07/11/2025
СОСТОЈБА СО ГРИП ВО РЕПУБЛИКА С. МАКЕДОНИЈА,
СЕЗОНА 2025/2026
(44-та недела, до 02.11.2025)
НЕДЕЛНИ ПОДАТОЦИ
Епидемиолошки надзор
Во текот на 44-тата недела од 2025 година (од 27.10-02.11.2025), во Р.С. Македонија, пријавени се 94
случаи (I=5,1/100.000 жители) на групни пријави за заболени од грип/заболувања слични на грип што
претставува зголемување од 67,9% во споредба со минатата недела (n=56). За споредба, во текот на
претходната недела се забележува зголемување од 2 пати повеќе во однос на 44-тата недела од
минатата сезона, кога беа регистрирани 47 заболени лица, додека во однос на моделот за
последните 15 сезони (n=66), се регистрира зголемување од 42,9%.
Заболените лица оваа недела се регистрирани во Гостивар – 27, Куманово – 26, Битола – 7, Штип – 15,
Неготино и М. Брод – по 4, Тетово и Струмица – по 3, Скопје и Радовиш – по 2 и Кавадарци – 1.
Во однос на возраста, од 15-64 години се регистрирани 70 лица, лица над 65 години – 17, од 5-14
години – 6 лица и од 0-4 години – едно лице.
Пријавената инциденца е под неделната граница на сезонската активност на вирусот на грип
(I=22,03/100.000), односно сѐ уште не е достигнат прагот на влез во сезоната на грип.
Вирусолошки надзор
Во текот на 44-та извештајна недела, во вирусолошката лабораторија на ИЈЗ РСМ, пристигнаа 29
материјали од рутинскиот и САРИ надзорот за лабораториско тестирање, паралелно тестирани за
Influenza, SARS-CoV-2 и/или RSV.
Од вкупно тестираните материјали, не се детектирани позитивни примероци на грип и на SARS-CoV-2.
ОПШТИ МЕРКИ НА ПРЕВЕНЦИЈА
*Извор: https://sezonskigrip.mk/
Општите мерки за заштита од грип се насочени кон сите акутни респираторни заболувања и може да
се од голема корист, особено ако се применуваат во текот на целиот зимски период:
Да се избегнува собирање и престој во простории каде престојуваат повеќе луѓе, особено да
се избегнува близок контакт со луѓе кои се болни или сомнителни – кашлаат, киваат, имаат
покачена телесна температура.
Често да се мијат рацете со вода и сапун или дезинфекционо средство.
Да се загреваат просториите за престој и често да се проветруваат.
Препорачливо е топло, слоевито облекување, топли бањи.
Да се пијат топли напитоци (чаеви и супи), овошни цедени сокови, вода со лимон.
Да се земаат свежи продукти богати со витамини и минерали, најдобро овошје и зеленчук кои
му се неопходни на организмот. Особено се пожелни продукти богати со витамин Ц (цитрони,
лимони, портокали). Доколку не се располага секогаш со свежи прехрамбени продукти, може
да се користат и мултивитамински напитоци и препарати.
Практикување здрав начин на живот и навики, вклучително добар сон и одмор, здрава храна,
одржувајте физичка и психичка активност, намалете го стресот.
Силниот имунитет ќе ви помогне да останете здрави или полесно да се справите со грипот и
заболувањата слични на грип. Сепак, дури и да сте совршено здрави и да имате силен имунитет,
може да заболите од грип или заболување слично на грип.
Што доколку се разболите од грип?
Следете ги следните препораки:
Останете дома и не одете на работа, во училиште или на места каде има многу луѓе.
Одморајте се и земајте многу течности и лесна храна.
Избегнувајте блиски контакти со лицата со кои живеете, не примајте посети додека сте болни.
Покријте го носот и устата со шамивче при кашлање и кивање. По употреба, фрлете ги во
корпа за отпадоци.
Носете заштитна маска кога контактирате со своите блиски во домот, кога кашлате и кивате.
Практикувајте често и темелно миење на раце со топла вода и сапун.
Користете влажни марамчиња кои содржат алкохол или средство за дезинфекција на рацете.
Избегнувајте допирање на очите, носот и устата со раце.
Често проветрувајте ја просторијата каде престојувате додека сте болни.
Одржувајте ја чиста вашата околина – предмети, површини со средства за хигиена на домот.
Ако сте над 65 години или имате хронични заболувања, или доколку симптомите на болеста
се влошуваат или траат повеќе денови – побарајте лекарска помош.
ЕПИДЕМИОЛОШКИ КОМЕНТАР
Се забележува зголемување на бројот и инциденцата на заболувања слични на грип, но истиот
останува на меѓусезонско ниво, карактеристично за овој период од годината.
Оддел за епидемиологија на заразни болести
Институт за јавно здравје
