FEB Félag eldri borgara í Reykjavík og nágrenni

27/03/2026

Hópurinn á myndinni sem hér fylgir með svaraði kalli FEB framúrskarandi þegar þrengdi mjög að í bílastæðamálum í nágrenni FEB og komu því alltaf 5 saman í bíl á fornsagnanámskeiðið. Þau kalla bílinn "Skólabílinn". Algjörlega til fyrirmyndar.
Í morgun voru síðan "skólaslit hjá Skólabílnum" á Kaffi Loka hjá flottu myndinni þar.

25/03/2026

Vont veður og slæm færð – lokun hjá FEB
Frétt uppfærð kl. 11:10 fimmtudaginn 26. mars. Öll starfsemi og námskeið FEB falla niður í dag 26. mars vegna veðurs og ófærðar. Þátttakendur námskeiða sem vera áttu í dag hafa fengið póst um hvenær nýir tímar eru í boði í stað þeirra sem falla niður í dag.

Öll starfsemi á vegum FEB fellur niður að morgni fimmtudagsins 26. mars þar sem vonskuveðri er spáð fram til hádegis. Við munum taka stöðuna á morgun (26. mars) hvort hægt verður að opna eftir hádegi.

24/03/2026

Vilt þú vera fulltrúi FEB á landsfundi LEB
Miðvikudaginn 29. apríl n.k. boðar Landssamband eldri borgara (LEB) til landsfundar. Fundurinn verður haldinn í salnum Háteigi á Grand Hótel Reykjavík. Innskráning á fundinn hefst kl. 9:30 en fundurinn sjálfur hefst kl. 10.15. og gert er ráð fyrir að fundarstörfum ljúki kl. 16:30.

Félag eldri borgara í Reykjavík og nágrenni (FEB) hefur rétt á að senda 42 fulltrúa á landsfundinn og að auki þurfa að vera til taks varamenn. Áhugasamir félagsmenn FEB eru hvattir til þátttöku. Vinsamlegast vertu í sambandi við skrifstofu FEB fyrir 7. apríl, með því að hringja í síma 588 2111, senda tölvupóst á feb@feb.is eða mæta á skrifstofuna, ef þú hefur áhuga. Nauðsynlegt er að gefa upp nafn, kennitölu, netfang og símanúmer. Eingöngu fulltrúar félaganna með gilt kjörbréf útgefnum af stjórnum sinna félaga, hafa rétt á setu á landsfundi LEB.

Við hlökkum til að heyra frá þér.

23/03/2026

Við minnum á ráðstefnu Öldrunarráðs sem verður haldin að Stórhöfða 31, núna á miðvikudaginn 25. mars (gengið inn neðan við húsið, gegnt Grafavoginum).

Ráðstefnan ber heitið Eldri borgarar - Hvar stöndum við - hvert stefnum við?
Hún stendur yfir kl. 13:00 – 16:00.

Fundarstjóri er Magnús J. Magnússon varaformaður Öldrunarráðs Íslands og stjórnarmaður LEB.

Það eru allir velkomnir

Hér er skráningarlinkurinn

https://docs.google.com/forms/d/e/1FAIpQLSfjmtKwS7OUoLeegssBd_W9cur0_zcOEVXSQFZAolPl6dAjWA/viewform

19/03/2026

Alþingi samþykkti upp úr hádegi frumvarp ríkisstjórnarinnar um að láta árlegar breytingar á greiðslum almannatrygginga taka mið af þróun launavísitölu í stað launaþróunar. Frumvarpið var samþykkt með 33 atkvæðum stjórnarflokkanna gegn 21 atkvæði stjórnarandstæðinga. Fjórir þingmenn greiddu ekki atkvæði og fimm voru fjarstaddir.

Almannatryggingar taka hér eftir breytingum í takt við launavísitölu en ekki launaþróun. Alþingi samþykkti frumvarp ríkisstjórnarinnar með 33 atkvæðum gegn 21.

19/03/2026

Námskeið hannað fyrir fólk sem hefur misst maka sinn. Að horfa á eftir ástinni sinni við dauða reynist mörgum mikið högg.

Námskeiðið veitir fræðslu, samkennd og stuðning sem hjálpar til við úrvinnslu sorgar og að ná sálrænni endurheimt.

Eftir að hafa misst maka er margt sem er mjög "prívat" og ekki hægt að ræða við vini eða fjölskyldu.

Að hafa námskeiðið rafrænt gefur þátttakanda kost á því að fara aftur og aftur í gegnum efni námskeiðsins, á sínum forsendum og á sínum tíma.

Námskeiðið inniheldur fræðsluefni, sérstakar hugleiðslur, öndunaræfingu og jóga nidra djúpslökun.

Margvísleg verkefni eru í lok námskeiðs sem eru bæði gagnleg og gagnreynd hjálp við úrvinnslu erfiðra tilfinninga.

