12/09/2025
ကလေးနှင့် အားဆေး
ကလေးနှင့်အားဆေး
▪️ကလေးကိုအားဆေးတိုက်ချင်တယ် ဘယ်ဟာဝယ်တိုက်ရမလဲ?
▪️အားဆေးက ကလေးကိုမဖြစ်မနေတိုက်ရမှာလား?
ဒီမေးခွန်းက မိဘတွေအလွန်မေးကြတဲ့မေးခွန်းဖြစ်ပါတယ်။ ဆရာဝန်တွေအနေနဲ့လည်း စာတစ်ကြောင်းတည်းနဲ့ပြန်ပြီးဖြေဖို့မလုံလောက်တဲ့မေးခွန်းလည်းဖြစ်ပါတယ်။ ခုဆောင်းပါးမှာတော့ သေချာလေးရှင်းပြထားပါမယ်ရှင်။
အရင်ဦးဆုံး ကလေးတွေမှာလိုအပ်တဲ့ အာဟာရဓာတ်တွေအကြောင်းပြောပြချင်ပါတယ်။
ကလေးငယ်တစ်ဦး ဖွံ့ဖြိုးကြီးထွားဖို့လိုအပ်တဲ့အာဟာရဓာတ်တွေကတော့
Protein -အသားဓာတ်
Carbohydrate -ကစီဓာတ်
Fat -အဆီဓာတ်
Vitamin - သက်စောင့်ဓာတ်
mineral - သတ္တုဓာတ်
Water -ရေဓာတ် စသည်တို့ပဲဖြစ်ပါတယ်။
ဒီအာဟာရဓာတ်တွေကို ကျွန်မတို့နေ့စဉ်စားနေတဲ့ အသား၊ငါး၊ပဲအမျိုးမျိုး၊ နို့၊ နို့ထွက်ပစ္စည်းများ၊ အသီးအနှံများ၊ ဟင်းသီးဟင်းရွက်များ၊ အစေ့အဆံများ၊ ဆန်၊ဂျုံ၊ပြောင်း၊အုတ်ဂျုံ၊ အာလူး၊ ဟင်းရွက်ဆီ၊ အဆီအမျိုးမျိုး၊ ရေ စတဲ့အစားအစာတွေကနေ ရရှိနိုင်ပါတယ်။
🔺ကလေးတစ်ဦးရဲ့အာဟာရအနေနဲ့ မွေးစကနေ အသက် ၆လအထိဟာ မိခင်နို့တစ်မျိုးတည်းနဲ့လုံလောက်ပါတယ်။ ၆လမပြည့်ခင်မှာ ကလေးကိုထမင်းကျွေးစရာ၊ရေတိုက်စရာမလိုပါဘူး။
🔺ကလေး အသက်၆လပြည့်ပြီးနောက်ပိုင်းမှာတော့ ဖြည့်စွက်စာစကျွေးရပါပြီ။ ကလေးအတွက် လိုအပ်တဲ့အာဟာရဟာ မိခင်နို့တစ်မျိုးတည်းနဲ့မလုံလောက်တော့တဲ့အတွက်ဖြစ်ပါတယ်။ ကမ္ဘာ့ကျန်းမာရေးအဖွဲ့အစည်းဖြစ်တဲ့ WHO က မိခင်နို့ကို ကလေးအသက် ၂နှစ်အထိတိုက်သင့်တယ်လို့ညွှန်ကြားထားပါတယ်။
ကလေးအားဆေးတွေမှာ များသောအားဖြင့် Vitamin A, C ,D, E, B complex အုပ်စု, Folic acid နဲ့ Niacin အဓိကပါတတ်ပါတယ်။ ထပ်မံပါဝင်နိုင်တဲ့ အာဟာရဓာတ်တွေလည်းရှိပါတယ်။ Brand ပေါ်လိုက်ပြီး ကွဲပြားနိုင်ပါတယ်။
✔️Vitamin A က ကလေးအတွက် အမြင်အာရုံကိုကောင်းမွန်စေပါတယ်။ ခုခံအားစနစ်ကိုမြှင့်တင်ပေးနိုင်ပါတယ်။
Vitamin A ကြွယ်ဝတဲ့အစားအစာတွေကတော့
အသည်း၊လိမ္မော်ရောင်နဲ့အနီရောင်ရှိတဲ့သစ်သီးဝလံများ၊အစိမ်းရင့်ရောင်ဟင်းသီးဟင်းရွက်များပဲဖြစ်ပါတယ်။
