Dr.Fayrouz Abduallah د فيروز عبدالله

28/11/2025

هذا المثلث نسمو فيه مثلث الخطر

ردو بالكم لو جاك فيه اي التهاب جلدي زي مثلا دماله او حبة تقعدو تمسو فيها وتعصروها بايديكم

ممنووووووع منعا باتا لانه توقع انه البكتيريا تنتقل بشكل عكسي للدماغ وتسبب في مضاعفات جدا خطيره

ح تلقو تفاصيل أكثر في التعليقات

27/11/2025

24/11/2025

صباحكم ورد وفل وياسمين

لو ماتبيش تشوفي المنظر هذا 👇👇👇

استعملي الكريم هذا🥰

❤️Numis med urea 25% cracked heel ❤️

تلقو كل المعلومات عالرابط في التعليقات 😍

23/11/2025

من فترة جتني بنوته تعاني من تساقط شعر قوي ...والسبب واضح كان عندها نقص في الحديد

المشكلة انها تشكي انه علي قد ما خدت من كورسات علاج الحديد مانفعش معاها

وفعلا شفت آخر تحليل داراته كان ناقص الحديد وخدت حبوب للعلاج نوعيتهم ممتازة و فترة طويلة وللأسف بعد ما عاودت التحليل طلع ناقص اكثر 🥴

المهم عصرت دماغي باش نطلع السبب لانه زي حالتها في هلبا اسباب اغلبهم يتبعو دكتور الباطنة او النساء ...

نحاولو نعرفو السبب ونعالجوه ولانه في هلبا اسباب كلها استثنيناها وتاكدنا منها

وبعد جهد جهيد وقصة طويلة و وقت أطول ،اكتشفت السبب🫣😳

انها مهووسه بشرب الشاهي والقهوة وركزو علي كلمة(مهووسة )

آآآآآآه تعبتني معاها 😭

عطيتها الملخص ... انه والله لو تاكل الحديد ماكلة زي جازورا ماهو صاير منها ولا حيتعدل الحديد🤣

20/11/2025

كل فيتامين عنده وقت يفضل اخده فيه لزيادة امتصاصه بالتالي الاستفادة منه أكثر...

🌟مثلا فيتامين c و B عادي يكونو اي وقت قبل او بعد الأكل

🌟ويفضل فيتامين C صباحا بعد الفطور

🌟بينما فيتامين B12 يفضل صباحا قبل الفطور

🌟اما الفيتامينات A K E D هادي فيتامينات قابلة للذوبان في الدهون لازم أخذها بحذر ووصفة طبيب لانه زيادتها تسبب سمية و لازم ناخدوها بعد الأكل مباشرة او أثناء الأكل ونفس الشي اوميغا3

🌟فمثلا فيتامين د D يفضل ناخدوه مع وجبة دسمه فيها دهون والأفضل مع زيت زيتون وجبنه ويفضل في النهار لانها تسبب في أرق لو اخديناها في الليل

🌟الكالسيوم يفضل في الليل قبل النوم

🌟اما الحديد اختلفوا عليه فيه دراسات تقول انه يفضل علي معدة فاضيه بمعنى قبل الأكل بساعتين او بعد الأكل بساعه مع شرب هلبا اميه
لكن اللي عندهم مشاكل في المعدة ياخدوه بعد الاكل مباشرة
ويفضل شرب كوب عصير برتقال او اي مصدر لفيتامين C لانه يزيد امتصاصه والابتعاد عن شرب الحليب او مشتقاته لانه تنقص امتصاصه
وممنوع القهوة والشاهي الأحمر لنفس السبب تنقص من امتصاصه

🌟بالنسبة للحبوب اللي فيهم مجموعة فيتامينات multivitamin tablets احسن وقت ليها بعد وجبة الغذاء

🌟وطبعا ممنوووووع اخذ المكملات الغذائيه للحامل والمرضع والحالات اللي عندهم فشل كلوي والأعمار اقل من 15 سنه

وطبعا اكيد يفضل التركيز عالاكل الصحي وشرب الميه وممارسة الرياضة حتحسن الوضع هلبا وتزيد من الاستفادة من الفيتامين وتسرع من الشفاء 🥰

