07/12/2025
ကျွန်မရဲ့ မှန်တစ်ချပ် (သို့မဟုတ်) အပြင်လောကဆိုတာ ကိုယ့်စိတ်ရဲ့ ရောင်ပြန်ဟပ်မှု
ကျွန်မတို့တွေ ဘဝမှာ ကိုယ့်ကို အမြင်ကပ်စေတဲ့သူ၊ ကိုယ့်ကို ဒေါသထွက်စေတဲ့သူ၊ ဒါမှမဟုတ် ကိုယ့်ကို နာကျင်စေတဲ့သူတွေနဲ့ ကြုံရတိုင်း... ပထမဆုံး ဖြစ်လာတဲ့ စိတ်က "သူ ဘာလို့ ငါ့ကို ဒီလိုလုပ်တာလဲ" ဆိုတဲ့ မေးခွန်းပါပဲ။
ကျွန်မလည်း အရင်က ဒီလိုပဲ တွေးခဲ့ဖူးတယ်။ အထူးသဖြင့် ကိုယ်အဆင်မပြေတဲ့သူ နဲ့ ကြုံတွေ့ခဲ့ရတဲ့ အခြေအနေတွေမှာပေါ့။
Psychology နဲ့ Spiritual path ကို သေချာလေ့လာလိုက်တဲ့အချိန်မှာတော့ ကျွန်မ တော်တော်လေး မှားခဲ့မှန်း သတိထားမိလိုက်တယ်။ ဘာလို့လဲဆိုတော့ "The External World is a Reflection of the Inner World" (အပြင်လောကကြီးက ကိုယ့်အတွင်းစိတ်ရဲ့ ရောင်ပြန်ဟပ်မှု သက်သက်) ဆိုတဲ့ အမှန်တရားကို မျက်ဝါးထင်ထင် တွေ့လိုက်ရလို့ပါပဲ။
🪞 ကိုယ့်ကိုအဆင်မပြေဖြစ်ခဲ့သူ က ကျွန်မကို ဘာသင်ပေးခဲ့လဲ?
သူ နဲ့ ပတ်သက်ပြီး ကျွန်မ ခံစားခဲ့ရတဲ့ (ဒေါသ/ အားမလိုအားမရဖြစ်မှု/ နာကျင်မှု) တွေဟာ တကယ်တော့ သူလုပ်လို့ ဖြစ်ရတာဆိုတာထက်... ကျွန်မရဲ့ အတွင်းစိတ်ထဲမှာ ကုစားဖို့ လိုအပ်နေတဲ့ အစိတ်အပိုင်းတွေကို သူက "မီးမောင်းထိုးပြ" နေတာမျိုးပါ။
ဥပမာ - သူက ကျွန်မကို (ဝေဖန်လိုက်တဲ့အခါ/ တင်းမာတဲ့အခါ/ မကြိုက်တာတွေပြောတဲ့အခါ) ကျွန်မ ဘာလို့ သည်းမခံနိုင်ဖြစ်ရသလဲ။ အဖြေက ရှင်းပါတယ်။ ကျွန်မမှာလဲ သူနဲ့ ချွတ်စွက် တူတဲ့အစိတ်အပိုင်း တစ်ခု ရှိနေပြီးတော့ ကျွန်မရဲ့ မသိစိတ် (Subconscious) ထဲမှာ "ဒီအစိတ်အပိုင်းနဲ့ ပတ်သက်ပြီးလက်မခံနိုင်မှု" သို့မဟုတ် "ငါ မလုံခြုံဘူးဆိုတဲ့ ခံစားချက်" (Insecurity) တွေ ရှိနေလို့ပါပဲ။ အကယ်၍သာ ကျွန်မစိတ်ထဲမှာ အပြည့်အဝ ငြိမ်းချမ်းနေခဲ့ရင်၊ ကိုယ့်တန်ဖိုးကို ကိုယ် အပြည့်အဝ သိနေခဲ့ရင်... သူ ဘာလုပ်လုပ် ကျွန်မ ပြုံးပြုံးလေး နေနိုင်ခဲ့မှာပါ။
သူ့ကို မြင်ရင် စိတ်ထဲက Sensitive ဖြစ်လာတယ်၊ Trigger ဖြစ်လာတယ်ဆိုတာ... ကျွန်မရဲ့ အတွင်း စိတ်ထဲက ဒဏ်ရာဟောင်းတစ်ခုခုကို သူက လာထိသွားလို့ပါပဲ။ အနာမရှိတဲ့ လက်ဝါးနဲ့ အဆိပ်ကို ကိုင်ရင် အဆိပ်မသင့်နိုင်ပါဘူး။ ကျွန်မ နာကျင်တယ်ဆိုကတည်းက ကျွန်မဆီမှာ အနာရှိနေလို့ပါ။
