Kaethies Physio

05/07/2025

Type 2 நீரிழிவு நோயினை பூரணமாக குணப்படுத்த முடியுமா? அறிவியல் சொல்வது உங்களை ஆச்சரியப்படுத்தலாம்!

நீரிழிவு நோய் வாழ்நாள் முழுவதும் இருக்கும் என்று பெரும்பாலோர் நம்புகிறார்கள் — ஆனால் அது அவ்வாறே இருக்க வேண்டுமா?

🔍 சுருக்கமான பதில்: ➡️ டைப் 2 நீரிழிவு நோய் சில நேரங்களில் மீளக்கூடியது – குறிப்பாக ஆரம்ப நிலையிலேயே கண்டறிந்து நடவடிக்கை எடுத்தால்.

➡️ டைப் 1 நீரிழிவு நோய் மீள முடியாது, ஆனால் சிறப்பாக கையாள படக்கூடியது.

விவரமாக பார்ப்போம் 👇

✅ டைப் 2 நீரிழிவு – உண்மையில் மீள முடியுமா?

ஆம். சமீபத்திய மருத்துவ ஆராய்ச்சிகள் கூறுவது:
நீங்கள் சரியான வாழ்க்கை முறையை பின்பற்றினால், மருந்துகள் இல்லாமலும், உங்கள் இரத்தத்தில் சீனியின் அளவைக் கட்டுப்பாட்டுக்குள் கொண்டு வரலாம்.

🛠️ எப்படி?

✅ சிறந்த உடல் எடை குறைப்பு (குறிப்பாக வயிற்று தொப்பையினை குறைத்தல்)

🍽️ குறைந்த மாப்பொருள் அல்லது குறைந்த கலோரி உணவுகளை உட்கொள்ளல்

⏳ Intermittent fasting (மருத்துவ ஆலோசனையுடன்)

🏃‍♀️ தினசரி உடற்பயிற்சி

😴 நல்ல தூக்கம், குறைந்த மன அழுத்தம்

💡 மீட்பு என்பது "பூரண குணமடைதல்" அல்ல. பழைய பழக்கங்களுக்கு திரும்பினால், நீரிழிவு மீளதிரும்பும் வாய்ப்பு அதிகம்.

❌ டைப் 1 நீரிழிவு – மாற்ற முடியுமா?

இல்லை. டைப் 1 ஒரு தன்னைத்தானே தாக்கும் நோய் (Autoimmune disease).
உடல், இன்சுலின் உற்பத்தி செய்யும் செல்களைக் தாக்குவதால், மருந்துகளால் மட்டுமே கட்டுப்படுத்த இயலும்.

📋 எப்படி கையாளலாம்?

💉 இன்சுலின் ஊசி மற்றும்

📱 இன்சுலின் பம்ப், CGM போன்ற சாதனங்கள்

🥗 சரியான உணவுமுறை & வாழ்க்கை முறை

அறிவியல் ஆதாரம்?

DiRECT Trial (UK) எனும் ஒரு பெரிய மருத்துவ ஆய்வில், தொடக்க நிலை டைப் 2 நீரிழிவு உள்ளவர்களில் பலர் எடை குறைப்பும், சரியான உணவுத் திட்டமும் மூலம் நீரிழிவு நோயிலிருந்து மீட்சி அடைந்தனர்.
சிலருக்கு அறுவை சிகிச்சை (bariatric surgery) மூலம் நீடித்த மாற்றமும் ஏற்பட்டது.

💬 இறுதி கருத்து:

உங்களுக்கோ, உங்களுடைய பிரியமான ஒருவருக்கோ டைப் 2 நீரிழிவு இருந்தால், நம்பிக்கையை இழக்க வேண்டாம்.
உணவுமுறை, பயிற்சி, நலம் சார்ந்த பழக்க வழக்கங்கள் மூலம் மீட்பு சாத்தியம் உள்ளது.
மருத்துவரை அணுகுங்கள் — ஆரம்பத்திலேயே செயலில் இருங்கள்.

❤️ பயனுள்ளதாக இருந்தால், Like & Share செய்யுங்கள்!

🙋‍♂️ கேள்விகள் உள்ளதா? Comments இல் கேளுங்கள்!

27/06/2025

💧 சிறுநீர் தவறி வெளியேறும் பிரச்சனை (urinary incontinence)– பிசியோதெரபி மூலமான தீர்வு!

சிறுநீர் தவறி வெளியேறும் பிரச்சனை (Urinary Incontinence) என்பது குழந்தை பிறப்புக்குப் பிறகு, வயதான பிறகு, அல்லது அறுவைசிகிச்சையிற்குப் பிறகு ஆண்கள் மற்றும் பெண்கள் பலரை பாதிக்கும் பொதுவான பிரச்சனையாகும். சிலர் சிரிக்கும்போது, தும்மும்போது அல்லது ஓடும்போது சிறுநீர் கசியலுக்குள்ளாகிறார்கள். மற்றவர்கள் திடீரென ஏற்படும் சிறுநீர் கழிக்க வேண்டும் உணர்வு அழுத்தத்தால் பாதிக்கப்படுகிறார்கள்.

பெரும்பாலானவர்கள்இந்த பிரச்சனை குறித்து பேச மற்றும் சந்தேகங்களை நிவர்த்தி செய்ய சங்கடங்களுக்கு உள்ளாகின்றனர். ஆனால் உண்மையில், இது சாதாரணமாகவே ஏற்படக்கூடிய ஒரு உடல் நிலை பிரச்சனையாகும் – மேலும், பிசியோதெரபி மூலம் அதை சீர்செய்ய கூடிய சந்தர்ப்பங்கள் உள்ளன.

🧠 சிறுநீர் தவறி வெளியேறுவது என்றால் என்ன?

சிறுநீர் தவறி வெளியேறுவது என்பது சிறுநீரை கட்டுப்படுத்த முடியாமல், அது வேண்டாமென்ற நேரங்களில் வெளியேறுவதாகும். இது பலவகையாக ஏற்படலாம்:

🔹 ஸ்டிரஸ் இன்கொன்டினன்ஸ் (Stress Incontinence) – சிரிப்பது, தும்முவது, தூக்குவது போன்ற செயல்களில் வயிற்றழுத்தம் அதிகரிக்கும்போது சிறுநீர் கசியும் நிலை.

🔹 ஏர்ஜ் இன்கொன்டினன்ஸ் (Urge Incontinence) – திடீரென, கட்டுக்கடங்காதவாறு சிறுநீர் கழிக்க வேண்டும் என்ற உணர்வு அழுத்தம் தோன்றி உடனடியாக வெளியேறுவதாகும்.

இவை தவிர மற்ற வகைகளும் உள்ளன, மேலும் பல காரணங்களால் இவை ஏற்படக்கூடும் – அவையாவன பெல்விக் புளோர் (pelvic floor) தசைகளின் பலவீனம், நரம்பியல் சிக்கல்கள், குழந்தைப் பிறப்புகள், சத்திர சிகிச்சைகள் மற்றும் வயது சார்ந்த மாற்றங்கள்.

💪 பிசியோதெரபி எப்படி உதவுகிறது?

சிறுநீர் கசியலை சிகிச்சையளிக்க அறுவைசிகிச்சை தவிர, பாதுகாப்பான மற்றும் மிகவும் பயனுள்ள முறையாக பிசியோதெரபி இன்று பரவலாகப் பயன்படுத்தப்படுகிறது.

பிசியோதெரபிஸ்ட்கள், உங்கள் உடல்நிலை மற்றும் தேவைகளைப் பொறுத்து

✅ பெல்விக் தசைகள் மற்றும் அதன் செயல்பாடுகளை மதிப்பீடு செய்வார்கள்

✅ அவற்றை சரியாக இயக்கும் முறையை கற்றுக்கொடுப்பார்கள்

✅ சிறுநீர் கட்டுப்பாட்டை மேம்படுத்த பயிற்சிகளை கற்றுத் தருவார்கள்

✅ உங்கள் உடல்நிலை மற்றும் வாழ்க்கைமுறைகளில் தேவையான மாற்றங்களை பரிந்துரைப்பார்கள்

🔄 பெல்விக் பிளோர் பயிற்சிகள் என்றால் என்ன?