✔️Vitamin B အုပ်စု(B1,B2,B6,B12,Niacin,Folic acid,Biotin, Pantothenic acid) ကတော့ ကလေးရဲ့ဇီဝရုပ်ဖြစ်ပျက်မှုတွေကိုအားကောင်းစေတယ်။ သွေးနီဥတွေထုတ်လုပ်တဲ့နေရာမှာကူညီပေးပါတယ်။
Vitamin B ကြွယ်ဝတဲ့အစားအစာတွေကတော့
အုတ်ဂျုံ၊ ပင်လယ်စာ၊ ငါး၊အသား၊ကလီစာ၊ဥအမျိုးမျိုး၊ နို့နဲ့နို့ထွက်ပစ္စည်းများ၊ ဒိန်ချဉ်၊ပဲအမျိုးမျိုး၊ ဟင်းသီးဟင်းရွက်များနဲ့ Cereal စတာတွေပဲဖြစ်ပါတယ်။
✔️Vitamin C ကတော့ ကလေးရဲ့ခုခံအားစနစ်ကိုကောင်းမွန်စေပါတယ်။ အနာကျက်လွယ်စေတယ်။ ကလေးရဲသွားဖုံး၊ အရိုးနဲ့ သွေးကြောတွေကို ကောင်းမွန်အောင်ထိန်းထားပေးတယ်။ သံဓာတ်စုပ်ယူမှုကိုအားကောင်းစေပါတယ်။
Vitamin C ကြွယ်ဝတဲ့အစားအစာတွေကတော့
အရည်ရွှမ်းပြီးချဉ်တဲ့အသီးအနှံတွေနဲ့ ခရမ်းချဉ်သီး၊ ပန်းစိမ်း၊ဂေါ်ဖီထုပ်၊ကီဝီသီးစတာတွေပဲဖြစ်ပါတယ်။
✔️Vitamin D ကတော့ ကလေးငယ်ရဲ့အရိုးနဲ့သွားကိုကျန်းမာစေပါတယ်။ ကယ်လ်စီယမ်ဓာတ်စုပ်ယူဖို့ အတွက် အားဖြည့်ကူညီပေးပါတယ်။
Vitamin D ကြွယ်ဝတဲ့အစားအစာတွေကတော့
နို့နဲ့နို့ထွက်ပစ္စည်းများ၊ ငါး / အရိုးပါဝါးစားနိုင်တဲ့ငါးလေးများ၊ ကြက်ဥအနှစ်၊ အသည်း၊ အုတ် စတာတွေပဲဖြစ်ပါတယ်။
✔️Vitamin E ကတော့ ကလေးရဲ့ခန္ဓာကိုယ်မှာရှိတဲ့ဆဲလ်တွေနဲ့အာရုံကြောတွေကို မပျက်စီးအောင်ကာကွယ်ပေးပါတယ်။ သွေးနီဥတွေရဲ့ကျန်းမာရေးအတွက်လည်းအရေးကြီးပါတယ်။ လမစေ့ ပေါင်မပြည့်ဘဲမွေးလာတဲ့ကလေးတွေမှာ Vitamin E ဟာ အလွန်အရေးပါပါတယ်။
Vitamin E ကြွယ်ဝတဲ့အစားအစာတွေကတော့
အစေ့အဆံများ၊ အုတ်ဂျုံ ၊ အစိမ်းရောင်ဟင်းသီးဟင်းရွက်များ၊ နေကြာဆီ ၊သံလွင်ဆီ နဲ့ကြက်ဥအနှစ်တို့ပဲဖြစ်ပါတယ်။
ခုနောက်ပိုင်းမှာ DHA , Fibers စတဲ့ အာဟာရဓာတ်တွေပါလာတဲ့အားဆေးတွေကိုလည်းတိုက်လာကြပါတယ်။ Omega 3 Fatty Acid များဟာ ခန္ဓာကိုယ်ကျန်းမာရေးအတွက် အလွန်အရေးပါပါတယ်။ နှလုံးကျန်းမာရေး၊ ဦးနှောက်လုပ်ဆောင်မှု နဲ့ ကိုယ်ခံစွမ်းအားတို့အပေါ်မှာ ကောင်းမွန်စွာသက်ရောက်ပါတယ်။ ငါး၊ ရေညှိစတဲ့အစားအစာတွေကနေ အလွယ်တကူရရှိပါတယ်။ Fibers အမျှင်ဓာတ်ကတော့ ဝမ်းချုပ်တတ်တဲ့ကလေးငယ်တွေအတွက် သင့်တော်ပါတယ်။ အသီးအနှံတွေ၊ ဟင်းသီးဟင်းရွက်တွေကနေလည်း သဘာဝအတိုင်းရရှိနိုင်ပါတယ်။
