07/09/2022
နာတာရှည် ပင်ပန်းနွမ်းနယ်မှု ( Chronic Fatigue Syndrome )
Chronic Fatigue Syndrome ဆိုတာ နာတာရှည်ရောဂါ တစ်ခုဖြစ်ပြီး ခြောက်လ အထက် အလွန်အမင်း မောပန်းနွမ်းနယ်နေခြင်းဖြစ်ပါတယ်။ နာတာရှည် ပင်ပန်းနွမ်းနယ်မှု ( Chronic Fatigue Syndrome )ဖြစ်နေပြီလို့ နာမည်တပ်ဖို့ ခက်ပါတယ်။
ပင်ပန်းနွမ်းနယ်မှု ( Chronic Fatigue Syndrome ) က တစ်ချိန်လုံးဖျားနေသလို ခံစားနေရတတ်တယ်။ အချိန်အကြာကြီးမလုပ်နိုင်မကိုင်နိုင် ပင်ပန်းနေတတ်တယ်။ မှတ်ဉာဏ်တွေလျော့လာတတ်တယ်။ တစ်ခါတစ်ရံ အဆစ်တွေ၊ ကြွက်သားတွေ နာတတ်တယ်။ အကျိတ်လေးတွေ ထွက်လာတတ်တယ်။ ခေါင်းကိုက်တတ်တယ်။ ညဘက်ချွေးထွက်တယ်။ အူလမ်းကြောင်းမူမမှန်တာတွေဖြစ်တတ်တယ်။ စိတ်ဓာတ်လည်းကျနေတတ်တယ်။
ဟိုမုန်း မူမမှန်မခြင်း၊ ကိုယ်ခံအားစနစ် ချို့ယွင်းချက်ရှိခြင်း၊ နာတာရှည်သွေးအားနည်းနေခြင်း နှင့် အစာအဟာရာမပြည့်စုံခြင်းတို့က ပင်ပန်းနွမ်းနယ်မှု ( Chronic Fatigue Syndrome ) ရောဂါကိုပိုဆိုးစေပါတယ်။ Celiac disease ရောဂါ၊ oxidative stress ဖြစ်ခြင်း၊ အစာနှင့် ဓာတ်မတည့်မှုတွေ နှင့် နာတာရှည် ပင်ပန်းနွမ်းနယ်မှု ( Chronic Fatigue Syndrome ) အဆက်အစပ်ရှိတယ်ဆိုပါတယ်။ ဗိုင်းရပ်တွေကလည်း နာတာရှည် ပင်ပန်းနွမ်းနယ်မှု ( Chronic Fatigue Syndrome ) ကို ဖြစ်စေနိုင်ပါတယ်။
နာတာရှည် ပင်ပန်းနွမ်းနယ်မှု ( Chronic Fatigue Syndrome ) ကို ဆေးရုံတွေမှာတော့ ရောဂါဇစ်မြစ်ကိုရှာလို့မရတာကြောင့် ဖြစ်လာတဲ့ ဝေဒနာကိုပဲ သက်သာအောင် ကုပါတယ်။ ကုရတာလည်း သိပ်ကြာပြီး ဓာတုဆေးတွေရဲ့ဘေးထွက်ဆိုးကျိုးလည်း ခံစားရပါတယ်။ Alternative and Complementary Medicine ဂျာနယ်အဆိုအရ အပ်စိုက်ကုခြင်း၊တရားထိုင်ခြင်းတို့က နာတာရှည် ပင်ပန်းနွမ်းနယ်မှု ( Chronic Fatigue Syndrome ) ကို သက်သာစေတယ် ရေးပါတယ်။
အကြံပြုချက်တွေက
