08/08/2022
အားလုံးပဲ မင်္ဂလာပါရှင် 👩🏻⚕️
ဆု ဆေးကုခန်း Page မှ ဒီတစ်ပတ် မျှဝေပေးသွားမယ့်
အကြောင်းအရာလေးကတော့ အမျိုးသမီးများ အတွက် အရေးကြီးတဲ့
သားအိမ်ခေါင်းကင်ဆာ အကြောင်းပဲ ဖြစ်ပါတယ်။ ထိုကင်ဆာသည် အမျိုးသမီးများအတွက်
အသံတိတ်လူသတ်သမားလို့တောင် တင်စားကြပါတယ်။
ဖွံ့ဖြိုးပြီး နိုင်ငံများတွင် ကျောင်းနေအရွယ်များမှ စ၍ ကာကွယ်ဆေးထိုးခြင်း၊ အသက်အရွယ်အလိုက်
အသိပညာပေးခြင်း နှင့် စစ်ဆေးခြင်းများ ပြုလုပ်ပြီး စောင့်ရှောက်မှုပေးကြပါတယ်။
သားအိမ်ခေါင်းကင်ဆာ ကို မိန်းကလေးများ အပျိုဖော်ဝင်ချိန်မှ စပြီး သွေးဆုံးပြီးအရွယ် အမျိုးသမီးများ အထိ သတိထားသင့်
ပါတယ်။ ကာကွယ်ဆေးကို ဆန့်ကျင်ဘက်လိင် နှင့် ထိတွေ့ဆက်ဆံမှု မရှိသေးသော မိန်းကလေးငယ်များ/အမျိုးသမီးများ ထိုးနှံခြင်းသည်
အထိရောက်ဆုံးဖြစ်ပါတယ်။ ဆန့်ကျင်ဘက် လိင်အင်္ဂါတွင် ပါရှိသော Human papillomavirus (HPV) ဟုခေါ်သော
Virus သည် သားအိမ်ခေါင်းကင်ဆာ ဖြစ်စေသောကြောင့် ဖြစ်ပါတယ်။
🔍 သားအိမ်ခေါင်းကင်ဆာ ဘယ်လိုလူတွေများ အဖြစ်များသလဲ??
၁. အသက်ငယ်ငယ်တွင် ဆန့်ကျင်ဘက်လိင်နှင့် ထိတွေ့ဆက်ဆံမှု ရှိသော အမျိုးသမီးများ/ အိမ်ထောင်စောစောပြုသော အမျိုးသမီးများ
၂. လိင် ဆက်ဆံဖော်များသော အမျိုးသမီးများ / အိမ်ထောင်ဆက်များသော အမျိုးသမီးများ
၃. ဆေးလိပ်သောက်သော အမျိုးသမီးများ ( ဆေးလိပ်သောက်ခြင်းသည် သားအိမ်ခေါင်းကင်ဆာ ဖြစ်စေသော (HPV) Virus ကို ကိုယ်ခံအားမှ တိုက်ထုတ်မှုကို ယုတ်လျော့စေသည် )
၄. ကိုယ်ခံအားကျဆင်းမှုရောဂါ (ဥပမာ - HIV) ရှိသော အမျိုးသမီးများ / ကာလရှည် ကိုယ်ခံအားချသောဆေးဝါးများ သောက်သုံးနေရသော အမျိုးသမီးများ စသူတို့တွင် အဖြစ်များပါတယ်။
🔍 သားအိမ်ခေါင်းကင်ဆာ၏ အဖြစ်များသည့် ရှေ့ပြေးလက္ခဏာများ
၁. ပုံမှန် မဟုတ်သော မိန်းမကိုယ်မှ သွေးဆင်းခြင်းများ
- လိင်ဆက်ဆံပြီးတိုင်း သွေးဆင်းခြင်း / ဆက်ဆံတိုင်း နာကျင်နေခြင်း
- ရက်ရှည် ဓမ္မတာသွေးပေါ်ခြင်း/ အချိန်မဟုတ် ဓမ္မတာသွေးပေါ်ခြင်း
- သွေးဆုံးပြီးမှ ဓမ္မတာပြန်ပေါ်ခြင်း
၂. မိန်းမကိုယ် မှ အနံ့မကောင်းသည့်သွေး/အရည်များ ဆင်းခြင်း
၃. သိသိသာသာ စားမဝင်ခြင်း/ ကိုယ်အလေးချိန်လျော့ကျလာခြင်း / သွေးအားနည်းလာခြင်း
၄. ရက်ရှည် ဆီးစပ်/ခါး ကိုက်လာခြင်း
၅. ဆီးယိုစိမ့်ခြင်း စသည်တို့ကို သတိထားသင့်ပါတယ်။
🔍 စစ်ဆေးမှု နှင့် ကုသနည်းများ
အဓိကစစ်ဆေးမှုများ အနေဖြင့် သားအိမ်ခေါင်းမှ အကျိအချွဲကို ဓာတ်ခွဲစစ်ဆေးခြင်း (Pap smear)၊
သားအိမ်ခေါင်းကို မှန်ပြောင်းကြည့်ခြင်း (Colposcopy) နှင့် သားအိမ်ခေါင်း အသားစယူခြင်း (Biopsy) တို့ရှိပါတယ်။
အထက်ပါ သင့်တော်သော စစ်ဆေးမှုများမှ ရလဒ်ပေါ် မူတည်၍
- Loop Diathermy / Cold Coagulation
- ခွဲစိတ်ကုသခြင်း၊
- ဓာတ်ရောင်ခြည်ကင်ခြင်း၊
- ကင်ဆာဆေးသွင်းခြင်း စသဖြင့် ကုသမှု အဆင့်ဆင့်ရှိပါတယ်။
အထက်ဖော်ပြပါ လက္ခဏာများ ခံစားနေရခြင်း (သို့မဟုတ်) မိမိကိုယ်ကို သားအိမ်ခေါင်းကင်ဆာမှ ကာကွယ်မှုပြုလုပ်လိုပါက
သက်ဆိုင်ရာအထူးကု ဆရာဝန်ကြီးများ၊ မိသားစု ဆရာဝန်များ နှင့် တိုင်ပင်ဆွေးနွေးရန် အကြံပြုလိုပါတယ်။
