09/11/2021
කවුද වාසනාව දෙපා මුල තබාගෙන සිටින්නේ???
විදේශ රටවල් කෝවිඩ්-19 රෝගය පාලනය කර ඇත්තේ උණුසුම් ජලය, උණුසුම් ජල වාෂ්ප ඇල්ලීම, උණුසුම් තේ හෝ උණුසුම් ජලය දිනකට වාර කිහිපයක් ගැනීමෙන් ය.
නමුත් අපි කොච්චර වාසනාවන්තද ?
අපේ මුතුන්මිත්තන්ගේ තුන්කල් විනිවිද දුටු පාරම්පරික ඥාණය ඉතාමත් විශිෂ්ට යි.
උණුසුම් ඖෂධීය කසාය පාන, ඖෂධීය වාෂ්ප ප්‍රතිකාර, ඖෂධීය ධූම, ආදී වටිනා ගුණයෙන් යුත් විශ්මිත ප්‍රතිකාර ක්‍රම තුළින් හා නිවැරදි ආහාර, ඖෂධ, විහරණ මඟින් ශරීරගත ප්‍රතිශක්තිකරණය ඉහළ නැංවිය හැකි අපේ හෙළ වෙදකම විස්මිතයි..
මේ ඒ ගැන පුංචි සටහනක් නැවතත් ..
"ඈත අතීතයේ බුදුරජාණන් වහන්සේගේ ජීවමාන කාලයේ සිට අද දක්වාම මේ ලෝකයේ සෑම රටකම වාගේ මිනිසුන්ට වෛරස් රෝග සෑදී ඇත
විද්‍යාව හා සෞඛ්‍යය එතරම් දුරට වර්ධනය නොවූ කාලවල මිනිසුන් වෛරස් රෝගයන්ට එතරම් බිලිවුණේ නැත.
නමුත් අද එසේ නොවේ. සෑම දේකම මිනිසුන් බිය වද්දන කෝවිඩ් 19 වැනි වෛරස වලින් ආරක්ෂා වීමට අපගේ දේශීය වෛද්‍යවරුන් අත ප්‍රතිශක්තිකරණය වර්ධනය කරන අත් බෙහෙත් බොහෝ ඇත.
අන් රටවල මෙන් නොව අපේ සංස්කෘතිය අනුව කුඩා දරුවෙකුට රන්කිරි කට ගෑම එක් වැදගත් චාරිත්‍රයකි. අලුත උපන් බිළිඳාට ශෝධිත ස්වර්ණ භෂ්ම සමඟ මව්කිරි ලබා දීම තුළින් සිදු වන්නේද දරුවාගේ ස්වභාවික ප්‍රතිශක්තිකරණය ඉහළ නැංවීමකි. අප සැම දෙනාටම ඒ උතුම් ශක්තිය ඒ උතුම් මව්වරුන්ගේ ආශිර්වාදයෙන් හිමි වී ඇත.
එලෙසම ඈත අතීතයේ සිට අප රටේ මිනිසුන් පොල්වතුර පානය කළහ. පොල් ලෙලි පොල් කොළ පොල්කටු අඟුරු සුදු හඳුන් දමා දුම් ඇල්ලීය. ඔවුන් සියලු රෝගවලින් ආරක්ෂා වූයේ දේශීය පළතුරු ,එළවළු, පලාවර්ග, දේශීය සහල් ආහාරයට ගෙනය. මීට අමතරව දේශීය කසාය වර්ග, කැඳ වර්ග, පාන වර්ග පානය කළහ.
ගෞතම බුදුරජාණන් වහන්සේ දේශනා කළ ආකාරයට මේ පුංචි ශ්‍රී ලංකාදීපය තුළ පිවිතුරු බුදුදහම ඉතුරු වෙනු ඇත. එය සත්‍යය ය.
