05/11/2025
هالحالة هي وحدة من الحالات اللي شكلتلي تحدي لاقدر اوصل لأفضل نتيجة تجميلية ممكنة لندبة الحرق القوية .. والحمدلله بمساعدة وقوة هالطفل البطل اللي تحمل جلسات الحقن المتكرر قدرنا انو نعالجا ونحسن لون وسماكة وقساوة الندبة .. الشي اللي أعاد الفرح والأمل إلو ولأهلو بعد ألم وصبر طويل .. نطروني بحالات شبيهة رح نزلا تباعاً ما زالت قيد الجلسات وعم تتحسن بشكل ملحوظ ..
هاي🖐! بوست اليوم عن الندبة الجلدية أو Skin scar.
شو هي الندبة الجلدية؟ شو أسبابا؟ شو أشكالا؟ وشو علاجاتا؟ وهل ممكن تروح عالآخر؟
#الندبة الجلدية هي أثر بيتبع أذية تعرضلا الجلد متل جرح أو حرق، وبتنتج عن عملية ترميم ذاتي بيخضعلا الجلد بعد هالأذية منسميا تليّف.
وهالترميم ممكن ياخود مسار طبيعي أو مسار مُعيب، ومن هالشي بتتصنّف الندبة لعدة أشكال. شو يعني هالحكي؟
يعني لما بيترمّم الجلد المتأذي ضمن حدود الحرق أو الجرح مثلاً وما بيكون مرتفع عن سطح الجلد المُحيط، هون تُسمّى:
☝ندبة طبيعة أو normotrophic scar.
أما إذا كانت ضمن حدود الأذية ولكن مرتفعة عن مستوى الجلد المحيط، فتُسمّى:
✌ندبة ضخامية أو hypertrophic scar.
ولما بتتعدّى الندبة حدود الأذية وكمان بتكون مرتفعة عن الجلد المُحيط، فتُسمّى:
👌جُدرة أو keloid scar.
وبالعكس، ممكن ببعض الحالات ينجم عن الترميم المُعيب انخفاض بالجلد بيعطينا ما يُعرف بِ:
✌✌ الندبة الضمورية atrophic scar.
الندبة الضخامية والجُدرة بينتجو عن تصنيع كمية كبيرة من ألياف الكولاجين فبتكون الندبة مُبالغ فيا، أما الندبة الضمورية فممكن تكون ناجمة عن تصنيع ناقص لطبقات الجلد، أو نتيجة شد الكولاجين المتسمّك بالطبقات السُفلى من الجلد، للبشرة السطحية الأعلى منا، فبتنخمص للداخل.
رح أعرض بالتعليق الأول 👇 صورة بتوضح أشكال الندبات المختلفة types of scars.
🩹💊 علاجات الندبة متعددة وأكثرا إفادة هوي اللي بيتلاحق خلال الترميم بالمراحل الأولى لمّا تكون الندبة بعدا حمرا ما صارت بيضا.
وطبعاً حسب شكل الندبة بيتحدّد شو العلاج الأفضل.
من هالعلاجات:
* استخدام جل السيليكون أو كريم كورتيكوستيروئيد مع تدليك متكرر للنسيج الندبي لتخفيف التليّف وتحسين الترمّم،
* وممكن نلجأ لحقن كورتيوستيروئيد ضمن الندبة، وبشكل خاص منستخدم هالطريقة بنوع الجدرة أو keloid، متل بحالة الصورة المُرفقة مع هالبوست لَ طفل تعرض لحرق سبّب انكماش بالجلد بمنطقة أعلى الصدر نتج عنو تندّب تليّفي شديد، وبعد عدة جلسات من حقن الكورتيوستيروئيد ضمن الندبة ب مركز عناية الطبي تمكنا من تحسين الندبة بشكل واضح.
أخيراً، هل ممكن الندبة تختفي تماماً 😑؟
الجواب للأسف هوي لا 😔، لأن الجلد ما بيرجع لوضعو الطبيعي بشكل كامل لمّا بتتخطى الأذية البشرة وبتوصل للأدمة والطبقات السفلى من الجلد.
دايماً رح يكون في أثر ويُستحسن مراجعة طبيب أمراض جلدية مختص لمتابعة الحالة من مراحلا الأولى للحصول على أفضل نتيجة تجميلية ممكنة للندبة.
بتمنى تكونو استمتعو واستفدتو 🥰 بلاقيكم ع خير ببوستات جلدية أو تجميلية جديدة، باي 👋.
