17/01/2023
ဝမ်းချုပ်ခြင်း ပြဿနာ
သင့်ကိုယ်သင် ဝမ်းချုပ်နေပြီလို့ ခံစားနေရပါပြီလား...
အဲဒါဆို သင်တစ်ယောက်တည်း မဟုတ်ပါဘူး...
အသက်အရွယ်မရွေး ဝမ်းချုပ်တတ်ပါတယ်။ဝမ်းချုပ်ခြင်းက ကမ္ဘာတစ်ဝန်း အဖြစ်များတဲ့ အခြေအနေတစ်ခုပါ။ ဒီနေရာမှာ 'ရောဂါ'လို့ မသုံးပဲ 'အခြေအနေ' လို့သုံးလိုက်ရတာက ဝမ်းချုပ်ခြင်းက နေထိုင်စားသောက်မှုပုံစံမမှန်မှုကြောင့် အဖြစ်များတတ်လို့ပါ။ တချို့ရောဂါတွေကြောင့်လည်း ဖြစ်တတ်ပေမယ့် ဒီဆောင်းပါးမှာ အဓိကဆွေးနွေးပေးမှာက ရောဂါကြောင့် မဟုတ်တဲ့ ဝမ်းချုပ်ခြင်းသက်သာအောင် အဓိကပြောပြပေးမှာဖြစ်လို့ပါ။
🧐သင် ဝမ်းချုပ်နေပြီဆို ဘယ်လိုလက္ခဏာတွေခံစားရမလဲ?
▶️ တစ်ပတ်အတွင်း ဝမ်းသွားချိန် သုံးခါအောက်သာရှိခြင်း
▶️ဝမ်း အလွန်အမင်း မာခြင်း
▶️ဝမ်းသွားရန် ပုံမှန်ထက်ပို၍ ညှစ်ပြီးမှသွားရခြင်း
▶️စမြင်းတုံးခံနေခြင်း
❓ဘာကြောင့် ဝမ်းချုပ်ရသလဲ?
ပါးစပ်ကနေ စားလိုက်တဲ့ အစားအစာတွေကို ဝမ်းအဖြစ် ခန္ဓာကိုယ်အပြင်သို့စွန့်ထုတ်ရပါတယ်။ အဲဒီဖြစ်စဉ်အရ အူတွေထဲမှာ အစာတွေလှုပ်ရှားမှု အားနည်းရာမှ အစာထဲကရေတွေအများကြီးစုက်ယူခံလိုက်ရပြီး ခြောက်သွေ့တဲ့ အပြင်ကိုလွယ်လွယ်မထွက်တော့တဲ့ ဝမ်းမာမာတွေဖြစ်လာပါတယ်။
အဓိကအားဖြင့်
▶️ အမျှင်ဓာတ်ပါတဲ့ အစာတွေ အစားနည်းခြင်း
▶️ရေသောက်နည်းခြင်း
▶️ကိုယ်လက်လှုပ်ရှားမှု နည်းပါးခြင်း
▶️စိတ်ဖိစီးမှုများခြင်း
▶️ဝမ်းသွားခြင်းကို မကြာခဏအောင့်ထားတတ်ခြင်း စတဲ့အပြုအမူတွေကြောင့်ဖြစ်ပါတယ်။
၃လနှင့်အထက်ကာလရှည်ကြာဝမ်းချုပ်လာပြီဆိုရင်တော့ အောက်ပါရောဂါတွေကို သတိထားသင့်ပါတယ်
❗လည်ပင်းကြီးရောဂါ၊ ဆီးချိုရောဂါ
❗အူမကြီးကင်ဆာ
❗အခြားအူမကြီးရောဂါများ
❗လေဖြတ်ခြင်း
❗အူပ်ိတ်ခြင်း၊ အူခေါက်ခြင်း
🔆ဝမ်းနှုတ်ဆေး/ ဝမ်းပျော့ဆေးတွေသောက်တာထက် နေ့စဉ်နေထိုင်လှုပ်ရှားမှု Lifestyle ပြောင်းလဲမှုများ လုပ်ဆောင်ပေးခြင်းဖြင့် အချိန်ကုန် ငွေကုန်သက်သာပြီး ဆေးတွေရဲ့ ဆိုးကျိုးတွေကနေ ရှောင်ရှားနိုင်ပါတယ်
💡ဝမ်းချုပ်တာ သက်သာအောင် နေ့စဉ်ဘဝမှာ ဘာတွေလုပ်ဆောင်သင့်လဲ❓
▶️တစ်နေ့ကို အနည်းဆုံး ရေနှစ်လီတာသောက်ရပါမယ်။
▶️ကဖင်းဓာတ်ပါသော အရည်များ နှင့် အရက်အလွန်အကျွံသောက်ခြင်းကိုရှောင်ရှားရပါမယ်။
▶️ အမျှင်ဓာတ်ပါသောဟင်းသီးဟင်းရွက်၊ အသီးအနှံများများစားခြင်း၊အစေ့အဆန်များစားသုံးခြင်း (အခွံမခွာထားသောပန်းသီး၊ လိမ္မော်သီးအသားပေါ်က အမျှင်လေးများ၊ သင်္ဘောသီး၊ ဌက်ပျောသီး စသဖြင့်စားသုံးပေးနိုင်ပါတယ်။ ဒိန်ချဉ်ကလည်း ဝမ်းမှန်စေဖို့ သဘာဝကပေးတဲ့ ဆေးတစ်ခွက်ပါ) အဆီဓာတ်များသော အသား နဲ့ cheese များလျှော့စားရပါမယ်။
▶️ပေါ့ပေါ့ပါးပါး လေ့ကျင့်ခန်းများလုပ်ဆောင်ခြင်း
▶️ဝမ်းသွားချင်စိတ်ကို မကြာခဏအော့င်ပစ်ခြင်းမှ ရှောင်ရှားရပါမယ်။
အထက်ပါနည်းလမ်းတွေနဲ့မှ အဆင်မပြေဘူးဆိုရင်တော့ တတ်ကျွမ်းနားလည်သူနဲ့ တိုင်ပင်ပြီးမှ ဝမ်းပျော့ဆေး/ဝမ်းနှုတ်ဆေးများ သောက်သုံးသင့်ပါတယ်။
မှီငြမ်း
Constipation (Mayo Clinic, Cleveland Clinic)
photo credit iStock photos