එලෙසම උන්වහන්සේ දේශනා කළ ආකාරයට නිතර නිවැරදි දැකීමෙන් නිවැරදි කල්පනාවට පත් ව නිවැරදි සිහියෙන් නිවැරදි දිවි පෙවෙතක් ගත කිරීම තුළින් ද මේ උවදුරෙන් බොහෝ දුරට ආරක්ෂා වීමට අපට හැකිය...
මේ පුංචි ලස්සන ශ්‍රී ලංකාවේ ස්වභාවික දිය ඇලි ගස් වැල් කඳු මුදුන් වල ස්වභාවික ඖෂධ පොළොවට වැටුණත් පැලවෙන ශාඛ වර්ග තිබෙන වටිනා පුංචි රටේ ජීවත්වන අප ඉතාමත් වාසනාවන්තය.
අපට ආරක්ෂා වීමට සෑම අතින්ම වටිනා ස්වභාවික ඖෂධ සහ ස්වභාවික සම්පත් මේ ලක්බිම ඇත.
පාරම්පරික දේශීය කැඩුම් බිදුම් වෛද්‍යවරියක් වන මම අත්දුටු අත් බෙහෙත් මගේ ජීවිත කාලය පුරාම දැක ඇත්තෙමි. එවන් අත්බෙහෙත් කිහිපයක් සියලු සත්වයන්ගේ යහපත උදෙසා මෙසේ සටහන් කිරීමට අදහස් කළෙමි.
සාගරයක් වැනි ආයුර්වේද පාරම්පරික දේශීය වෙදකමේ මා උගත් දිය දෝතින් බිදක් ඔබටත්... තෙරුවන් සරණින් සියලු ලෝ සතුන් සුවපත් වේවා!...
මේ දිනවල පවතින කෝවිඩ් - 19 වෛරසයෙන් ආරක්ෂා වීමට පාරම්පරික දේශීය ආයුර්වේද වෛද්‍ය ක්‍රමයෙන් පිළිවෙත් කිහිපයක් .... අවදානමකට පෙර සූදානම
1. පළමුව ඔබේ සිරුර නිතර පිරිසිදුව තබා ගන්න
මේ සදහා කොහොඹ කොළ, අමුකහ තැම්බූ වතුරින් විවේකය ඇති සෑම දිනකම ස්නානය කිරීම සුදුසුයි ....
වෙනිවැල්ගැට තැම්බූ වතුර ස්නානය කරන්න
2. දෑත් හා දෙපතුල් හොදින් සෝදන්න
අමුකහ සහ දෙහි තැම්බූ වතුරින් දෑත් දිනකට තෙවරක්වත් හොදින් සෝදන්න
නැතහොත් දෙහි බෑයකින් දෙඅත් දෙපතුල් මැද සෝදා හරින්න
3.නිතර නිවස සහ අවට පිරිසිදුව තබා ගන්න
එලෙසම ඉදිරි පස දොරට ඉහළින් කොහොඹ අත්තක් එල්ලන්න
කහ සහ දෙහි මිශ්‍ර වතුර නිතර නිවස පුරා වත්ත පුරා ඉසින්න
ඔබ නිවසට පැමිණෙන විට දෙහි පෙති හෝ අමුකහ/ කහ දැමූ වතුර බදුනකින් මුව අත් පා සෝදා නිවසට ඇතුළු වන්න
4. ඖෂධීය පාන වර්ග තේ වෙනුවට පානය කරන්න
කරපිංචා, සුදු ලූණූ, වෙනිවැල්ගැට , ගම්මිරිස් තැම්බූ වතුර පානය කරන්න
බෙලිමල් , රණවරා , ඉරමුසු, කොත්තමල්ලි වැනි පාන වර්ග ඉගුරු සමග මිශ්‍ර කොට භාවිතා කරන්න
මේ සියලු පානයන් ශරීරයට හිතකර ප්‍රතිශක්තිකරණ පද්ධතිය ශක්තිමත් කරන පානයන් ය..
මීට අමතරව ඔබ සම්මත කසාය පානයන් සකස් කරන්නේ නම්,
ඔබ නියමිත මාත්‍රාවක් අනුව කසාය පාන සකස් කොට පානය කළ යුතුයි...
