https://www.facebook.com/DY-Medical-103426645391763/

Der Allgemeinarzt..The General Doctor, Damascus (2026)

26/09/2021

تصويت بخصوص بوست اليوم الي رح ينزل ع ال9 مساءً..

😯: الأمراض والأعراض المرتبطة بتغير المناخ وكيفية الوقاية منها.
🌸: داء المشعرات المهبلية// Trichomoniasis..

واضح شو رح يكون البوست نظراً لأهميتو😄😄
شاركونا رأيكم 🙆🏻‍♂️❤️

25/09/2021

-كلّ شخص منّا الله ميزو بصفة وشخصيّة خاصة فيه..فما بالك بأشخاص بيعيشوا بينا ومعنا الله ميزون بمتلازمة بتسمى بمتلازمة الحب..او متل ما بتسمى ..

-شخصين متزوجين مقبلين على الإنجاب ولكن عمر المرأة كان كبير وقريب من سن الإياس دريوا أنو الأم حامل بطفل معو متلازمة داون..ففكرت تعمل #إجهاض الو💔 يمكن خايفة عليه يمكن خايفة على نفسها بأنو تعيش مع شخص بيحتاج رعاية واهتمام خاص..

- هو اضطراب سببه الانقسام غير الطبيعي للخلايا مما يؤدي إلى زيادة النسخ الكلي او الجزئي للصبغي 21..ولازم نذكر انو هو أشيع اضطرابات الصبغيات وبتسبب إعاقات تعلم عند الأطفال بالإضافة لإعاقات أخرى..قلبية او هضمية..

- ولازم نذكر انو هو اي المتلازمة بتتفاوت بحدتها بين المصابين..1)فمنهم بيكون جميع الخلايا تحتوي على 47 صبغي بدل 46 (الطبيعي للإنسان العادي) وهاد بيشكل 95% من حالات المتلازمة..

2)منهم بتقتصر على نمط يسمى بالفسيفسائي حيث بعض الخلايا فقط بتحتوي على نسخ إضافية من الصبغي 21 (الصبغي الذي يحدث تثلثه هذا الاضطراب) وهالحالة بتصير بعد التخصيب..يعني بعد الإلقاح..

3) النمط الأخير يسمى متلازمة داون بالتبدل الصبغي وفيها بيصير اتصال ما بين جزء من الصبغي 21 وصبغي آخر خلال الحمل أو قبله.. الصبغي 21 بيكون طبيعي يعني نسختين منه..ولكن توجد مواد وراثية إضافية من الصبغي 21 مرتبطة بصبغي آخر..

-يمكن لذات السبب بنلاقي انو مصابو داون بيكونوا قادرين على الإنجاب والحب والتزاوج لا بل انو بتطرأ عليون نفس التغيرات الهرمونية والجسدية والعاطفية الي بتطرأ على شخص طبيعي..لذلك الجواب على السؤال (هل يستطيع مرضى داون التزوج والإنجاب) الجواب هو نعم.. عكس ما كان شائع انو مو بالإمكان.

-أما المشكلة الأكبر بخصوص هالمتلازمة بتكمن انو كيف نخلي ولادنا المصابين يندمجوا بالمجتمع وما يحسوا بأي فرق او نقص تجاهون.

-وهاد الأمر بدو وعي من الأهل وما يتطلعوا عليون بعين الشفقة بالعكس يعاملوهم حسب أعمارهم متلهم متل اي شخص ( طبعاً ما عدا حالة المصابين الشديدة الي بيعانوا من مشاكل ذهنية) ..وبيتطلب أمر المعالجةمساعدة ما بين معالجين متخصصين لمتابعة الحالة وكمان معالجين سلوكيين ومعلمين..ليقدروا يخليون يندمجوا مع رفقاتهم..

-ويعملوا مجموعات من العوائل الي بيكون عندهم طفل مصاب ليستفيدوا من تجارب بعض..ونقتنع قبل كل شي انو مرضى داون بإمكانهم يعيشوا حياتهم ويمارسوا أعمال متنوعة بالحياة العملية..

-وما نحسسون انو في فرق..بالعكس متلون متلنا بكل شي..وحسب المتوفر وحسب طاقاتون وإلإرادة تبعون..وقت يلاقونا عم نعطيون اهتمام زايد اكتر من اخواتون الصغار بتشكل خلفية عندون لبكرة انو هني أقل منون..وبيصيروا يطلبوا الاهتمام مع انو ما بيكونوا بحاجتو..بس هيك عوّدوه..

