06/02/2022
သွေးအုပ်စုများ အကြောင်း သိကောင်းစရာ
လက်ရှိ ကမ္ဘာပေါ်တွင် သွေးအုပ်စုပေါင်း 36 မျိုးခန့် ကိုရှာတွေ့ထားပြီး ဖြစ်သည့်အနက် သွေးအုပ်စု A,B,O, AB လေးမျိုးမှာ အဓိကလူသိများသော သွေးအုပ်စုကြီးများဖြစ်သည်။
ထိုလေးမျိုး ကိုမှ Rh အုပ်စု နှစ်ခု +/- ပြန်ခွဲသောအခါ အဓိက အုပ်စုကြီး 8 ခုဖြစ်သွားပါသည်။
သွေးအုပ်စုဆိုသည်မှာ လူတယောက်အတွက် အခြေခံကျသော မှတ်တမ်းမှတ်ရာဖြစ်ပါသည်။ ထို့ကြောင့် မှတ်ပုံတင်များ တွင်သွေးအုပ်စုများ ခွဲ၍မှတ်ထားကြခြင်းဖြစ်သည်။
ကိုယ်ဝန်ဆောင်များ၊ ခွဲခန်းဝင် လူနာများတွင်လည်း မစစ် မဖြစ်စစ်ရသော စစ်ဆေးချက်များထဲတွင် အပါအဝင်တခုဖြစ်ပါသည်။ ရှားပါး သွေးအုပ်စု Rh negative လူများအတွက် ဆိုလျှင် ခွဲစိတ်မှု အကြီးစားများတွင် သွေးကြိုဆောင်ထားရန် အရေးကြီးလှပါသည်။
သွေးအုပ်စုဆိုသည် လူတစ်ယောက်၏ အဓိကဝိသေသ (identity) တခုဖြစ်သည့် အတွက်အရေးကြီးသည့် အပြင် တချို့သွေး အုပ်စုများ သည် ရောဂါတချို့နှင့် ဆပ်စပ်နေသည် ကို လေ့လာသူများက တွေ့ရှိခဲ့ပါသည်။
ဥပမာ - O သွေးအုပ်စုများသည် အစာအိမ်ယောင်ရောဂါ၊ A သွေးအုပ်စု များသည် အစာအိမ်ကင်ဆာ ရောဂါ ဖြစ်သူများတွင် ပိုမိုတွေ့ရှိရပါသည်။
တချို့သွေးအုပ်စုများ Duffy (မြန်မာနိုင်ငံတွင်စစ်မရသေး) သည် ငှက်ဖျားရောဂါကို ခုခံကာကွယ်နိုင်စွမ်းရှိကြသည်။
ရှားပါးအုပ်စုများဖြစ်သည့် Rh - လူများသည် ကိုယ်ဝန်ဆောင်ချိန်တွင် ကြိုတင်သိရှိရန် အရေးကြီးပါသည်။ ထိုအုပ်စုများသည် ကလေး မွေးသည့်အချိန်တွင် သေချာစွာ လိုအပ်သောဆေးထိုး ကုသရန် လိုအပ်ပါသည်။ သို့မဟုတ်ပါက နောက်ကိုယ်ဝန်များ တွင် ကလေးကို ထိခိုက် လာနိုင်ပါသည် (ကလေးအသားဝါ၊ သွေးအားနည်း၊နှလုံးကြီး ဖောယောင်၊ ကလေးအသေလေးမွေး)။
သွေးအုပ်စုများသည် အာရှဓလေ့ ထုံးတမ်းအရ လူတစ်ယောက်၏ ကိုယ်ရည်ကိုယ်သွေး၊ ဟန်ပန် အနေအထား၊ အမူအကျင့်များနှင့်လည်း ဆက်စပ်နေသည်ဟု လေ့လာရပါသည်။
