Techo Santepheap National Hospital, WIn-Win Boulevard, Phnom Penh (2026)

31/03/2026

ជំងឺមហារីកមាត់ស្បូន
ជំងឺមហារីកមាត់ស្បូនគឺជាជំងឺមហារីកឈានមុខគេមួយដែលប៉ះពាល់ដល់សុខភាពស្ត្រីនៅកម្ពុជា។ ប៉ុន្តែអ្វីដែលពិសេសនោះគឺយើងអាចបង្ការជំងឺនេះបានយ៉ាងមានប្រសិទ្ធភាពតាមរយៈការធ្វើតេស្តរកមេរោគ HPV (Human Papillomavirus)។

តើការធ្វើតេស្ត HPV មានសារៈសំខាន់យ៉ាងដូចម្តេច?
- អាចរកឃើញមេរោគដែលបង្កគ្រោះថ្នាក់
- ក្នុងករណីរកឃើញ គ្រូពេទ្យអាចជួយទប់ស្កាត់ ក្នុងការវិត្តទៅជាជំងឺមហារីកបានទាន់ពេលវេលា។

តើពេលណាដែលលោកអ្នកគួរអញ្ជើញទៅពិនិត្យ?
- ស្រ្តីអាយុចាប់ពី ២៥ឆ្នាំ ដល់ ៦៥ឆ្នាំ
- ស្រ្តីដែលមានគ្រួសាររួច ឬមានដៃគូរួមភេទ

សូមទំនាក់ទំនងមកកាន់មន្ទីរពេទ្យជាតិ តេជោសន្តិភាព ឬមន្ទីរពេទ្យដែលនៅជិតលោកអ្នក ដើម្បីទទួលបានការប្រឹក្សា និងសេវាកម្មពិនិត្យឱ្យបានត្រឹមត្រូវ។

31/03/2026

សេវាប្រឹក្សាការអភិវឌ្ឍកុមារ (Child Development Service - CDS) នៃមន្ទីរពេទ្យជាតិ តេជោសន្តិភាព ផ្តល់សេវាក្នុងការប្រឹក្សាដល់កុមារដែលមានវិបត្តិទំនាក់ទំនង អាកប្បកិរិយា និងវិបត្តិការលូតលាស់ទាំងផ្លូវចិត្ត និងផ្លូវកាយ។
ផ្តល់ការប្រឹក្សាកុមារ និងគ្រួសារដើម្បីជួយឱ្យកុមាររៀន ចូលរួមសកម្មភាព និងអភិវឌ្ឍជំនាញក្នុងការរស់នៅប្រចាំថ្ងៃតាមប្រក្រតី។

ការប្រឹក្សា និងគាំទ្រ៖
⁃ ជួយឱ្យអាណាព្យាបាលយល់ច្បាស់អំពីរបៀបនៅក្នុងការទំនាក់ទំនង អាកប្បកិរិយា ការលេង ការរៀន និងការអភិវឌ្ឍរបស់កូនលោកអ្នក
⁃ កំណត់គោលដៅ និងតាមដានការអភិវឌ្ឍរបស់កុមារតាមពេលវេលាជាមួយអាណាព្យាបាល និងក្រុមគ្រួសារ
⁃ បង្រៀនពីវិធីសាស្ត្រជាក់ស្ដែងដែលអ្នកអាចអនុវត្តបាននៅផ្ទះក្នុងសកម្មភាពប្រចាំថ្ងៃសម្រាប់កុមារ
⁃ លើកទឹកចិត្តកុមារឱ្យមានការអភិវឌ្ឍជំនាញតាមរយៈការលេង ការប្រាស្រ័យទាក់ទង និងសកម្មភាពប្រចាំថ្ងៃ
⁃ សហការជាមួយក្រុមគ្រួសារ និងអ្នកជំនាញផ្នែកសុខភាពផ្សេងទៀតដើម្បីផ្ដល់ការគាំទ្រអភិវឌ្ឍយ៉ាងពេញលេញតាមតម្រូវការសុខភាពកុមារ

