Heilbrigðisstofnun Suðurlands

06/02/2026

„Ég þarf að passa mig að segja ekki mamma á vaktinni.“

Mæðgurnar Aðalbjörg Skarphéðinsdóttir og Aðalheiður Svanhvít Magnúsdóttir vinna saman á myndgreiningardeild á Selfossi. Aðalheiður, eða Heiða eins og hún er alltaf kölluð, er á öðru ári í geislafræði frá Háskóla Íslands og Aðalbjörg, Alla, mamma hennar er deildarstjóri myndgreiningar á Selfossi.

Alla segir stærsta kostinn við að vinna með dóttur sinni vera að fá að miðla reynslu sinni áfram. „Það er gaman að geta kennt henni og sérstaklega gaman að hún hafi áhuga á að læra það sem ég lærði,“ segir hún. Heiða tekur undir „Stærsti kosturinn er að vera með einhvern sem getur lesið yfir verkefnin mín og veit nákvæmlega um hvað ég er að skrifa. Það var sérstaklega mikill kostur þegar ég byrjaði og vissi í raun ekki neitt um efnið.“

Að kenna eigin barni er þó ekki alveg það sama og að kenna öðrum nemum. „Það er kannski erfiðast að passa sig á því að segja ekki eitthvað eins og: ‚gerðu þetta bara svona, elskan mín‘,“ segir hún hlæjandi.
„Ég þarf líka að passa mig á því að segja ekki mamma í vinnunni,“ bætir Heiða við. „Það hljómar eins og það sé starfsdagur!“

Fyrir Heiðu getur það verið pínu viðkvæmt þegar mamma er áhorfandi. „Ef ég er að setja upp æðalegg fyrir framan mömmu og klúðra því, þá er það auðvitað alltaf leiðinlegt, en mamma sá mig samt klúðra því. Það getur sært smá stoltið,“ segir hún og glottir út í annað.

Heiða lýsir því líka þegar samstarfsfólk horfir tortryggið á þær. „Þegar stelpurnar af bráðamóttökunni koma á deildina og horfa til skiptis á okkur en þora ekki að segja neitt,“ segir Heiða og mamman tekur við „þá segi ég bara: ‚þetta er dóttir mín‘. Þetta er bara skemmtilegra. Við erum nefnilega mjög líkar – bæði í fari og hegðun.“
„Og við hljómum líka eins,“ skýtur Heiða inn.

Spurðar hvort þær telji að þær væru góðir samstarfsmenn ef þær væru ekki mæðgur eru þær sammála. „Já, alveg klárlega,“ segir Heiða. „Við eigum sömu áhugamál, elskum báðar að prjóna og okkur myndi semja vel.“

05/02/2026

Búið er að samþykkja framkvæmdir um stækkun og endurbætur fyrir sjúkrahúsþjónustu og heilsugæslu við Heilbrigðisstofnun Suðurlands á Selfossi.

Fyrsti áfanginn felst í endurnýjun og stækkun húsnæðis heilsugæslu, geðheilsuteymis og heimahjúkrunar. Sá áfangi er fullfjármagnaður og ætlað að ljúka framkvæmdum við fyrsta áfangann um mitt ár 2027.

Nánar má lesa um málið í frétt í fyrstu athugasemd.

02/02/2026

"Við erum auðvitað með stjórnanda á heimsmælikvarða"

Starfsmenn í endurhæfingu á Selfossi komu saman á vinnustofu í síðasta mánuði og var fljótt ljóst hversu lausnamiðaður og samheldinn hópurinn er, leiddur af sterkum stjórnanda teymisins. Markmið vinnustofunnar er að sjá tækifæri til umbóta og vann starfsfólk saman að hugmyndum til að besta ferla sem þau svo fylgja sjálf eftir í samráði við sinn yfirmann.

Takk fyrir ykkar starf, þið eruð ómetanlegur hlekkur í starfsemi HSU.

