28/07/2025
මේ ගීතය රචනා කළේ සෝමපාල ලීලානන්ද මහතා. මෙය ඔහු ලැබූ අත්දැකීමක් පාදක කරගෙන ලියන ලද්දක්. එතුමන් විසින් රචනා කරන ලද බොහොමයක් ගීත පෙර සැකසූ තනුවකට අනුව රචනා කරන ලද ගීත. 'පාට පොදක් තිලකලා' , 'අම්මලා දුක් ගන්නේ', 'කැන්දම් යන්නම්' වගේ ගීත රැසක් ඔහු විසින් රචනා කර තිබෙනවා. ඒ බොහොමයක් පෙර සැකසූ තනුවලට රචනා කලත් මේ ගීතය එසේ නොවන ඔහු විසින් රචිත එකම ගීතයයි.
මෙය ඔහු විසින් ඔහුගේ දිනපොතේ නොදැනුවත්වම ලියූ කවියක්. දිනක් ප්රවීණ සංගීතවේදී සරත් දසනායක මහතා මේක දකිනවා. ඉන්පසු ඔහු විසින් තනුවක් දාල ගීතය පටිගත් කරනවා. මේ ගීතයට පාදක වෙන්නෙ සෝමපාල මහතාගේ අත්දැකීමක්. එය ඔහුගේ වචන වලින්ම උපුටා දක්වන්නම්.
"අපේ ගමේ හිටියා පොල් කඩන මිනිහෙක්. එයාගේ ඇස් පේන්නෙ නැහැ. කෝටුවක් අරගෙන තමයි ඇවිදින්නෙ. එයාගේ ගෑනු මනුස්සයාත් එයත් එක්කමයි හිටියේ. ඒක තමයි මේ සින්දුව ලියන්න නිමිත්ත කරගත්තේ. සින්දුවේ එක තැනක තියෙනවා.
කුලුඳුල් නැකතින් හමුවන පැතුමක්
පතමුව සසරින් නික්මෙනදා
“මේ වචන ටික මගේ පෞද්ගලික ජීවිතයට සම්බන්ධයි. එයින් කියැවෙන්නේ සංසාරේ එකට ඉන්න ඇය ඔහුගේ ප්රථම ප්රේමය නොවන බවයි. එතකොට ඇය කියනවා
සංසිඳුවා සිත පහන් කරන්නෙමි
මේ පෙම කුලුඳුල් පෙමය සිතා
එන්නෙමි පසුපස සංසාරේ
කැපවෙමි ඔබ සිතු ගැනම සිතා
ඉතින් සංසාරෙන් සමුගන්නා දා ඒ ගමනත් ඔහු යන්නේ ඇයත් සමඟයි." -2009/08/30 සිළුමිණ-[1]
සැරයටියෙන් අපි යනෙන තුරා
සංසාරේ අපි එකට ඉමූ
සංසාරෙන් අපි සමුගන්නාදා
ඒ ගමනත් අපි එකට යමූ
සැරයටියෙන් අපි යනෙන තුරා
සංසාරේ අපි එකට ඉමූ
සංසාරෙන් අපි සමුගන්නාදා
ඒ ගමනත් අපි එකට යමූ
ජීවන මං පෙත මලින් සැදී ගීය
යුගයක නොව ඔබ හමු වූයේ
කටු කොහොලින් පිරි කලල් වියේ මා
තනිවම එද්දිය හමුවූයේ
මින් මතු මංපෙත මලින් සදන්නෙමි
ළතැවුල් සෝ ගී නෑසෙන සේ
පමනක් නොව මේ සංසාරේ
උපදින වුව මතු සංසාරේ
මතු සංසාරේ මා හුරුබුහුටිව
පෙම් කරනා කල එලඹෙනදා
කුලුඳුල් නැකතින් හමුවන පැතුමක්
පතනෙමි සසරින් නික්මෙනදා
සංසිදුවා සතු පහන් කරන්නෙමි
මේ පෙම කුලුඳුල් පෙමය සිතා
එන්නෙමි පසුපස සංසාරේ
කැපවෙමි ඔබ සිතු ගැනම සිතා
සැරයටියෙන් අපි යනෙන තුරා
සංසාරේ අපි එකට ඉමූ
සංසාරෙන් අපි සමුගන්නාදා
ඒ ගමනත් අපි එකට යමූ
