25/11/2022
မြင်းခွာရွက်၏အကျိုးအာနိသင်
မြင်းခွာက်ရွက် ရုက္ခဗေဒနာမည်ကတော့ Centella asiatica(L.)Urban ဖြစ်ပါတယ်။
Apiaceae မျိုးရင်းဝင်ဖြစ်ပါတယ်။
မြင်းခွာရွက်ပင်ကို ကျွန်တော်တို့နိုင်ငံမှာ သဘာဝအလေ့ကျပေါက်ပင်အနေနဲ့လည်း တွေ့နိုင်သလို စိုက်ပျိုးပင်အနေနဲ့လည်းတွေ့နိုင်ပါတယ်။နေရာအနှံ့မှာပေါက်ရောက်ပါတယ်။ ရေစပ်စပ်ရှိတဲ့နေရာတွေမှာ ပိုပြီးပေါက်ပွားပါတယ်။
မြေလျှောက်တွားတွားပင်ဖြစ်ပြီး နှစ်ရှည်ခံပင်အမျိုးအစားဖြစ်ပါတယ်။
အရွက်သည် ကျောက်ကပ်ပုံစံရှိသည်။တချို့ကလည်းမြင်းရဲ့ခွာပုံစံရှိတယ်လို့ပြောကြပါတယ်။
ရင်းတူ ထိပ်ညီပန်းခိုင်မျိုးဖြစ်သည်။အဖြူရောင်ပန်းပွင်းများပါရှိသည်။အသီးနံရံဟာ အလွန်ထူပြီး စေ့သည် ဘေးတိုက်အားဖြင့်ကျပ်နေတတ်ပါတယ်။
မြင်းခွာရွက်ကို ကျွန်တော်တို့နိုင်ငံမှာ ရေစင်အောင်ဆေးပြီး အစိမ်းလိုက် ငါးပိရည်နဲ့တို့စားကြသလို ဆီချက်၊ပဲမှုန့်တို့နဲ့ရောသုပ်စားကြတာလည်းရှိပါတယ်။ဟင်းချိုချက်သောက်တာလည်းရှိပါတယ်။
မြင်းခွာရွက်မှာ အရိုင်းမျိုး၊အယဉ်မျိုး၊အဖြူမျိုးစသဖြင့် အမျိုးအစားလေးငါးမျိုးလောက်ရှိပါတယ်။
မြင်းခွာရွက်မှာ Essential oils,Fatty oil,alkaloid hydrocotyline,vellarine,triterpene,asiaticoside,Vitamin C စတဲ့ဓါတ်များပြည့်စုံစွာပါဝင်နေပါတယ်။
ဒီလိုဓါတ်တွေပြည့်စုံစွာပါတဲ့အတွက် မြင်းခွာရွက်မှာ အပူကိုကျစေတဲ့အစွမ်း၊ရောင်ရမ်းမှုကိုသက်သာစေတဲ့အစွမ်း၊အနာရွတ်ဖြစ်ပေါ်ခြင်းကိုဟန့်တားပေးနိုင်တဲ့အစွမ်း၊အနာကိုနိုင်သောအစွမ်း၊ဝမ်းကိုက်ရောဂါကိုသက်သာစေသောအစွမ်း၊ဦးနှောက်နဲ့အာရုံကြောကိုအားကောင်းစေသောအစွမ်း စတဲ့အစွမ်းသတ္တိတွေအများကြီးရှိပါတယ်။
ဒီလိုအစွမ်းသတ္တိတွေအများကြီးရှိလို့ မြင်းခွာရွက်ကို စားစရာအနေနဲ့သာမက ဆေးအဖြစ်ပါသုံးကြပါတယ်။
မြင်းခွာရွက်ရဲ့ဆေးနည်းအသုံးဝင်ပုံတွေကို သိသလောက်ပြောရရင်တော့
၁။မြင်းခွာရွက်ကိုအရည်ညှစ်ပြီး သကြား၊ပျားရည်တို့နဲ့ ရောကာ နေ့စဉ်သောက်ပါက ခွန်အားကိုတိုးစေနိုင်ပြီး ဆီးကိုရွှင်စေကာ ဆီးပူ၊ဆီးကျင်၊ဆီးအောင့် တာတွေကိုသက်သာပျောက်ကင်းစေနိုင်ပါတယ်။
၂။ကလေးငယ်တွေ အအေးမိလို့ရင်ကြပ်ချောင်းဆိုးတာ၊ဖုန်အမှုန်တွေအရှုများလို့ ချောင်းခြောက်ဆိုးတာတွေအတွက်လည်း မြင်းခွာရွက်ကိုအရည်ညှစ်ပြီး လက်ဖက်စားဇွန်းတဇွန်းခန့်တိုက်ပါက သက်သာပျောက်ကင်းနိုင်ပါတယ်။
၃။ဒါ့အပြင် ရုတ်တရက်ထိခိုက်ရှနာဖြစ်တာ၊ခိုက်မိပြီးရောင်ရမ်းတာတွေအတွက်လည်း မြင်းခွာရွက်ကိုကြိတ်ပြီး လိမ်းကျံပေးနိုင်ပါတယ်။
၄။မြင်းခွာရွက်ကိုနေလှမ်းကာ အရွက်ခြောက်ကို ရေနွေးထဲလက်ဖက်ခြောက်ခတ်သလို ခတ်သောက်ပါက သွေးတိုးရောဂါကိုသက်သာစေနိုင်ပါတယ်။
၅။မြင်းခွာရွက်ကို နေ့စဉ်ပုံမှန်စားပါက အမောအပန်းခံနိုင်ပြီး သက်လုံကောင်းလာစေနိုင်ပါတယ်။အဆုတ်ရောဂါ၊ ချောင်းဆိုးရောဂါတွေကိုလည်း သက်သာပျောက်ကင်းစေတယ်။ ဦးနှောက်ကို ကြည်လင်စေပြီး မှတ်ဉာဏ်ကောင်းလာစေနိုင်ပါတယ်။ ဖြူနေတဲ့ဆံပင်ကို
မြင်းခွါရွက်ကို နေ့စဉ်ဆက်ပြီးစားပေးခြင်းဖြင့် ပိတုန်းရောင်ကေသာလို ပြန်လည်နက်မှောင်လာစေတယ်။
ဒါ့အပြင် အမျိုးသားများ ကျားအားတိုးရန်အတွက်လည်း အထောက်အကူပြုပါတယ် လို့ တိုင်းရင်းဆေးကျမ်းတွေမှာဖော်ပြထားပါတယ်။
Internet
Credit
