11/02/2026
ឯកឧត្ដម ឧត្ដមសេនីយ៍ឯក ឃឹង សារ៉ាត់ អញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែមករា និងលើកទិសដៅខែកុម្ភៈ ឆ្នាំ២០២៦ របស់មន្ទីរប្រឆាំងគ្រឿងញៀន
រាជធានីភំ្នពេញ៖ ដោយមានការអនុញ្ញាតដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នៅរសៀលថ្ងៃទី១១ ខែកុម្ភៈ ឆ្នាំ២០២៦នេះ ឯកឧត្ដម ឧត្ដមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន បានអញ្ជើញដឹកនាំកិច្ចប្រជុំបូកសរុប លទ្ធផលការងារប្រចាំខែមករា និងលើកទិសដៅខែកុម្ភៈ ឆ្នាំ២០២៦ របស់មន្ទីរប្រឆាំងគ្រឿងញៀន នៅអគ្គស្នងការដ្ឋាននគរបាលជាតិ។
កិច្ចប្រជុំនេះ មានការអញ្ជើញចូលរួមពី លោកឧត្តមសេនីយ៍ទោ សម សម្បត្តិ ប្រធានលេខាធិការដ្ឋាននាយកដ្ឋានកណ្តាលនគរបាលយុត្តិធម៌ និងលោកឧត្តមសេនីយ៍ វរសេនីយ៍ នាយករងមន្ទីរ នាយការិយាល័យ និងមន្រ្តីនគរបាលយុត្តិធម៌ ជាច្រើនរូប។
លោកឧត្តមសេនីយ៍ទោ អ៊ិន សុង នាយករងមន្ទីរប្រឆាំងគ្រឿងញៀន បានឡើងរាយការណ៍សង្ខេបអំពីលទ្ធផលប្រចាំខែមករា ឆ្នាំ២០២៦ កឮបញ្ហាប្រឈម សំណូមពរ និងបានដាក់ចេញទិសដៅសម្រាប់អនុវត្តបន្ត ៖
១-បង្កើនកិច្ចសហប្រតិបត្តិការជាមួយសមត្ថកិច្ចពាក់ព័ន្ធ បង្ការ ទប់ស្កាត់ បង្ក្រាបតាមខ្សែបន្ទាត់ព្រំដែន ជាពិសេសតាមច្រកព្រំដែនគោក ទឹក អាកាស និងលម្ហសមុទ្រ។
២-រៀបចំចាត់បញ្ជូនកម្លាំង ចុះជួយអន្ដរាគមន៍នៅតាមតំបន់ភូមិសាស្រ្ដស្មុគស្មាញ និងតាមបណ្ដោយព្រំដែន ដែលប្រឈមការចរាចរគ្រឿងញៀនឆ្លងកាត់។
៣-បង្កើនការស្រាវជ្រាវ ស៊ើបអង្កេត និងបង្រ្កាបការលួចលាក់នាំចូល ចរាចរឆ្លងកាត់ ជួញដូរ និងប្រើប្រាស់គ្រឿងញៀន ជាពិសេសបង្កើនការទប់ស្កាត់ និងបង្រ្កាបបណ្តាទីតាំង លួចលាក់កែច្នៃផលិតគ្រឿងញៀនដោយខុសច្បាប់ ។
៤-ជំរុញការអនុវត្តវិធានការរដ្ឋបាល ស្របនឹងវិធានការច្បាប់ នៅតាមបណ្តាគោលដៅដែលមានហានិភ័យដូចជា ក្លឹបកំសាន្ត ខារ៉ាអូខេ ផ្ទះសំណាក់ ផ្ទះជួល តំបន់មិនរៀបរយ..។ល។ ដើម្បីបង្រួមទីផ្សារប្រើប្រាស់គ្រឿងញៀន ឈានទៅលុបបំបាត់ការនាំចូល ការចរាចរ និងការជួញដូរគ្រឿងញៀនខុសច្បាប់។
៥-ជំរុញបន្លាតការស្រាវជ្រាវ ស៊ើបអង្កេត ស្វែងរកទ្រព្យសម្បត្តិ ដែលជាផលនៃបទល្មើសគ្រឿងញៀន សំដៅឈានទៅចោទប្រកាន់បទល្មើសសម្អាតប្រាក់ ដើម្បីឃាត់ទុក បង្កក និងរឹបអូសជាទ្រព្យសម្បត្តិរដ្ឋ និងស្នើសុំគោលការណ៍បង្វែរទ្រព្យទាំងនោះ មកគាំទ្រដល់ការងារប្រយុទ្ធប្រឆាំងគ្រឿងញៀនខុសច្បាប់។
៦-បន្ដពង្រឹង និងពង្រីកកិច្ចសហការអន្ដរជាតិ ក្នុងការផ្លាស់ប្ដូរព័ត៌មាន ទាន់ហេតុការណ៍ និងសហការស្រាវជ្រាវបង្ក្រាបមុខសញ្ញាឲ្យដល់ឬសគល់។
