04/07/2025
***သွေးဆုံးခါနီးဝေဒနာကို သက်သာစေမည့်နည်းလမ်းများ**😊😊
အမျိုးသမီးတွေမှာ အသက် ၄၀ နောက်ပိုင်း၊ ၅၀ ကျော်လာပြီဆိုရင် သွေးဆုံးတဲ့လက္ခဏာတွေက စတင်လို့လာပြီး အများအားဖြင့် နှစ်နဲ့ကြာတတ်ကြပါတယ်။ ဒီကာလအတွင်းမှာဆိုရင် သွေးဆုံးတဲ့အမျိုးသမီး အနည်းဆုံး ၃ ပုံ ၂ ပုံ လောက်က သွေးဆုံးခါနီးဝေဒနာတွေကို ခံစားရတတ်ပါတယ်။ ရှိန်းတိန်းဖိန်းတိန်းဖြစ်ခြင်း၊ ညဘက်ချွေးထွက်ခြင်း၊ စိတ်အတက်အကျမြန်ခြင်း၊ စိတ်ဆတ်ခြင်း၊ နုံးခြင်းအစရှိတာတွေ ခံစားရပါတယ်။ ဒါ့အပြင် အရိုးပွခြင်း၊ အဝလွန်ခြင်း၊ နှလုံးရောဂါ၊ ဆီးချို အစရှိတဲ့ရောဂါတွေလည်း ဖြစ်နိုင်ခြေပိုများလာပါတယ်။
ဒီနေ့မှာတော့ သွေးဆုံးခါနီးရင်ဖြစ်တတ်တဲ့ ဝေဒနာတွေကိုပြေလျော့သက်သာစေမယ့် နည်းလမ်းတွေကို ဖော်ပြလိုက်ပါတယ်။
ကယ်လ်စီယမ်၊ ဗီတာမင်ဒီ ကြွယ်ဝတဲ့အစားအစားကိုစားပါ
သွေးဆုံးချိန်မှာ ဟော်မုန်းအပြောင်းအလဲဖြစ်ခြင်းက အရိုးကိုအားနည်းစေပြီး အရိုးပွနိုင်ခြေကိုမြင့်မားစေပါတယ်။ ဒါကြောင့် အရိုးကိုကျန်းမာစေတဲ့ ကယ်လ်စီယမ်၊ ဗီတာမင်ဒီပါဝင်တဲ့ အစားအသောက်တွေကို လုံလောက်စွာစားသုံးပါ။ နို့နဲ့နို့ထွက်ပစ္စည်းတွေ၊ အစိမ်းရောင်ဟင်းရွက်၊ တို့ဟူး၊ ပဲအမျိုးမျိုးက ကယ်လ်စီယမ်ကြွယ်ဝပြီး ဗီတာမင်ဒီအတွက်ကတော့ နေရောင်ခြည်နဲ့ထိတွေ့ပါ။
ဒါပေမဲ့ အသက်ကြီးလာရင် နေရောင်ခြည်ကနေ ဗီတာမင်ဒီထုတ်တာကနည်းသွားတတ်လို့ ဖြည့်စွက်စာ (သို့) ဥအမျိုးမျိုး၊ ငါးကြီးဆီ၊ ဗီတာမင်ဒီဖြည့်စွက်ထားတဲ့အစားအစာတွေကို မှီဝဲနိုင်ပါတယ်။
***ကိုယ်အလေးချိန်ထိန်းပါ***
သွေးဆုံးချိန်နီးရင် အများအားဖြင့် ဝိတ်တက်လာကြပါတယ်။ ဒါက ဟော်မုန်းအပြောင်းအလဲကြောင့်လည်း ဖြစ်နိုင်သလို အသက်အရွယ်၊ နေထိုင်စားသောက်ပုံ၊ ဗီဇနဲ့လည်းသက်ဆိုင်ပါလိမ့်မယ်။
လေ့လာမှုတစ်ခုအရ တစ်နှစ်အတွင်းမှာ ကိုယ်အလေးချိန်ရဲ့ ၁၀ % ကို လျှော့ချလိုက်နိုင်တဲ့အမျိုးသမီးတွေက ဖိန်းတိန်းရှိန်းတိန်းဖြစ်တာ၊ ညဘက်ချွေးထွက်တာတွေ သက်သာသွားနိုင်ပါတယ်။
***အသီးအနှံ၊ ဟင်းသီးဟင်းရွက် များများစားသုံးပါ***
ဒီအစားအစာတွေက သွေးဆုံးခါနီးလက္ခဏာတော်တော်များများကို သက်သာစေတဲ့အပြင် ကယ်လိုရီနည်းပြီး ဗိုက်ပြည့်တင်းတိမ်စေလို့ ကိုယ်အလေးချိန်ထိန်းသိမ်းရာမှာလည်း အထောက်အကူပြုပါတယ်။ နောက်ပြီး အရိုးကျန်းမာအောင်လည်း ကူညီပေးပါတယ်။
ပိုဆိုးစေမယ့်အစားအစာတွေကို ရှောင်ပါ
