21/11/2025
#ចែករំលែកដើម្បីចង់អោយបង្កើនការការពារមិនមែនអោយភ័យទេ ព្រោះមានវ៉ាក់សាំងការពារបាន
#ជំងឺគ្រុនផ្តាសាយធំ គឺជាជំងឺឆ្លងផ្លូវដង្ហើមដែលបង្កឡើងដោយវីរុសគ្រុនផ្តាសាយ ដែលជាប្រភេទបង្កជំងឺធ្ងន់ធ្ងរជាងផ្តាសាយជាទូទៅ។
ប្រភេទនៃវីរុសគ្រុនផ្តាសាយធំមាន 4ប្រភេទ គឺប្រភេទ A, B, C និង D ដែលវីរុសគ្រុនផ្តាសាយធំប្រភេទ A និង B គឺជាប្រភេទដែលបង្កជំងឺគ្រុនផ្តាសាយច្រើនតាមរដូវកាល ពិសេសរដូវត្រជាក់ ធ្លាក់ខ្យល់។
គ្រុនផ្តាសាយធំ វាអាចមានគ្រោះថ្នាក់ខ្លាំងចំពោះកុមារ ដោយសារប្រព័ន្ធភាពស៊ាំរបស់ពួកគេនៅមិនទាន់អភិវឌ្ឍពេញលេញ។
កុមារអាចលេចចេញនូវរោគសញ្ញា និងអាការៈដូចជា៖
🔥គ្រុនក្តៅខ្លាំង
🤧 ក្អក និងឈឺបំពង់ក
😪 ហៀរសំបោរ
🥴 ឈឺសាច់ដុំ និងឈឺខ្លួន
😵💫 អស់កម្លាំង និងអស់ថាមពល
🤮 ចង់ក្អួត និង ចង្អោរ
#ផលវិបាក៖
១. រលាកសួត៖ វីរុសផ្តាសាយអាចបណ្តាលឱ្យមានការរលាកសួតធ្ងន់ធ្ងរ។
២. រលាកខួរក្បាល៖ កម្រ ប៉ុន្តែគ្រោះថ្នាក់ខ្លាំង។
៣. ភាពខ្សោះជាតិទឹក៖ បណ្តាលមកពីគ្រុនក្តៅ និងការក្អួត។
៤. ការរលាកសាច់ដុំបេះដូង៖ អាចបណ្តាលឱ្យមានបញ្ហាបេះដូងធ្ងន់ធ្ងរ។
#មូលហេតុអាចឈានទៅដល់នៃការស្លាប់៖
១. ការខូចខាតសួតធ្ងន់ធ្ងរ៖ បណ្តាលឱ្យមានការដកដង្ហើមលំបាក និងកង្វះអុកស៊ីហ្សែន។
២. ការឆ្លើយតបរបស់ប្រព័ន្ធភាពស៊ាំហួសហេតុ៖ អាចបណ្តាលឱ្យមានការខូចខាតសរីរាង្គច្រើន។
៣. ការបង្កមេរោគបន្ទាប់បន្សំ៖ បាក់តេរីអាចបង្កមេរោគលើសួតដែលចុះខ្សោយដោយសារវីរុស។
៤. ភាពខ្សោះជាតិទឹកធ្ងន់ធ្ងរ៖ អាចនាំឱ្យមានការចុះខ្សោយសរីរាង្គសំខាន់ៗ។
ទោះជាយ៉ាងណា ជំងឺគ្រុនផ្តាសាយធំជាជំងឺដែលអាចការពារបានតាមរយះការចាក់វ៉ាក់សាំង ដែលមិនត្រឹមតែផ្តល់នូវការការពារដ៏ល្អបំផុតប្រឆាំងនឹងជំងឺប៉ុណ្ណោះទេ ថែមទាំងជួយកាត់បន្ថយផលវិបាកធ្ងន់ធ្ងរដែលអាចកើតមាន ព្រមទាំងអាចកាត់បន្ថយការរីករាលដាលនៃជំងឺគ្រុនផ្តាសាយធំទៅអ្នកដទៃទៀតផង។
កុមារដែលបានទទួលថ្នាំបង្ការ ត្រូវបានបង្ហាញដើម្បីឃេីញពី ការកាត់បន្ថយជំងឺគ្រុនផ្តាសាយ មិនសូវឈឺទៅរកគ្រូពេទ្យញឹកញាប់ មិនសូវខកខានក្នុងការសិក្សា កាត់បន្ថយការឈឺថ្កាត់ដែលត្រូវការសំរាកនៅមន្ទីរពេទ្យ ក៏ដូចជាកាត់បន្ថយការស្លាប់របស់កុមារដោយសារជំងឺផ្តាសាយធំ។
#កុមារអាចទទួលវ៉ាក់សាំងការពារជំងឺគ្រុនផ្តាសាយធំនៅពេលដែលពួកគេមានអាយុចាប់ពី ៦ខែ ឡេីងទៅ:
👧 សំរាប់ក្មេងអាយុ ៦ខែ - ៩ឆ្នាំ ត្រូវចាក់២ដង គឺលើកទី១ និង១ខែក្រោយ (បេីចាក់បាន ២ដងហ្នឹងរួចហេីយ ត្រូវចាក់រំលឹកមួយឆ្នាំម្តងជារៀងរាល់ឆ្នាំ)
👩 សំរាប់ក្មេងអាយុចាប់ពី៩ឆ្នាំ មនុស្សពេញវ័យ និងមនុស្សចាស់ត្រូវការចាក់តែម្ដងទេ ហេីយត្រូវចាក់រំលឹកមួយឆ្នាំម្តងជារៀងរាល់ឆ្នាំដូចគ្នា)
សូមចងចាំថា ការពិគ្រោះជាមួយគ្រូពេទ្យជំនាញគឺមានសារៈសំខាន់ណាស់ សម្រាប់ការវិនិច្ឆ័យ និងការព្យាបាលត្រឹមត្រូវ រាល់ពេលកូនមានសញ្ញាណាមួយមិនប្រក្រតី។
ម៉ាក់ពេទ្យ
