د.شيماء عويضة Dr. Shaima Oweidah

06/12/2025

"رحل اللص ، أخذ كل شيء ، ما عدا القمر عند نافذتي " ريوكان

شفت هالجملة بمتحف اللوفر بأبو ظبي (عقبال ما اشوف اللوفر الاصلي) ، بعرفش ريوكان (طلع شاعر او راهب ياباني بوذي حسب جوجل) ، بس لفتت نظري عبارته كتير ..

لمحبي القمر بظن هالجملة معبرة كتيير وما بدها شرح ..

ولمحبي الكأس المليان كمان هالجملة بتعبر عنهم ..

ولكل لص ، ما فيكم تخطفوا منا القمر 😉
وأكيد مش قصدي اللص .

03/12/2025

قلتلها السلام عليكم ، يعطيك العافية ، وبلشت أصور .. كنت سعيدة بطريقتها وطولة بالها بصنع هاللقيمات مع كل العجقة اللي حواليها .. ناس من كل الجنسيات واقفين حوالينها يستنوا اللقيمات احتفالا باليوم الوطني..

ابتسمت ..
فناولتني بايدها من بين كل الحاضرين هاللقيمتين بكل حب ❤️

ما أحلى سلامنا اللي بكسر كل حواجزنا وحدودنا .

كل عام وانت بخير يا حجة

01/12/2025

لما تدرك انه خالق الأكوان العظيم أعطاك فسحة لقصر الصلاة بالسفر ، مع انها أول وأهم العبادات .. بتفكر كيف لرب رحيم يتركك .. ما يسمعك .. ما يحبك؟

احنا ظلمنا أنفسنا فاغفرلنا يا رب ..
قولوا آمين .

29/11/2025

إجازة خاطفة

28/11/2025

بعلاقتك مع ربنا ..
المشكلة مش بأسئلتك .. شكوكك.. مخاوفك ،
المشكلة لما يمر السؤال بدون ما تفكر فيه ، تتجاهله وتطنشه ..وتخاف من سؤالك .

أسئلة مثل : ليش أنا يا رب؟ ليش هيك صار معي؟ ليش مش زابط شغلي ..زواجي.. اولادي؟

هي أسئلة عميقة بإيمانك بالقدر ..
حرام ما تعالج هالشك ، وتلاقيله اجابات ..
كل الإجابات موجودة للي بيبحث ، بس بدك تلاقيها وتسقطها على حياتك وقلبك ..

الإيمان ما وقر في القلب ، يعني مش تحكي الحمد لله بلسانك وانت مش مصدقها بقلبك وكل كيانك ..

برجع بقلك .. معلش الحياة مكان اختبار ، ومتوقع تسأل وتشك أحيانا ، المهم تفكر وتجاوب ، وما تترك هالشك يتغلل فيك ويخرب إيمانك .

جمعة مباركة عامرة بالإيمان .

19/11/2025

شو احلى جملة انحكتلك بحياتك ومستحيل تنساها ؟!😍😁🫣

انا مثلا💁‍♀️😅
- اقسم بالله ما بتدفع 💸
- تعال كُل، وارجع نام 👩‍🍳
- بدك اياها دبل؟🌯
- نورت يا صبية 🫣

17/11/2025

اللي ما جرب الفايروس المنتشر هالاكم يوم يحمد الله 🤧😷🤒🤕

13/11/2025

10/11/2025

وجودك مع ناس من مستواك؛ أكبر نعمة انت مش مقدرها!!

مستواك مش في المظاهر، وكم حسابك بالبنك ، وشو السيارة اللي راكبها!

مستواك في طريقتك، في فهمك للحياة ، في تقديرك لنفسك وللي حواليك..

لما تكون مع ناس بتشبهك في الذوق، والفكر، والنُضج،
رح تحس إنك بخير .. مفهوم من غير ما تشرح ..

وهاي صدقني نعمة من ألطاف الله محروم منها ناس كتيير.

يلااا
#منشن للناس النعمة بحياتك ❤️

08/11/2025

زمان (مش زمان كتير😅) كنت أستمتع بفكرة يوم ما تعمل اشي ، doing nothing !
اليوم لاحظت انه هاي الفكرة بطلت ممتعة ، وقعدت أفكر بيني وبين حالي شو اللي اختلف ؟!

بالنسبة الي اللي فرق هو social media ..
اكتشفت انها بتدخلني بشعور انه لسه في شيء عم بينعمل ! ومش تسلاية أبدا ..
بتعطيني شعور اني بشتغل وأنا معطلة ..
متصلة بالناس وأنا هدفي أفصل وأريح ..!
بتعطيني قصص وأحداث وأخبار للناس وأنا هدفي أهدى وأكون مع نفسي بهاليوم !

ممممم هذا الاكتشاف خلاني أبحث شو الأمور اللي ممكن تساعدني أفصل بيوم doing nothing؟
طبعا القائمة تطول.. بس اللي بهمني منها ،
أصلي بهدوء وبآيات ما بقرأها عادة .
أزود بالسنن .
أقرأ قرآن بهدوء .
أتصفح كتاب جديد ..
أنوع بالأكل والشرب .. وأنام!
أفتح شغلة مسلية أحضرها ..
أرتب مكان من زمان تاركته..
ألعب رياضة خفيفة وما اطلع عالجيم.
أكتب وأحكي مع نفسي ..
وأهم نقطة : ما أخطط ولا أتحمس لشو بدي اعمل تاني يوم .. أعيش هاليوم لحاله بدون خطط ...

عندكم مقترحات تانية؟

06/11/2025

مدحك لأم بجروب أمهات المدرسة.. محتاج سوية نفسية😊
مساعدتك لزميل أصغر منك وتعليمه.. محتاج سوية نفسية

انك تنسب الفضل لأهله والنجاح لأهله .. انك تساعد بدون مقابل.. وتشجع الاقل منك .. وتشارك علمك وثقافتك مع اللي بحتاجها ..تبتسم لشخص عابر .. تشكر شخص بيعمل شغله ..

كل هاد محتاج سوية نفسية ..

قل لي كيف علاقتك مع الناس .. بقول لك كيف صحتك النفسية 😉