21/12/2022
နေ့စဉ် ပိတ်ရက်မရှိ ဒေါက်တာစိုးသီဟမောင် နှင့်ပြသရန် booking တင်လို့ရပါသည်။
အရေးကြီးလို့ အထပ်ထပ် သတိပေးချင်ပါတယ် …
မြန်မာနိုင်ငံမှာ ဘီပိုးကူးစက်ခံထားရသူတွေရဲ့ ၈၀% လောက်သည် ဘီပိုးရှိသူမိခင်ကနေတဆင့် ကူးစက်ခံခဲ့ရတာ ဖြစ်ပါတယ်။
ကူးစက်ချိန်ကလည်း “ကလေးမီးဖွားနေချိန်” မှာ ကူးစက်တာ ဖြစ်ပါတယ်။
အဲ့လို မွေးတဲ့အချိန်မှာ ဘီပိုးကူးစက်ခံရပါက ကလေးသည် “နာတာရှည် ပိုးသယ်ဆောင်သူ” ဖြစ်ဖို့ ၉၀% လောက် သေချာပါတယ်။
သူ့ဘာသာသူမပျောက်နိုင်တော့ဖို့ များပါတယ်။
🔔🔔🔔 ဒါကြောင့် အရေးအကြီးဆုံးအချက်က မိခင်ကနေ ကလေးဆီကို ဘီပိုး ကူးစက်မသွားဖို့ ဖြစ်ပါတယ်။
မိခင်ကနေကလေးဆီ ဘီပိုးမကူးစက်အောင် ကာကွယ်နိုင်တဲ့ နည်းလမ်းတွေ ရှိပါတယ်။
၁၀၀% မကူးစက်အောင် ကာကွယ်နိုင်ပါတယ်။
ဒါမှသာ အဆိုးသံသရာလည်ခြင်းမှ သက်သာပြီး မိမိရဲ့ နောင်မျိုးဆက်အတွက် ကျန်းမာပြီး ဘီပိုးကင်းသော အမွေ ကောင်းကောင်းကို ပေးနိုင်မှာ ဖြစ်ပါတယ်။
ဒီအကြောင်းကို ကျွန်တော် ခဏ ခဏ ပြောဖူးပါတယ်။
တိုက်တိုက်ဆိုင်ဆိုင်ပဲ ကျွန်တော့ လူနာတယောက်က ဘီပိုးဆေး သောက်နေရင်း နဲ့ ကိုယ်ဝန်ရသွားခဲ့လို့ သားဖွား၊ မီးယပ် အထူးကုဆရာဝန် တဦး နဲ့ သွားပြချိန်မှာ ဘီပိုးဆေးသည် ကိုယ်ဝန်အပေါ်မှာ သက်ရောက်မှုရှိတယ်ဆိုတဲ့ အယူအဆကို ပြောလာလို့ အခုလို အသေးစိတ် ထပ်ရှင်းပြရတာဖြစ်ပါတယ်။
ဒါကြောင့် သေသေချာချာ မှာချင်တာကတော့
၁။ မည်သူမဆို ဘီပိုးရှိ/မရှိ စစ်ဆေးကြပါ။ မရှိရင် ကာကွယ်ဆေးကို အကြိမ်ပြည့်ထိုးထားကြပါ။
၂။ အိမ်ထောင်သည်တွေအနေနဲ့လည်း ဘီပိုး ရှိ/မရှိ စစ်ဆေးကြပါ။ အထူးသဖြင့် မိခင်လောင်းတွေ အနေနဲ့ ကိုယ်ဝန်မဆောင်ခင်ကပင် ဘီပိုး ရှိ/မရှိ စစ်ဆေး သင့်ပါတယ်။