ប្រសិនបើលោកអ្នកត្រូវការសេវាប្រឹក្សាយោបល់ដើម្បីជួយកូនរបស់លោកអ្នកក្នុងការសិក្សា ការប្រាស្រ័យទាក់ទង អាកប្បកិរិយា ឬការលេង អាចធ្វើការទំនាក់ទំនងមកកាន់សេវាប្រឹក្សាអភិវឌ្ឍកុមារ (Child Development Service) នៃមន្ទីរពេទ្យជាតិ តេជោសន្តិភាព តាមព័ត៌មានខាងក្រោម៖
សូមធ្វើការណាត់ទុកមុនដើម្បីធ្វើការប្រឹក្សាជាមួយអ្នកជំនាញ។
សម្រាប់ព័ត៌មានលម្អិតអាចទាក់ទងតាមរយៈ
លេខទូរសព្ទ ៖ 087 222 930
តេឡេក្រាម ៖ https://t.me/TSNH26
អ៊ីមែល ៖ tsnh.childdevelopment@gmail.com
ទីតាំង ៖ មន្ទីរពេទ្យជាតិ តេជោសន្តិភាព អគារ H3-B1 ជាន់ទី ១

30/03/2026

កិច្ចប្រជុំគណៈកម្មការពិនិត្យមរណភាពមាតា និងទារកជុំវិញកំណើត និងការឆ្លើយតប (MPDSR) នៃមន្ទីរពេទ្យជាតិ តេជោសន្តិភាព
------------
នាព្រឹកថ្ងៃចន្ទ ១២កើត ខែចេត្រ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៣០ ខែមីនា ឆ្នាំ២០២៦ ដោយមានការអនុញ្ញាតពីលោកវេជ្ជបណ្ឌិត សួន សាមិត្ត នាយកមន្ទីរពេទ្យជាតិ តេជោសន្តិភាព គណៈកម្មការពិនិត្យមរណភាពមាតា និងទារកជុំវិញកំណើត និងការឆ្លើយតបនៃមន្ទីរពេទ្យជាតិ តេជោសន្តិភាព បានបេីកកិច្ចប្រជុំដែលដឹកនាំដោយលោកស្រីវេជ្ជបណ្ឌិត ឆន សុធារី នាយិការងមន្ទីរពេទ្យ និងជាប្រធានគណៈកម្មការ។
ជាកិច្ចចាប់ផ្តើមលោកស្រីនាយិការងបានថ្លែងអំណរគុណដល់គណៈកម្មការ MPDSR នៃមន្ទីរពេទ្យជាតិ តេជោសន្តិភាព មន្រ្តីរាជការ និងបុគ្គលិកទាំងអស់ដែលបានខិតខំប្រឹងប្រែងបំពេញការងារ និងបម្រើសេវាព្យាបាលប្រកបដោយទំនុកចិត្ត។ ប្រធានអង្គប្រជុំបានលើកអនុសាសន៍សំខាន់ៗដូចខាងក្រោម៖
១. ពង្រឹងសមត្ថភាពគណៈកម្មការ MPDSR នៃមន្ទីរពេទ្យជាតិ តេជោសន្តិភាព និងក្រុមការងារគ្រប់ផ្នែកទាំងអស់ដែលពាក់ព័ន្ធ
២. ពង្រីកទំនាក់ទំនងរវាងគណៈកម្មការ MPDSR នៃមន្ទីរពេទ្យជាតិ តេជោសន្តិភាព និងខេត្តសម្ព័ន្ធមេត្រីភាព
៣. បន្តជួយគាំទ្រគណៈកម្មការ MPDSR ខេត្តសម្ព័ន្ធមេត្រីភាពទាំងបីក្នុងការពិនិត្យមរណភាពមាតា និងទារកជុំវិញកំណើត និងការឆ្លើយតប ព្រមទាំងការបណ្តុះបណ្តាលនានាដែលឆ្លើយតបទៅនឹងតម្រូវការបច្ចេកទេសព្យាបាលថែទាំ ពិសេសលើការថែទាំស្ត្រីមានផ្ទៃពោះមុនសម្រាល។
ជាចុងបញ្ចប់លោកស្រីនាយិការងប្រធានអង្គប្រជុំបានរំលឹកក្រុមការងារទាំងអស់នូវប្រសាសន៍ដ៏ខ្ពង់ខ្ពស់របស់ឯកឧត្តមសាស្រ្តាចារ្យរដ្ឋមន្ត្រីក្រសួងសុខាភិបាលត្រូវយកចិត្តទុកដាក់បន្តអនុវត្តការពិនិត្យមរណភាពមាតា និងទារកជុំវិញកំណើត និងការឆ្លើយតប ជាប្រព័ន្ធឱ្យកាន់តែសកម្មប្រសើរឡើងនៅគ្រប់រាជធានី ខេត្ត។