🪞 သူမဟုတ်ဘူး... ကိုယ်ပါပဲ
ဒါက လက်ခံဖို့ အခက်ခဲဆုံး အမှန်တရားပါပဲ။ ကိုယ့်ကို ပေါက်ကရ လာလုပ်နေတာက သူ မဟုတ်ပါဘူး။ ကိုယ့်အတွင်းစိတ်ထဲမှာ ဒီလို Energy မျိုး၊ ဒီလို Vibration မျိုး ရှိနေလို့... အဲဒါနဲ့ ကိုက်ညီတဲ့ အခြေ အနေတစ်ခု (သို့) လူတစ်ယောက် အနေနဲ့ "သူ" ဆိုတဲ့ ပုံရိပ်က ကျွန်မရှေ့ ရောက်လာတာပါ။
ကိုယ့်ရဲ့ Shadow Self (ကိုယ့်ကိုယ်တိုင်တောင် လက်မခံရဲတဲ့ ကိုယ့်ရဲ့ အခြမ်းပဲ့တွေ) ကို သူများဆီမှာ သွားမြင်ပြီး မကြိုက်ဖြစ်နေတာမျိုးလည်း ဖြစ်နိုင်ပါတယ်။ ကိုယ့်စိတ်ထဲမှာ ရှိနေပြီးသား အရာတစ်ခုကိုပဲ ကိုယ်က အပြင်မှာ မြင်ရတာပါ။ ကိုယ့်ထဲမှာ မရှိရင် အပြင်မှာ ဘယ်လိုမှ မမြင်နိုင်ပါဘူး။
🪞 Reflection ကို ဘယ်လိုလက်ခံမလဲ?
ကျွန်မကို sensitive ဖြစ်စေသူ ဟာ ကျွန်မအတွက်တော့ ဆရာကောင်း တစ်ဆူပါပဲ။ သူသာ ဒီလိုတွေ မလုပ်ခဲ့ရင် ကျွန်မရဲ့ အတွင်းစိတ်ထဲက (သည်းမခံနိုင်မှုတွေ/ ဒေါသတွေ/ ကြောက်စိတ်တွေ) ကို ကျွန်မ မြင်ခွင့်ရမှာ မဟုတ်ပါဘူး။
ဆက်ဆံရေးတိုင်းက Reflection တွေပါပဲ။
ကိုယ့်ကို ချစ်ခင်တဲ့သူတွေက ကိုယ့်ရဲ့ "ချစ်ခြင်းမေတ္တာ" ကို ပြန်ဟပ်ပြသလို...
ကိုယ့်ကို ဒုက္ခပေးတယ်လို့ ထင်ရတဲ့သူတွေက ကိုယ့်ရဲ့ "မငြိမ်းချမ်းမှုနဲ့ အားနည်းချက်" တွေကို ပြန်ဟပ်ပြနေတာပါ။
ဒါကြောင့် အခုချိန်မှာတော့ တစ်ဖက်လူကို လက်ညှိုးထိုးမယ့်အစား... "သူ့ရဲ့ ဘယ်အပြုအမူက ငါ့ကို နာကျင်စေတာလဲ?" "အဲဒီနာကျင်မှုက ငါ့ရဲ့ ဘယ်အတိတ်ဒဏ်ရာနဲ့ ဆက်စပ်နေလဲ?" "ငါ့ရဲ့ ဘယ်အစိတ်အပိုင်းက ဒီအခြေအနေကို ဖိတ်ခေါ်လိုက်တာလဲ?" "ငါ ဘာတွေကို လက်မခံနိုင်တာလဲ။?" ဆိုပြီး ကိုယ့်အတွင်းစိတ်ကိုပဲ ပြန်မေးခွန်းထုတ်၊ ပြန်ပြီး ကုစား (Heal)၊ ပြန်လက်ခံနိုင်ဖို့ ကြိုးစားပါတယ်။
ကိုယ့်စိတ်ထဲမှာ အားလုံးကို လက်ခံနိုင်သွားတဲ့နေ့၊ ငြိမ်းချမ်းသွားတဲ့နေ့ကျရင်... မှန်ထဲက ပုံရိပ်တွေလည်း အလိုလို ပြောင်းလဲသွားပါလိမ့်မယ်။ ပြောင်းမသွားခဲ့ရင်တောင် ကိုယ့်ကို မထိခိုက်တော့ပါဘူး။
Reflection သဘောတရားကို နားလည်သွားတဲ့အခါ ဘဝက ပိုပြီး နေပျော်လာတယ်။ ဘယ်သူ့ကိုမှ အပြစ်တင်စရာ မလိုတော့ဘဲ ကိုယ့်စိတ်ကိုပဲ ကိုယ် ပြန်ပြုပြင်ရုံပဲမို့ပါ...။