28/01/2026

Bólusetning við HPV á morgun, fimmudag í Fjölbrautaskóli Suðurlands (þgf) fyrir drengi fædda 2008-2009 þeim að kostnaðarlausu.

HPV veira getur valdið vörtumyndum og krabbameini í kynfærum, munnholi, koki og víðar.

Nánar má lesa um bólusetninguna í frétt í fyrstu athugasemd.

28/01/2026

Díana Óskarsdóttir, forstjóri HSU, hefur skipað nýtt sjö manna fagráð til næstu þriggja ára.

Hlutverk fagráðsins er að vera ráðgefandi vettvangur um faglega þróun og gæði þjónustu innan HSU. Ráðið skal stuðla að framþróun og faglegri umræðu þvert á starfsemi stofnunarinnar, með hag sjúklinga og samfélagsins að leiðarljósi.

Nánar má lesa um skipun fagráðsins í frétt í fyrstu athugasemd.

26/01/2026

Hjúkrunarheimilin Ljós- og Fossheimar á Selfossi blótuðu Þorranum á föstudaginn síðastliðin á sjálfan bóndadaginn.

Tókst það einstaklega vel og heimilisfólk naut þess að vera saman og njóta þorramatar í góðum félagsskap.

Unnur Eyjólfsdóttir, deildarstjóri á Foss- og Ljósheimum, mætti til vinnu einstaklega þjóðleg klædd íslenskum upphlut.

19/01/2026

“Við viljum senda okkar bestu þakkir til nágranna spítalans, skjólstæðinga okkar og starfsfólks fyrir þolinmæði og skilning á meðan framkvæmdir stóðu yfir. Við erum spennt fyrir að geta boðið fólki sem á erindi á aðra eða þriðju hæð betra aðgengi á ný.”

Inngangur norðan megin við sjúkahúsið í Vestmannaeyjum hefur verið opnaður á ný eftir lokun sem stóð yfir í nokkra mánuði vegna framkvæmda. Á þeim tíma var planið við innganginn malbikað og skipt um lagnir.

22/12/2025

🧡 Hérna birtum við 4. tölublaðið af fréttapósti Heilbrigðisstofnunar Suðurlands, sem við köllum „Hjartað í HSU". Þetta er safnútgáfa tíðinda af starfsemi okkar frá september, október og nóvember 2025, sem við höfum að megninu til birt nú þegar á vef og samfélagsmiðlum. Einnig er þó alltaf eitthvað um nýtt efni, sem seinna ratar á aðra miðla HSU.

👇 Smelltu á tengil í fyrstu athugasemd (comment) til að skoða Hjartað (PDF) á vef HSU.

/////

Í pistli Díönu Óskarsdóttur, forstjóra Heilbrigðisstofnunar Suðurlands, í þessari haustútgáfu Hjartans segir meðal annars:

,,Í þessu tölublaði Hjartans í HSU lítum við yfir einstaklega farsæla og kraftmikla haustmánuði – september, október og nóvember – þar sem markmið okkar um að veita aðgengilega, mannúðlega og örugga heilbrigðisþjónustu hefur skilað sér í verki.

Stærstu tíðindin í haust fólust í opnun Heilsugæslu Uppsveita í byrjun nóvember, sem markar mikilvægt skref í að efla þjónustu á víðfeðmu dreifbýlissvæði og bæta aðgengi fjölskyldna og aldraðra að faglegri heilsugæslu í heimabyggð. Heilsugæslan opnaði formlega 6. nóvember og er þessi áfangi skýr birtingarmynd stefnu HSU um að færa þjónustuna nær fólki og styrkja grunnstoðir heilsugæslunnar.

Einnig fjöllum við um öflugan tækjabúnað, aukna samvinnu við sveitarfélög, nýsköpunarverkefnið Leviosa, framfarir í mæðravernd, vinnu okkar með börnum og metnaðarfulla uppbyggingu mannauðs stofnunarinnar. Hér kynnast lesendur þeim fjölbreyttu verkefnum sem starfsfólk HSU vinnur af fagmennsku, metnaði og stolti í þágu íbúa umdæmisins."