නියමිත අනුපාන හා නියමිත කසාය පත සිඳවීම පිළිබඳව ඔබේ ප්‍රදේශයේ සුදුසු පාරම්පරික හෝ ආයුර්වේද වෛද්‍යවරයෙකුගේ උපදෙස් ඇතිව දැන ගෙන කසාය පානය කළ යුතුයි...
කසාය වට්ටෝරු පමණ ඉක්මවා ප්‍රමාණ අසමානව ඖෂධ යොදා සකස් කරන පානයන් නිතර පානය කිරීමෙන් ඔබගේ රුධිර සීනි මට්ටම පහත වැටිය හැකියි...
එම නිසාවෙන් නියමිත මාත්‍රාවට අනුකූලව පාරම්පරික හෝ ආයුර්වේද වෛද්‍ය උපදෙස් අනුව කසාය සිඳ බීම යහපත් ය...
නැතහොත් ආයුර්වේද ඖෂධ වෙළඳ සැල් වල ඇති සුවධරණි ප්‍රතිශක්තිකරණ වර්ධක පානය නියමිත මාත්‍රාවන්ට යොදා සකස් කළ කසාය පානයකි. එය දිනපතා තේ වෙනුවට පානය කළාට කමක් නැත..
5. අමුකහ,වදකහ සහ පෙරුම්කායම් වැනි ඖෂධ නූලක අමුණා අතේ හෝ බෙල්ලේ පළදන්න
පෙරුම්කායම් කුඩු ඇතැම් අය ආහාර වලට මිශ්‍ර කර ආහාරයට ගන්නා අතර එලෙස ආහාරයට ගැනීම විශේෂයෙන් ගර්භනී කාන්තාවන්ට නුසුදුසු බව කරුණාවෙන් සලකන්න
6. නිවසෙහි නිතර රතන සූත්‍රය සජ්ජායනය කරන්න.
ආනාපානසති හා මෛත්‍රී භාවනාදිය සිදුකොට නිතර මෙත් සුව වඩන්න.
නැතහොත් තම තමන්ගේ ආගමානුකූල වතාවත් කරන්න.
7. නිතර පිරිසිදු ජලය පානය කරන්න
ළිදක් ඇත්නම් එයට කරද පොතු හෝ කුඹුක් මුල්, ඉගිනි ඇට කිහිපයක් දමන්න.
නැතහොත් ගුරුලේත්තුවකට පානීය ජලය දමා ඉගිනි ඇට කුඹුක් මුල් ස්වල්පයක් දමා තබා පෙරා පානය කරන්න
8. වියලි කොහොඹ කොල, වියලි කහ, වියලි මදුරුතලා කොල, එනසාල්, අරලු, සුවද කොට්ටන් වැනි ඖෂධ දුම්මල සමග එක්කොට දුම් අල්ලන්න...
මීට අමතරව පාවට්ටා, නික කොල, ඉගුරු, දෙහි කොළ, අමුකහ, කප්පරවල්ලිය තැම්බූ වතුරින් වාෂ්ප අල්ලන්න...
නැතහොත් කප්පරවල්ලිය පත්‍ර හා අමු කහ කොටා ඉස්ම ගෙන සර්වවිෂාදී තෙල් සමඟ මිශ්‍ර කොට මඳක් රත් කර නාසය දෙපස, උගුර දෙපස හා පපුවේ පිටින් ආලේප කරන්න .