၃။ ဘီပိုးရှိပါက သက်ဆိုင်ရာ ဆရာဝန် နှင့် တိုင်ပင်ဆွေးနွေးပါ။ ဘီပိုးဆိုတာ အရင်တုန်းကလို ရှိသော်လည်း ဒီအတိုင်းထားလို့မရတော့ပါဘူး။ စနစ်တကျ ကုသမှုခံယူရပါမယ်။ ဘီပိုးကြောင့်တော့ ကလေးရခြင်း/မရခြင်းက သက်ဆိုင်မှုမရှိပါဘူး။
၄။ အရင်ကမစစ်ဆေးဖူးပါက ကိုယ်ဝန်ဆောင်မိခင်တိုင်းသည် ကိုယ်ဝန်ရှိသည်ကို သိရှိသည်နှင့် အသည်းရောင် အသားဝါဘီပိုးရှိ/မရှိ စစ်ဆေးသင့်ပါတယ်။ မရှိပါက ဘီပိုးကာကွယ်ဆေးကို အကြိမ်ပြည့်အောင် ထိုးရပါမယ်။ ကိုယ်ဝန်ဆောင်ချိန်မှာ ဘီပိုးကာကွယ်ဆေးထိုးလို့ရပါတယ်။ ကလေးအတွက်ရော၊ ကိုယ်ဝန်အတွက်ပါ ထိခိုက်မှုမရှိပါ။
၅။ အကယ်၍ အရင်က မစစ်ဆေးဖူးဘဲ ကိုယ်ဝန်ဆောင်ချိန်မှ ဘီပိုးရှိမှန်း သိပါက ချက်ခင်း သက်ဆိုင်ရာ ဆရာဝန်နဲ့ ပြသဆွေးနွေးတိုင်ပင်သင့်ပါတယ်။
ကိုယ်ဝန်ဆောင်မိခင်မှာ ဘီပိုးရှိပါက သွေးထဲရှိ ဘီပိုး ပွါးနေခြင်းရှိ/မရှိ နှင့် အသည်းရောင်အသည်းဝါဘီပိုး အကောင်အရေအတွက် တို့အပြင် အသည်းအခြေအနေတွေကို စစ်ဆေးရန် သက်ဆိုင်ရာ ဆရာဝန်က ညွှန်ကြားပါလိမ့်မယ်။
အရင်ကပင် ဘီပိုးဆေးသောက်နေရသူ ကိုယ်ဝန်ဆောင် မိခင်တွေ အနေနဲ့ ကုသမှုခံယူနေရင်း ကိုယ်ဝန်ရသွားသော်လည်း စိတ်မပူပါနဲ့။ ဘီပိုးကို ကုသပေးနေတဲ့ သက်ဆိုင်ရာ ဆရာဝန် နဲ့ ချက်ချင်းပြန်ပြပါ။ လိုအပ်တဲ့ ညွှန်ကြားမှုတွေ အပြင် ဆေး ဆက်သောက်ဖို့ လို/မလို တွေကို ပြောပါလိမ့်မယ်။
(ပုံမှန်အားဖြင့် ဘီပိုးသေဆေးအများစုကို ဆေးမရပ်ဘဲ ဆက်သောက်ဖို့ ပြောပါလိမ့်မယ်။ အချို့သော ဘီပိုးသေဆေးကတော့ ကိုယ်ဝန်ဆောင်ချိန်မှာ ရပ်ပြီး ကိုယ်ဝန်ကို မထိခိုက်စေတဲ့ဆေးမျိုးကို ပြောင်းပေးရတာ ရှိပါတယ်။ အသေးစိတ်ကို မိမိရဲ့ သက်ဆိုင်ရာ ဆရာဝန် နဲ့ တိုင်ပင်ပါ။)
ကိုယ်ဝန်ရပြီးမှ ဘီပိုးရှိမှန်း သိတဲ့ မိခင်များအတွက်ကတော့ …