Rafrænt námskeið fyrir þá sem hafa misst maka sinn. Fagleg fræðsla, stuðningur og verkfæri til að takast á við sorgina.

18/03/2026

Nýtt félagsskírteini, Félagstíðindi FEB og Afsláttarbók.

Ágæti félagsmaður
Nú fer skilvísum greiðendum félagsgjalda FEB – sem ekki hafa afþakkað sendingu á pappír – að berast bréfpóstur sem inniheldur þrennt:

1. Félagstíðindi FEB 2026
2. Félagsskírteini FEB sem gildir til 31. mars 2027
3. Afsláttarbók 2026
Þetta er allt sent saman í stóru umslagi, vinsamlegast skoðaðu innihald umslagsins vel áður en því er fargað, þar sem félagsskírteinið er svo lítið og gæti því auðveldlega orðið eftir.

Við viljum sérstaklega vekja athygli á því, að allt þetta þrennt er einnig hægt að nálgast með rafrænum hætti.

1. Félagstíðindin er að finna rafrænt á heimasíðu FEBhttps://www.feb.is/file/2026/03/FEB_Felagstidindi_210x297_Februar_2026_LOWRES_Single_Page.pdf
2. Félagsskírteinið er að finna rafrænt inní Appinu Spara.
3. Afsláttarbókina 2026 er að finna rafrænt á heimasíðu FEBhttps://www.feb.is/file/2026/03/LEB_Afslattarbok_2026_Issuu.pdf

Þeir félagsmenn sem óskuðu eftir rafrænu félagsskírteini fá ekki send Félagstíðindi og Afsláttarbók á pappír. Við hvetjum sem flesta félagsmenn að bætast í þennan hóp, því þannig náum við verulegri hagræðingu fyrir félagið og þar með félagsmenn.

Með von um að sendingin berist þér fljótt og vel, en að þú sjáir þér líka hag í því að vera rafrænn notandi í framtíðinni.

17/03/2026

FEB 40 ára 15. mars 2026

Vekjum athygli á grein á heimasíðu FEB sem birtist einnig í Félagstíðindum FEB 2026 um tilurð stofnunar FEB fyrir 40 árum.

Grein er birtist í Félagstíðindum FEB 2026 í tilefni af 40 ára afmæli FEB þann 15. mars 2026: FEB stofnað með samtök launafólks sem bakland Hrafn Magnússon, fyrrverandi framkvæmdastjóri Sambands almennra lífeyrissjóða – SAL og síðar framkvæmdastjóri Landssamtaka lífeyrissjó...

13/03/2026

Alltaf gaman hjá henni Tönyu/FEB í Zumba og leikfiminni Sterk og liðug. Flottir hópar hér á ferð ☺️

09/03/2026

París með FEB-ferðum - nokkur sæti laus

Langar þig ekki að upplifa hina einstöku stemningu í París í góðum félagsskap?
Nú gefst frábært tækifæri fyrir félagsmenn FEB að njóta nokkurra yndislegra daga í einni fallegustu borg Evrópu. Bókaðu þig sem fyrst svo þú missir ekki af 😊

FEB-ferðir í samvinnu við ferðaskrifstofuna Betri ferðir bjóða uppá fjögurra nátta ferð til Parísar dagana 10. til 14. júní, flogið er með Icelandair.

Fáar borgir hafa upp á jafn mikið að bjóða eins og París, hin óviðjafnanlega borg ástar og rómantíkur. Ferð þangað í sól og sumaryl verður öllum ógleymanleg. Gist á hótelinu des Mines rétt við Luxemburg garðinn í hjarta borgarinnar. Í boði er ökuferð um borgina í þrjár klukkustundir þar sem allt það markverðasta í miðborginni er skoðað m.a. farið í listmannahverfið fræga Montmartre. Einnig er létt gönguferð á slóðir Moulin Rouge með sögulegu ívafi, sigling á Signu með kvöldverði og yndislegri tónlist o.fl.
Fararstjóri: Lilja Hilmarsdóttir hjá Betri ferðum.
Verð: 269.000 á mann í tvíbýli en 344.000 í einbýli

Innifalið í verði ferðar er :
• Flug með Icelandair.
• Gisting í 4 nætur með morgunverði.
• Skoðunarferð í rútu um borgina og það markverðasta í miðbænum skoðað.
• Létt gönguferð með sögulegu ívafi á slóðir Moulin Rouge.
• Sigling á Signu með kvöldverði og ljúfri tónlist.
• Tveir kvöldverðir á veitingahúsi við hótelið.
• Akstur til og frá flugvelli svo og íslensk fararstjórn.

Bókanir fara fram í gegnum bókunarsíðuna klik.is eða með því að smella hér: https://klik.is/event/buyingflow/140