19/12/2025

„Við viljum senda jólakveðjur til allra þeirra sem standa vaktina þessi jól, hvort sem það er á vakt fyrir aðra eins og við erum að gera, eða þeirra sem eru heima á vaktinni þar."

Valey Sara Árnadóttir Workman og Heiða Skúladóttir eru starfsmenn í aðhlynningu á öldrunardeild Ljós- og Fossheima og verða á vakt á aðfangadagskvöld.

Valey Sara segist hlakka til þess að upplifa eitthvað nýtt og fá að gera sitt besta til þess að gera jólin sérstök fyrir fólkið. „Það er gaman hvað er búið að skreyta deildina vel og það hvetur fólk til að staldra við, dást að skreytingum og deila þá oft með okkur jólasögum úr sínu lífi," segir hún og bætir við að það fallegasta við starfið á þessum tíma er að rifja upp gamla tíma með fólkinu okkar og hvernig maður finnur að samverustundirnar með þeim verða nánari. "Drengirnir mínir fá að opna nokkra jólapakka á aðfangadagsmorgun áður en ég fer til vinnu, svo fara þeir með pabba sínum heim til foreldra minna og opna restina þar," en bætir við að þrátt fyrir að þeir séu svekktir að hún sé að vinna skilja þeir vel mikilvægi þess að einhver standi vaktina og sé hjá fólkinu.

Heiða hefur aldrei áður unnið á aðfangadag og hlakkar til að vinna þetta kvöld og finnst fallegt að sjá hvað það þarf lítið til að gleðja á þessum tíma. „Þar sem þetta verða aðeins öðruvísi jól í ár þá breyttum við fjölskyldan hefðunum okkar. Við ætlum að opna pakkana saman á jóladag og borða góðan mat þá. Maðurinn minn og strákarnir mínir ætla njóta saman á aðfangadagskvöld og gera eitthvað sem ég myndi aldrei bjóða uppá að aðfangadag. Sem sagt heimagerð pizza og PlayStation tími!"

Við á HSU erum þakklát fyrir mannauðinn okkar, aðstandendur þeirra og öll þau sem standa vaktina yfir hátíðarnar.

18/12/2025

Gunnhildur Stella Pálmarsdóttir fjölskyldufræðingur í Geðheilsuteymi HSU gefur út barnabók um Alzheimer

Bókin ,,Amma nammigrís – engin venjuleg amma" eftir Gunnu Stellu er hjartnæm og fyndin barnabók sem segir frá ömmu sem hoppar á trampólíni, gerir kollhnísa og getur borðað ótrúlegt magn af nammi. Það sem er hinsvegar farið að gerast hjá ömmu í dag er að hún farin að gleyma. Amma er með Alzheimer.

Í bókinni eru skemmtilegar og fyndnar sögur af ömmu, byggðar á sönnum atburðum en móðir Gunnu Stellu er með Alzheimer. Sagan er sögð frá sjónarhorni barnabarns sem deilir gleði, hlátri og kærleika með ömmu sinni á einlægan hátt.

Auk þess að vera skemmtileg lesning er bókin fræðandi. Hún útskýrir Alzheimer-sjúkdóminn á einfaldan hátt og hjálpar börnum að skilja hvað það þýðir þegar ástvinur byrjar að gleyma.

18/12/2025

Jólapistill forstjóra 🎄
Á aðventunni gefst okkur oft tækifæri til að staldra við, líta yfir farinn veg og velta fyrir okkur því sem skiptir raunverulegu máli í lífi og starfi. Árið sem er að líða hefur verið viðburðaríkt hjá Heilbrigðisstofnun Suðurlands (HSU) og líkt og í samfélaginu öllu höfum við fundið fyrir bæði áskorunum og tækifærum sem kalla á samstöðu, seiglu og skýra framtíðarsýn.