-للأسف لحد اليوم ما قدرنا نتخلص من مسميات ما بتنمّ غير عن تنمر وتحجّر عقل صاحبها..''منغولي//متخلّف//مجنون'' مع أنو أصاحبها متل ما ذكرنا بيتمتعوا بقلب ما بيعرف الحقد وما بيعرف إلا يحب..وللعلم تسمية منغولي مانها إساءة قدر ما هي توصيف الها..لانو جاي من ورا بلد اسمها منغوليا بشرق آسيا..كتوصيف للأجفان الزائدة الي بيمتلكها شعب هداك البلد..ولكن لطالما نحن بناخد الامور بغير منحاها كان لازم تكون شي سلبي..

-الإنجاب بعد عمر ال40 بالنسبة للمرأة بيزيد فرص الأمراض الوراثية ومنها متلازمة داون.. لأنو بويضات الأنثى بتلاقي صعوبة بالانقسام وعادة بتنقسم بشكل ش*ذ غير طبيعي..

-وإذا صار وكان الولد معو ظرف صحي ما عم يعيقو من أنو يمارس حياتو بشكل طبيعي..بس لمجرد شكلو كان مختلف..حرام ننهي حياتو بس لانو خايفين بكرة يتعب بينما ممكن يمارس حياتو متلو متلنا..

-الإعاقة بعمرها ما كانت إعاقة جسد متل ما هي إعاقة فكر ورأي..وتقبل الآخر على اختلاف شكلو هي ميّزة ومهارة مو الكل بيتمتعوا فيها..

-وبالأخير كل الحب لأصحاب متلازمة الحب♥️♥️
---------------------------------------------------------------------
----------------------------------------------
المصادر:
1) https://www.moh.gov.sa/HealthAwareness/EducationalContent/BabyHealth/Pages/005.aspx

2)https://www.mayoclinic.org/ar/diseases-conditions/down-syndrome/symptoms-causes/syc-20355977

24/09/2021

-إلي بالصورة السجقات او ما بتسمى بالمصارين أو متل ما مذكور بالصورة ممبار بلهجة أهل مصر ...
بعد ما ننضفو ولقينا حبوب بحجم حبة الحمص متل هي..

-لو شفت هالمنظر معناها أوعى ثم أوعى تنطبخ وتتاكل هالقطعة سواء هي او اي قطعة لحم تانية من الدبيحة نفسها..لانو الي بالصورة هو مرض سلّ.

-ومرض السُّل ما بيروح بالسلق أو الطهي..
ولازم تتطهر الايدين منيح وتتأكد إنو ما في أي جرح موجود
وتتخلص فوراً من السكينة والصحن وأي أدوات استخدمتها في تنضيف الدبيحة..

-والاجزاء المصابة لازم تنحرق أحسن ما ترميه في الزبالة مشان ما ياكلوا شي قط او كلب بالغلط..

-ودمتم بخير وصحة وسلامة♥️

منقول من صفحة الطبيب

23/09/2021

-بوست اليوم رح يكون مختلف شوي..رح نحاول نذكر أشيع عادات خاطئة شائعة بالمجتمع.. وإذا عجبتكم الفكرة فينا ننزل كل خميس هيك منشور😄..باسمه تعالى نبدأ🙆🏻‍♂️:

-❌:كثرة #الإلعاب // عند الأطفال بيكون السبب الإصابة بأمراض الديدان..

- ✅ : كثرة الإلعاب عند الأطفال مو بالضرورة يكون من ورا إصابة طفيليّة..ممكن يكون ببساطة التهاب لوزات او إصابة بالغدد اللعابية لهيك لازم ننفي الأسباب التانية قبل ما نفكر بالإصابة بالديدان..

-❌:الاعتقاد السائد بأنو لازم نفرشي سناننا مباشرةً بعد كل وجبة طعام.

-✅: هلأ المفروض نفرشي سناننا مرتين ع الأقل يومياً خاصة بالمسا..ولكن لازم ننطر شي نص ساعة بعد كل وجبة لانو بعض الأطعمة متل البرتقال والليمون بتحتوي مواد حمضية بتأثر على الطبقة الخارجية للأسنان..وغسيلها بعد الأكل مباشرةً بيضعفها..

