08/11/2022
.. #طوارىء
جالنا فى طوارئ مستشفى عين شمس التخصصي من كام سنة طالب بكلية الهندسة، عنده تشنجات و اضطراب فى درجة الوعي، عملنا كل الفحوصات الممكنة كلها ما وصلتش للسبب، و أدينا كل العلاجات بشكل تحفظي، لغاية ما ظهر عليه رهاب الماء و ده عرض مميز جدا لمرض السعار، سألنا اهله اتعض من كلب او قطة قالوا لأ، و بعدين والدته قالت لي من ٦ شهور قطة شارع خربشته فى رجله، و سألوا الناس افتت لهم ان الخربشة مش بتنقل مرض، و طهروا الجرح ببيتادين، مش قادرة أنسى اللحظة دي، لحظة ما قلت لها احتسبيه عند ربنا دي مسألة ساعات مش اكتر.. الله يرحمه و يسامح اللي أفتى فتوى قاتلة.
١، السعار ينتقل عن طريق الخربشة من حيوان مسعور مش العض بس...
٢، حتى لو الجرح ما جابش دم، فرصة انتقال المرض موجودة لأن الفيروس بيتنقل عن طريق النهايات العصبية فى الجلد مش الدم
٣، الحيوان المسعور ممكن يكون حامل للفيروس و لسة ما ظهرش عليه كل اعراض السعار، ما نقدرش نثبت او ننفي ان الحيوان مسعور من مظهره و سلوكه..
٤، لو العضة شديدة او ناحية الوجه و الرقبة لازم يتاخد المصل كمان (اجسام مضادة) مع التطعيم..
٥، ممنوع خياطة الجروح نهائيا، و لو فى الوجه بنحقن مصل فى الجرح نفسه.
٦، فترة الحضانة احيانا بتاخد شهور حسب عمق الإصابة و مكانها، و كمية الفيروس
٧،لو الحيوان عاش بعد العضة ما ماتش و عدى وقت يبقى الحيوان مش مسعور
مفيش هزار لو الحيوان مسعور و اللي اتعض ما اخدش التطعيم حيموت بنسبة مية فى المية
التطعيم مجانا فى الحميات او مستشفى منشية البكري او مستشفى الزاوية العام و المنيرة العام و مستشفي الشروق العام..
منقول عن
Dr. Mona Mokhtar
مديرة وحدة الامراض العصبية بمستشفى عين شمس التخصصي