நீங்கள் "கீகல் பயிற்சிகள்" (Kegel Exercises) என்ற வார்த்தையை கேள்விப்பட்டிருக்கலாம். இவை சிறுநீர் வெளியேற்றம், மல வெளியேற்றம் மற்றும் உடலுறவு செயற்பாடுகள் போன்றவற்றுடன் தொடர்புடைய அடிவயிற்று தசைகளை பலப்படுத்தும் பயிற்சிகள் ஆகும்.

ஆனால், இவை அனைவருக்கும் ஒரே மாதிரியாக பரிந்துரைக்கப்படுவது இல்லை – ஒவ்வொருவருக்கும் அவர்களது உடலமைப்பிற்கேற்ப பயிற்சிகள் மாறுபடும். பிசியோதெரபியின் மூலம், நீங்கள் சரியான முறையில், பயனுள்ள பயிற்சிகளைப் பெறுவீர்கள்.

❤️ தயங்க வேண்டாம் – இது தீரக்கூடியது!

சிறுநீர் தவறி வெளியேறுவது ஒரு மருத்துவப் பிரச்சனைதான் – ஆனால் அதற்குத் தீர்வும் உள்ளது. நவீன பிசியோதெரபி முறைகள் மூலம், பலர் மீண்டும் தன்னம்பிக்கையுடன், சுதந்திரமாக வாழ்கிறார்கள்.

📞 இன்றே எங்களை தொடர்பு கொள்ளுங்கள்!
முதற்கட்ட பரிசோதனைக்கு நேரம் ஒதுக்கவோ, மேலும் தகவல் அறியவோ தயங்க வேண்டாம்.

✨ உங்களுக்குத் தெரிந்தவர்களில் யாராவது இதுபோன்ற பிரச்சனையால் பாதிக்கப்பட்டிருந்தால், இந்த தகவலை அவர்களுடன் பகிருங்கள் – நம்பிக்கையை பரப்புங்கள்! 💙

17/06/2025

🌟 ஒஸ்டியோஆர்த்ரைடிஸ் (Osteoarthritis) பற்றி தெரிந்து கொள்ளுங்கள் – வலி இல்லாமல் வாழ்வை நகர்த்த physiotherapy உங்களுக்கு உதவலாம்! 🌟

நீங்கள் மெதுவாக படிக்கட்டில் ஏறும்போது மூட்டுகள் வலிக்கிறதா? காலையிலே எழும்போது முழங்கால் அல்லது இடுப்பு மூட்டுக்கள் இறுகியது போல் இருக்கிறதா? இதுவே ஒஸ்டியோஆர்த்ரைடிஸ் (OA) எனப்படும் பொதுவான மூட்டு பிரச்சனையின் அறிகுறிகள்.

🔍 ஒஸ்டியோஆர்த்ரைடிஸ் என்றால் என்ன?

ஒஸ்டியோஆர்த்ரைடிஸ் என்பது வயதின் காரணமாக அல்லது பழைய காயங்களால் மூட்டு பகுதியில் உள்ள திசுக்கள் மற்றும் இளையங்கள் அழிவடைவதால் உருவாகும் ஒரு நோய்நிலையாகும். இது முக்கியமாக கீழ்கண்ட பகுதிகளில் ஏற்படுகிறது:

✅ முழங்கால்
✅ இடுப்பு
✅ கைகள்
✅ முதுகெலும்பு

அறிகுறிகள்:

🔸 மூட்டு வலி
🔸 ஓய்வு எடுத்த பிறகு இறுகி இருப்பது போன்ற உணர்வு
🔸 வீக்கம் மற்றும் அழுத்தும் போது வலி அதிகரித்தல்
🔸 நடக்கும் போது அல்லது மூட்டுகளை அசைக்கும் போது மூட்டுகளில் சத்தம் ஏற்படுதல்
🔸 அசைவுகள் குறைபாடு

வயதானவர்களுக்கு மட்டுமின்றி, முந்தைய காயங்கள், அதிக உடல் எடை, மரபு, மற்றும் மீண்டும் மீண்டும் ஒரே மாதிரியான செயல்களை செய்வது ஆகியவையும் OA-க்கு காரணமாக இருக்கலாம்.

---

💡 Physiotherapy எப்படிச் பயனளிக்கின்றது?

ஒஸ்டியோஆர்த்ரைடிஸ்-க்கு நிரந்தரமான தீர்வு இல்லையென்றாலும், பிசியோதெரபி மூலம் வலியை குறைத்து, வாழ்வதற்கான தரத்தை மேம்படுத்த முடியும்.

பிசியோதெரபி சிகிச்சையின் போது செய்யப்படும் விடயங்கள்:

🔹 வலிநிவாரணம் – manual therapy, ultrasound, dry needling சிகிச்சைகள்
🔹 தசை வலிமை பயிற்சி – இது மூட்டுகளுக்கு வலிமை தரும்
🔹 நெகிழ்வு பயிற்சி மற்றும் சீரான அசைவுகள் – தசைகளின் இறுக்கத்தன்மையை குறைக்கும்
🔹 உடல் நிலை மற்றும் வாழ்கை மாற்றங்கள் – வாழ்வியல் ஆலோசனைகள்
🔹 தனிப்பட்ட பயிற்சி திட்டங்கள் – நோயாளர்களின் தேவைகளுக்கேற்ப அமைக்கப்படும்

பிசியோதெரபி சிகிச்சையின் மூலமாகவலியை ஏற்றுக்கொள்வதற்கு மாற்றாக, மூட்டுக்கள் பாதிப்படையும் வீதத்தை குறைத்து உங்கள் தன்னம்பிக்கையை அதிகரித்து நீங்கள் மீண்டும் சுதந்திரமாக நகர்வதை உறுதிப்படுத்த முடியும்.

பலரும் முதலில் பிசியோதெரபிஸ்டை அணுகும் போது, நடக்க முடியாத நிலை, தூங்க முடியாத வலி போன்ற சிக்கல்களுடன் வருகிறார்கள். ஆனால் சில வாரங்களில், அவர்கள் சீராக நகர்கிறார்கள், தன்னம்பிக்கையுடன் வாழ்கிறார்கள்!

📲 இன்று முதல் ஒரு மாற்றத்தை துவங்குங்கள்!

உங்கள் மூட்டு வலி உங்கள் வாழ்க்கையை கட்டுப்படுத்தவிடாதீர்கள். இன்றே ஒரு பிசியோதெரபிஸ்டின் ஆலோசனையைப் பெறுங்கள், உங்கள் வாழ்க்கைக்கு ஏற்ற திட்டத்தை ஒன்றாக உருவாக்கலாம்.

👍 எங்கள் பக்கத்தை லைக் செய்யுங்கள் – வாராந்திர பயிற்சி குறிப்புகள் மற்றும் நிஜமான மேம்பாட்டு கதைகள் உங்களுக்காக நாங்கள் தொடர்ந்து வழங்குவோம்!

✨ வலி இல்லாமல், சுதந்திரமாக நகருங்கள். நாங்கள் உங்களுடன் இருக்கிறோம்! ✨

#மூட்டுவலி

16/06/2025

🚨நீங்கள் நீண்ட காலமாக தலைவலியினால் அவதிப்படுகிறீர்களா

🚨நீண்ட கால ஆங்கில மற்றும் சுதேச வைத்திய முறைகளுக்கு பின்பும் குறித்த தலைவலி குறைவடையாது தொடர்ச்சியாக இருக்கிறதா

🚨இது சிலவேளைகளில் சர்வைக்கோஜெனிக் தலைவலியாக இருக்கலாம்

🧠 சர்வைக்கோஜெனிக் தலைவலி: காரணங்கள், அறிகுறிகள் மற்றும் சிகிச்சைகள்

தலைவலி என்பது உலகம் முழுவதும் பொதுவான நரம்பியல் குறைபாடுகளில் ஒன்றாகும். ஆனால் எல்லா தலைவலிகளும் மூளையில் இருந்தே தோன்றும் என்பது இல்லை. சர்வைக்கோஜெனிக் தலைவலி என்பது ஒரு குறிப்பிட்ட வகை தலைவலியாகும். இது கழுத்து பகுதியிலுள்ள பிரச்சனைகளால் ஏற்படும். இது பெரும்பாலும் டென்ஷன் தலைவலி அல்லது மைகிரேன் என தவறாக அடையாளம் காணப்படலாம். இந்த நிலையைப் புரிந்துகொள்வது சரியான சிகிச்சைக்கு முக்கியமானது.

📍 சர்வைக்கோஜெனிக் தலைவலி என்றால் என்ன?