-❌: مر عليك إسبوع مليان فاينلات واختبارات وعانيت خلال هالاسبوع من قلّة النوم..فخبرت حالك انو رح تعوض نقص النوم بالعطلة.

-✅: أثبتت الدراسات الحديثة أن النوم لفترات طويلة خاصّة خلال الإجازات بيكون الو أضرار صحيّة على المدى الطويل..ومنها الإرهاق والتعب والصداع المستمر..فالصح انو نعوّد أجسامنا (حسب احتياج كلّ منها) على مدة نوم معيّنة بكل يوم..

-❌: العيلة كلها مجتمعة وصار العصر جدك طلب منون يجيبوا فواكه لتروقوا عليها..وأصر انو التفاح يتقشر قبل ما يتاكل..

-✅: التفاحة الكاملة مع قشرها بتحتوي 40% أكثر من فيتامين A و25% زيادة من البوتاسيوم..و100% أكثر من كريستين التفاح وهي المادة المضادة للأكسدة الموجودة فيه المفيدة لصحة القلب.

-❌:شب رياضي بيخاف على صحتو وما بيشرب إلا من المي المعدنيّة المعباية بقناني لانو بفكرو هي الأنضف..

-✅: أثبتت دراسات علمية حديثة بعد اختبار أكثر من 100 نوع مختلف من المياه المعدنية أنو ببعض الأحيان يمكن تحتوي على مواد كيماوية وربما بعض أنواع البكتيريا متّهمة بإحداث أمراض خطيرة في مقدمتها السرطان لهيك الأفضل شرب مياه الحنفية بعد استخدام المرشح لتنقيتها..

-ودمتم بخير وسلامة ♥️
------------------------------------------------------------------------------------
- المصدر:
محاضرات كليّة الطب البشري في جامعة دمشق..

22/09/2021

-دانيا طالبة صف عاشر بلشت تعاني بهالعمر من مرض الجمال او متل ما بيسمى البهاق..قررت تبطل من المدرسة لأنو رفقاتها سمّوها البنت الي معها برص..وضلّوا يتنمروا عليها..وكل هالشي لأنو بشرتها لونها مختلف شوي (بس انو الجلد هو هو)..

-رح نحاول اليوم نسلّط الضوء على #البهاق // Vitiligo # كمرض بيصيب 1% من مجموع سكان الكرة الأرضية..لهيك فهو بيعتبر شائع نوعاً ما

- كل شخص منّا بشرتو بتحتوي على عدد محدد من خلايا بتسمى الخلايا الميلانينية وهي المسؤولة عن تحديد لون بشرة كل واحد منّا من ورا الأجسام الميلانيّة الي بتحتويها..مع العلم انو جميع أنواع البشر على اختلاف أعراقهم وجنسياتهم بيكون عندهم نفس عدد الخلايا الميلانينية 😄

-بالبداية لازم نعرف انو البهاق مرض مكتسب وغالباً بيطلع قبل عمر ال20 سنة.. بتتميز انو بيكون في بقع فاتحة على أرضية غامقة او العكس.. للأسف متلو متل بقية الأمراض المناعية الذاتية مالو علاج ناجع وفعّال لانو المسبب غالباً بيكون من الجسم نفسو
ومنذ القدم كانت نظرة البشرية لأصحاب هالمرض نظرة دونيّة وبيقرفوا منون وممكن توصل لحد النفي من البلاد لأصحاب هالبشرات..لانو كان سائد الاعتقاد أن السبب هو مس شيطاني أو أصحابون مو انقياء ومن سلالة الشيطان..

-لازم نعرف انو بهالمرض بينقص عدد الخلايا الميلانينية المنتجة للميلانين بأماكن معينة ومحددة بالجسم..والنظرية الي بتقول انو هو مرض مناعي ذاتي أنو غالباً بيترافق مع أمراض مناعية ذاتية أخرى..والمرض بيكون أوضح عند أصحاب البشرة الغامقة لتبلش بعد تعرّض الجلد المكشوف للشمس او ببداية الربيع لتبلش تظهر البقع.. والي ممكن انو تتوسع تدريجياً..