Dr.Fayrouz Abduallah د فيروز عبدالله

14/11/2025

من اكثر المشاكل الجلدية اللي تواجهنا سواء رجال او نساء هي مشكلة سواد الابط

المشكلة هادي أولا لازم علاج الاسباب وبعدها نعالجو السواد و ثانيا لازم المحافظة عالنتيجة

التفاصيل حتكون في التعليقات بإذن الله اللي يهمه الموضوع يدير لايك او يخلي تعليق باش توصله كل المعلومات اول ما انزلها

Dr.Fayrouz Abduallah د فيروز عبدالله

14/11/2025

اني متأكده انه مافيش حوش مافيشي حد ياخد في فيتامين د

المشكلة انه تقريبا كلهم ياخدو فيه غلط😩

فيتامين د ضروري جدا ناخد معاه فيتامين k...وماغنسيوم...وناخدوه في النهار....ومع وجبة دهون🥰😳

اول ما نفضى نكتبلكم التفاصيل....خلو لايك باش توصلكم باقي المعلومات 🥰

13/11/2025

"يَا مُقَلِّبَ الْقُلُوبِ، ثَبِّتْ قُلُوبَنَا عَلَى دِينِكَ، وَاهْدِنا لِمَا تُحِبُّ وَتَرْضَى."🥹❤️‍🩹🤲🏻

صباح الخير والبركة عليكم جميعا يارب

13/11/2025

تعرفو يابنات حاجة من الحاجات اللي فعلا لقيت روحي مش عارفة قيمتها في الروتين اليومي هو التقشير...

خصوصا لو تحبي تمكيجي هلبا...لانه لو ما استعملتيش المقشر استعدي للمنظر اللي في الصورة 🫣🫣👇👇👇👇

المقشر هذا ممتاز جدا للبشرة الدهنية...ينظف البشرة ويزيل الدهون ...وينظف المسام ...

🌱🌱🌱Dermo pure commage scrub 🌱🌱🌱

التقشير يابنات ....مهم جدا في روتين البشرة الدهنية... واكيد من أفضل الشركات اللي موفرة مقشر ممتاز شركة يوسيرين الألمانية...

استعملوه مرتين أسبوعيا...لو بشرتك مختلطة
ويوم بعد يوم ...لو بشرتك دهنية

وتقدرو تستعملُوه حتى يوميا خصوصا اللي يتعرضو للشمس هلبا والغبرة والتراب

وللعلم انه آمن جدا للحوامل....واللي بشرتهم حساسة

12/11/2025

لو عندك قطوسة في الحوش او صغارك يلعبو مع القطاطيس في اي مكان ...وطلع عليهم طفح زي اللي في الصور سواء في الجسم او الشعر هادو فطريات سببها القطاطيس

علاجهم اول واهم نقطة علااااااج القطوسة نفسها ...مافيش فايده تعطي لعيلك الدواء من غير ماتعالج مصدر الالتهاب نفسه
ركزو معاي قلت عالجو القطوسه مش تلوحوها...

والعلاج يكون حسب حدة المرض لو في الجسم علاجه أسهل... لكن لو في الشعر يحتاج وقت ولازم مع العلاج الموضعي علاج بالفم حبوب او شروبو

وركزو معاي في نقطة مهمه سعفة الرأس لو ماتعالجتش بشكل سليم توقعو انه المكان يقعد من غير شعر للأبد 😟

11/11/2025

منو اللي صايرله زي اللي في الصورة طبعا فيه ألم غير طبيعي😭
ما يعلم بيه غير ربي واللي مجربه

خلو لايك او استفسار في تعليق واول مانفضى نكتب كل المعلومات علبه
السبب وكيف العلاج وكل التفاصيل ان شاءالله🥰

#تعديل

اسم المرض الدَّاحِس الحادّ acute paronychia هُو عدوى بكتيريَّة تُصِيبُ طية الظفر.

سببها انه البكتيريا تخش بطريقة ما للجلد جهة الظفر ويصير إلتهاب
تصير هلبا من النتيفه في الظفر

غالبا تاخد من 5 ل 10 إيام وتبرأ لكن لانه فيها ألم قوي في بعض الحالات نعطو مسكن ومضاد حيوي موضعي ومرات حتى عن طريق الفم
وفي حالات لازم انظفوها ونتخلصو من التقيح في المستشفى لتخفيف التورم والالم