៧-បង្កើនការអប់រំណែនាំ រំលឹកដាស់តឿនដល់មន្រ្តីអនុវត្តច្បាប់ ឲ្យគោរពនូវក្រមសីលធម៌ និងមនសិកាវិជ្ជាជីវៈ គោរពច្បាប់ បទបញ្ញត្តិ និងគោលការណ៍នានា របស់រាជរដ្ឋាភិបាល និងក្រសួងមហាផ្ទៃ។ ទន្ទឹមនោះ យកចិត្តទុកដាក់ក្នុងការលើកទឹកចិត្ត តាមរយៈការលើកសរសើរ ជូនរង្វាន់ចំពោះមន្រ្តីដែលមានស្នាដៃ ព្រមទាំងអនុវត្តវិន័យ ឬវិធានការច្បាប់យ៉ាងម៉ឺងម៉ាត់ ដោយគ្មានការលើកលែងចំពោះមន្រ្តីប្រតិបត្តិការ ដែលប្រព្រឹត្តបទល្មើសពាក់ព័ន្ធនឹងគ្រឿងញៀន។
គោរពបទវិន័យនគរបាលជាតិកម្ពុជា។
៨-ត្រូវបន្តពង្រឹង និងពង្រីកកិច្ចសហប្រតិបត្តិការ ទាំងក្នុងក្របខ័ណ្ឌទ្វេភាគី ពហុភាគី ក្នុងតំបន់ និងអន្តរជាតិ ឱ្យកាន់តែទូលំទូលាយ ពិសេសការពង្រឹង និងពង្រីកកិច្ចសហប្រតិបត្តិការទ្វេភាគីជាមួយប្រទេសជិតខាងដើម្បីធានានូវគុណភាព ប្រសិទ្ធភាព ក្នុងការផ្លាស់ប្តូរព័ត៌មានទៅវិញទៅមកតាមរយៈយន្តការការិយាល័យទំនាក់ទំនងព្រំដែន (BLO) ព្រមទាំងត្រូវបន្តជំរុញការអនុវត្តស្មារតីនៃកិច្ចព្រមព្រៀង ស្តីពីកិច្ចសហប្រតិបត្តិការត្រួតពិនិត្យគ្រឿងញៀនឆ្លងកាត់ព្រំដែន ដើម្បីឈានទៅកសាងភូមិ “ស” គ្មានគ្រឿងញៀននៅតាមតំបន់ព្រំដែន។
៩-ជំរុញសកម្មភាពបោសសម្អាតការប្រើប្រាស់គ្រឿងញៀន និងឈានទៅលុបបំបាត់ទីផ្សារគ្រឿងញៀនក្នុងផ្ទៃប្រទេស តាមគោលការណ៍ «សម្អាតចកចេញពីផ្ទៃបឹង និងរក្សាផ្ទៃបឹងឱ្យថ្លាជាប្រចាំ» ។
ឯកឧត្ដម ឧត្ដមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន ក៏បានឯកភាពរបាយការណ៍ និងទិសដៅបន្តរបស់មន្ទីរប្រឆាំងគ្រឿងញៀន និងបានសង្កត់ធ្ងន់ឱ្យអស់លោក-លោកស្រីឧត្តមសេនីយ៍ វរសេនីយ៍ បន្តយកចិត្តទុកដាក់លើការងាររដ្ឋបាលប្រចាំថ្ងៃ, ស្លៀកពាក់ឯកសណ្ឋាន នគរបាលជាតិឲ្យបានត្រឹមត្រូវ ពិសេសឈុតប្រយុទ្ធពេលចុះប្រតិបត្តិការបង្រ្កាប ហើយវត្ថុតាងចាប់យកត្រូវប្រគល់មកការិយាល័យរដ្ឋបាល-សរុប ដើម្បីគ្រប់គ្រង
និងត្រូវត្រួតពិនិត្យបញ្ជីវត្តមានជាប្រចាំ។
មុននឹងបញ្ចប់ ឯកឧត្ដមនាយកមន្ទីរប្រឆាំងគ្រឿងញៀន ក៏បានចែកសម្ភារៈឱ្យទៅតាមបណ្តាការិយាល័យទាំង១១ រួមមាន៖ អាវក្រោះ មួក និងស្រោមដៃ ក្នុងមួយការិយាល័យ ២០, ខែលការពារ ក្នុងមួយការិយាល័យ ១ខែល, អាវយឺត ក្នុងម្នាក់១អាវ សរុប ៨៥០អាវ, កុំព្យូទ័រលើតុ ក្នុងមួយការិយាល័យ ១គ្រឿង, ឧបករណ៍តេស្តសារធាតុញៀន ១០ឈុត និងឧបករណ៍ស្វែងរកសារធាតុញៀន ០៥ឈុត ជូនការិយាល័យ ក៦, កំព្យូទ័រយួរដៃ ជូន(ក១) ៥គ្រឿង និង៥គ្រឿងទៀត ជូនដល់ (ក៦) និងក្រុមជំនួយការ, ម៉ាស៊ីន កូពី ចំនួន ០២គ្រឿង ជូនការិយាល័យ ក១, ដងដែកសម្រាប់បុកចូល និងចាប់មនុស្ស ចំនួន០៣។
ឯកឧត្ដម ឧត្ដមសេនីយ៍ឯក ឃឹង សារ៉ាត់ ក៏បានណែនាំឱ្យតាមបណ្ដាការិយាល័យ ត្រូវថែរក្សា និងទុកដាក់សម្ភារទាំងអស់ខាងលើឲ្យបានត្រឹមត្រូវផងដែរ៕
