30/10/2025
ថ្ងៃព្រហស្បតិ៍ ៩ កើត ខែកត្តិក ឆ្នាំម្សាញ់
សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៣០ ខែតុលា ឆ្នាំ២០២៥ លោកសាស្ត្រាចារ្យ ជំនួយ លនទ្រីយ៍ ប៉ាទ្រិច អនុប្រធានមន្ទីរពេទ្យបង្អែកខេត្តកំពង់ចាម រួមជាមួយមន្ត្រីនៃមន្ទីរពេទ្យបង្អែកខេត្តកំពង់ចាម បានទទួលស្វាគមន៍ លោកជំទាវ ប៉ាង ដានី តំណាងដ៏ខ្ពង់ខ្ពស់ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត និងលោកជំទាវ នីចន្ទធីតា តំណាងដ៏ខ្ពង់ខ្ពស់ ឯកឧត្តម ប៉ែន កុសល្យ ប្រធានគណ:កម្មាធិការសាខា ខេត្តត្បូងឃ្មុំ និងចូលរួមអមដំណើរដោយឯកឧត្តម នាយកសាខា រួមនឹង ក្រុមការងារឥស្សរជនឆ្នើមថ្នាក់ជាតិនៃសាខានិង សមាគមនារីដើម្បីសន្តិភាពនិងអភិវឌ្ឍន៍ខេត្តកំពង់ចាម និងខេត្តត្បូងឃ្មុំ បានអញ្ជើញ ចុះសួរសុខទុក្ខ លោកស្រី សំអូន អុីអុី អាយុ ២៦ ឆ្នាំ ជាភរិយាវីរ:កងទ័ព ជួរមុខទិស ប្រាសាទតាក្របី ដែលបានចូលមកសម្រាលកូន នៅក្នុងមន្ទីរពេទ្យបង្អែកខេត្តកំពង់ចាម ។
សូមបញ្ជាក់ថា លោកស្រី សំអូន អុីអុី ជាភរិយាវីរ:កងទ័ពជួរមុខទិស ប្រសាទតាក្របី ដែលកំពុង បំពេញ បេសកកម្ម ការពារបូរណភាពទឹកដីយ៉ាងប្តូរផ្តាច់នៅសមរភូមិព្រំដែន ។ បច្ចុប្បន្នលោកស្រី រស់ ភូមិតាប៉ាវបំពេញទេស ឃុំរកាពរប្រាំ ស្រុកត្បូងឃ្មុំ ខេត្តត្បូងឃ្មុំ ហើយបានចូលមកទទួលសេវានៅផ្នែកសម្ភព និងរោគស្ត្រីនៃមន្ទីរពេទ្យបង្អែកខេត្តកំពង់ចាម នៅថ្ងៃទី២៧ ខែតុលា ឆ្នាំ២០២៥ វេលាម៉ោង ១០:៤២ នាទី ព្រឹក ។ លោកស្រីសម្រាលកូនដោយវះកាត់ ទទួលបាន
កូនប្រុស ទម្ងន់ ៣,២ គក្រ ហើយសេវា សម្រាល និង ថែទាំព្យាបាល ជាបន្ទុកមន្ទីរពេទ្យបង្អែកខេត្តកំពង់ចាមទាំងស្រុង ។
លោកជំទាវ ប៉ាង ដានី និង លោកជំទាវ នី ចន្ទធីតា បាននាំយកបណ្តាំផ្ញើសាកសួរសុខដោយក្តីនឹករលឹក និងអាណិតអាសូរបំផុត ពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាដែលក្នុងតូនាទី ជាឥស្សរជនឆ្នើមថ្នាក់ជាតិ សម្តេចប្រធាន តែងតែបានណែនាំអោយក្រុមការងារឥស្សរជនឆ្នើមថ្នាក់ជាតិថ្នាក់សាខា ក៏ដូចជាបណ្តាញការងារគ្រប់ថ្នាក់ យកចិត្តទុកដាក់ ជួយដោះស្រាយសម្រាលទុក្ខលំបាកដល់ពលរដ្ឋរងគ្រោះ និង ងាយរងគ្រោះ ក្នុងនោះ ត្រូវផ្តោតជាសំខាន់ទៅលើគ្រួសារវីរ:កងទ័ពជួរមុខ និងពលរដ្ឋភៀសសឹក ពិសេស ការគាំពារ សុខភាព មាតា ទារក និងកុមារ ដោយមិនរើសអើង ។
លោកជំទាវប្រធានក្រុមការងារឥស្សរជនឆ្នើមថ្នាក់នៃសាខា និងសមាគមនារីដើម្បីសន្តិភាព និងអភិវឌ្ឍខេត្តទាំង ២ បានផ្តល់អំណោយរបស់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ជូន អ្នកស្រី សំអូន អុីអុី រួមមាន ម្សៅទឹកដោះគោ សម្ភារមាតា ខោអាវទារក ឃីតស្ត្រី ១ឈុត ផ្លែឈើស្រស់ ២កន្ត្រក និង ថវិកាសរុប ចំនួន ១,០០០,០០០រៀល ។