சர்வைக்கோஜெனிக் தலைவலி (Cervicogenic Headache) என்பது இரண்டாம்நிலை தலைவலியாகும். அதாவது, இது மற்றொரு உடல் பிரச்சனையால் ஏற்படுகிறது—பொதுவாக கழுத்துப் பகுதியில் உள்ள என்பு தசை மற்றும் மென் இழையங்களில் ஏற்படும் பாதிப்பினால் இவ்வகை தலைவலி வெளிக்காட்டப்படலாம்.

🧩 பொதுவான காரணங்கள்:

கழுத்து முதுகெலும்பின் ஆர்த்ரைட்டிஸ் அல்லது திசுக்களின் சிதைவு

விபத்து அல்லது அடிபட்டு ஏற்பட்ட காயம்

தவறான உடல் நிலை, குறிப்பாக நீண்ட நேரம் உட்கார்ந்திருத்தல் மற்றும் நீண்ட தூரம் பயணம் செய்தல்

கழுத்து மற்றும் மேல் தோள்பகுதியில் ஏற்படும் தசை அழுத்தம்

என்புகள் தேய்மானம் அடைவதால் நரம்புகள் அழுத்தப்படுதல்

🩺 அறிகுறிகள்

சர்வைக்கோஜெனிக் தலைவலிக்கு சில விசேட அறிகுறிகள் உள்ளன:

பொதுவாக ஒரே பக்கம் தலையில் வலி ஏற்படுகிறது (பின்புற கழுத்தில் இருந்து தலையின் முன்னோக்கி பரவுகிறது)

கழுத்து அசைவில் குறைவு அல்லது இறுக்கம் இருத்தல்

கழுத்தை அசைக்கும் போது அல்லது குறிப்பிட்ட நிலைகளில் வைத்திருக்கும் போது வலி அதிகரித்தல்

சில சமயங்களில் தோள்பட்டை அல்லது கை பகுதிகளுக்கும் வலி பரவலாம்

சிலருக்கு மங்கிய பார்வை, வாந்தி, ஒளி உணர்வுச் செறிவு போன்றவை ஏற்படலாம் (இவை மைகிரேனில் பொதுவானவை ஆனால் சில நேரங்களில் CGH-இல் காணப்படலாம்)

🧠 கண்டறிதல்

இந்த தலைவலியை கண்டறிவது சற்று கடினம், ஏனெனில் இது மைகிரேன் மற்றும் டென்ஷன் தலைவலிகளுடன் ஒத்திருக்கக்கூடும். ஒரு விரிவான மருத்துவ வரலாறு, உடற்சோதனை மற்றும் சில நேரங்களில் MRI அல்லது CT ஸ்கேன் போன்ற ஒளிச்சாய்வு சோதனைகள் மூலம் கண்டறியப்படலாம்.

சில நேரங்களில், நரம்பு தடுப்பு சோதனை மூலம் (nerve block) துல்லியமாக இது சர்வைக்கோஜெனிக் தலைவலியா என்பதை உறுதிப்படுத்தலாம்.

💊 சிகிச்சைகள்

சிகிச்சை பொதுவாக கழுத்து பிரச்சனையை குணப்படுத்துவதற்கே மையப்படுத்தப்படுகிறது.

🏥 பொதுவான சிகிச்சைகள்:

பிசியோதெரபி (physiotherapy): பிசியோதெரபியில் பின்வரும் சிகிச்சை முறைகள் பயன்படுத்தப்படலாம்

கழுத்து தசைகளை வலுப்படுத்தும் பயிற்சிகள்

மனுவல் தெரபி (manual therapy): கை மூலம் செய்யப்படும் சிகிச்சைகள் (deep friction and mobilization)

அங்க நிலைகளை மாற்றி அமைத்தல்(Postural correction) தொடர்பான ஆலோசனைகள்: அலுவலகம் அல்லது வீட்டில் உட்காரும் முறையை திருத்துவது

உலர் ஊசி சிகிச்சை முறை dry needling

Electrotherapy (TENS, Ultrasound Therapy)

🩺 பிற மருத்துவ சிகிச்சைகள்:

மருந்துகள்: வலி நிவாரணி (NSAIDs), தசை தளர்வூட்டிகள், நரம்பு வலி குறைக்கும் மருந்துகள்

நரம்பு தடுப்பு ஊசி (Nerve blocks)

Radiofrequency ablation – வலி ஏற்படுத்தும் நரம்புகளை இடைநிறுத்துவது

Trigger point injections – வலி புள்ளிகளில் நேரடியாக மருந்து செலுத்துவது

🏥 அறுவை சிகிச்சை:

மிகவும் கடுமையான Structural பிரச்சனை (முதல் எலும்புகளின் சிதைவு அல்லது disc இடைநெரிச்சல் போன்றவை) இருந்தால் மட்டுமே செய்யப்படும்.

🛡️ தடுப்பு மற்றும் வாழ்வுமுறை ஆலோசனைகள்

சரியான உடல் நிலையை பராமரித்தல், குறிப்பாக மொபைல்/கம்ப்யூட்டர் பயன்படுத்தும் போது

நீண்ட நேரம் உட்காரும் வேலை செய்தால் அடிக்கடி இடைவெளி எடுத்து நடைபயிற்சி செய்தல்

கழுத்து மற்றும் தோள்பகுதி தசைகளுக்கு இழுவை மற்றும் வலிமை பயிற்சிகள் செய்தல்

சரியான உணவு பழக்கங்கள் மற்றும் மன அழுத்த மேலாண்மை நடைமுறைகளை பின்பற்றல்

🩺 எப்போது மருத்துவரை அணுக வேண்டும்?

நீங்கள் கழுத்து வலி மற்றும் தலைவலியுடன் கூடிய அறிகுறிகளை அனுபவிப்பதாக இருந்தால், உடனே ஒரு மருத்துவரை அல்லது இயன் மருத்துவரை அணுகுவது முக்கியம். சரியான நேரத்தில் சிகிச்சை பெறுவதன் மூலம், நீண்ட கால வலியிலிருந்து விடுபடலாம்

21/05/2025

#டென்னிஸ்_எல்போ_(Tennis Elbow)
டென்னிஸ் எல்போ அல்லது மருத்துவ ரீதியாக லாடரல் எப்பிகொண்டைலைடிஸ் (Lateral Epicondylitis) என அழைக்கப்படும் இந்த நிலை, கைகளின் மேல் பகுதியான முன்கைகளின் தசைகள் அதிகமாக பயன்படுவதால் உண்டாகும். முழங்கை பகுதியில் தொடர்ந்து வருகிற வலியால் அது மிகவும் தொந்தரவாக இருக்கலாம்.

டென்னிஸ் எல்போ, பெரும்பாலும், ஒரே மாதிரியான கை இயக்கங்களை மீண்டும் மீண்டும் செய்வதாலோ அல்லது கைகளை மிகுந்த அழுத்தத்துடன் பயன்படுத்துவதாலோ ஏற்படுகிறது. இதற்கான பொதுவான காரணங்களில் சில:

🔷️டென்னிஸ் மற்றும் பிற ராக்கெட் விளையாட்டுகள்
🔷️வர்ணச்சாயம் அடித்தல் (Painting)
🔷️மர வேலை (Carpentry)
🔷️கணினி வேலை (நீண்ட நேரம் தட்டச்சு செய்தல்)
🔷️கை கருவிகள் நீண்ட நேரம் பயன்படுத்துவது

#டென்னிஸ்_எல்போ_(Tennis Elbow)_அறிகுறிகள்

டென்னிஸ் எல்போவின் முக்கியமான அறிகுறி, முழங்கையின் வெளியே வலி ஏற்படுவது. இதைத் தவிரவும்:

கைபிடி வலிமை குறைவாக இருப்பது

முழங்கை வளைத்தால் அல்லது உயர்த்தும்போது வலி ஏற்படுவது

கதவுக் கை திருப்பும் போதும் கையெடுப்பதிலும் வலி

இந்த வலி சுருக்கமாக ஆரம்பித்து, காலப்போக்கில் மோசமாகலாம்.

பொதுவாக, மருத்துவர் கையை சோதனை செய்வதன் மூலமாகவே இந்த நிலையை கண்டறிகிறார்கள். சில சமயங்களில், எக்ஸ்-ரே அல்லது எம்.ஆர்.ஐ. சோதனை மூலம் பிற காரணங்களை தவிர்க்கும் நோக்கில் சோதனை செய்யப்படலாம்.