-في نظرية بتقول انو ممكن يظهر البهاق من ورا سبب انفعالي( لهيك ياريت نتروى ونهدى وما نعصب بسرعة🌚🌚) بنفس الوقت بتقول الأبحاث انو مالها علاقة أبداً بالأسباب النفسية..وكمان البهاق ما بيدل على نشاط سرطاني كامن
العوامل المتّهمة بالتسبب بالبهاق هني:

1) العوامل المناعية الذاتية.
2) العوامل الوراثية..
3)عوامل عصبية..
4)أسباب عاطفية وجسدية..

-أما العوامل الي بتزيد من خطورة الإصابة فهني:

1) وجود فرد مصاب بنفس العائلة.
2) وجود تاريخ عائلي لأمراض مناعية ذاتية..
3) الإصابة بسرطانات الجلد او سرطان الغدد اللمفاوية..

-وبقي ننوّه أنو متل صعوبة علاج باقي الأمراض المناعية الذاتية فالبهاق بيشترك معها بهي النقطة..حيث أكتر شي ممكن تعملو الأدوية سواء كورتيزون او غيرها أو حتى العلاج بالأشعة فوق البنفسجية:هي تخفيف من حدة التباين ومحاولة إزالة الفرق ..
بالإضافة لعمليات الترقيع باستخدام جلد صحي..او باستخدام البثور او حتى باستعمال تقنية الليزر لمحاولة توحيد اللون نحو درجة واحدة.

-ومشان نوقي حالنا من البهاق فطالما مو معروفة الأسباب الكامنة وراه لازم نتخذ الاحتياطات اللازمة للوقاية من أشعة الشمس.. ونستعمل مطريّات للجلد وقت يتشقّق..وندير بالنا على صحة جلدنا.

- بالنهاية الكل سواء..وهالمرض الي ميّز هاد الشخص مانو عائق قدامو ليمارس حياتو بالشكل الطبيعي متلو متلي متل اي حدا تاني..العائق بيكون بيعقول الناس الي بتفكرو عيب او علة لانو شي مو بايدو..

-ودمتم بخير وسلامة ♥️
------------------------------------------------------------------------------------
المصدر:
1) محاضرات مادة الأمراض الجلدية والزهرية في جامعة دمشق.

2) https://www.webteb.com/dermatology/diseases/%D8%A7%D9%84%D8%A8%D9%87%D8%A7%D9%82

21/09/2021

-نجاح أخدت لجارتها سميرة سائل جلي جديد كان منعملو ضجّة كبيرة قبل ما ينزل خصوصاً انو أرخص من باقي الأنواع.. ولكن بعد يومين بتتفاجأ سميرة انو طلعت على ايديها متل البثور وبلشت تتشقق وتصير حمرا مع ألم.. وطبعاً كان من ورا سائل الجلي رخيص الثمن سيء الجودة..

-الحالة الي صارت مع سميرة مانها نادرة لا بل بتصير كتير ومنتشرة بين ستّات البيوت والي هي نوع من أنواع الإكزيما أو التهاب الجلد Eczema #..والي بتسمى بحالتنا بأكزيما ربّات البيوت// Housewives' Eczema.

-متل ما شفنا بحالتنا بتكون على إثر استعمال متكرر لمواد التنضيف فغالباً بتصيب الأمهات وهي حالة شائعة بتصل نسبتها إلى 10% بين ربّات البيوت بالولايات المتحدة الأمريكية..

-ولازم نشير انو هالحالة مانها معدية مع انو بتصير من ورا التعامل مع مواد متل المي ومواد كيميائية موجودة بمواد التنضيف أثناء قيام المرأة بمهام البيت بشكل متكرر..ولازم نشير انو أكزيما ربّات البيوت ما بتترافق مع حكة عكس باقي أنواع الأكزيما..

-بل بتتقصر أعراضها على:
1) ترقق وتقشر بجلد الأصابع الثلاثة الأولى( لانو الأكثر استعمالاً)..
2) ظهور الاحمرار..
3)الألم.
4) بحالات متقدمة ممكن يحدث يتشقق الجلد وبتأدي للنزف.

-وتجدر الإشارة كمان انو لأكزيما ربات البيوت نوعين: *رطب و*جاف ويمكن انو يطلعوا تنيناتون سوا عند الشخص نفسو..أما *النوع الحاد فهو الرطب الي بيظهر بشكل متكرر دوري من ورا استعمال المواد المنظفة.

