu.

Tilvalið er svo að leyfa veggspjaldinu að hanga uppi á vegg í herbergi ömmu eða afa.

Við fengum góðfúslegt leyfi til að birta hér nokkur dæmi um hvernig hægt er að útbúa svona veggspjöld eða síður í albúm.

11/02/2026

Minnum á kóræfingu í dag

Kóræfing er í hátíðasal Grundar í dag kl. 14:00 – 15:00. Kórinn leiðir Kristín Waage organisti og er kórinn opin heimilisfólki, aðstandendum, starfsfólki og öðrum velunnurum Grundar.
Svo endilega ef þið sjáið ykkur fært mætið þá á æfingu með heimilisfólki og njótið þess að syngja með fólkinu ykkar.

02/02/2026

Febrúar genginn í garð og ánægjulegt hvað það hefur verið bjart að undarförnu og daginn augljóslega farið að lengja.
Vikan hjá okkur hér á Grund er nokkuð hefðbundin.

Í dag mætir Bjarni Hall með gítarinn og stýrir söngstundum sínum. Baddi byrjar í hátíðasal um 13:30 og færir sig svo í beinu framhaldi yfir á Litlu og Minni Grund.

Á miðvikudag er morgunstund á sínum stað í hátíðasal kl. 9:30 – 11:00. Morgunstundina leiðir sr. Pétur Þorsteinsson, en í stundinni er lesið úr fréttamiðlum, gerðar léttar æfingar, sungið, boðið uppá kaffisopa og oft tekið á móti góðum gestum. Gestur stundarinnar þessa vikuna er Kristinn Arnar Sigurðsson fjöllistamaður og ætlar hann að segja frá sér og störfum sínum.

Kóræfing er á miðvikudag kl. 14:00 í hátíðasal að venju. Stjórnandi kórsins er Kristín Waage organisti og er alltaf pláss fyrir áhugasama að ganga til liðs við kórinn. Áhugasamir um kórstarfið geta haft samband við Kristínu á netfangið kristin@grund.is

Á föstudag verður jón Ólafur á ferð um húsið með nikkuna. Jón byrjar að spila og syngja á Litlu og Minni fyrir hádegisverð og færir sig svo yfir í hátíðasal kl. 13:30.

Auk alls þessa verða aðrir fastir liðir eins og tómstundavagn, boccia, stólaleikfimi ofl. á sínum stað samkvæmt stundaskrám,

30/01/2026

Grundarheimilin óska eftir að ráða reynslumikinn einstakling í starf sviðsstjóra rekstrar– og fjármálasviðs. Leitað er að reyndum leiðtoga sem hefur eldmóð til að taka þátt í að leiða heimilin til framtíðar

Grundarheimilin saman standa af hjúkrunarheimilum sem eru heilbrigðisstofnanir í öldrunarþjónustu sem og íbúðafélögum fyrir íbúa 60+ og starfa þau á grundvelli samfélagslegra sjónarmiða.

Sviðsstjóri rekstrar– og fjármálasviðs er yfir rekstrar– og fjármálasviði Grundarheimilanna en um nýja stöðu er að ræða. Hann er einn af lykilstjórnendum félaganna, situr í framkvæmdastjórn og heyrir beint undir forstjóra.

Helstu verkefni

· Ábyrgð á daglegri stjórn rekstrar- og fjármálasviðs
· Þátttaka í mótun, þróun og innleiðingu verklags með ábyrgri fjármálastjórn
· Ábyrgð, umsjón og eftirfylgni með áætlanagerð
· Lausafjárstýring
· Ábyrgð á bókhaldi, greiðslum, reikningagerð, uppgjörum og gerð ársreiknings
· Samskipti við kröfuhafa, skuldunauta, fjármálastofnanir, endurskoðendur og aðra hagaðila
· Rekstur fasteigna heimilanna
· Innkaupamál þvert á svið heimilanna
· Rekstur eldhúss
· Öryggis og upplýsingatæknimál
· Samningagerð
· Sinnir öðrum þeim verkefnum sem forstjóri felur honum og eðlilegt getur talist að rúmist innan verksviðs hans.

Hæfniskröfur

· Þekking og reynsla af fjármálum, rekstri, samningagerð og áætlanagerð er nauðsynleg
· Þekking og reynsla af rekstri hjúkrunarheimila eða sambærilegum stofnunum er kostur
· Góð greiningarhæfni og þekking á framsetningu fjárhagsupplýsinga, t.d. með PowerBI er kostur
· Háskólamenntun sem nýtist í starfi, framhaldsmenntun kostur
· Nákvæm og öguð vinnubrögð
· Framúrskarandi hæfni í mannlegum samskiptum
· Frumkvæði og leiðtogahæfni

Nánari upplýsingar um starfið veitir:

Karl Óttar forstjóri
karl.ottar@grund.is
530 6100

Kíktu á laus störf hjá Grund, Mörk og Ás hjúkrunarheimili.

