13/01/2026
Медициналық туризм - ұлттық денсаулық сақтаудың стратегиялық бағыты.
Мемлекет басшысы Қасым-Жомарт Тоқаев елді жаңғыртудың жаңа кезеңінде адам капиталының сапасы, денсаулық сақтау жүйесінің тиімділігі және жоғары технологиялық медицинаның дамуы негізгі басымдықтардың бірі екенін атап өтті. Бұл стратегиялық міндеттерді жүзеге асыру аясында University Medical Center (UMC) қызметі толық үндес келеді, себебі клиникалар заманауи медицина, ғылым және инновация тоғысқан жетекші медициналық экожүйе ретінде қалыптасты.
Бүгінде Астана қаласы медициналық туризмнің халықаралық орталығына айналып келеді, ал UMC бұл бағытта нақты нәтижелерге қол жеткізді. Біздің клиникаларымызда алыс және жақын шетелдерден келген мыңдаған пациенттер жоғары технологиялық медициналық көмек алды, бұл қазақстандық дәрігерлерге деген сенімнің артып келе жатқанын көрсетеді.
2025 жылы шамамен 100 шетелдік пациент жүрекке жасалатын операцияларға (ашық және аз инвазивті) және акушерлік-гинекологиялық қызметтерге жүгінді. Медициналық туристердің орташа жасы - 45 жас, бұл еңбекке қабілетті жастағы азаматтардың еліміздің жоғары технологиялық медицинасына деген сенімінің жоғары екенін көрсетеді.
UMC базасында кардиохирургия, интервенциялық кардиология, трансплантология, нейрохирургия және онкология салаларында JCI халықаралық стандарттарға сай күрделі операциялар жүргізілуде. Сонымен қатар, шетелдік пациенттерге қашықтан кеңес беру, екінші пікір (second opinion) және жеке емдеу жоспарын әзірлеу сияқты қызметтер сәтті енгізіліп, медициналық көмектің қолжетімділігі мен ашықтығы артты.
Медициналық туризмнің дамуы тек ел беделін көтеріп қана қоймай, денсаулық сақтау саласына инвестиция тартуға, жаңа технологияларды енгізуге және отандық мамандардың кәсіби деңгейін арттыруға мүмкіндік береді. Бұл үдеріс әлеуметтік қамсыздандыру жүйесін нығайтып, халықтың өмір сүру сапасын жақсартуға тікелей ықпал етеді.
Алдағы уақытта UMC медициналық туризмді жүйелі түрде дамыта отырып, еліміздің денсаулық сақтау жүйесін жаңа деңгейге көтеруге өз үлесін қосады деп сенеміз.