30/03/2026

សកម្មភាពមន្ត្រីរាជការ និងបុគ្គលិកនៃមន្ទីរពេទ្យជាតិ តេជោសន្តិភាព គោរពទង់ជាតិនៃព្រះរាជាណាចក្រកម្ពុជា នាព្រឹកថ្ងៃចន្ទ ទី៣០ ខែមីនា ឆ្នាំ ២០២៦។

ការគោរពទង់ជាតិគឺដើម្បីពង្រឹងពង្រីកខឿនឯករាជ្យជាតិ បង្ហាញពីសាមគ្គីជាតិផ្សារភ្ជាប់ និងមនសិការស្នេហាជាតិមាតុភូមិ ព្រមទាំងបង្ហាញពីសិរីសួស្តី ភាពរឹងមាំ រុងរឿង ថ្កើងថ្កាន នៃជាតិខ្មែរ។

27/03/2026

កិច្ចប្រជុំគណៈកម្មការមន្ទីរពេទ្យជាតិ តេជោសន្តិភាព ប្រចាំខែមីនាឆ្នាំ ២០២៦
-----------------------
នាព្រឹកថ្ងៃទី២៧ ខែមីនា ឆ្នាំ២០២៦ វេលាម៉ោង ៩:០០ នាទីព្រឹក មន្ទីរពេទ្យជាតិ តេជោសន្តិភាព បានរៀបចំកិច្ចប្រជុំគណៈកម្មការមន្ទីរពេទ្យ ក្រោមអធិបតីភាពលោកវេជ្ជបណ្ឌិត សួន សាមិត្ត នាយកមន្ទីរពេទ្យជាតិ តេជោសន្តិភាព ដើម្បីពង្រឹងប្រសិទ្ធភាពការងារ និងការងារត្រៀមសង្គ្រោះក្នុងឱកាសបុណ្យចូលឆ្នាំខ្មែរដែលឈានចូលមកដល់នៅពេលខាងមុខ។

ក្នុងឱកាសនៃកិច្ចប្រជុំ លោកនាយកមន្ទីរពេទ្យបានសង្កត់ធ្ងន់លើចំណុចគន្លឹះសំខាន់ៗមួយចំនួន ដើម្បីលើកកម្ពស់ក្នុងការបម្រើសេវាជូនអ្នកជំងឺឱ្យកាន់តែប្រសើរឡើង រួមមាន៖
១.ត្រូវពង្រឹងការយកចិត្តទុកដាក់ខ្ពស់ក្នុងការផ្ដល់សេវាព្យាបាលជូនអ្នកជំងឺ ប្រកបដោយប្រសិទ្ធភាព និងភាពជឿជាក់
២.បន្តពង្រឹងសមត្ថភាពមន្ត្រីសុខាភិបាលជាប្រចាំ និងជំរុញឱ្យមានការគោរពក្រមសីលធម៌គ្រូពេទ្យឱ្យបានខ្ជាប់ខ្ជួន
៣.បង្កើនស្មារតីសាមគ្គីភាពផ្ទៃក្នុង ដោយឈរលើការគោរពវិន័យ បទបញ្ជាផ្ទៃក្នុង និងឋានានុក្រមការងារ។

