26/08/2021
၆ လအကြာမှာ ကိုဗစ်ကာကွယ်ဆေးတွေက အားပျော့ပျက်ပြယ်သွားတယ်လို့ ဗြိတိန်သုတေသီတွေ ထုတ်ဖော်ပြောဆို
~~~~~~~~~~~~~~~~~~~~~~~~~~~~~~~~~~
၂ ကြိမ်စီထိုးနှံရတဲ့ ကိုဗစ်ကာကွယ်ဆေးတွေဖြစ်တဲ့ Pfizer, AstraZeneca ကာကွယ်ဆေးတွေဟာ ၆ လအတွင်းမှာ ဗိုင်းရပ်စ်ကာကွယ်နိုင်စွမ်း အားပျော့ပျက်ပြယ်သွားတယ်လို့ အင်္ဂလန်သုတေသီတွေက ပြောဆိုလိုက်ပါတယ်။
ဒီအတွက် အားသစ်လောင်းပေးမှုအဖြစ်နဲ့ တတိယအကြိမ်ထိုးနှံမှု လိုအပ်တယ်လို့လည်း သုတေသီတွေက ထောက်ပြခဲ့ပြီး အချက်အလက်တွေထုတ်ပြန်ခဲ့ပါတယ်။
Pfizer ကာကွယ်ဆေး ဒုတိယအကြိမ်ထိုးနှံပြီးနောက် ငါးလ ကနေ ခြောက်လအထိ ကိုဗစ်ကူးစက်ခြင်းကို ကာကွယ်ပေးမှုက ထိရောက်မှုရှိပြီး အဲဒီနောက်မှာတော့ ကာကွယ်ဆေးရဲ့ ထိရောက်မှုဟာ ၈၈% ကနေ ၇၄% အထိ ကျဆင်းသွားပါတယ်။
AstraZeneca ကာကွယ်ဆေးကတော့ ၇၇% ကနေ ၆၇% အထိကို ကျဆင်းသွားတယ်လို့ သုတေသီတွေက ဆိုပါတယ်။ ဆောင်းရာသီမှာဆိုရင်သက်ကြီးရွယ်အိုတွေနဲ့ ကျန်းမာရေးဝန်ထမ်းတွေအတွက် ကာကွယ်ပေးမှုဟာ ၅၀% အောက်အထိ ရောက်နိုင်တယ်လို့တောင် သိရပါတယ်။
ဒီစမ်းသပ်မှုကို အက်ပလီကေးရှင်းအသုံးပြုသူ တစ်သန်းကျော်ရဲ့ အချက်အလက်တွေကို အခြေခံခဲ့တာလည်းဖြစ်ပါတယ်။
ကူးစက်ခံထားရပေမယ့် ကာကွယ်ဆေးထိုးနှံထားတယ်လို့ ပြောဆိုထားသူတွေနဲ့ မထိုးနှံထားသူတွေအုပ်စုကို နှိုင်းယှဉ်ခဲ့တာလည်းဖြစ်ပါတယ်။
ဒါပေမယ့်လည်း ဒီလေ့လာတွက်ချက်မှုမှာတော့ လူငယ်တွေနဲ့ပတ်သက်တဲ့ အချက်အလက်တွေ ပိုပြီးလိုအပ်နေတယ်လို့လည်း သူတို့က ပြောဆိုခဲ့ပါတယ်။
အကြောင်းရင်းကတော့ လေ့လာမှုမှာ ပါဝင်ခဲ့သူအများစုဟာ လွန်ခဲ့တဲ့ ၆ လက ကာကွယ်ဆေးဦးစားပေးအဆင့်မှာပါဝင်တဲ့ သက်ကြီးရွယ်အိုတွေဖြစ်နေတာကြောင့်လို့ လေ့လာသူတွေက ဆိုပါတယ်။
ဒီလေ့လာမှုမှာ ZOE Ltd က ပါဝင်ထောက်ပံ့ပေးခဲ့ပြီး အဆိုပါကုမ္ပဏီဟာ လွန်ခဲ့တဲ့ ၃ နှစ်က စတင်တည်ထောင်ခဲ့ပြီး အာဟာရဆိုင်ရာအကြံဉာဏ်တွေ ပေးနေတာဖြစ်ပါတယ်။ ZOE က ကိုဗစ်လက္ခဏာလေ့လာရေးအက်ပလီကေးရှင်းကို ကင်းကောလိပ်(လန်ဒန်) နဲ့ ပူးပေါင်းကာ ဖန်တီးပြီး ကျန်းမာရေးနဲ့လူမှုဖူလုံရေးဌာနရန်ပုံငွေအတွက် အကျိုးအမြတ်မယူဘဲ လုပ်ကိုင်ခဲ့တာဖြစ်ပါတယ်။
ကာကွယ်ဆေးနဲ့ပတ်သက်ပြီး ထိပ်တန်းကျွမ်းကျင်သူတွေက တတိယအကြိမ်ထိုးနှံဖို့ လိုအပ်ကြောင်း အကြံပြုခဲ့ပြီးနောက် ဗြိတိန်အပါအဝင် အခြားသောဥရောပနိုင်ငံတွေဟာ ကိုဗစ်ကာကွယ်ဆေးကို တတိယမြောက်ထိုးနှံမယ့်အစီအစဉ်ကို စတင်လုပ်ဆောင်နေတာဖြစ်ပါတယ်။
အမေရိကန်ကတော့ စက်တင်ဘာလလယ်မှာ စတင်ထိုးနှံခွင့်ပြုခဲ့ပြီဖြစ်ပါတယ်။ ရီးဒင်းတက္ကသိုလ်က ဆဲလ်အဏုဇီဝဗေဒတွဲဖက်ပါမောက္ခ Simon Clarke က "ိကုဗစ်ပြန့်ပွားမှုကို ကာကွယ်ဖို့ ကာကွယ်ဆေးတမျိုးတည်းအပေါ်မှီခိုနေလို့မရဘူးလို့ သတိပေးလိုက်တာပါပဲ" လို့ ဆိုပါတယ်။
River News