9. සෙම් ගතිය ඇතිවන විටම මද උණු වතුරට ලුණු දැමූ වතුරින් උගුර කට සෝදන්න
10. උදෑසන හිස්බඩ මීපැණි ඉගුරු ඉස්ම හෝ දෙහි ඉස්ම දමා පානය කර පිරිසිදු වතුර වීදුරුවක් පානය කරන්න
11. අමු කහ පෙති කපා උණුවතුරට දමා දිනකට එක්වරක් වත් පානය කරන්න
12. වෙනිවැල්ගැට රත්මල් සේපාලිකා කොළ මල් මුල් ගෙඩි තම්බා ස්නානය කරන්න
13. රසකිඳ කොළ කොටා ඉස්ම පානය කරන්න
14. මොණරකුඩුම්බිය පංචාංගය පොල්කිරි ලූනු දමා පානය කරන්න
15. වෙනිවැල්ගැට කොහොඹ සුදුහදුන් ඇත්තෝර සබන් ආලේප කරන්න
16. එළබටු කොළ කැඳ ඉඟුරු ගම්මිරිස් දමා පානය කරන්න
17. කරපිංචා, සුදුළූණු, හීනටි හාල් දමා කැඳ සාදා පානය කරන්න
මීට අමතරව මොණරකුඩුම්බිය කැඳ, ඉරමුසු කැඳ, නීරමුල්ලිය කැඳ වැනි කොළ කැඳ යහපත් ය.
18.පාවට්ටා, අමු ඉඟුරු ,නික කොළ, කප්පරවල්ලිය දමා හුමාලය අල්ලන්න
දෙහි ඉස්ම කරපිංචා ඉස්ම අමු ඉගුරු මී පැණි ඉස්ම දමා පානය කරන්න
19. වැට මුරුංගා කොළ ,කරපිංචා ස්වල්පයක් දිනපතා බත් හැලියට සහ ව්‍යංජන වලට දමන්න
20. වැල්මී ඉස්ම හෝ කුඩු සමග මීපැණි හෝ තල් සූකිරි මිශ්‍ර කර දිනකට වරක් තේ හැන්දක් පමණ පානය කරන්න
21. කහ,තුනපහ, වැට මුරුංගා කොළ, කරපිංචා සහ විශේෂයෙන් සුදුලූණූ වැනි දෑ එක්කොට ආහාර පිසීමෙන් ඔබේ ශරීරයේ ප්‍රතිශක්තිකරණ හැකියාව වැඩිදියුණු ගත හැක
22. පැපොල්,ජම්බෝල,නෙල්ලි,ලොවි,උගුරැස්ස,මාදං,සැපදිල්ලා,ලාවුලු,කෙසෙල්, කලු උක් දඩු, අන්නාසි,ඇඹුල් දොඩම් වැනි දේශීය පළතුරු වර්ග ආහාරයට ගන්න..
23. නිවිති, සාරණ, , කොහිල, කංකුං, ගොටුකොල, ලුණුවිල, ගැටතුඹ, වැට මුරුංගා,වෙල් අලකොළ,කටු එරබදු දලු වැනි පලා වර්ග ආහාරයට එකතු කරගන්න
24. වැටකොලු, කෙසෙල්මුව, කැකිරි, රාබු, නෝකෝල්, අමු පැපොල්, පොලොස්ගැට, එළබටු වැනි එළවලු වැඩිපුර ආහාරයට ගන්න
25. ඔබ පෞද්ගලිකව පාවිච්චි කරන කොට්ට මෙට්ට ඇද ඇතිරිලි, කෝප්ප පිගන්, ඇදුම් පැලදුම් නිතරම පිරිසිදුව තබාගන්න.
ඒවාසෝදන විට දෙහි බිදු කිහිපයක් හෝ කොහොඹ ඉස්ම ස්වල්පයක් ජලයට මිශ්‍ර කොට සෝදන්න.. ඖෂධීය දූම වර්ග ඒවාට අල්ලන්න..
කොහොඹ කොල, පැගිරි කොළ වේලා ඒවායින් දුම් අල්ලන්න.. ඇදුම් සේදු පසු තද අව්වේ වියළා ගන්න
නිතර සිත සන්සුන් කරගෙන ධර්මානූකූල සැහැල්ලු දිවි පෙවතක් ගත කරන්න
තෙරුවන් සරණින් ඔබ සැමගේ නිරෝගීභාවය ආරක්ෂා වේවා!!!