၁။ ကိုယ်ဝန် ၇ လ (၂၈ ပတ်) မှစ၍ မိခင်သည် သက်ဆိုင်ရာ ဆရာဝန်၏ ညွှန်ကြားချက်ဖြင့် “ဘီပိုးသေဆေး” သောက်ရပါမယ်။ ဘီပိုးသေဆေးကြောင့်ကလေးကို ထိခိုက်မှု လုံးဝ (လုံးဝ) မရှိပါ။ မိခင်ရော ကလေးအတွက်ပါ စိတ်ချရတဲ့ ဘီပိုးသေဆေးတွေ ရှိပါတယ်။
၂။မွေးဖွားပြီး (၃) လအထိ “ဘီပိုးသေဆေး” ကို သောက်ရပါမယ်။ ဆက်ပြီး သောက်သင့်/မသောက်သင့်ကို သက်ဆိုင်ရာ ဆရာဝန်က ပြန်လည် ညွှန်ကြားပါလိမ့်မယ်။
၃။ ကလေးမွေးမွေးပြီးချင်း (၁၂) နာရီအတွင်း
- ဘီပိုးကာကွယ်ဆေး (HBV vaccine) နှင့်
- အဆင်သင့်ထုတ်ထားသော “ဘီပိုးကိုယ်ခံအား”ဆေး (Hepatitis B Immunoglobulin) တို့ကို ပေါင် တဖက်စီတွင်ထိုးရပါမယ်။
အထက်ပါအချက်အားလုံး လိုက်နာပါက မိခင်မှ တစ်ဆင့် ကလေးထံသို့ အသည်းရောင်အသားဝါ ဘီပိုးကူးစက်မှုကို ၁၀၀% ကာကွယ်ပေးနိုင်မည် ဖြစ်ပါတယ်။
ကိုယ်ဝန်ဆောင်နေချိန်မှာ ဆေးမသောက်ဘဲ ကလေးမွေးပြီး “ဘီပိုးကိုယ်ခံအား” ဆေး နဲ့ ဘီပိုးကာကွယ်ဆေးတို့ကို ထိုးမယ်ဆိုရင်ရော ကူးစက်နိုင်သေးလား? လို့ မေးတဲ့သူတွေ ရှိပါတယ်။
သိထားသင့်တာက ကလေးမွေးဖွားချိန်တွင် မိခင်သွေးထဲတွင် အသည်းရောင် အသားဝါဘီပိုး အကောင်အရေအတွက် (HBV DNA - Quantitative Viral Load) နည်းနိုင်သမျှ အနည်းဆုံးဖြစ်နေသင့်တာပါ။
ဒါကလည်း လူနာ တဦး နဲ့ တဦး ပိုးရဲ့ သဘာဝတွေ မတူနိုင်ပါဘူး။
ဒါကြောင့် မိခင်ကနေ ကလေးဆီကို မကူးဖို့ ၁၀၀% သေချာချင်ရင် အပေါ်ကပေါ်ခဲ့တဲ့ အချက် (၃) ချက်လုံး လုပ်ဆောင်ဖို့ လိုအပ်ပါတယ်။
ဆိုလိုတာက … ကိုယ်ဝန်ဆောင်နေချိန်မှာ ဘီပိုးသေဆေးမသောက်ဘဲ ကလေးမွေးပြီး “ဘီပိုးကိုယ်ခံအား” ဆေး နဲ့ ဘီပိုးကာကွယ်ဆေးတို့ကို ထိုးမယ်ဆိုရင် လုံးဝ မကူးစက်ဘူးလို့ အာမ မခံနိုင်ကြောင်းပါ …
နောက်ထပ်မေးစရာရှိတာက ဘယ်လိုမွေးရမလဲ?