சிகிச்சை முறைகள்
பெரும்பாலான டென்னிஸ் எல்போவை அறுவை சிகிச்சை இல்லாமல் குணப்படுத்தலாம். முக்கியமான சிகிச்சை முறைகள்:

1. இயன் மருத்துவம் (Physiotherapy)
🔷️Ice therapy - இது வீக்கத்தையும் வலியையும் குறைக்கும்.
🔷️Ultrasound Therapy & Electrotherapy
🔷️ஓய்வு வலியை ஏற்படுத்தும் செயல்களை தவிர்ப்பது மற்றும் செயல்பாட்டை மாற்றுதல் தொடர்பான ஆலோசனை
🔷️முன்கை தசைகளை பலப்படுதும் மற்றும் அதன் அழுத்தத்தை குறைக்கும் பயிற்சிகள்.
🔷️சார்புறுப்புக்களை பயன்படுதுதல் தொடர்பான ஆலோசனை (Tennis elbow Splint)

2. மருந்துகள்
buprofen, naproxen போன்ற வலி நிவாரணிகள்.

3. மூட்டு ஊசி சிகிச்சைகள்
(PRP) ஊசிகள்.

4. அறுவை சிகிச்சை
6 முதல் 12 மாதங்கள் வரையிலான சிகிச்சைக்குப் பிறகும் வலி குறையவில்லை என்றால் அறுவை சிகிச்சை பரிந்துரைக்கப்படலாம்.

டென்னிஸ் எல்போவைத் தவிர்ப்பதற்கான வழிமுறைகள்:

சரியான தொழில்நுட்பம் மற்றும் உபகரணங்களை பயன்படுத்துதல்

மீண்டும் மீண்டும் செய்யும் செயல்களில் இடைவெளி எடுத்தல்

முன்கை தசைகளை வலுப்படுத்துதல்

கணினி வேலைக்கு நல்ல உடல் நிலையை பராமரித்தல்

டென்னிஸ் எல்போ என்பது பொதுவானதொரு பிரச்சனை. ஆனால் சரியான பராமரிப்பு மற்றும் சிகிச்சை மூலம் பெரும்பாலானவர்கள் அறுவை சிகிச்சை இல்லாமல் முழுமையாக குணமடைகிறார்கள். ஆரம்ப கட்டத்தில் இது கண்டறியப்பட்டால், குணமடைவதும் எளிது, மீண்டும் ஏற்படாமல் தடுப்பதும் சாத்தியம்.

14/09/2021

#ஓஸ்டியோபோரொசிஸ்

எமது வயது அதிகரிக்கும் போது என்புகள் பருமனில் சிறிதாக மாறி வலிமையை இழக்கும் இது ஒஸ்டியோபோரொசிஸ் என அழைக்கப்படும். சாதாரணமாக வயதடையும் போது அனைவருக்குமே இந்த ஒஸ்டியோபோரோசிஸ் நிலை ஏற்படும் . என்பு என்பது ஒரு உயிருள்ள இழையம் என்பதுடன் அது தேய்வடைந்து தொடர்ச்சியாக மீண்டும் கட்டியெழுப்பப்படும் . நாம் இளமையாக இருக்கும் போது எமது என்புகள் மீள்வடிமைக்கப்படும் செயற்பாட்டினூடாக என்புகள் தேய்வடைவதற்கு பதிலாக அவை அதிகமாக வலுவூட்டப்படும் . எமது முப்பது வயது காலப்ப குதியில் எமது என்புகள் மிக அதிக அடர்த்தியாகவும் வலிமையாகவும் காணப்படுவதுடன் அதி உயர் என்பு அடர்த்தியையும் காண்பிக்கும் .

போதியளவு தினசரி கல்சியம் மற்றும் விற்றமின்கள் உட்கொள்ளல் , சுகாதாரமான வாழ்க்கை முறை மற்றும் சிறு வயது முதல் உடல் பருமன் குறைக்கும் உடற்பயிற்சிகள் செய்தல் போன்றனவற்றை மேற்கொள்ளும் நபர்கள் அதி உயர் என்புத் திணிவினை பெற்றுக்கொள்வார்கள் . இவ்வாறான நபர்கள் வயதடையும் போது ஒஸ்டியோபோரொசிஸ் நிலைமையை ஒப்பீட்டளவில் குறைவாகவே பெற்றுக்கொள்வார்கள் . அதி உயர் என்புக்கான திணிவினை அடைந்துகொள்வதே இந்த நோய்க்கெதிரான மிகப் பெரிய பாதுகாப்பாகும்.

ஓஸ்டியோபோரொசிஸ் நோய் காரணமாக என்புகளின் அடர்த்தி குறைவ துடன் அவற்றின் தரம் மற்றும் வலிமை போன்றன குறைவடைந்து விரைவில் உடையும் நிலைமையையும் அடையும் இது ஒரு மௌனமான நோயாகும் என்பதுடன் என்புகள் விரைவில் உடையும் . சாதாரண ஒரு விழுதலின் போது என்புகளில் முறிவு ஏற்பட்ட பின்னரே அனேகமானவர்கள் இந்த நோய் பற்றி தெரிந்து கொள்வார்கள்.

மணிக்கட்டு, முள்ளந்தண்டு மற்றும் இடுப்பு என்புகளிலே முறிவுகள் பொதுவாக ஏற்படும் . சில வயோதிபர்களின் முதுகு கூன் விழும் . நின்றுகொண்டு இருக்கும் போது யாராவது விழுவார்களாயின் அவர்களின் இடுப்பு என்பு முறிவடையும் . ஒஸ்டியோபோரோசிஸ் உடன் சம்பந்தப்பட்ட இடுப்பு என்பு முறிவானது சத்திரசிகிச்சைக்கு உற்படுத்தப்பட வேண்டும் என்பதுடன் அந்த நபருக்கு நீண்ட புனர்வாழ்வுச் சிகிச்சையும் தேவைப்படும். இடுப்பு என்பு முறிவுக்கு உற்படும் நோயாளிக ளில் சுமார் 20% - 25% ஆனவர்கள் முதல் வருடத்தில் இறந்துபோகின்றனர்.

ஒரே இடத்தில் நீண்ட காலமாக அசையாமல் இருப்பதன் விளைவாகவும் குருதி அமுக்கம் , உடற்காயங்கள் , நியுமோனியா மற்றும் சிறுநீரக தொற்று நோய்கள் காரணமாக ஏற்படும் சிக்கலான நிலைமைகள் காரணமாகவே இவ்வாறான இறப்புக்கள் ஏற்படுகின்றன . மேலும் , சுமார் 25% ஆனவர்கள் மாத்திரமே சாதாரண நிலமைகளுக்கு திரும்புகின்றனர். ஏனையோர்களுக்கு நீண்ட கால உதவிகள் தேவைப்படும் . இன்னும் சிலருக்கு வாழ்க்கை பூராகவும் நடமாட ஷமுடியாமல் கட்டிலிலேயே வாழ நேரிடுகிறது. ஆகையால் , முறிவுகள் ஏற்படுவதற்கு முன்னராக உதவிகள் வழங்கப்படவேண்டும் என்பதுடன் ஒஸ்டியோபோரோசிஸ் இற்கான மருத்துவ சிகிச்சை பெறப்படவேண்டும் என்பது கட்டாயமாகும்.