លោកនាយកក៏បានណែនាំឱ្យបុគ្គលិកទាំងអស់ យកចិត្តទុកដាក់ខ្ពស់បំផុតចំពោះអ្នកជំងឺដែលប្រើប្រាស់ បណ្ណ ប.ស.ស. (បេឡាជាតិរបបសន្តិសុខសង្គម) និង បណ្ណមូលនិធិសមធម៌ ដើម្បីធានាថាប្រជាពលរដ្ឋគ្រប់រូបទទួលបានការព្យាបាលដោយស្មើភាព និងគ្មានការរើសអើង។

សម្រាប់ការត្រៀមលក្ខណៈជួយសង្គ្រោះបន្ទាន់ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរដែលនឹងឈានចូលមកដល់នាពេលខាងមុខ លោកនាយកក៏បានណែនាំឱ្យក្រុមគ្រូពេទ្យប្រចាំការត្រៀមខ្លួន ២៤ម៉ោង ដើម្បីឆ្លើយតបចំពោះករណីគ្រោះថ្នាក់ផ្សេងៗ ដែលអាចកើតឡើងជាយថាហេតុ។

23/03/2026

ការអភិវឌ្ឍវិជ្ជាជីវៈបន្តសម្រាប់វេជ្ជសាស្ត្រ នៅមន្ទីរពេទ្យជាតិ តេជោសន្តិភាព
————————
នៅព្រឹកថ្ងៃទី២០ ខែមីនា ឆ្នាំ២0២៦ មន្ទីរពេទ្យជាតិ តេជោសន្តិភាព បានរៀបចំកម្មវិធីបណ្ដុះបណ្ដាលបន្តវិជ្ជាជីវៈវេជ្ជសាស្ត្រ (Continuing Medical Education - CME) ដោយជោគជ័យក្រោមប្រធានបទ៖ “ជំងឺកកឈាមក្នុងសរសៃវ៉ែនខួរក្បាល និងការប្រើប្រាស់ថ្នាំប្រឆាំងការកកឈាម-Cerebral Venous Sinus Thrombosis vs Anticoagulants? ”
កម្មវិធីនេះមានការចូលរួមពីវេជ្ជបណ្ឌិតជំនាញប្រសាទសាស្ត្រ និងអ្នកជំនាញពាក់ព័ន្ធដើម្បីពង្រឹងចំណេះដឹង និងជំនាញក្នុងការព្យាបាល និងថែទាំអ្នកជំងឺ CVT។
ក្នុងវគ្គបណ្ដុះបណ្ដាលនេះបានពិភាក្សាអំពី៖
- កត្តាហានិភ័យ និងរោគសញ្ញាដំបូងរបស់ CVT
- វិធីសាស្ត្រធ្វើរោគវិនិច្ឆ័យ ដោយផ្អែកលើ CT Scan និង MRI/MRV
- គន្លឹះសំខាន់ក្នុងការបកស្រាយរូបភាពវេជ្ជសាស្ត្រ
- ការប្រើប្រាស់ថ្នាំប្រឆាំងការកកឈាម (Anticoagulants) ដោយមានសុវត្ថិភាព
- ការគ្រប់គ្រងជំងឺ និងការតាមដានអ្នកជំងឺក្នុងអំឡុងពេលខ្លី និងរយៈពេលវែង
លើសពីនេះ កម្មវិធីក៏មានការពិភាក្សាករណីជាក់ស្តែង (case-based discussion) និងការចែករំលែកបទពិសោធន៍គ្លីនិក ដើម្បីបង្កើនសមត្ថភាពក្នុងការសម្រេចចិត្តព្យាបាលប្រកបដោយប្រសិទ្ធភាព។
សកម្មភាព CME នេះបង្ហាញពីការប្តេជ្ញារបស់មន្ទីរពេទ្យជាតិ តេជោសន្តិភាព ក្នុងការលើកកម្ពស់គុណភាពសេវាសុខាភិបាល និងការអភិវឌ្ឍសមត្ថភាពវិជ្ជាជីវៈបុគ្គលិកដើម្បីឆ្លើយតបទៅនឹងតម្រូវការថែទាំជំងឺជាពិសេសអ្នកជងឺប្រសាទសាស្ត្រ និងស្ត្រូកនៅកម្ពុជា។