တချို့အစားအစာတွေက ဖိန်းတိန်းရှိန်းတိန်းဖြစ်ခြင်း၊ ညဘက်ချွေးထွက်ခြင်း၊ စိတ်အတက်အကျမြန်ခြင်းတွေကိုဖြစ်စေနိုင်ပါတယ်။ ဒါကြောင့် ကဖင်း၊ အရက်၊ အချိုကဲတဲ့အစားအစာ၊ အစပ်စတဲ့ ဝေဒနာပိုဆိုးစေတဲ့အစားအသောက်တွေကို ရှောင်ကြဉ်ပါ။
***ကိုယ်လက်လှုပ်ရှားမှု ပုံမှန်ပြုလုပ်ပါ***
ပုံမှန်ကိုယ်လက်လှုပ်ရှားမှုပြုလုပ်ခြင်းက သွေးဆုံးခါနီးသူတွေမှာဖြစ်တတ်တဲ့ အိပ်မပျော်ခြင်း၊ စိုးရိမ်သောကများခြင်း၊ ဝမ်းနည်းခြင်း၊ ပင်ပန်းခြင်းတွေကို သက်သာစေနိုင်ပါတယ်။ သွေးဆုံးပြီးတဲ့သူတွေမှာဆိုရင် နှလုံးရောဂါဖြစ်နိုင်ခြေက သိသိသာသာမြင့်တက်လာလို့ ပုံမှန်လေ့ကျင့်ခန်းပြုလုပ်ဖို့ အင်မတန်အရေးကြီးလှပါတယ်။
Phytoestrogens ကြွယ်ဝတဲ့အစားအစာတွေကို စားပါ
Phytoestrogens ဆိုတာ အီစထရိုဂျင်ဟော်မုန်းနဲ့ အကျိုးအာနိသင်ချင်းတူတဲ့ အပင်ဒြပ်ပေါင်းတစ်ခုဖြစ်လို့ ဟော်မုန်းမျှတအောင်ကူညီပေးနိုင်ပါတယ်။ Phytoestrogens ကြွယ်ဝတဲ့အစားအစာတွေကတော့ ပဲပိစပ်၊ တို့ဟူး၊ နှမ်းကြတ်စေ့၊ နှမ်း၊ ပဲအမျိုးမျိုးတို့ပဲဖြစ်ပါတယ်။
***ရေအလုံအလောက်သောက်ပါ***
သွေးဆုံးချိန်မှာ အဖြစ်များတဲ့ပြဿနာတစ်ခုက ခြောက်သွေ့ခြင်းပါ။ ဒါက အီစထရိုဂျင်ဟော်မုန်းလျော့နည်းသွားလို့ ဖြစ်နိုင်ပါတယ်။ ဒါကြောင့် တစ်နေ့ကို ရေ ၈ ခွက်ကနေ ၁၂ ခွက်အထိသောက်ပေးပါ။ ထမင်းမစားခင် နာရီဝက်လောက်ကြိုပြီး ရေ 500 ml သောက်ခြင်းကလည်း စားသုံးတဲ့ကယ်လိုရီကို ၁၃ % လျော့နည်းစေနိုင်ပါတယ်။
***အစားမှန်မှန်စားပါ***
သွေးဆုံးချိန်မှာ အစားစားတာမမှန်ရင် ဝေဒနာတွေကပိုဆိုးတတ်ပြီး ကိုယ်အလေးချိန်ထိန်းသိမ်းရလည်း ပိုခက်နိုင်ပါတယ်။ ဒါကြောင့် ဒီကာလမှာ အချိန်မှန်စားဖို့အရေးကြီးပါတယ်။
ပရိုတင်းကြွယ်ဝတဲ့အစားအစာကို စားပါ
အသက်ကြီးလာတာနဲ့အမျှ ကြွက်သားတွေက တဖြည်းဖြည်းဆုံးရှုံးလာတာပါ။ ဒီတော့ ကြွက်သားမဆုံးရှုံးဖို့အတွက်ရော ဗိုက်ပြည့်တင်းတိမ်ပြီး ကယ်လိုရီလောင်ကျွမ်းဖို့အတွက်ပါ ပရိုတင်းကြွယ်ဝတဲ့အစားအစာကို စားသုံးသင့်ပါတယ်။ ပရိုတင်းကြွယ်ဝတဲ့ အသား၊ ငါး၊ ဥအမျိုးမျိုး၊ သစ်အစေ့အဆံ၊ နို့ထွက်ပစ္စည်းတွေက စိတ်ခံစားချက်ကိုကောင်းစေပြီး အိပ်ပျော်အောင်လည်းကူညီပေးပါတယ်။
ကဲ ဒါဆိုရင်တော့ သွေးဆုံးခါနီးမှာဖြစ်တတ်တဲ့ ဝေဒနာတွေ သက်သာပျောက်ကင်းအောင် ဘယ်လိုနေထိုင်စားသောက်ရမလဲဆိုတာသိရှိပြီး လိုက်နာလုပ်ဆောင်နိုင်ကြမယ်လို့ မျှော်လင့်ပါတယ်နော်...
ပြန်လည်မျှဝေခြင်းဖြစ်ပါသည်
ကျန်းမာပျော်ရွှင်ကြပါစေ
#လေးစားစွာဖြင့်မူရင်းရေးသားသူကို
ေးပါတယ် 🙏🙏🙏
#ကျန်းမာရေးဗဟုသုတများ