🔵ஒஸ்டியோபோரொசிஸ் இற்கான அபாய காரணிகள்

🔷️தவிர்க்க முடியாதவைகள்
1. வயதடைதல்
2. இனம் - ஆசிய நாட்டவர்கள்
3. பெண்கள்
4. காலத்திற்கு முன்னரான மாதவிடாய் நிறுத்தம்
5. மெலிந்த உடல்வாகு
6. ஓஸ்டியோபோரொசிஸ் குடும்ப அங்கத்தவர்களுக்கு காணப்படல்

🔷️தவிர்க்கக்கூடியவைகள்
1. குறைந்த கல்சியம் , விற்றமின்கள் உட்கொள்ளல்
2. பொருத்தமற்ற உடல் உழைப்பு முறை
3. புகைத்தல் பழக்கம்
4. அளவுக்கு அதிகமான மதுபானம் அருந்துதல்
5. குறைந்த உடல் நிறை
6. பெண்களில் காணப்படும் ஈஸ்ரஜன் குறைபாடு
7. பிரிட்னிஸோலோன் போன்ற மருந்துகள்

🔵தடுக்கும் முறைகள்

🔷️உங்களது வாழ்க்கையின் பிற்காலத்தில் ஒஸ்டியோபோரொசிஸ் இனைத் தடுக்க என்புகளுக்கு போதிய ஊட்டச்சத்துக்களை வழங்குக வேண்டும்

🔷️பலவகையானதும் சமமானதுமான உணவுகளை உட்கொள்ள வேண்டும் காபோகைதரேட்டுகள் , புரதம் , கொழுப்பு விற்றமின்கள் மற்றும் கனியுப்புகள் ஆகிய சத்துக்கள் என்புகளை கட்டியெழுப்புவதில் முக்கிய பங்கு வகிக்கின்றன

🔷️பொருத்தமான உடல் நிறையை பேணுதல் வேண்டும் ( BMI இனை 18.5 இற்கும் 25 இற்கும் இடையில் பேணுதல் வேண்டும்)

🔷️ஒவ்வொரு நாளும் போதியளவு கல்சியத்தினை உற்கொள்க வேண்டும் கல்சியமானது வயது வந்த ஆணகளுக்கு ஒரு நாளைக்கு 800 mg தேவைப்படுவதுடன் இது வயது வந்த பெண்களுக்கு 1000 mg ஆக தேவைப்படும்.

🔷️விற்றமின் D ஆனது கல்சியம் என்புகளுக்குள் உறிஞ்சப்படுவதற்கு உதவிபுரியும் . அத்துடன் , விற்றமின் D ஆனது நரம்புகள் மற்றும் தசைகளின் செயற்பாட்டிற்கும் தேவைப்படும் .

🔷️என்புகளுக்கு போதிய பயிற்சிகளை கொடுக்க வேண்டும் : உயிர்ப்பான உடற்பயிற்சி எடுத்தலும் என்புகளின் நல்ல சுகாதாரமான நிலைக்கு முக்கியமாகும் . ஆகக்குறைந்தது 30 நிமிடங்கள் பாரத்தினை தாங்கும் உடற்பயிற்சிகள் இங்கு பரிந்துரைக்கப்படுகின்றன . ஓடுதல் , நடத்தல் , வேகமாக நடத்தல் , படிக்கட்டுகளில் ஏறுதல் , தோட்டம் செய்தல் , ஆடுதல் , யோகா பயிற்சி , ஏரோபிக் பயிற்சிகள் என்பன இவ்வாறான வினைத்திறன் பாரம் தாங்கும் உடற்பயிற்சிகளாகும்.

🔷️விபத்துக்கள் மற்றும் விழுதல் ஆகியவற்றை தவிர்த்துக்கொள்ளல் : என்பு முறிவுகள் ஏற்படுவதைத் தடுக்க வயோதிபர்கள் கிழே விழுவதை தவிர்த்துக் கொள்ளும் முகமாக அவர்கள் கிழே காட்டியுள்ளவாறு முன்னெச்சரிக்கையுடன் நடந்துகொள்ள வேண்டும் .

🔹️ஒழுங்கான உடற்பயிற்சிகள் மூலமாக தசைகளின் வலிமை , சமநிலை , ஒருங்கிணைப்பு ஆகியவற்றை விருத்திசெய்துகொள்ள வேண்டும்
🔹️பொருத்தமான கால இடைவெளியில் கண்கள் , காதுகள் ஆகியவற்றை பரீட்சித்துப்பார்த்து தேவையான நடவடிக்கைகளை எடுத்தல்
🔹️தூக்க மருந்துகள் பயன்படுத்துவதை குறைத்தல் , ஏனெனில் அவைகள் காரணமாக கீழே விழுவது அதிகரிக்கப்படலாம் .
🔹️வீடுகளை நன்றாக ஒளியூட்டியும் ஒழுங்காயும் வைத்துக்கொள்ளல் . இதனூடாக கீழே விழும் விபத்துக்களை தவிர்க்கலாம் .
🔹️தரையானது ஈரமாகவும் வழுக்குவதாகவும் இல்லாதிருப்பதை உறுதிசெய்து கொள்ளல்
🔹️குளியலறையில் வழுக்காதவாறு தரையினை பராமரித்தல்
🔹️குளியலறையில் கைப்பிடிகளை பொருத்துதல்
🔹️சவர்க்காரம் , பல்துலக்கி , சவரப்பொருட்கள் ஆகியவற்றை இலருவில் பெறக்கூடியவகையில் குளியலறையில் வைத்தல்.
🔹️வெளியில் நடந்து செல்லும் போது தேவையாயின் கைத்தடி ஒன்றை பயன்படுத்துதல்.
🔹️இறப்பரால் தயாரிக்கப்பட்ட அடியை கொண்ட பாதணிகளை பயன்படுத்துதல்

ஒஸ்டியோபோரோசிஸ் இற்கான சிகிச்சை உங்களது வைத்தியர் ஒரு DEXA SCAN இனை மேற்கொள்வதுடன் விற்றமின் D மட்டம் தொடர்பான ஆய்வினையும் மேற்கொண்டு உங்களுக்குமிகப்பொருத்தமான சிகிச்சையை தீர்மானிப்பார். இங்கு முள்ளந்தண்டு மற்றும் என்புகளுக்கான X - RAYபரிசோதனை அவ்வளவு உதவியளிக்காது

ஒஸ்டியோபோரொசிஸ்இற்காக சிகிச்சை அளிக்கப்படும் போது நோயாளிகளுக்கு போதியளவு கல்சியம் மற்றும் விற்றமின் D என்பன தேவைப்படும் .

என்பு சிறியதாக மாறுவதையும் முறிவு ஏற்படும் ஆபத்தையும் குறைத்து என்பின் தரத்தினை அதிகரிக்க அழிவினைக் குறைக்கும் சிகிச்சைகள் தேவைப்படும் உதாரணமாக Bisphosphonate - Alendronate, Risedronate Ibandronate போன்றன பொதுவாக பயன்படுத்தப்படும் மருந்துகளாகும் உங்களுக்கு மிகப் பொருத்தமான மருந்து எது என்பதை உங்களது வைத்தியர் தீர்மானிப்பார் . சில மருந்துகள் வாய்மூலமாக தினசரி அல்லது வாரம் ஒரு முறை வழங்கப்படும் . வருடத்திற்கு ஒரு முறை ஊசி மூலம் வழங்கப்படும் .

ஒஸ்டியோபோரோசிஸ் காரணமாக வலியுடன் கூடிய முதுகெலும்பு உள்ளவர்களுக்கு Calcitonin பொதுவாக வழங்கப்படும் . இது ஊசி மூலமும் வழங்கப்படுவதுடன் மூக்குத்துவாரம் மூலமாகவும் விசிரப்படலாம்.

27/07/2021

Hello Friends, Please support me by subscribing my YouTube channel.

Share your videos with friends, family, and the world

02/07/2021

#கழுத்து_வலி #காரணமும்_சிகிச்சை_முறைகளும்

கழுத்து வலி என்பது மூன்றில் ஒருவருக்கு வரக்கூடிய ஒரு பொதுவான உடல் உபாதை ஆகும். “செர்விகல் ஸ்பாண்டிலைட்டிஸ்“ என்று அழைக்கப்படும் கழுத்து முள்ளந்தண்டு என்புகள் தேய்மானம் அடைவதால் ஏற்படும் கழுத்து வலியானது, வயதானவர்களில் ஒரு பொதுவான பிரச்சினையாகும் இதன் போது கழுத்து எலும்புகளில் ஏற்படும் தேய்மானம் காரணமாக இடைக் கசியிழையம் / இடை மென்சவ்வு விலகும் அல்லது அது வீக்கமடைந்து அருகிலுள்ள நரம்பை அழுத்துவதால் கழுத்து வலி ஏற்படும். பொதுவாக 40 வயதில் இந்த தேய்மானம் ஆரம்பிக்கும் ஆனால் அண்மைக் காலங்களில் இளைஞர்களும் இப் பிரச்சனையால் பாதிக்கப்படுவது அதிகரித்து வருகிறது. இவ் வகையான கழுத்து வலிக்கு முக்கியக் காரணமாக அமைவது கழுத்துப் பகுதியில் உள்ள தசைகள் சோர்வடைவதாகும். அப்போது கழுத்தை அவற்றால் தாங்கிப் பிடிக்க முடிவதில்லை. இதன் வெளிப்பாடாக கழுத்து வலி ஏற்படுகின்றது.