23/03/2026

ការអភិវឌ្ឍវិជ្ជាជីវៈបន្តសម្រាប់គិលានុដ្ឋាក-ឆ្មប មន្ទីរពេទ្យជាតិ តេជោសន្តិភាព
————————
ថ្ងៃទី២០ ខែមីនា ឆ្នាំ២០២៦ ផ្នែកថែទាំនៃការិយល័យបច្ចេកទេសបានរៀបចំវគ្គបណ្ដុះបណ្ដាលបន្តសម្រាប់គិលានុបដ្ឋាក និងឆ្មប (CNE) ក្រោមប្រធានបទ "ក្រមសីលធម៌វិជ្ជាជីវៈគិលានុបដ្ឋាក និងឆ្មប" (Ethics of Nursing and Midwifery)។
គោលបំណងវគ្គបណ្ដុះបណ្ដាលនេះដើម្បីយល់ដឹងពីសីលធម៌ និងក្រមសីលធម៌ក្នុងវិជ្ជាជីវៈគិលានុបដ្ឋាក និងឆ្មប, យល់ដឹងអំពីនិយមន័យនៃសីលធម៌ និងតួនាទី, គោលការណ៍សំខាន់ៗនៃសីលធម៌ក្នុងវិជ្ជាជីវៈគិលានុបដ្ឋាយិក និងឆ្មប, បង្ហាញពីសារៈសំខាន់នៃការអនុវត្តសីលធម៌ក្នុងការថែទាំអ្នកជំងឺ និងវិសាលភាពនៃការអនុវត្តសីលធម៌ ក្នុងក្រុមសីលធម៌សម្រាប់ការងារប្រចាំថ្ងៃ។
វគ្គបណ្តុះបណ្តាលនេះជាការបង្ហាញពីការប្តេជ្ញាចូលរួមពីគិលានុបដ្ឋាក-ឆ្មប នៃមន្ទីរពេទ្យជាតិ តេជោសន្តិភាព និងនិស្សិតកម្មសិក្សាការីពីគ្រប់ផ្នែកពាក់ព័ន្ធ ក្នុងការលើកកម្ពស់សីលធម៌ និងគុណភាពសេវាសុខាភិបាល ដើម្បីធានាថា អ្នកជំងឺទទួលបានការថែទាំដោយមានកិត្តិយស និងមនុស្សធម៌។

13/03/2026

មន្ទីរពេទ្យជាតិ តេជោសន្តិភាព បើកសិក្ខាសាលារៀបចំផែនការយុទ្ធសាស្ត្រ ២០២៦-២០៣០ និងផែនការសកម្មភាពប្រចាំឆ្នាំ២០២៧នាខេត្តព្រះសីហនុ
————————-
ក្រុងព្រះសីហនុ៖ នាថ្ងៃសុក្រ ១០រោច ខែផល្គុន ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៣ ខែមីនា ឆ្នាំ២០២៦ មន្ទីរពេទ្យជាតិ តេជោសន្តិភាព បានរៀបចំសិក្ខាសាលាដ៏មានសារៈសំខាន់មួយ ស្តីពី “ការរៀបចំផែនការយុទ្ធសាស្ត្រ២០២៦-២០៣០ និងផែនការសកម្មភាពប្រចាំឆ្នាំ២០២៧” នៅសណ្ឋាគារ ស៊ីប្រ៊ីស និងវីឡា ក្រោមអធិបតីភាពដ៏ខ្ពង់ខ្ពស់លោកវេជ្ជបណ្ឌិត សួន សាមិត្ត នាយកមន្ទីរពេទ្យ ។
សិក្ខាសាលានេះមានការអញ្ជើញចូលរួមពីសំណាក់លោក-លោកស្រីនាយករង នាយិការង ប្រធាន-អនុប្រធានការិយាល័យទាំងបី នាយផ្នែក នាយរងផ្នែក ប្រធាន-អនុប្រធានផ្នែកថែទាំ នាយសាល នាយរងសាល និងមន្ត្រីរាជការ បុគ្គលិកនៃមន្ទីរពេទ្យជាតិ តេជោសន្តិភាព។

