04/03/2026
سؤال؟
شن احسن حليب نعطيه لطفلي
جواب
رضاعة طبيعية وماتسمعي كلام حد ، كنز غذائي مفيد ليه في صغره وكبره
سؤال؟
هل ضروري نعطي قطرة غازات ؟
جواب
لا مش ضروري افضل شي هو تمارين متع الغازات ، واشربي طاسة بابونج قبل ماترضعي
سؤال؟
ايمت نطهر ولدي ؟
جواب
من اول شهر عادي ومادابيك ما تتأخريش ✅
سؤال؟
ايمت نبدا نوكل طفلي ؟
جواب
بعد مايكمل 4 شهور ، ويبدا يتحكم في راسه ويبدا لما يشوف الاكل يفرفش
سؤال؟
شن نوع الاكل يلي نبدا بيه؟
جواب
افضل شي الخضرة تكون مطبوخه ، ولازم كل صنف بروحه تجربيه 3 ايام
سؤال؟
عادي نعطي حقنة 💉 فيتامين د من غير تحليل
جواب
ممنوع لانه مرات تسبب سمية وقصور في كلى لازم تحليل
سؤال؟
عادي نعطي شراب بروفين !
جواب
يعطى تحت اشراف طبي ، لانه في بعض حالات يكون ممنوع وخطير ، زي حالات الاسهال ،حالات الربو ، حالات قصور الكلى كلهم ممنوع فيهم
سؤال ؟
احسن فيتامين لزيادة الوزن
جواب
مافيش حاجة اسمها احسن فيتامين ، في حاجة اسمها اهتمام بالاكل الصحي ، شن الفايدة من فيتامين وهو ياكل في شيبس ولاندومي والمعلبات !!!!!!
سؤال ؟
شن علاج ارتجاع المري؟
جواب
حسب الحالة ودرجة الارتجاع ، لانه في حالات توصل حتى للعملية الجراحية موضوع مش بسيط راهو
سؤال؟
هل مهم قياس محيط راس؟
جواب
نعم مهم ولازم تخلي دكتور ياخده ويسجله لازم
سؤال ؟
عادي نغير نوع الحليب في حال مالقيتش
جواب
نعم بشرط يكون نفس صفة
مع العلم انه مرات يسبب امساك واضطرابات لانه مش نفس تركيبة
سؤال؟
تأخرت شهر على تطعيمة عادي نطعمة تو؟
جواب
عادي طعميه ✅
سؤال؟
عجبك المنشور واستفدت
نعم دير مشاركة بيش يوصل لغيرك وتشارك معانا في الاجر 🙋
د.محمد امدلل عبدالله
