28/04/2026
Sot, përfaqësueset nga shoqata "CORTEX", Sema Halili dhe Nebahat Imeri nga Tetova, e cila menaxhon të vetmen këshillimore për mbështetjen e viktimave të dhunës në rajonin e Pollogut, së bashku me koordinatoren e Kabinetit të Kryetarit të Komunës së Tetovës, Sevim Veseli, realizuan një takim pune në hapësirat e Myftinisë së Tetovës.
Ato u pritën nga Myftiu i Tetovës, dr. Selver Xhemaili, i shoqëruar nga shefi i kabinetit, Muhamed Berzati, me qëllim krijimin dhe forcimin e bashkëpunimit në fushën e parandalimit dhe sensibilizimit ndaj dhunës në familje dhe asaj me bazë gjinore. Duke e konsideruar Bashkësinë Fetare Islame si një faktor relevant dhe me ndikim të rëndësishëm në shoqëri, u diskutua mbi rolin dhe kontributin që ky institucion mund të japë në ngritjen e vetëdijes publike dhe në adresimin e kësaj dukurie shqetësuese.
Takimi rezultoi me një bashkëpunim të suksesshëm dhe me dakordim për ndërmarrjen e aktiviteteve të përbashkëta, të cilat do të synojnë edukimin, parandalimin dhe fuqizimin e mekanizmave sensibilizues përmes fushatave ndërgjegjësuese, ligjëratave edukative dhe tryezave të diskutimit. Ky bashkëpunim, i cili promovon vlerat e respektit, barazisë dhe dinjitetit njerëzor, përbën një hap të rëndësishëm drejt angazhimit të përbashkët institucional dhe shoqëror për të luftuar dhunën dhe për të ndërtuar një mjedis më të sigurt e më të drejtë për të gjithë.