សិក្ខាសាលានេះត្រូវបានរៀបចំឡើងក្នុងគោលបំណងសំខាន់ៗជាច្រើនរួមមាន៖
- ការកំណត់យុទ្ធសាស្ត្ររយៈពេលវែង៖ រៀបចំផែនការយុទ្ធសាស្ត្រសម្រាប់ឆ្នាំ២០២៦-២០៣០ ។
- ការត្រួតពិនិត្យសមិទ្ធផល៖ ពិនិត្យមើលលទ្ធផលការងារដែលសម្រេចបានក្នុងឆ្នាំ២០២៥កន្លងមក និងពិនិត្យសមិទ្ធផលការងារប្រចាំឆ្នាំ២០២៦។
- ការពង្រឹងគុណភាពសេវា៖ ផ្តោតលើការផ្តល់សេវាដែលផ្អែកលើលទ្ធផល និងគុណភាព ព្រមទាំងការធ្វើទំនើបកម្មសម្ភារឧបករណ៍ និងហេដ្ឋារចនាសម្ព័ន្ធ ។
- ការអភិវឌ្ឍធនធានមនុស្ស៖ ពង្រឹងសមត្ថភាពស្ថាប័ន និងធនធានមនុស្ស ដើម្បីបម្រើសេវាជូនប្រជាពលរដ្ឋឱ្យទទួលបានសុវត្ថិភាព ប្រសិទ្ធភាពខ្ពស់ និងប្រកបដោយក្រមសីលធម៌វិជ្ជាជីវៈ ។

ក្នុងឱកាសបើកអង្គសិក្ខាសាលា លោកវេជ្ជបណ្ឌិត សួន សាមិត្ត បានសង្កត់ធ្ងន់ថាផែនការយុទ្ធសាស្ត្រនេះជាត្រីវិស័យសម្រាប់ដំណើរការមន្ទីរពេទ្យ ហើយក៏ស្ថិតនៅលើការប្តេជ្ញាចិត្ត និងការអនុវត្តជាក់ស្តែងរបស់បុគ្គលិកគ្រប់រូប ។

ជាទីបញ្ចប់ លោកនាយកបានជំរុញឱ្យសមាជិកសិក្ខាសាលាទាំងអស់ ចូលរួមមតិឱ្យបានផុសផុល និងពិភាក្សាឱ្យបានស៊ីជម្រៅ ដើម្បីឱ្យផែនការសកម្មភាពឆ្នាំ២០២៧ ក្លាយជាផែនការដែលមានប្រសិទ្ធភាព និងអាចអនុវត្តបានពិតប្រាកដ ក្នុងបេសកកម្មបម្រើសេវាសុខាភិបាលជូនប្រជាពលរដ្ឋ ៕

07/03/2026

អបអរសាទរ ខួបលើកទី១១៥ ទិវាអន្តរជាតិនារី ៨មីនា ឆ្នាំ២០២៦
ក្រោមប្រធានបទ “សន្តិភាព និងសន្តិសុខសម្រាប់ស្ត្រី និងគ្រួសារ”

04/03/2026

មន្ទីរពេទ្យជាតិ តេជោសន្តិភាព ប្រារព្ធពិធីអបអរសាទរខួបលើកទី១១៥ ទិវាអន្តរជាតិនារី ៨មីនា ក្រោមប្រធានបទ «សន្តិភាព និងសន្តិសុខសម្រាប់ស្ត្រី និងគ្រួសារ»
============
ថ្ងៃទី៤ ខែមីនា ឆ្នាំ២០២៦ មន្ទីរពេទ្យជាតិ តេជោសន្តិភាព បានរៀបចំពិធីអបអរសាទរខួបលើកទី១១៥ ទិវាអន្តរជាតិនារី ៨មីនា ក្រោមអធិបតីភាពដ៏ខ្ពង់ខ្ពស់របស់ លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាភិបាលមន្ទីរពេទ្យជាតិ តេជោសន្តិភាព ។

