29/04/2025
#လေမဖြတ်အောင်_ကာကွယ်ပါ
#ပါမောက္ခဒေါက်တာဦးအောင်ကြီး
(အတိုင်ပင်ခံရောဂါဗေဒဆရာဝန်ကြီး)
⚕️ ⚕️ ⚕️
လေဖြတ်စေတဲ့ အကြောင်းရင်းခံတွေ ရှိပါတယ်။ ဒါတွေကို ကြိုတင်ရှောင်ရှားနိုင်ရင် လေမဖြတ်အောင် ကာကွယ်ထားနိုင်မှာ ဖြစ်ပါတယ်။
လေဖြတ်အောင် တွန်းအားပေးတဲ့အချက်တွေကို Risk Factors လို့ ခေါ်ပါတယ်။ ဒါတွေကို သိထားဖို့ လိုပါတယ်။ Risk Factor တွေကို အုပ်စုခွဲထားပါတယ်။ ပထမအုပ်စုက Uncontrollable Risk Factor တွေပါ။ ဒီအချက်တွေက ထိန်းချုပ်လို့ မရပါဘူး။ အသက်အရွယ်ကြီးရင့်လာတာ၊ မိသားစုမှာ ရောဂါရာဇဝင်ရှိခဲ့ဖူးတာ၊ ယောကျ်ားဖြစ်နေတာ၊ Migraine ရောဂါဖြစ်ဖူးတာ စတာတွေပါ။
ဒုတိယအုပ်စုက Controllable Risk Factor တွေပါ။ ဒီအုပ်စုက ထိန်းချုပ်လို့ရတဲ့အချက်တွေပါ။ သိထားရင် ဒါတွေကို ကြိုတင်ရှောင်လွှဲနိုင်တယ်။ လေမဖြတ်အောင် ကြိုတင်ကာကွယ်ရာမှာလည်း အသုံးဝင်ပါတယ်။ ဒီအချက်တွေက သွေးတိုးရောဂါ၊ နှလုံးခုန်တာ စည်းချက်ဝါးချက်မမှန်တဲ့ရောဂါ၊ ဆီးချိုရောဂါ၊ သွေးထဲမှာ အဆီဓာတ်များတာ၊ ဆေးလိပ်သောက်တာ၊ အရက်သောက်တာ၊ ပြည့်ဝဆီစားတာ၊ အဝလွန်ရောဂါရှိတာ၊ နှလုံးသွေးကြောကျဉ်းရောဂါအခံရှိနေတာ၊ အမျိုးသမီးတွေမှာ အီစထရိုဂျင်ဓာတ်ပါတဲ့ ဆေးဝါးတွေ သောက်နေတာ စတဲ့ အချက်တွေ ဖြစ်ပါတယ်။
ထိန်းချုပ်လို့ရနိုင်တဲ့အချက်တွေကို တတ်နိုင်သမျှ ထိန်းချုပ်ထားပြီး လေမဖြတ်အောင် အတတ်နိုင်ဆုံး ကြိုတင်ကာကွယ်ထားတာ အကောင်းဆုံးပါပဲ။ ဒါကြောင့် လိုက်နာရမှာတွေက
(၁) သွေးတိုးရှိရင် သေသေချာချာကုပါ။ သွေးပေါင် မကြာခဏချိန်ပါ။ ဆေးမှန်မှန်သောက်ပါ။
(၂) နှလုံးခုန် စည်းချက်ဝါးချက်မမှန်ရင် သတိထားပါ။ သေသေချာချာ ကုသပါ။
(၃) ဆီးချိုရှိရင် ဂရုစိုက်ပါ။ သွေးထဲက သကြားဓာတ်ကို မကြာမကြာ စစ်ဆေးပါ။
(၄) ပြည့်ဝဆီရှောင်ပါ။
(၅) စားအုန်းဆီရှောင်ပါ။
(၆) အချိုမှုန့်ရှောင်ပါ။
(၇) ဆေးလိပ်ဖြတ်ပါ။
(၈) အဝလွန်ရင် ကိုယ်အလေးချိန်လျှော့ချပါ။
(၉) အရက်ဖြတ်ပါ။
(၁၀) လေ့ကျင့်ခန်းမှန်မှန်လုပ်ပါ။ လမ်းမှန်မှန်လျှောက်ပါ။
(၁၁) မသဘာဝဟော်မုန်းပါတဲ့ ဆေးဝါးတွေ မှီဝဲရင် သတိထားပါ။
(၁၂) သစ်သီးဝလံနဲ့ ဟင်းသီးဟင်းရွက် များများစားပါ။
(၁၃) အိပ်ရေး၀၀အိပ်ပါ။
(၁၄) စိတ်ဖိစီးမှုနည်းအောင် နေပါ။
(၁၅) တရားထိုင်ပါ။
(၁၆) အချိန်မှန် ကျန်းမာရေးစစ်ဆေးခြင်း (Regular Medical Check-up လုပ်ပါ။
❤ ဤကဏ္ဍကို “Microlife အဆင့်မြင့်သွေးပေါင်ချိန်တိုင်းကိရိယာ” မှ ကူညီပံ့ပိုးပေးပါသည်။ ❤