✅ အစာနဲ့ ဓာတ်မတည့်ခြင်း နှင့် နာတာရှည် နွမ်းနယ်နေမှု တို့က အဆက်အစပ်ရှိတယ်လို့ သုသေတနအများစုက ပြောပါတယ်။ Scandinavian Journal of Gastroenterology မှာရေးတာက အူလမ်းကြောင်းမူမမှန် လှုပ်ရှားမှုကြောင့် ဖြစ်သောရောဂါ (IBS ) ၊ နာတာရှည် ကြွက်သားနာကျင်တောင့်တင်းသောရောဂါ (fibromyalgia) နှင့် နာတာရှည် ပင်ပန်းနွမ်းနယ်မှု ( Chronic Fatigue Syndrome ) တို့က အဆက်အစပ်ရှိနေပါတယ်။
အစာမကြေခြင်း နှင့် ဂလူတန်နဲ့ မတည့်ခြင်း၊ နို့ နဲ့မတည့်ခြင်း လို အစာနဲ့ ဓာတ်မတည့်ခြင်းက အဓိက အကြောင်းဖြစ်နိုင်တယ်လို့ ကောက်ချက်ချပါတယ်။ ဓာတ်မတည့်ခြင်းအတွက် IgG (Immunoglobulin G) စစ်ဆေးမှုလုပ်ပြီး မတည့်တဲ့အစားအစာကို ရှောင်လိုက်လျှင် အူလမ်းကြောင်းမူမမှန် လှုပ်ရှားမှုကြောင့် ဖြစ်သောရောဂါ (IBS ) နှင့် နာတာရှည် ပင်ပန်းနွမ်းနယ်မှု ( Chronic Fatigue Syndrome ) တို့ သက်သာ သွားတတ်ပါတယ်။ Orthomolecular Medicine ဂျာနယ် အဆိုအရ အစာလမ်းကြောင်းကို အကျိုးပြုတဲ့ ပရိုဘိုင်အိုတစ် အများကြီးပါတဲ့ အစားအစာတွေက Chronic Fatigue Syndrome ကုသမှုအတွက် အထောက်အကူပြုပါတယ်။
ကမ္ဘာ့လူဦးရေရဲ့ ၂/၃ လောက်မှာ H. pylori က ဘက်တီးရီး ကူးစက်မှုရှိပါတယ်။ H. pylori ပိုးက အစာအိမ်နံရံကို ဖျက်စီးတတ်တယ်၊ မကုပဲထားလျှင် အစာအိမ်အနာဖြစ်တတ်တယ်။ H. pylori ပိုးကလည်း နာတာရှည် ပင်ပန်းနွမ်းနယ်မှု ( Chronic Fatigue Syndrome ) နဲ့ ဆက်စပ်နေပါတယ်။ Chronic Fatigue Syndrome နှင့် candida မှိုတွေက ဆက်စပ်နေတယ်ရေးပါတယ်။ ဒါကြောင့် candida မှိုတွေကြိုက်တဲ့ သကြား၊ အသီးချို၊ အရက် နဲ့ ပြောင်းဖူးလို အစေ့အဆန်တွေ ရှောင်ပါ။ IgG စစ်ရင်း မှိုရှိ၊ မရှိ Candida albicans test လုပ်ကြည့်နိုင်ပါတယ်။
✅ ဗိုက်တာမင် B အုပ်စုတွေဖြစ်တဲ့ B1,B12,B 6,B 2,folate နဲ့ နာတာရှည်နွမ်းနယ်မှု တိုက်ရိုက်ပတ်သတ်နေတယ်လို့ တော်ဝင်ဆေးပညာအဖွဲရဲ့ ဂျာနယ်မှာရေးသားဖော်ပြခဲ့ပါတယ်။ ဗိုက်တာမင် B-6 က မောပန်းမှုကို မဖြစ်အောင်ကာကွယ်တယ်။ မောပန်းနေလျှင်လည်း