அதிக சுமையைத் தலையில் தாங்குவது, நீண்ட நேரம் கழுத்தை அசைக்காமல் ஒரே நிலையில் வைத்துக் கொண்டிருப்பது அல்லது சரியான அங்க நிலையை பேணாது கணினி முன்னால் அதிக நேரம் அமர்ந்திருந்து தொடர்ந்து வேலை செய்வது தொடர்ந்து பல மணி நேரத்துக்கு தொலைக்காட்சி பார்ப்பது, படுத்துக் கொண்டே படிப்பது, படுத்துக்கொண்டு தொலைக்காட்சி பார்ப்பது, கழுத்தைக் கோணலாக வைத்துக்கொண்டு உறங்குவது. தலையணைகளைத் தலைக்கு அடுக்கிவைத்து உறங்குவது, பல மணிநேரம் பயணிப்பது, பயணங்களில் உட்கார்ந்துகொண்டே உறங்குவது குண்டும் குழியுமாக உள்ள சாலைகளில் அடிக்கடி பயணிப்பது போன்றவை கழுத்துப் பகுதியில் உள்ள தசைகள் மென் இழையங்களை பாதிப்பதனால் கழுத்து வலிக்கு காரணமாகின்றது.

தண்டுவட நோய்கள், ஆத்திரைட்டிஸ், கர்ப்பப்பை வாய்ப் புற்றுநோய் போன்ற நிலைமைகள் கழுத்து வலிக்கு வழிவகுக்கலாம், அவற்றிக்கு உடனடியான மருத்துவ கவனிப்பு அவசியமாகும். விபத்துக்ள் மூலம் ஏற்படும் பாதிப்புக்கள் காரணமாக கழுத்து வலி ஏற்படுபவர்களுக்கு பல ஆண்டுகளுக்கு பிறகும் அறிகுறிகள் தோன்றலாம். கழுத்து வலிக்கான சிகிச்சை அதன் அடிப்படை காரணம் சார்ந்துள்ளது அது பெரிதும் வேறுபடுகிறது.

மருந்துகள், பிசியோதெரபி சிகிச்சை, வாழ்க்கை முறை மாற்றங்கள் மற்றும் சரியான அங்க நிலையை பேணுதல் போன்றவை கழுத்து வலி மேலாண்மைக்கு பயன்படுத்தப்படும் முக்கிய சிகிச்சை உத்திகளாகும் அனைத்து சிகிச்சை உத்திகளும் பயனளிக்காத சந்தர்ப்பத்தில் அறுவை சிகிச்சை பரிந்துரைக்கப்படும்.

பெரும்பாலான சந்தர்ப்பங்களில் கழுத்து வலிக்கான சிகிச்சைகளில் மருத்துவர்கள் வலி நிவாரணிகள் மற்றும் அழற்சி எதிர்ப்பு போன்ற மருந்துகள் மற்றும் தசை தளர்பான்கள், முதுகுத்தண்டு ஊசி போன்றவற்றுடன் பிசியோதெரபி சிகிச்சையையும் பரிந்துரைக்கின்றனர் ஆய்வுகளின் அடிப்படையில் மற்ற சிகிச்சைகள் பதிலளிக்காத நாள்பட்ட கழுத்து வலி தசை வலிமை பயிற்சி மூலம் முன்னேற்றம் அடைவது அவதானிக்கப்பட்டுள்ளது.

பிசியோதெரபி சிகிச்சையின் போது கழுத்தில் இறுக்கமான தசைகளை தளர்த்துவதற்காக உலர் ஊசி சிகிச்சை இலத்திரனியல் சிகிச்சை போன்ற நுட்பங்கள் பயன்படுத்தப்படும் அத்துடன் குறிப்பிட்டு வடிவமைக்கப்பட்ட பயிற்சிகளை தொடர்ந்து செய்வதற்கு பரிந்துரைக்கப்படும், மேலும் சரியான அங்க நிலையை பேணுவதற்கான ஆலோசனைகளும் வழங்கப்படும் இதன் மூலம் கழுத்து தசைகள் பலமாகி, கழுத்து வலியிலிருந்து நீடித்த நிவாரணம் கிடைக்கும் . எந்த உடற்பயிற்சி திட்டத்தை தொடங்குவதாக இருந்தாலும், அதற்கு முன் ஒரு இயன் மருத்துவரது ஆலோசனை பெற வேண்டும்.

மருந்துகள் மற்றும் பிசியோதெரபி சிகிச்சை போன்றவை பலனளிக்காத சந்தப்பங்களில் மருத்துவர்கள் அறுவை சிகிச்சையை பரிந்துரைக்கிறார்கள். அறுவை சிகிச்சையின் பின் அசைவுகளை சீர்படுத்தவும் தசைகளின் வலிமை மற்றும் இயக்க தன்மையை சீர்ப்படுத்தவும் பிசியோதெரபி சிகிச்சை பரிந்துரைக்கப்படுகிறது.

ஆய்வுகளின் அடிப்படையில் ஆரோக்கியமான வாழ்க்கைமுறை நீண்டநாள் கழுத்து வலி ஏற்படுவதையும் அதிகரிப்பதையும் தவிர்க்க உதவுகின்றது. உடல் ரீதியாக சுறுசுறுப்பாக இருந்து, மது அருந்துவதைத் தவிர்த்து அல்லது குறைத்து, புகை பிடிப்பதை தவிர்த்து, ஆரோக்கியமான உணவை உண்டு வந்தால் கழுத்து வலியை தடுக்க முடியும். ஒரு ஆரோக்கியமான வாழ்க்கைமுறை கழுத்து வலி தடுப்பது மட்டுமல்லாமல் அதை சமாளிப்பதற்கும் உதவும். கழுத்து வலிக்கு மற்ற எந்த சிகிச்சைகளும் பலனளிக்காவிட்டால் வாழ்க்கைமுறை மேலாண்மை அதை சரி செய்வதில் ஒரு முக்கிய பங்கு வகிக்கும்.

சிலரில் கழுத்து வலி சோர்வான மனநிலை மற்றும் உளவியல் ஆரோகியத்துடன் தொடர்புடையதாக உள்ளது. இவர்களில் மன அழுத்தம் மற்றும் பதட்டம் ஏற்படுவதை குறைப்பதன் மூலம் கழுத்து வலி குறையலாம். வெளியில் அதிக நேரம் செலவழித்தல் உடல் ரீதியாக செயல்பட்டு கொண்டே இருத்தல். பிடித்த பொழுதுபோக்கில் கவனம் செலுத்தல் என்பன மன அழுத்தத்தை சமாளிப்பதற்கான உத்திகளாகும்.

தி.கேதீஸ்வரன்
பிசியோதெரபிஸ்ட்
மாவட்ட பொது வைத்தியசாலை - வவுனியா
077 8148351

Like our page and share this article for public awareness.

28/06/2021

#முழங்கால்_மூட்டுவாதம்_தவிர்ப்பது_எப்படி.

ஆஸ்டியோ-ஆர்த்ரைடிஸ் எனப்படும் மூட்டுவாதம், 60 வயதுக்கு மேற்பட்டவர்களை, குறிப்பாகப் பெண்களை அதிகம் பாதிக்கிறது. 2050-ல், 60 வயதுக்கு மேற்பட்டோரில் 20 சதவீதத்தினர் முழங்கால் மூட்டுவாதத்தினால் பாதிக்கப்படுவர்கள் என்று உலக சுகாதார நிறுவனம் குறிப்பிடுகிறது.

பெரும்பாலானோருக்கு, மூட்டுவாதம் முழங்கால் மூட்டில் ஏற்படும். சிலருக்கு, இடுப்பு, தோள்பட்டை, கைவிரல் மூட்டுகளைப் பாதிக்கும். மூட்டுவாதத்தில்- , மூட்டின் இரு பக்கமுள்ள எலும்புகளின் எலாஸ்டிக் போன்ற மூட்டுமென்சவ்வானது சேதமடையும். மூட்டுவாதத்தால், எலும்புகள் நேருக்கு நேராக உராய்ந்து, வலி, மூட்டு இறுக்கம் ஏற்பட்டு, நாள்பட, மூட்டு அசைவுகள் குறையத் தொடங்கி, மூட்டைச் சுற்றியுள்ள தசைகள் பலவீனப்படும்.

