30/09/2025
ថ្ងៃអង្គារ ៨ កើត ខែអស្សុជ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៣០ ខែកញ្ញា ឆ្នាំ២០២៥ អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមខេត្តកំពង់ចាម និង ឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ និងជាប្រធានគណៈកម្មាធិការសាខាកាកបាទក្រហមខេត្ត ត្បូងឃ្មុំ អមដំណើរដោយ ឯកឧត្តម ម៉ៅ ឌុង អភិបាលរងនៃរដ្ឋបាលខេត្តត្បូងឃ្មុំ ឯកឧត្តមវេជ្ជបណ្ឌិត គីមសួរ ភីរុណ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលនៃរដ្ឋបាលខេត្តកំពង់ចាម និងឯកឧត្តមវេជ្ជបណ្ឌិត កែវ វណ្ណៈ ទីប្រឹក្សាក្រសួងសុខាភិបាល និងប្រធានមន្ទីរសុខាភិបាលនៃរដ្ឋបាលខេត្តត្បូងឃ្មុំ ព្រមទាំងរួមដំណើរដោយ លោក លោកស្រី ថ្នាក់ដឹកនាំ មន្ទីរអង្គភាព និងមន្ត្រីពាក់ព័ន្ធ បានអញ្ជើញចុះសួរសុខទុក្ខ ស្ត្រីសម្រាលកូនភ្លោះ៣ និង ស្ត្រីជាភរិយារបស់វីរៈយោធិនជួរមុខទិសប្រាសាទតាក្របីស្លាបឆ្វេង ដែលបានមកទទួលសេវាសម្រាលកូននិងកំពុងសម្រាកថែទាំសុខភាពនៅមន្ទីរបង្អែកខេត្តកំពង់ចាម ដោយបាននាំយកមកនូវថវិកា និងអំណោយដ៏ថ្លៃថ្លា របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់ក្រុមគ្រួសារទាំងពីរផងដែរ ។
សូមបញ្ជាក់ផងដែរថា កាលពីថ្ងៃអាទិត្យ ៦កេីតខែអស្សុជ ឆ្នាំម្សាញ់ សប្តស័ក ព.ស២៥៦៩ ត្រូវនឹងថ្ងៃទី២៨ ខែកញ្ញា ឆ្នាំ២០២៥ ផ្នែកសម្ភព និងរោគស្ត្រីនៃមន្ទីរពេទ្យបង្អែកខេត្តកំពង់ចាម បានទទួលស្រ្តីឈ្មោះ សុះ អីសះ អាយុ៣៦ឆ្នាំ អាស័យដ្ឋាន នៅភូមិ ទ្រាទី១ ឃុំទ្រា ស្រុកក្រូចឆ្មារ ខេត្តត្បូងឃ្មុំ ។ ស្ត្រីត្រូវបានរថយន្តគិលានសង្គ្រោះនៃមន្ទីរពេទ្យបង្អែកស្រុកក្រូចឆ្មារ បញ្ជូនមកកាន់មន្ទីរពេទ្យបង្អែកខេត្តកំពង់ចាមនៅម៉ោង ១៧:២១នាទី ថ្ងៃទី២៧ ខែកញ្ញាឆ្នាំ២០២៥ ។ ស្រ្តីបានសំរាលកូនភ្លោះបី នៅថ្ងៃទី២៨ ខែកញ្ញា ឆ្នាំ២០២៥ កូនភ្លោះទី១ ភេទប្រុស ទំងន់ ២៥០០ក្រាម នៅម៉ោង ១០:៥០នាទី កូនភ្លោះទី២ ភេទស្រី ទំងន់ ២០០០ក្រាម នៅម៉ោង ១០:៥៥នាទី និងកូនភ្លោះទី៣ ភេទស្រី ទំងន់ ២៤០០ក្រាម នៅម៉ោង ១១:០០ នាទី ហើយបច្ចុប្បន្នទារកទាំងបី ត្រូវបានបុគ្គលិក និងគ្រូពេទ្យ ថែទាំយ៉ាងយកចិត្តទុកដាក់នៅផ្នែកថែទាំទារកទើបកើតនៃមន្ទីរពេទ្យបង្អែកខេត្តកំពង់ចាម ។
ចំពោះករណីមួយទៀត កាលពីថ្ងៃចន្ទ ៧កេីតខែអស្សុជ ឆ្នាំម្សាញ់ សប្តស័ក ព.ស២៥៦៩ ត្រូវនឹងថ្ងៃទី២៩ ខែកញ្ញា ឆ្នាំ២០២៥ ផ្នែកសម្ភព និងរោគស្ត្រីនៃមន្ទីរពេទ្យនៃខេត្តកំពង់ចាម បានទទួលសំរាលកូនជូនស្រ្តីឈ្មោះ ចាន់ រ៉ាឌីអាយុ២១ឆ្នាំ អាស័យដ្ឋាន នៅភូមិ សំពៅផុស ឃុំជីរោទ៍ទី២ ស្រុកត្បូងឃ្មុំ ខេត្តត្បូងឃ្មុំ ជាភរិយា របស់វីរៈកងទ័ពនៅតំបន់ប្រាសាទតាក្របី ។ ស្ត្រីបានចូលមកមន្ទីរពេទ្យបង្អែកខេត្តកំពង់ចាម នៅម៉ោង ០៥:៥៤នាទី នាថ្ងៃទី២៩ ខែកញ្ញាឆ្នាំ២០២៥ ។ ស្រ្តីបានសំរាលកូន នៅម៉ោង០៦:៥០នាទី បានកូន ភេទប្រុស ទំងន់ ២៨០០ក្រាម ។ បច្ចុប្បន្នទារក និងស្ត្រីជាម្តាយ ត្រូវបានបុគ្គលិក និងគ្រូពេទ្យ ថែទាំយ៉ាងយកចិត្តទុកដាក់នៅផ្នែកសម្ភាព និងរោគស្ត្រី នៃមន្ទីរពេទ្យបង្អែកខេត្តកំពង់ចាម ។
ឯកឧត្តម អ៊ុន ចាន់ដា និងឯកឧត្តម ប៉ែន កុសល្យ បានផ្តល់អំណោយរបស់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ជូនអ្នកស្រី ចាន់ រ៉ាឌី រួមមាន ម្សៅ ទឹកដោះគោ សម្ភារមាតា ខោអាវទារក ឃីត ស្ត្រី ១ឈុត ផ្លែឈើស្រស់ ២កន្ត្រក និង ថវិកាសរុប ចំនួន ១,៥០០,០០០រៀល និងស្ត្រីសម្រាលបានកូនភ្លោះ៣នាក់ ទទួលបានថវិកា ២.០០០.០០០រៀល៕
