12/10/2025
"ပိုကျန်းမာဖို့၊ ပိုလှဖို့ သွားကြွေလွှာကပ်ခြင်း - Veneers "
သွားကြွေလွှာကပ်တယ်လို့ပြောလိုက်တာနဲ့ နာမည်ကြီးအလှမယ်တွေရဲ့ သွားဖြူဖြူဖွေးဖွေးလေးတွေကို တန်းမြင်ကြမယ်လို့ထင်ပါတယ် ။ သွားကြွေလွှာကပ်တာကို အင်္ဂလိပ်လို Veneers လို့ခေါ်ကြပြီးတော့ သွားအလှအပကုသမှုတစ်ခုအဖြစ် ရင်းနှီးနေကြမှာဖြစ်ပါတယ် ။ ဒါပေမယ့် Veneer တွေကို အလှအပကုသမှုဆိုတာမျိုးမဟုတ်ပဲ ကျန်းမာရေးရှု့ထောင့်ကနေ ကြည့်တဲ့အခါ ကောင်းမွန်တဲ့အချက်တွေ အများကြီးရှိနေတာကိုလည်း မျှဝေပေးချင်မိပါတယ် ။
📌 Veneers ဆိုတာဘာလဲ?
သွားကြွေလွှာကပ်တယ်ဆိုတဲ့အတိုင်းပဲ ကျွန်တော်တို့သွားမျက်နှာပြင်မှာ ကြွေလွှာလေးတွေကို ကပ်ခြင်း၊ အစားထိုးခြင်းပဲဖြစ်ပါတယ် ။
Veneer မှာ ယေဘုယျအားဖြင့် (၂)မျိုးရှိတယ် ။
ပထမတစ်မျိုးက Veneer ကို လူနာရဲ့မျက်နှာနဲ့လိုက်ဖက်အောင် ဒီဇိုင်းသေသေချာချာဆွဲ၊ ပုံစံတွေသေသေချာချာယူပြီး သွားကြွေလွှာပြုလုပ်တဲ့သွားတုပညာရှင်တွေက ဓာတ်ခွဲခန်းမှာ ပြုလုပ်ပေးတဲ့ Veneer ။ ဒါကို Indirect Veneer လို့ခေါ်ပါတယ် ။
ဒုတိယတစ်မျိုးကျတော့ Veneer ဒီဇိုင်းကို ဆရာဝန်က လူနာပေါ်မှာ တထိုင်တည်းဆွဲပြီး တစ်ထိုင်တည်း နာရီပိုင်းအတွင်း ကြွေလွှာကပ်ပေးတဲ့ Veneer ။ ဒါကိုကျတော့ Direct Veneer လို့ ခေါ်ပါတယ် ။
ဒုတိယအမျိုးအစားဖြစ်တဲ့ Direct Veneer သည် အချိန်ကုန်သက်သာပြီး ကုန်ကျစရိတ်ပိုသက်သာပါတယ် ။
ပထမအမျိုးအစား Indirect Veneer ကျတော့ လုပ်ရတာ ပိုလက်ဝင်သလို ပိုမိုကောင်းမွန်၍ ပြီးပြည်စုံအောင်လှပလွန်းသော ရလဒ်ကို ရရှိမှာဖြစ်ပါတယ်။ ခိုင်ခန့်မှု၊ ရေရှည်ခံနိုင်ရည်ရှိမှုကလည်း ပိုမိုအားကောင်းပါတယ် ။
📌 ဘယ်လိုလူတွေက Veneer ကပ်သင့်သလဲ?
- ကျိုးပဲ့၊ ကွဲအက်နေသောသွားများ ။
- သွားဖြူစေတဲ့ကုသမှုများလုပ်လို့မရတော့တဲ့အထိ ဝါနေသော၊ ညိုနေသော၊ မဲနေသော သွားများ ။
- သွားကြွေလွှာမျက်နှာပြင် မလှသောသွားများ ။
- ပုံသဏ္ဏန်မမှန်သောသွားများ ။ ဥပမာ သေးလွန်းသောသွား၊ ချွန်နေသောသွားများ ။
- ကျဲနေသောသွားများ ။
- ပိုးစားနေသော ရှေ့သွားများ ။
- မိမိသွားကို သာမာန်ထက်ထူးကဲ၍ လှပချင်သူများ ။
📌 Veneer ကပ်တဲ့အခါ သွားအစစ်ရဲ့ကြွေလွှာတွေကို အများကြီး ခွာပစ်ရန်လိုသလား?