முழங்கால் மூட்டுவாதத்தினால் பாதிக்கப்பட்டவர்கள், முழங்காலை நீட்டி மடக்க முடியாமல், அன்றாட வேலைகளைச் செய்வதிலும் வீட்டு விசேஷங்கள், பொழுது போக்குகளில் பங்கேற்பதிலும் சிரமங்களைக் கொண்டிருப்பர். சிலருக்கு, மூட்டு மாற்று அறுவை சிகிச்சை தேவைப்படும் அளவுக்கு வலியும் செயல்பாடின்மையும் ஏற்படும்.

அபாயகாரணிகள்

முழங்கால் மூட்டுவாதம் உண்டாவதற்கு மாற்ற முடியாத (முதுமை, பெண் பாலினம்), மாற்றத் தகுந்த என இரு பிரிவு அபாய காரணிகள் உள்ளன. அவற்றில், உடல் பருமன், தசைகளில் வலிமையின்மை, இளவயதில், விளையாடும்போது ஏற்பட்ட முழங்கால் மூட்டுத் தசை நார்களில் ஏற்பட்ட காயம் ஆகியவை மாற்றக் கூடிய முக்கிய காரணிகளாகக் கூறப்படுகின்றன.

உடல் எடையில் கவனம்

நமது உயரத்துக்குத் தகுந்த எடையைக் கணக்கிட "உடல் நிறை குறியீடு" (Body Mass Index, BMI) பயன்படுகிறது. உங்களின் உயரம் (மீட்டர்), எடையை (கிலோ) BMI = kg/m2 என்ற சூத்திரத்தில் கணக்கிட்டுக் கொள்ளுங்கள். 18.5 to 24.9 வரை BMI என்பது ஆரோக்கியமான உடல் எடையைக் குறிக்கும். உலக சுகாதார நிறுவனம், BMI 25 முதல் 30-க்குள் இருந்தால், "அதிக எடை கொண்டவர்கள்" என்றும், 30-க்கு மேலிலிருந்தால் "உடல்பருமன் கொண்டவர்கள்" என்று வரையறுக்கிறது.

இடுப்புச் சுற்றளவையும் இன்னொரு கணக்கீடாகக் கொள்ளலாம். இடுப்பு சுற்றளவு, ஆண்களுக்கு 94 சென்டிமீட்டர் அல்லது அதற்கு மேலாகவும், பெண்களுக்கு 80 சென்டிமீட்டர் அல்லது அதற்கு மேலாகவும் இருந்தால், கண்டிப்பாக உடல் எடையைக் குறைப்பதற்கு ஆரம்பிக்க வேண்டும். ஆண்களுக்கு 102 சென்டிமீட்டர் அல்லது அதற்கு மேலாகவும், பெண்களுக்கு 88 சென்டிமீட்டர் அல்லது அதற்கு மேலாகவும் இடுப்பு சுற்றளவு இருந்தால், சர்க்கரை நோய், புற்று நோய், இதயம் சம்பந்தமான பிரச்சினைகள், பக்கவாதம் போன்றவை ஏற்படும் அபாயம் அதிகரிக்கும்.

முழங்கால் மூட்டுவாதம் உண்டாவதற்கும் மோசமாவதற்கும் உடற் பருமனை முக்கியக் காரணியாக மருத்துவ ஆய்வுகள் உறுதிப்படுத்தியுள்ளன. அதிகரிக்கும் ஒவ்வொரு 5 கிலோ எடைக்கும், முழங்கால் மூட்டுவாதம் ஏற்படும் அபாயம் 36 சதவீதம் வரை அதிகரிக்கிறது. மேலும், அதிக நேரம் முட்டி போட்டோ குந்தி இருந்தோ வேலை செய்பவர்களுக்குத் தொடர்ந்து ஏற்படும் அழுத்தங்கள், மூட்டுகளைச் சேதமடையச் செய்யும்.

சமச்சீரான குறைந்த-கலோரி உணவு முறை, உடற்பயிற்சி மூலம் உடல் எடையைக் குறைத்து, மீண்டும் ஏறாமல் பார்த்துக் கொள்ளலாம். ஜிம்முக்குச் சென்று முறையான உடற்பயிற்சியைச் செய்ய முடியாதவர்கள், நல்ல உணவு முறையோடு, சுறுசுறுப்பாக வீட்டு வேலைகளைச் செய்வது, அதிக நேரம் உட்கார்ந்திருப்பதைத் தவிர்ப்பது, வாய்ப்புக் கிடைக்கும் போதெல்லாம் நடப்பது, லிஃப்டைப் பயன்படுத்தாமல் படிகளில் செல்வது போன்ற அன்றாட வாழ்க்கை முறைக்குத் தகுந்த பழக்கங்களை ஏற்படுத்திக்கொள்ளலாம்.

தசைகளை வலிமையாக்குவோம்

தொடை முன்பகுதியில் உள்ள குவாட்ரீசெப்ஸ் எனப்படும் தசையில் வலிமையின்மை, முழங்கால் மூட்டுவாதம் ஏற்பட ஒரு காரணியாகக் கூறப்படுகிறது. வலிமையான தசைகள், தசைத் திறனையும் உடல் செயல்பாட்டையும் அதிகரித்து, மூட்டுகளில் ஏற்படும் அழுத்தத்தைச் சீரான முறையில் பகிர்ந்து மூட்டுகளைக் காக்கும். உங்களுக்கேற்ற முழங்கால் தசை வலிமை பயிற்சிகளை உங்கள் பிசியோதெரபிஸ்டிடம் ஆலோசித்துப் பெற்றுக் கொள்ளுங்கள்.

காயங்களைத் தவிர்ப்போம்

இளவயதில், விளையாட்டுகளின் போது, முழங்கால் மூட்டுத் தசை நார்களில் (Anterior cruciate ligament) அடிபட்டு அறுவை சிகிச்சை செய்துகொண்டவர்களில், 50 சதவீதத்தினருக்கு , அவர்களின் 30-40 வயதுகளிலேயே முழங்கால் மூட்டுவாதம் ஏற்பட வாய்ப்புள்ளது. எனவே, விளையாடும் குழந்தைகள்/இளவயதினர்க்கு, முழங்கால் மூட்டில் அடிபட வாய்ப்புகள் எவ்வாறு நேரிடக் கூடும், அதனைக் கையாளும் முறைகள் பற்றி விழிப்புணர்வு அளிக்க வேண்டும்.

அதனோடு, வாரத்திற்கு 2-3 முறை, தசை, நரம்புச் செயல்பாடுகளை ஒருங்கிணைக்கும் பிரத்யேகப் பயிற்சிகள் (Neuromuscular training) 50 சதவீதம் வரை தசை நார் விபத்துகளைத் தவிர்க்கும் என்று ஆய்வுகள் கூறுகின்றன. காயம் ஏற்பட்டாலோ அறுவை சிகிச்சை மேற்கொள்ளும் பட்சத்திலோ அதன் பின் பரிந்துரைக்கப்படும் சிகிச்சையைக் கவனத்துடன் சரிவர எடுத்துக்கொள்வதன் மூலம் மூட்டுவாதம் வருவதைத் தவிர்க்கலாம்.

தி.கேதீஸ்வரன்
பிசியோதெரபிஸ்ட்
மாவட்ட பொது வைத்தியசாலை - வவுனியா
077 8148351

28/06/2021

உங்கள் குழந்தையை பல உறுப்பு அழற்சி நிலையில் (Multisystem Infalmmatory Syndrome in Children - MIS-C) இருந்து பாதுகாப்பாக வைத்திருப்பது எவ்வாறு?

பல உறுப்பு அழற்சி நிலை (MIS-C)என்பது கொவிட்- 19 நோய்த் தொற்றுடன் தொடர்புடையதாக ஏற்படும் ஒரு தீவிர நோயாக கருதப்படுகின்றது. இதற்கான வலிமையான ஆதாரங்கள் இல்லாத நிலையிலும், மருத்துவ ஆதாரங்களின் அடிப்படையில் பல உறுப்பு அழற்சி நிலையால் (MIS-C) பாதிக்கப்பட்டுள்ள பல குழந்தைகள் கொவிட்- 19 வைரஸ் தொற்றினால் பாதிக்கப்பட்டவர்கள் அல்லது கொவிட்- 19 நோய்த் தொற்றால் பாதிக்கப்பட்ட ஒருவருடன் நெருங்கிய தொடர்பில் இருந்தவர்களாக நிருபிக்கப்பட்டுள்ளது.