သက်သာပျောက်ကင်းစေတယ်။သွေးဖြူဥတစ်မျိုးဖြစ်တဲ့ T cell ရဲ့ကျန်းမာရေးကို ကောင်းမွန်စေပြီး ဗိုင်းရပ်ကူးစက်မှုကို ကာကွယ်ပေးတယ်။နာတာရှည် နွမ်းနယ်တတ်သူတွေ ဗိုက်တာမင် B-6 ကြွယ်ဝတဲ့ ဆာလမွန်ငါး၊တူနာငါး၊ဌက်ပျောသီး၊အမဲသား၊ကန်စွန်းဥ၊ကြက်သွန်ဖြူ၊ဟင်းနုနွယ်တွေ များများစားပေးသင့်ပါတယ်။
ဗိုက်တာမင် B6, folate, B12 သုံးခုပေါင်းပြီး မီသိုင်းလေးရှင်း (Methylation) ဆိုတဲ့ ဖြစ်စဉ်ကို ဆောင်ရွက်ပြီး ကိုယ်ခန္ဓာရဲ့ ခုခံအား၊ စွမ်းအင်ထုတ်လုပ်မှု၊ စိတ်အခြေအနေ၊ အာရုံကြောကျန်းမာရေး၊ ကိုယ်တွင်း အဆိပ်ထုတ်သန့်စင်ခြင်းတို့ကို တိုးတက်ကောင်းမွန်စေပါတယ်။နှစ်ခြိုက်စွာ အိပ်ပျော်စေတဲ့ မယ်လတိုနင် ဟိုမုန်းထုတ်လုပ်မှုလည်း တိုးတက်စေတယ်။
မီသိုင်းလေးရှင်း (Methylation) ကောင်းကောင်းမဖြစ်လျှင် နာတာရှည် နွမ်းနယ်ပင်ပန်း နေတတ်တဲ့အပြင် နာတာရှည်ရောဂါတွေဖြစ်တဲ့ ကင်ဆာ၊ဆီးချို၊နှလုံးရောဂါ၊ဓာတ်မတည့်ခြင်းများနဲ့ စိတ်ရောဂါတွေ ဖြစ်တတ်ပါတယ်။
✅ ပိုတက်ဆီယမ် နဲ့ မက်ဂနီဆီယမ် က နာတာရှည် ပင်ပန်းနွမ်းနယ်မှု ( Chronic Fatigue Syndrome ) ကို သက်သာစေပါတယ်။ သုသေတနတွေမှာတွေ့တာက မက်ဂနီဆီယမ် ကြွယ်ဝတဲ့အစာတွေကို ခြောက်ပတ်လောက်စားပေးလျှင် နာတာရှည် ပင်ပန်းနွမ်းနယ်မှု ( Chronic Fatigue Syndrome ) ကို သက်သာစေတယ်ဆိုပါတယ်။ ပိုတက်ဆီယမ် က ကိုယ်ခန္ဓာရဲ့ ဓာတ်သတ္ထုတွေကို မှန်ကန်စေပါတယ်။ ပိုတက်ဆီယမ်များတဲ့ အစာတွေ စားပေးလျှင် နာတာရှည် ပင်ပန်းနွမ်းနယ်မှုကို သက်သာစေပါတယ်။
✅ နာတာရှည် ပင်ပန်းနွမ်းနယ်မှု ( Chronic Fatigue Syndrome ) ဟာ စိတ်သာမက ကိုယ်ခန္ဓာပါ ပင်ပန်းစေပါတယ်။ ဒါကြောင့် အနားယူပါ။ တစ်ပတ် တစ်ရက် ဘာမှ မလုပ်ပဲနားပါ။ ပေါ့ပေါ့ပါးပါး လေ့ကျင့်ခန်းလုပ်ပါ။ အိပ်ပါ။ ယောဂကျင့်ပါ။ ဆီဖြင့် အနှိပ်ခံပါ။ တရားထိုင်ပါ။ ဒီအချက်တွေကို သေချာလိုက်နာလျှင် နာတာရှည် ပင်ပန်းနွမ်းနယ်မှု ( Chronic Fatigue Syndrome ) သက်သာသွားတတ်ပါတယ်။
ဒေါက်တာဖြိုးမောင်မောင်