ပုံမှန်မိခင်များကဲ့သို့ပင် မွေးဖွားနိုင်ပါတယ်။ မိခင်မှတဆင့် ကလေးထံသို့ ဘီပိုး မကူးစက်စေလိုသော ရည်ရွယ်ချက်ဖြင့် "ခွဲမွေး" ရန်မလိုအပ်ပါ။ "ခွဲမွေး"ရန် မဖြစ်မနေလိုအပ်သော အခြေအနေမှလွဲပြီး "ရိုးရိုးမွေး" ရန်သာ တိုက်တွန်းပါတယ်။ ကလေးကို ခွဲမွေးလိုက်ခြင်းဖြင့် ဘီပိုးကူးစက်နိုင်ချေကို လျော့နည်းမသွားစေနိုင်ပါ။ အပေါ်မှာပြောခဲ့တဲ့ မိခင်မှ ကလေးကို ဘီပိုးမကူးစက်စေရေး လုပ်သင့်သည်များကိုသာ လိုက်နာဆောင်ရွက်သင့်ပါတယ်။
ကဲ နောက်ဆုံးကတော့ … အသည်းရောင်အသားဝါ ဘီပိုးရှိသော မိခင်အနေဖြင့် ကလေးကို မိခင်နို့တိုက်သင့်ပါသလားတဲ့ …
မိခင်နို့တိုက်ရန် အပြည့်အဝတိုက်တွန်းပါတယ်။ ကမ္ဘာ့ကျန်းမာရေးအဖွဲ့ကြီး နှင့် ယူနီဆက် တို့ကလည်း ကလေး ၆ လ အရွယ်အထိ မိခင်နို့တစ်မျိုးတည်းကို တိုက်သင့်ကြောင်း တိုက်တွန်းပါတယ်။ မိခင်၏နို့သီးခေါင်းတွင် သွေးထွက်နေခြင်း၊ ကွဲနေခြင်းတို့ ဖြစ်မနေရန်ကိုတော့ သတိပြုရပါမယ်။
- မိခင်က ဘီပိုးသေဆေးသောက်ထားခြင်း၊
- ကလေးမွေးပြီး ၁၂ နာရီအတွင်း “ဘီပိုးကိုယ်ခံအား” ဆေး နဲ့ ဘီပိုးကာကွယ်ဆေးတို့ကို ထိုးခြင်းတို့ ပြုလုပ်ပါက ကူးစက်နိုင်မှုကို ၉၉-၁၀၀ ရာခိုင်နှုန်း ကာကွယ်နိုင်ပြီဖြစ်လို့ မိခင်နို့တိုက်ခြင်းဖြင့် မကူးစက်နိုင်ပါ။
ဒါ့အပြင် မြန်မာနိုင်ငံမှာဆိုရင် ဘီပိုးကာကွယ်ဆေးကို ကလေး အသက် (၂) လ၊ (၄) လ နဲ့ (၆) လတို့အပြင် အသက် ၁နှစ်ခွဲမှာရော စသဖြင့် အကြိမ်ပြည့် ထိုးပေးဖို့လိုအပ်ပါတယ်။
“အသည်းရောင် အသားဝါ ရောဂါကင်းစင်သော အနာဂတ်ဆီသို့ … မိခင်များကိုယ်တိုင် ပူးပေါင်းပါဝင်ပေးကြစို့”
ဒါကြောင့် ဘီပိုးရှိသူ ကိုယ်ဝန်ဆောင် မိခင်လောင်းတွေ အနေနဲ့ အခုလို သေချာသိထားဖို့ရာ မျှဝေပေးလိုက်ရပါတယ်။
*** ဖတ်ရှုပြီးလို့ အသိတစ်စုံတစ်ရာ ရခဲ့ရင် တခြားမိမိ သူငယ်ချင်း/ မိတ်ဆွေ များလည်း သိရအောင် Share လုပ်ပေးနိုင်ပါတယ်။
ကျွန်တော် ဒေါက်တာစိုးသီဟမောင်က ကျန်းမာရေးဆိုင်ရာ ဗဟုသုတများကို ဖြန့်ဝေပေးနေခြင်း ဖြစ်ပါတယ်။