သွားကြွေလွှာလို့ ပြောထားတဲ့အတိုင်း အလွှာလေးတွေပဲ ကပ်ကြတာမို့ ကြွေလွှာအစစ်တွေကို ဖယ်တဲ့အခါ (0.3mm / 0.7mm မှ 1mm) ခန့်သာ များသောအားဖြင့် ဖယ်ကြပါတယ် ။
Veneer ကပ်မည့်သူရဲ့ သွားအရောင်က အခြေအနေတော်တော်ဆိုးပြီး အပြင်ကိုထင်ဟပ်နေနိုင်တဲ့အခြေအနေမျိုးတွေမှာတော့ သွားကြွေလွှာများကို ပို၍ ဖယ်ရှားရတာမျိုးလည်း ရှိနိုင်ပါတယ် ။
Direct Venner မှာတော့ သွားကြွေလွှာတွေကို စားပစ်ခြင်းမျိုး လုပ်လေ့မရှိပါဘူး ။
တချို့ Indirect Veneer တွေမှာဆိုရင်လည်း နဂိုကြွေလွှာအစစ်များကို စားပစ်ခြင်းမရှိပဲ ကုသမှုလုပ်ရနိုင်ပါတယ် ။
📌 Veneer တွေက ကျန်းမာရေးအတွက် ဘယ်လိုကောင်းကျိုးပြုနေသလဲ?
ဒီနေရာမှာတော့ သွားအစွပ်တွေနဲ့ ယှဥ်ပြီးပြောပြရမှာပါ ။ သွားအစွပ် - Dental Crown တွေဟာ သွားတစ်ချောင်းလုံးကို စွပ်ထားတာပါ ။ သွားပတ်ပတ်လည်ကို သေးသေးလေးဖြစ်အောင်စားပြီး အစွပ်ငုံလိုက်တဲ့သဘောပါ။
သွားကြွေလွှာကပ်ခြင်း - Veneer ကျတော့ သွားအရှေ့မျက်နှာပြင်မှာပဲ ကြွေလွှာကိုကပ်ထားတာပါ ။
ဒါကြောင့် သွားကျိုးပဲ့ကွဲအက်နေတာမျိုး၊ သွားပိုးစားတာမျိုး၊ သွားအရောင်မလှတာမျိုး စတဲ့အခြေအနေတွေမှာ သွားအစွပ်တွေလုပ်မယ့်အစား Veneer တွေကိုလုပ်ခြင်းအားဖြင့် လူနာရဲ့သွားအစစ်တွေကို အစားခံရတာ သက်သာစေပြီး နဂိုသွားများရဲ့ ကျန်းမာခိုင်ခန့်မှုကို ထိန်းသိမ်းပေးနိုင်မှာဖြစ်ပါတယ် ။
ရလဒ်ပိုင်းမှာလည်း သွားအစွပ်များထက် ပို၍သဘာဝကျနေတာကို တွေ့ရမှာဖြစ်ပါတယ် ။
အခုနောက်ပိုင်းသွားကုသမှုတွေဟာ လူနာဘက်ကို မထိခိုက်စေတဲ့ကုသမှုတွေဖြစ်လာလေလေ၊ ကုသမှုဟာ အသေးစိတ်လေ၊ ကုန်ကျစရိတ်ပိုကုန်ကျလေပဲဖြစ်ပါတယ် ။ ဒါကြောင့် Veneer က သွားအစွပ်ထက် ကုန်ကျစရိတ်များနေမှာဖြစ်ပါတယ် ။
ဒီနေ့ ကျွန်တော်မျှဝေပေးခဲ့တာကတော့ Veneer တွေကို ကောင်းမွန်တဲ့ ကျန်းမာရေးရူ့ထောင့်ကနေ မျှဝေပေးခဲ့တာဖြစ်ပါတယ် ။
လူတွေထင်နေကြတာက Veneer ဆိုရင် သွားအစစ်တွေကို စားထုတ်ပစ်ပြီး ကြွေလွှာလှလှတွေ ကပ်လိုက်တယ်ဆိုတာလောက်မှာပဲ လမ်းဆုံးနေတာပေါ့လေ ။
Venner ဟာ ကျန်းမာရေးကုသမှုအနေနဲ့လည်းအရေးပါပြီး လူသိန်းပေါင်းများစွာကို ပြီးပြည့်စုံတဲ့အပြုံးတွေရအောင် ကူညီပေးနေတဲ့ သွားအလှအပကုသမှုတစ်ခုဖြစ်ပါတယ်။
ချစ်ခြင်းဖြင့်သာ မျှဝေပါသည် ။
ဒေါက်တာမျိုးမြင့်အောင် .................................................................................
Braces & Faces Aesthetic Dental Care
🏩 Room 303, Building 3, Hotel Yangon, 8 mile, Yangon.
☎ 09256027897 , 09940008510 , 09785048510
📧 bracesandfacesaesthetic@gmail.com