- والجاف أو المزمن فهو النوع الي بيظهر مرتين او تلاتة خلال 12 شهر بنفس الأعراض سابقة الذكر
ولازم ننوه أنو الأكزيما بتلعب عدة عوامل بزيادة خطر الإصابة فيها..متل *العوامل الوراثية و*وجود ربو لدى السيّدة ووجود أيضاً التهاب جلد تحسسي وحمّى القش.

-بالنسبة للتدابير العلاجيّة الخطوة الأولى والمهمة تجنّب المهيّجات والمثيرات قدر الإمكان..والحرص على استعمال منظفات بتحتوي كميات قليلة من المواد الكيميائية
وأكيد اتباع تعليمات وإرشادات الطبيب المختص بعد ما يتأكد التشخيص.

-فينا كنوع من أنواع الوقاية نلتزم بلبس كفوف مصنوعة من الفينيل نحن وعم نشتغل بالبيت ونحرص انو بس نغسل ايدينا نشطف المنظف قدر الإمكان

-وبالأخير الصحة فوق اي إعتبار..ودرهم وقاية خير من قنطار علاج.. إني جيب منتج موثوق معروفة مكوناتو أحسن من اني عرّض صحتي لشي ماني عرفانة شو بيحتوي وممكن يضرني أكتر ما انو ينفعني..

- ودمتم بخير وسلامة أمهاتنا الأعزاء ♥️
---------------------------------------------------------------------
المصدر:
1) محاضرات مادة الأمراض الجلدية والزهرية في جامعة دمشق..
2) https://mawdoo3.com/%D9%85%D8%A7_%D9%87%D9%8A_%D8%A7%D9%83%D8%B2%D9%8A%D9%85%D8%A7_%D8%B1%D8%A8%D8%A7%D8%AA_%D8%A7%D9%84%D8%A8%D9%8A%D9%88%D8%AA

21/09/2021

تصويت بخصوص بوست اليوم الي رح ينزل ع ال9 مساءً..
😯: الجيارديا لامبيليا كعدوى مدرسيّة..
😢:عدو ربّات البيوت الأول (الأكزيما)..
شاركونا رأيكم 🙆🏻‍♂️🖤

20/09/2021

-محمد شب عشريني عم يعاني من يومين من نفث الدم (Hemoptysis) اي بصق الدم.. خطر على بالو انو ممكن معو سل! خصوصاً انو اهلو قالوا ذات الشي.

-والمفهموم الون انو نفث الدم بيعني سل.. وهاد مو صحيح دائماً..بل يمكن آخر شي يخطر على بال الطبيب بتشخيص نفث الدم هو السل.

-ولانو كان السل معدي ف الناس اعتادت تتجنب الي بيصير معون نفث دم ولانو كان سائد انو مالو علاج
خصوصاً من ورا الحالات الي بتجي على إسعاف المواساة..كل حالة نفث دم عند الناس هي سل قولاً واحداً..ولكن غلط هاد الشي وكتير ورح نشوف ليش.

-لانو نفث الدم بيصير من ورا أمراض عديدة..ممكن اغلبها الأمراض الرئوية (غير السل طبعاً):
*التهاب القصبات//*توسع القصبات//*ذات الرئة//*فطر الرشاشيات//*سرطانات الجهاز الرئوي وخاصةً سرطان القصبات بالإضافة لأمراض مناعية ذاتية.

-طبعاً بالأمراض الي انذكرت..ما بيكون نفث الدم لحالو فمثلاً:

-سرطان القصبات المريض بيكون عندو بالإضافة لنفث الدم *نقص وزن غير مفسّر و*تبقرط بالأصابع(رح نحكي عن التبقرط clubbing بغير بوست ان شاء الله) و*سعال مزمن والمريض غالباً بيكون مدخن..

-أما بتوسع القصبات المريض بيكون عندو سعال مع قشع (بلغم يعني) بكميات كبيرة + تبقرط وبتصير معو إنتانات رئوية متكررة..