Heilbrigðiskerfið er samofið lífi fólks á öllum æviskeiðum og á hverjum degi mætum við fjölbreyttum þörfum einstaklinga og fjölskyldna. Það eru forréttindi að fá að starfa í þjónustu þar sem mannleg tengsl, fagmennska og ábyrgð skipta sköpum. Um leið er ljóst að verkefnin eru krefjandi, breytingar hraðar og kröfur til þjónustunnar sívaxandi. Í þeim raunveruleika skiptir máli að horfa ekki aðeins á hindranir heldur einnig á þau tækifæri sem felast í nýjum lausnum, samstarfi og áframhaldandi uppbyggingu.

Á Suðurlandi heldur íbúum áfram að fjölga og samfélagið þróast hratt. HSU hefur á árinu lagt ríka áherslu á að styrkja innviði sína og þróa þjónustu í takt við þessar breytingar.

Áframhaldandi þróun þjónustu HSU endurspeglar skýra sýn um að færa heilbrigðisþjónustuna nær fólki og styðja við heilsu og vellíðan á öllum æviskeiðum. Þar felast bæði uppbygging þjónustu í heimahúsum, svo sem Heimspítali HSU og nýjungar í öldrunarþjónustu, ásamt aukinni áherslu á forvarnir, lífsstíl og heilsueflingu með eflingu lífsstílsmóttaka.

Með þessari nálgun leggur HSU sitt af mörkum til samfélagsábyrgðar með því að styðja fólk til virkrar þátttöku í eigin heilsu og draga úr þörf fyrir íhlutandi meðferðir til framtíðar. Nýsköpun og markviss þróun þjónustunnar byggir á þekkingu, trausti og öflugu samstarfi starfsfólks og endurspeglar þá sýn að heilbrigðisþjónusta þróist í takt við þarfir fólks og þær aðstæður sem samfélagið býr við hverju sinni. Þessi sýn endurspeglast í nýrri framtíðarstefnu HSU, þar sem áhersla er lögð á að vera tengslanet heilsu og velferðar á Suðurlandi og eftirsóknarverður vinnustaður.

Grunnurinn að allri þessari vinnu er þó fólkið. Starfsfólk HSU er fjölbreyttur og öflugur hópur sem sýnir daglega fagmennsku, sveigjanleika og mannúð við oft krefjandi aðstæður. Ég vil þakka starfsfólki HSU innilega fyrir mikilvægt framlag á árinu og þann metnað sem endurspeglast í störfum þeirra. Án þessa öfluga hóps væri ekki hægt að veita þá þjónustu sem samfélagið treystir á.

HSU nýtur einnig mikils trausts og velvilja í samfélaginu og er það ekki sjálfgefið. Samstarf við sveitarfélög, fyrirtæki, félagasamtök og einstaklinga skiptir sköpum og vil ég þakka öllum þeim sem hafa stutt við starfsemina á árinu fyrir gott samstarf og samhug.

Þegar við horfum fram á veginn er ljóst að áskoranir munu áfram fylgja okkur, en jafnframt bíða ný tækifæri. Með sameiginlegu átaki, skýrri framtíðarsýn og áframhaldandi þróun er ég sannfærð um að HSU muni halda áfram að styrkjast sem burðarstoð heilbrigðisþjónustu á Suðurlandi og góður vinnustaður.

Að lokum óska ég ykkur öllum gleðilegra jóla og þakka fyrir samstarfið á árinu sem er að líða. Megi hátíðarnar færa ykkur hlýju og góðar stundir með ykkar nánustu og megi nýtt ár færa okkur öllum von og kraft til áframhaldandi verka.

Jóla- og nýárskveðja,

Díana Óskarsdóttir

17/12/2025

Lausar stöður hjúkrunarfræðinga
https://island.is/starfatorg?institution=Heilbrig%C3%B0isstofnun+Su%C3%B0urlands