dr.souha ezregiد.سهى الزريقي

15/09/2025

حالتنا اليوم طفل عمره شهرين جايبينه اماليه لان قالوله ولدك رجليه معوجات
درناله جهاز ع مفصل الحوض وطلع تمام والحمدلله ماعنداش اي خلع والمفصل سليم
اني مش ضد ان الاهل يخافو على الطفل وجيبوه يتطمنو لكن المشكله ف كلام الناس والأم خايفة وتبكي وهدا اول عيل وبيطلع معاق طمناها الام وسألتها لما جبتيه ف المستشفى هل فحصه دكتور اطفال قالت نعم سألتها تاني هل قالك ولدك يبي متابعة قالت لا شاف رجليه وقال أموره كويسه
باهي علاش تسمع ف كلام جارتها وسلفتها وتجي راعشه

15/09/2025

لأي استفسار ع الواتس اب 0914668666

15/09/2025

السلام عليكم
غيرنا مكاننا وحاليا في مركز المسار للتصوير الطبي خلف مستشفى الخضراء اثنين واربعاء مساء

26/12/2023

هده حالة تانية مدايرة عملية استئصال لاحد الث*يين وعندها كتله ف الث*ي الاخر
تدير جهاز ويطمنوها انه شكل الكتله حميد
خديت منها عينه وطلعت ورم
ف مريض الاورام اي كتلة فهي ورم الى ان يثبت العكس
مهما كان شكلها ومواصفاتها حميدة مش حنخسرو لو خدينا عينه وممكن نخسر انسان لو ماخديناش

26/12/2023

السلام عليكم
اليوم جايبتلكم حالة مدايرة عملية استئصال ورم من الث*ي الايمن وصارلها تجمع سوائل مكان العمليةseroma هده تصير عادي ويتم التعامل معاها حسب كميتها لو شوية نراقبوها وتمشي مع الوقت لكن لو هلبا لازم سحبها وتفريغها لانها عرضة للالتهاب
هده حالة مسكينة تمشي للدكتور وتشكيله من وجع وتقوله الجرح مشدود يقولها تتدلعي مافيك شي بري بري
ماحدش فكر انه يديرلها جهاز التراساوند
لما جتني سحبتلها السوائل لين دهشت وهيا ارتاحت وخف عليها الالم جدا
مش كل مريض يتدلع ومن حق المريض يتدلع لانه مريض
مانستهونوش بالشكوى نفسيا تفرق هلبا

03/10/2023

السلام عليكم بنتكلم اليوم على موضوع مهم غير امراض الث*ي الي هو دهون الكبد لاحظتها الفترة الماضية كاترة هلبا هلبا بشكل مخيف خاصة عند فئه صغار العمر عشرينات وثلاثينيات
يعني ف العمر هدا ويستهلكو ف الكبد تخليه كانه كبد مسن لشيباني كبير ف العمر من كتر السكريات والمشروبات الغازية والمعلبات وقلة الحركة والروتين الغير صحي
موضوع علاجه سهل وتجنبه اسهل وتوابعه خطيرة هده اول مرحلة في خسارة وفشل الكبد
الناس تحسابها سهلة كلمة دهون ع الكبد ولما نقولها للمريض يقولي الحمدلله يعني مافيا شي
نقوله خويا راهو الكبد عليها دهون هلبا يقولي الله غالب هده ماكلتنا

03/10/2023

14/02/2023

Fibroadenosis
تضخم الغدد الليفية احد حالات الث*ي الحميدة تصنف من ضمن التكيسات الليفية fibrocystic disease
تشكي المريضة من كبر حجم الث*ي او منطقة معينه فيه اوتحس بكتله توجع فيها واهم حاجة الوجع
الالم هدا مع الدورة الشهريه او بعدها بخمس ست ايام فترة تغيير الهرمونات
الحاله سببها تغيير الهرمونات وتزيد ف الحمل ايضا والرضاعة
العمر الشائع 12-35 سنه
هده حاله يصير فيها تغيير تركيب الث*ي نتيجة تاثير الهرمونات ماليهاش علاقة بالاورام ولا تزيد نسبتها ولا هي تتحول لورم
مش معناها ان الي عندها الحاله هده محمية من الاورام لا
اهم حاجة للمريضة انها تتطمن وتتاكد انها مش ورم وهدا دورنا كاطباء نشرحولها ونفهموها
لان الخوف والقلق والتفكير الزايد حيسببلها اضطراب هرمونات فيزيد معاها الالم
تتعايش المريضة مع الحالة بشكل طبيعي وتاخد مسكنات خفيفة عن طريق الفم او مسكن موضعي كريم يفيدها
استخدام نوع لين من حمالات الصدر مافيهاش حديد او اسفنج يساعد على تخفيف الاعراض الافضل النوع القطني الرياضي
كتبت البوست بالعاميه بدون استخدام للمصطلحات الطبيه المعقدة عشان موجه للنساء بصفة عامة لان هلبا حالات تجي خايفة وتستنى نقولها عندك حاجة خطيرة او تكون راحت لاكتر من دكتور ف فترات متقاربه وتبي حد يطمنها
ف الي تتشخص بالحالة هده تتعلم تتعايش معاها وتتاقلم وتتطمن انها حالة شائعة مش خطيرة
نتمنى الشرح يكون وافي وواضح ومفيد

04/11/2022

انتهاء شهر حمله الكشف عن سرطان الث*ي لا يعني عدم الاستمرار في الفحوصات
عشر دقائق قد تساوي حياتك