ဒီတော့ ကလေးတိုင်းဟာ အထက်ပါအစာအာဟာရတွေကိုပြည့်စုံအောင်စားသောက်နေမယ်ဆိုရင် အားဆေးဆိုတာ မဖြစ်မနေမလိုအပ်ပါဘူး။
💠ကလေးတွေမှာ အားဆေးကို လိုအပ်တဲ့အခြေအနေတွေလည်း ရှိတတ်ပါတယ်။
အဲဒါတွေကတော့
▪️အသားလုံးဝမစားတဲ့ သက်သက်လွတ်ပဲကျွေးလို့ရတဲ့ကလေးများ
▪️အစားအင်မတန်ကြေးများတဲ့ကလေးများ
▪️ကျန်းမာရေးပြဿနာ/အခြေအနေတစ်ခုခုရှိနေတဲ့ကလေးများ (ဥပမာ ပေါင်မပြည့်သော/လမစေ့သောကလေးများ၊ မွေးရာပါရောဂါအခံပါသောကလေးများ၊ပုံမှန်သောက်ရမယ့်နို့ပမာဏထက်နည်းနေသော ကလေးများ၊ ပေါင်ချိန်မတက်သဖြင့် ကလေးအထူးကုဆရာဝန်နဲ့ပြသနေရသောကလေးများ)
စတဲ့အခြေအနေတွေရှိရင်တော့ကလေးကိုအားဆေးတိုက်လို့ရပါတယ်။
💠 တိုက်လိုပါက အပေါ်မှာပြောထားတဲ့ အာဟာရဓာတ်တွေပါဝင်တဲ့အားဆေးကို အဆင်ပြေရာ၊ စိတ်ချရတဲ့ဟာရွေးချယ်ပြီးတိုက်ပါ။ မနက်အစားစားပြီးချိန်တိုက်နိုင်ပါတယ်ရှင်။
💠အားဆေးတိုက်တဲ့အခါမှာလည်း ဆေးညွှန်းအတိုင်းသာတိုက်ကျွေးဖို့လိုအပ်ပါတယ်။ ဆေး၂မျိုး/၃မျိုးရောတိုက်စရာမလိုပါဘူး။
💠အားဆေးတမျိုးတည်းကိုပဲ အားကိုးလို့မရဘဲ ကလေးကို အာဟာရပြည့်အောင် ကျွေးမွေးပြုစုဖို့ကလည်း အရေးကြီးပါတယ်။
💠ကလေးငယ်ကို
✔️Protein (အသားဓာတ်)ကြွယ်ဝတဲ့အစားအသောက်တွေ
ဥပမာ- နို့၊ အနီရောင်ရှိသောအသားအမျိုးမျိုး၊ ကြက်သား၊ ပဲအမျိုးမျိုး၊ကြက်ဥ၊ဘဲဥ
✔️ဗီတာမင်နဲ့သတ္တုဓာတ်ကြွယ်ဝသောအစားအစာတွေ
ဥပမာ- အသီးအနှံအမျိုးမျိုးနဲ့ ဟင်းသီးဟင်းရွက်အမျိုးမျိုးပါဝင်ပါတယ်။
✔️ကာဗိုဟိုက်ဒရိတ်(ကစီဓာတ်)နဲ့ အဆီဓာတ်ပေးသောအစားအစာတွေ
ဥပမာ- ဆန်၊ဂျုံ၊ပြောင်း၊အာလူး၊သကြားနဲ့ထောပတ်၊ဆီစတာတွေ
မျှတအောင်ကျွေးရမှာဖြစ်ပါတယ်။
ခုဆိုရင် မိဘတွေအမေးများကြတဲ့ ကလေးကိုအားဆေးတိုက်ရမလား....မဖြစ်မနေတိုက်ရမှာလားဆိုတဲ့မေးခွန်းရဲ့အဖြေကို သိရှိသွားလိမ့်မယ်လို့မျှော်လင့်ပါတယ်ရှင်။
အားလုံးကျန်းမာပျော်ရွှင်ကြပါစေ။
မောင်(ဆေး-၁)မာမီ
✅စာများကို လွတ်လပ်စွာ share နိုင်ပါတယ်။ ခွင့်ပြုချက်တောင်းရန်မလိုပါ။
❗️တစ်ဆင့်ပြန်လည်ကူးယူခြင်းမပြုရန်မေတ္တာရပ်ခံပါတယ်။