- الأمراض الي انذكرت بالإضافة للسل الها علاج خاص بكل وحدة منها ( علاج السل غالباً رباعي او ثلاثي يعني أربع انواع أدوية او تلاتة) ما عدا سرطان القصبات صعب التدبير وخاصة بالمراحل الأخيرة لأنو بيكون تدبيرها بالحالة هي تلطيفية فقط ولإطالة بقيا المريض💔

- لهيك مرة تانية اذا شكالك حدا انو عم ينفث دم لا تقلو معك سل وتبعد عندو..امسك ايدو وخدو عند أقرب طبيب صدرية او طبيب أسنان لانو ببساطة ممكن تكون نزف لثة بسيط وما عم يبين معو😄

-ودمتم بخير وصحة وسلامة ♥️
------------------------------------------------------------------------------------
المصدر:
محاضرات مادة المهارات السريرية بجامعة #دمشق

19/09/2021

-التهاب المفاصل الرثياني هو مرض التهابي مناعي ذاتي جهازي(الاسم من أطول أسماء الأمراض🌚) بمعنى انو بصيب أجهزة وأعضاء مختلفة بالجسم مترقي ومتطور يعني بيكون مخرّب للمفاصل كما انو بصيبها بشكل متناظر يعني بيصيب الجانبين سوا.

- بالإضافة لكونه أحد الامراض الشائعة بنسبة 1% بالمجتمع بصيب النساء اكثر من الرجال ب 3 ل 4 اضعاف مع ذورة الاصابة بالعقد الرابع من العمر.

-متل ما قلنا هو مرض مناعي ذاتي أسبابو المباشرة غير واضحة لكن في عوامل متهمة بحدوثه واللي هيي:

1)عوامل خارجية انتانية وتدخين
2)عوامل داخلية متل السيتوكينات -الوراثة و الهرمونات

-بداية المرض بتكون بشكل فجائي ولكنه مزمن.. وبشكل متناظر وممكن يبدأ بشكل معاود والمفصل المصاب بكون:
*ساخن.
*متورم.
*ألم وإيلام ويبوسة صباحية اكتر من نصف ساعة.

-ممكن انو يترافق مع اعراض عامة متل :
*الوهن
*الحرارة
*تعرق ليلي
*نقص وزن *آلام عضلية

-هاد المرض بيصيب المفاصل المحيطية الصغيرة واكتر اماكن توضعات هالاصابة هيي:
-مفاصل اليدين السنعية السلامية وما بين السلاميات الدانية للاصبعين التاني والتالت بلاضافة للمعصم والكاحل والمفاصل المشطية السلامية وبين السلاميات في القدمين يعني😄 المفاصل الي بتوصل بين أصابع الايد بالايد..والمفاصل الي بتوصل أصابع القدم بالقدم.

-الإصابة بتم تشخيصاً بالاعتماد عالدلائل السريرية مع تحاليل مخبرية وصور شعاعية تثبت الاصابة.

-بعد كل هالحكي عن الداء الرثياني لا بد نوصل للنقطة الأهم واللي هيي العلاج و مع الاسف لا يوجد بعد اي علاج شافي للداء الرثياني☹️ وكل هدف العلاج هوة الحصول على فترة هجوع للمرض اي تسكين شدة الأعراض وتخفيف شدة الهجمات و نقلل من تكرارها ومن اثارها المشوّهة على المفاصل و منذكر من هالعلاجات:

1)الستيروئيدات القشرية (ومن المهم التاكد على اعطائها بجرعات صغيرة) وبالمشاركة مع غيرها من الأدوية لنحصل على نتائج افضل بلاضافة إلى

2)مضادات الملاريا التركيبية

3)الديبنسليامبن وأملاح ااذهب والسيلازوبيرين (وبدنا ننوّه على أهمية مراقبة وظائف الكبد +عناصر الدم عند استخدام هالدوا)

4)ما مننسى طبعا الميتوتريكسات اللي هوة الاكثر شعبية واستخدام في علاج المرض.

-أما اخيراً وليس آخراً رح نذكر الأدوية البيولوجية (اضداد العامل المنخر للورم a( وهيي أجدد أنواع الادوية المستخدمة للعلاج و اللي بتقوم بإبطال عمل السيتوكينات الالتهابية اللي متل ما حكينا سابقا هيي احد الاسباب المقترحة للداء الرثياني.

-اما اخيراً اخيراً هالمرة😅ما ضل شي نحكيه الا انو الله يبعد عننا جميعا كل الامراض و لهيك ونظرا لعدم تحديد الاسباب الاساسية للداء الرثياني بيترتب علينا نبعد عن الاسباب المقترحة اللي ذكرناها ببداية البوست لنقلل فرص حدوث المرض وتبقوا بخير انشالله❤️
------------------------------------------------------------------------------------
المصدر:
محاضرات مادة الباطنة الرثوية بجامعة تشرين.

