30/03/2026
Парламент Мәжілісінің депутаты Бақытжан Базарбек Алматыдағы Әл-Фараби даңғылындағы жол-көлік оқиғасына байланысты пікір білдіріп, құқық қорғау жүйесін түбегейлі реформалау қажеттігін айтты.
Депутат жоғары лауазымды тұлғалар мен ірі бизнес өкілдерінің балаларына көрсетілетін жеңілдіктер мен «қамқорлық» мемлекеттік органдардың жұмысын тежеп отырғанын атап өтті. Ол бұл ойларын Парламент кулуарында журналистерге берген сұхбатында ашық жеткізді.
Депутат ішкі істер органдарындағы бейберекетті тоқтату үшін тек Алматымен шектелмей, республика көлемінде тексеріс жүргізу қажеттігін баса айтты.
«Мұндай «мажориктік» жағдай, яғни жоғары лауазымды шенеуніктердің, лауазымды тұлғалардың, ірі бизнесмендердің балаларына ішкі істер департаменттеріндегі лауазымды адамдардың қамқорлық танытуы – бұл тек Алматыда ғана емес, басқа аймақтарда да жеткілікті. Сондықтан ішкі істер органдарында ауқымды тазарту жүргізу қажеттілігі туындап тұр», - деді депутат.