குழந்தைகளில் கொவிட்- 19 நோய்த் தொற்று தீவிரம் குறைந்ததாக காணப்பட்டாலும், பல உறுப்பு அழற்சி நிலை (MIS-C) ஆனது அரிதாகக் காணப்படும், ஆனால், அதி தீவிர சிக்கல் நிலைமைகளை உருவாக்கும்.

இந்த நோய் நிலைமையால் பாதிக்கப்பட்ட குழந்தைகளின் உடலில் இதயம், நுரையீரல், சிறுநீரகம், தோல் மற்றும் சமிபாட்டுத் தொகுதி போன்ற பல உறுப்புக்கள் அழற்சிக்கு உள்ளாகின்றன.

2020 ம் ஆண்டு சித்திரை மாதம் தொடக்கம் பல உறுப்பு அழற்சி நிலை (MIS-C) பற்றிய அறிக்கைகள் உலகளாவிய ரீதியில் வெளியிடப்பட்ட போதிலும், இலங்கையில் அண்மையிலேயே இந் நோய் நிலை ஏற்பட்டுள்ளது.

சில குழந்தைகள் கொவிட்-19 நோயின் எந்தவொரு அறிகுறிகளையும் வெளிக்காட்டாது, பல உறுப்பு அழற்சி நிலையினால் (MIS-C) நேரடியாக பாதிக்கப்பட்டு அந்நிலையின் அறிகுறிகளை வெளிக்காட்டலாம் என்பதை முக்கியமாக கவனத்தில் கொள்ள வேண்டும்.

குழந்தை நல மருத்துவ நிபுணர்களால் கூறப்பட்டவாறு கீழே குறிப்பிடப்பட்டுள்ள பல உறுப்பு அழற்சி நிலையின் (MIS-C) அறிகுறிகளை பற்றி தெரிந்து வைத்திருப்பதால் ஆரம்ப நிலையிலேயே இதனை கண்டறியலாம்.

▪️காய்ச்சல்

▪️வயிற்றுவலி

▪️வயிற்றோட்டம்

▪️கழுத்துவலி

▪️தோலில் ஏற்படும் மாற்றங்கள்.

▪️கண்கள் சிவத்தல்

▪️வழக்கத்திற்கு மாறாக சோர்வு மற்றும் களைப்பு ஏற்படல்.

கீழ்வரும் நோய் அறிகுறிகள் அதிதீவிர நிலைக்கான எச்சரிக்கைகளாகும்.

▪️சுவாசிப்பதில் சிரமம்

▪️மார்புப் பகுதியில் இறுக்கும் உணர்வு

▪️நித்திரையில் இருந்து விழிக்கவோ அல்லது தொடர்ந்து விழித்திருக்கவோ இயலாமை

▪️வெளிறிய தோல்

▪️கடுமையான வயிற்றுவலி

மேலே குறிப்பிட்ட அறிகுறிகள் காணப்படுகின்ற எந்த குழந்தையையும் உடனடியாக வைத்தியசாலைக்கு கொண்டு செல்ல வேண்டும் என்று குழந்தை நல மருத்துவ நிபுணர்கள் கேட்டுக்கொள்கின்றார்கள்.

மேலும் நாட்டில் நிலவும் நோய்த் தொற்று சூழ்நிலைக்கு மத்தியில், கொவிட்-19 நோய்த் தொற்றிலிருந்து எமது குழந்தைகளை பாதுகாக்க நாம் அனைவரும் விழிப்பாக இருந்து மற்றும் முன்னெச்சரிக்கை நடவடிக்கைகளையும் மேற்கொள்ள வேண்டும்.

ஒரு வீட்டில் உள்ள நபரொருவர் கொவிட்-19 நோய்த் தொற்றால் பாதிக்கப்பட்டிருப்பின் வீட்டில் உள்ள அனைவருக்கும் நோய்த் தொற்று பரவும் அபாயத்தை அதிகரிக்கின்றது என்பதை நினைவில் வைத்திருக்க வேண்டும்.
எனவே தேவையற்ற பயணங்களை முடிந்தவரை தவிர்ப்பதை கவனத்தில் எடுத்துக் கொள்ள வேண்டும்.

கொவிட்-19 நோய்த் தொற்றுக்கு எதிராக முற்றிலும் தடுப்பூசி பெற்றவர்கள் நோயினால் ஏற்படும் கடுமையான சிக்கல்களின் ஆபத்து தன்மையை கணிசமாக குறைத்துக் கொள்ளலாம், ஆனால் அவர்களிற்கு நோய்த் தொற்று ஏற்படலாம்.
மேலும் அவர்கள் மூலம் மற்றவர்களிற்கு நோய் பரவக்கூடும். எனவே இது குறித்து அவர்கள் விழிப்புணர்வுடன் இருப்பதோடு கொவிட் -19 நோய்த் தொற்றை தடுப்பதற்கான பரிந்துரைக்கப்பட்ட சுகாதார பழக்கவழக்கங்களை தொடர்ந்தும் கடைப்பிடிப்பது அவசியமாகும்.

கொவிட்-19 நோய்த் தொற்றிலிருந்து உங்கள் பிள்ளைகளை பாதுகாக்க, கைகழுவுதல், முகக்கவசம் அணிதல், சமூக இடைவெளியை பேணுதல் மற்றும் இருமும் போதும், தும்மும் போதும் செயல்படுதல் போன்ற பழக்கவழக்கங்களை சரியான முறையில் பின்பற்றுவதைப் பற்றி உங்கள் பிள்ளைகளுக்கு கற்றுக் கொடுங்கள். நீங்கள் சொல்லிக் கொடுத்த அறிவுரைகளை சரியாகப் பின்பற்றுகின்றார்களா என்பதை உறுதிப்படுத்திக் கொள்ளுங்கள்.

மேலும் உங்கள் குழந்தையை கொவிட்-19 நோய்த் தொற்றிலிருந்து பாதுகாத்துக் கொள்வதற்கு சன நெரிசல் மிக்க இடங்களுக்கு அழைத்துச் செல்வதை தவிர்த்துக் கொள்ளுங்கள்.

குழந்தைகள் மூக்கு, வாய், மற்றும் முகக்கவசங்களை அடிக்கடி தொடுவதால் இலகுவாக வைரஸ் தொற்றால் பாதிக்கப்படுவார்கள். இரண்டு வயதிற்கு குறைந்த குழந்தைகள் எந்தவொரு முகக்கவசத்தையும் அணிய வேண்டும் என பரிந்துரைக்கப்படவில்லை.

உங்கள் பிள்ளைகளை பாதுகாப்பாக வைத்திருக்க, தற்போதைய சூழ்நிலையில் விருந்தினர்களின் எண்ணிக்கையை குறைவாக பேணுவது அவசியமாகும். ஏனெனில் பிள்ளைகள் விருந்தினர்களுடன் நெருங்கிய தொடர்புகளை பேணுவதால் அவர்களிற்கு தொற்று ஏற்படுவதற்கான சந்தர்ப்பங்கள் அதிகம்.

கொவிட்-19 நோய்த் தொற்று காரணமாக குழந்தைகளின் அன்றாட வாழ்க்கையில் ஏற்பட்டுள்ள சமூகக் கட்டுப்பாடுகள் காரணமாக அவர்கள் அதிருப்தி அடையலாம். அவர்களை வீடுகளில் இயன்றளவு மகிழ்ச்சியாகவும் மற்றும் சுறுசுறுப்பாகவும் வைத்திருக்க முயற்சி செய்யுங்கள். உங்கள் வீடுகளில் குழந்தைகளுடன் நீங்கள் செய்யக் கூடிய செயற்பாடுகளைப் பற்றி அறிந்து கொ‌ள்ளு‌ங்க‌ள், இதனால் உங்கள் குழந்தைகளின் அறிவுசார் வளர்ச்சிக்கு உதவி புரிவதற்கும், அவர்களை சந்தோசமாகவும் வைத்திருக்க உதவி புரியும். மேலும் குழந்தைகளுக்கு அவர்களின் உறவினர்கள் மற்றும் நண்பர்களுடன் உரையாடுவதற்கு தொலைபேசி அல்லது இணையத்தளத்தின் மூலம் வாய்ப்புக்களை உருவாக்கிக் கொடுங்கள்.

இந்த சவாலான காலகட்டத்தில் விழிப்புணர்வுடன் இருப்பதால் நாம் எங்கள் பாதுகாப்பையும், எங்கள் குழந்தைகளின் பாதுகாப்பையும் உறுதி செய்கின்றோம்.


Copied from