18/09/2021

-محمود مدخن شره..شخّص عندو الدكتور داء رئوي انسدادي مزمن أو متل ما هو معروف بالCOPD..
ولكن محمود استغرب لانو سبق وشخّصلو دكتورين قبل انو معو تضيق قصبات وواحد شخّص عندو التهاب رئوي.

-من اسمو الداء الرئوي الانسدادي المزمن هو مرض بيصيب الرئتين وتحديداً الأسناخ الرئوية (وحدات التبادل الغازي) وبتتضيق ..وبتصيب القصبات والشعب الهوائية وبيضيقها.. أما كلمة مزمن فهي لأنو المرض بيصير على مدى السنين ما بيطلع هيك فجأة وبين ليلة وضحاها.. والمتّهم الرئيس بهاد الشي هو #التدخين.

- طبعاً الطبيب ما شخّص لمحمود داء رئوي انسدادي مزمن من دون ما يطلب منو عدة فحوصات وتحاليل..ومنها اختبار وظائف الرئة شهيقاً وزفيراً..أشيعها *اختبار قياس النفس..كمان طلب منو *صورة صدر بسيطة بالأشعة السينية.. بالإضافة *لقياس غازات الدم الشريانية ليشوف مدى كفاءة الرئة بتزويد الدم بالأكسجين والتخلص من ثنائي أكسيد الكربون.
-بالاضافة *لفحوص مخبرية عامة لا يعتد بها لتشخيص المرض ولكن بتكون بالعادة موجّهة لسبب المرض وتنفيه وتأكدو بدرجة مساعدة..

- أما بالنسبة لسؤال ليش تشخّص المرض عندو بشكل خاطىء..فللأسف الCOPD بيتم تشخيصو بمراحل متأخرة.. وغالباً بيصير تداخل بين الأعراض فبيتم التوجه لأمراض تانية..

- التدبير بيكون بالدرجة الأولى والأساسية بترك التدخين(المسبب الأوحد والأعظم لأغلب الأمراض الصدرية) بجميع أنواعه..دخان..شيشة..سيجار..نبات القات..اركيلة..لانو الكل عندها ذات التأثير..
-وهيك شي بيساعد انو ترجع وظيفة الرئة طبيعية نوعاً ما وبتحسن من صحة المريض عموماً..

- الجانب الدوائي بيكون على شقين أساسين:
1) الموسعات القصبية والي بتكون عادة بشكل إنشاقي.
2) الستيروئدات المنشقة لتخفف الالتهابات..
وطبعاً في أدوية بتكون خليط من التنين..

- بتكمن صعوبة العلاج بترك التدخين بالدرجة الأولى.. لأنو شخص قضى عمرو مدخن عم تجبرو يترد هالعادة بكل بساطة..ف بيقدر يستعين بالطبيب ليوصفلو منتجات بديلة بتحتوي على النيكوتين..لتساعدو بأنو يترك..

-خطورة الCOPD بتكمن انو ممكن تتطور لالتهاب بالقصبات..وممكن تتحول لأنواع مختلفة من السرطانات على المدى البعيد (عافاكم وإيانا الله) في حال عدم ترك التدخين..وتأخر التشخيص..وكمان بتزيد الحالة سوءاً لما بتكون مترافقة مع أمراض صدرية رئوية تانية..

-بالنهاية صحتك بالدنيا واذا ما همتك كرمالك لازم تهمك كرمال الي حواليك الي بيحبوك..لا تنهيها ولا تسيء الها بالدوام على شي طلب الدكتور منك تتركو..لانو صدقاً الدقيقة مع أهلك بتسوى الدنيا♥️

- ودمتم بخير وسلامة انتو وحبابكم♥️
---------------------------------------------------------------------
المصدر:
https://www.mayoclinic.org/ar/diseases-conditions/copd/diagnosis-treatment/drc-20353685

Der Allgemeinarzt..The General Doctor

26/09/2021

25/09/2021

24/09/2021

23/09/2021

22/09/2021

21/09/2021

21/09/2021

20/09/2021

19/09/2021

18/09/2021

Address

Telephone

Website

Alerts

Shortcuts

Share

Category