លោកជំទាវ យក់ សម្បត្តិ បានមានប្រសាសន៍ថា រាជរដ្ឋាភិបាលតែងតែចាត់ទុកស្ត្រីជា «ឆ្អឹងខ្នងនៃសេដ្ឋកិច្ច និងសង្គមជាតិ»។ លោកជំទាវបានបន្តថា សន្តិភាពពិតប្រាកដត្រូវចាប់ផ្តើមចេញពី ការចេះសាមគ្គី យកអាសារគ្នា គ្មានអំពើហិង្សា និងមានការផ្តល់តម្លៃឱ្យគ្នាទៅវិញទៅមក។

ជាមួយគ្នានេះ កញ្ញាវេជ្ជបណ្ឌិត ឆន សុធារី នាយិការងមន្ទីរពេទ្យជាតិ តេជោសន្តិភាព បានរាយការណ៍ពីវឌ្ឍនភាពយេនឌ័រនៅក្នុងមន្ទីរពេទ្យ ដោយមានស្ត្រី ចំនួន ៤៦០នាក់ ដែលស្មើនឹង ៥២% នៃចំនួនមន្ត្រីរាជការ និងបុគ្គលិកសរុប ហើយស្ត្រីក៏ត្រូវបានតែងតាំងជាថ្នាក់ដឹកនាំ និងមានតួនាទីសំខាន់ៗជាច្រើនជា នាយិការង ប្រធានការិយាល័យ នាយផ្នែក រហូតដល់នាយសាល នាយរងសាល។

ជាចុងក្រោយ លោកជំទាវ យក់ សម្បត្តិ សូមឱ្យគណៈកម្មការមន្ទីរពេទ្យជាតិ តេជោសន្តិភាពបន្ដបង្កើនសមត្ថភាពដល់បុគ្គលិកនារី និងផ្ដល់ឱកាសទទួលបានការងារ ដើម្បីកសាងបរិយាកាសការងារដែលពោរពេញដោយសាមគ្គីភាព។

03/03/2026

មន្ទីរពេទ្យជាតិ តេជោសន្តិភាព សហការជាមួយមន្ទីរពេទ្យមិត្តភាពខ្មែរ-សូវៀត ផ្តល់ជូនការវះកាត់ភ្នែកកន្ទុយថ្លែន និងជំងឺបាយភ្នែកដោយឥតគិតថ្លៃរយៈពេល៥ថ្ងៃចាប់ពីថ្ងៃទី២ ខែមីនា ឆ្នាំ២០២៦ ដល់ថ្ងៃទី៦ ខែមីនា ឆ្នាំ២០២៦។

- កាលបរិច្ឆេទ៖ ចាប់ពីថ្ងៃចន្ទ ទី២ ខែមីនា ឆ្នាំ២០២៦ ដល់ថ្ងៃសុក្រ ទី៦ ខែមីនា ឆ្នាំ២០២៦
- ទីតាំង៖ គ្លីនិកចក្ខុសាស្ត្រ មន្ទីរពេទ្យជាតិ តេជោសន្តិភាព

សូមលោក លោកស្រី បងប្អូនប្រជាពលរដ្ឋអាចចុះឈ្មោះជាមុនតាមរយៈតំណនេះ៖ https://docs.google.com/forms/d/e/1FAIpQLSdblXhkFeDGbmrdImM21WxIRKyvDyhve-COmk0MyRNF4XlbRA/viewform

ឬទំនាក់ទំនងតាមទូរសព្ទសម្រាប់ព័ត៌មានលម្អិត៖
098 484 744
087 662 872
061 221 489

Techo Santepheap National Hospital

31/03/2026

31/03/2026

30/03/2026

30/03/2026

27/03/2026

23/03/2026

23/03/2026

13/03/2026

07/03/2026

04/03/2026

03/03/2026

Address

Telephone

Website

Alerts

Shortcuts

Share

Category