07/10/2021
មន្ត្រីក្រសួងជំរុញឲ្យអ្នកចិញ្ចឹមត្រចៀកកាំ វិនិយោគផ្ទះស្តង់ដា
ភ្នំពេញៈ ក្រសួងពាណិជ្ជកម្ម ជំរុញឲ្យប្រជាជនខ្មែរបង្កើនការវិនិយោគផ្ទះអភិរក្សត្រចៀកកាំកម្រិតស្តង់ដា ខណៈការនាំចេញផ្លូវការទៅទីផ្សារធំជាងគេលើពិភពលោកត្រូវរំពឹងថានឹងចាប់ផ្តើមនៅចុងឆ្នាំ ២០២០។
ថ្លែងក្នុងសិក្ខាសាលាស្តីពី «ស្ថាបត្យកម្មចុងក្រោយនៃរចនាប័ទ្មទំនើប ផ្ទះអភិរក្សសត្វត្រចៀកកាំសម្រាប់អ្នកមានប្រាក់ចំណូលមធ្យម» កាលពីម្សិលមិញលោក សំ សិរីរតន៍ រដ្ឋលេខាធិការក្រសួងពាណិជ្ជកម្មបាននិយាយថា ជាការចាំបាច់ និងល្អប្រសើរបំផុតក្នុងការគិតគូរពីការវិនិយោគទៅលើផ្ទះត្រចៀកកាំ លោកបានថ្លែងថា៖ «ចិនជាទីផ្សារធំ និងមិនចេះរីងស្ងួតសម្រាប់ទីផ្សារទឹកមាត់ត្រចៀកកាំ»។
លោកបន្តទៀតថា៖ «ខណៈតំបន់អាស៊ីអាគ្នេយ៍ ជាកន្លែងដែលអាចផ្តល់កន្លែងរស់នៅ និងផ្តល់នូវសម្បុក និងទឹកមាត់ត្រចៀកកាំប្រកបដោយគុណភាពខ្ពស់នោះ ខ្ញុំអាចនិយាយថា នេះជាឱកាសសម្រាប់ប្រជាជនខ្មែរក្នុងការចាប់ផ្តើមអាជីវកម្មទាក់ទងនឹងការសង់ផ្ទះអភិរក្សត្រចៀកកាំ»។
រហូតមកដល់ពេលនេះមានផលិតផលកសិកម្មកម្ពុជាតែ ៤ មុខគត់ដែលត្រូវបានអនុញ្ញាតជាផ្លូវការឲ្យនាំចេញទៅកាន់ប្រទេសចិន រួមមាន ពោត ដំឡូងមី អង្ករ និងចេក ខណៈបច្ចុប្បន្នកម្ពុជាកំពុងចរចានាំចេញផលិតផលផ្សេងៗទៀតមានដូចជា ទឹកមាត់ត្រចៀកកាំ ស្វាយ ម្រេច ស្រកានាគ តាង៉ែន និងដូងក្រអូប។
លោក មៀវ សុខទ្រី អគ្គលេខាធិការនៃសហព័ន្ធត្រចៀកកាំកម្ពុជាបាននិយាយថា ដោយសារកម្ពុជាមិនទាន់មានទីផ្សារជាផ្លូវការនៅប្រទេស ចិន បច្ចុប្បន្នកោះតៃវ៉ាន់ និងប្រទេស ជប៉ុន គឺជាទីផ្សារធំរបស់កម្ពុជា។
លោកបន្តថា តាមការប៉ាន់ស្មាន ផលិតផលពីសត្វត្រចៀកកាំមានប្រមាណ ១០០ តោនក្នុង ១ ឆ្នាំ។ លោកថ្លែងថា៖ «ពេលនេះតៃវ៉ាន់គឺជាទីផ្សារធំជាងគេសម្រាប់ទឹកមាត់ត្រចៀកកាំកម្ពុជា»៕
អត្ថបទដកស្រង់ពី៖
ភ្នំពេញៈ ក្រសួងពាណិជ្ជកម្ម ជំរុញឲ្យប្រជាជនខ្មែរបង្កើនការវិនិយោគផ្ទះអភិរក្សត្រចៀកកាំកម្រិតស....