23/01/2026

Það var notalegt andrúmsloftið á Grund í vikunni þegar þær Anne og Guðbjörg buðu upp á boccia einn morguninn.
Boccia hefur fyrir löngu sannað gildi sitt. Leikurinn eykur hreyfigetu í höndum, örmum og efri hluta líkamans.

Boccia bætir samhæfingu og jafnvægi, jafnvel þegar setið er og hjálpar til við að viðhalda styrk og liðleika án álags.

Boccia þjálfar einbeitingu og stuðlar að því að halda heilanum virkum með taktík og útreikningum.

23/01/2026

Magnea Tómasdóttir og nemendur hennar í Listaháskóla Íslands sem eru að læra um tónlist og minnissjúkdóma bjóða upp á vikulegar stundir fram að páskum.

Þetta eru dásamlegar stundir og ekki bara fyrir heimilisfólk heldur líka gefandi fyrir starfsfólk sem sér áhrifin sem tónlist hefur á heimilisfólk.🥰

22/01/2026

Það mæta yfirleitt margir á opið hjá hjá iðjuþjálfuninni á Grund. Ýmislegt er brallað, málað, prjónað, heklað, blaðað í tímaritum og bókum eða bara spjallað um daginn og veginn.

Sumum finnst reyndar bara gott að koma og njóta þess að vera í góðum félagsskap. 🥰

21/01/2026

Framvinda byggingar hjúkrunarheimilisins í Ási gengur vel og er verkið á áætlun en hjúkrunarheimilið í Ási er eitt þriggja heimilanna sem er undir hatti Grundarheimilanna.

Gísli Páll Pálsson, stjórnarformaður Grundarheimilanna, segir að þessa dagana sé verið að reisa veggi fjórða og síðasta hlutans sem er að austanverðu.

"Búið er að steypa þakplötu á hina þrjá hlutana og hiti kominn á þá. Frágangi þaks á fyrsta húsi að vestanverðu er lokið að fullu og þar með talið að hífa úthagatorf á þakið. Það hefur hjálpað verulega til hversu tíðarfarið hefur verið gott í vetur en ekki síður að Húsvirki sem er verktaki verksins hefur staðið sig mjög vel.
Forsteyptar einingar eins og húsið er byggt úr hefur stytt byggingartímann verulega og hefur húsið risið á undrafljótan hátt."

12/01/2026

Dagskrá vikunnar

Í dag líkt og aðra mánudaga mætir Bjarni Hall með gítarinn.
Baddi eins og hann er kallaður, hefur verið að koma á Grund í nokkur ár á mánudögum og er alltaf mikið fjör þegar hann er í húsi. Baddi byrjar með fyrri söngstundina í hátíðasal kl. 13:30 og færir sig svo yfir á Litlu og Minni Grund í beinu framhaldi, og oft eru einhverjir sem ekki hafa fengið nóg og fylgja Badda yfir á milli til að halda söngnum áfram.

Á miðvikudag verður morgunstund á sínum stað í hátíðasal kl. 9:30 – 11:00. Í morgunstund er farið yfir fréttir dagsins, sungið, gerðar léttar æfingar, boðið uppá kaffisopa og tekið á móti góðum gestum. Gestur stundarinnar þessa vikuna er tónlistarkonan Marsibil Una Gíslrún Schram og ætlar hún að segja aðeins frá sér og flytja nokkur lög.

Kóræfingar halda áfram á miðvikudögum í hátíðasal kl. 14-15. Stjórnandi kórsins er Kristín Waage organisti. Kórinn er opinn heimilisfólki, aðstandendum og öðrum velunnurum. Áhugasamir geta sett sig í samand við Kristínu á netfangið kristin@grund.is

Á föstudag verður Jón Ólafur á ferð um húsið með nikkuna. Jón byrjar með söngstund á Litlu og Minni Grund rétt fyrir hádegismatinn og verður svo úti í hátíðasal klukkan 13:30.

Guðsþjónusta í umsjón Félags fyrrum þjónandi presta verður næsta sunnudag í hátíðasal heimilisins og hefst hún klukkan 14:00.



Auk alls þessa verða aðrir fastir liðir eins og tómstundavagn, boccia, stólaleikfimi ofl. á sínum stað samkvæmt stundaskrám

07/01/2026

Það er áratuga löng hefð fyrir því að kveðja jólin með pompi og prakt á Grund og í gær var það að venju gert með þrettándaballi. Grundarbandið lék fyrir dansi í hátíðasal og söngkonan Hjördís Geirsdóttir leiddi sönginn.🎄