29/04/2023
❝ အိပ်နေရင်းနဲ့ ဟောက်လွန်းတဲ့အခါ ❞
" အိပ်ပြီဆို သူကအရမ်းဟောက်တာ...ဘေးလူ နားမခံနိုင်ဘူး... "
ဒီလိုကိစ္စမျိုးကို မိတ်ဆွေတို့ကိုယ်တိုင် (သို့) ပတ်ဝန်းကျင်မှာ ကြုံဖူးလိမ့်မယ်ထင်ပါတယ်။ အခုလို အိပ်ရင် အရမ်းဟောက်တဲ့ရောဂါကို Obstructive Sleep Apnea (OSA) လို့ခေါ်ပါတယ်။ ဒီနေ့တော့ လုမ္ဗိနီရဲ့မိတ်ဆွေတို့ ဗဟုသုတရစေဖို့ ဒီရောဂါအကြောင်းကို ပြောပြချင်ပါတယ်။
🔶 ဘာလို့ OSA လို့ခေါ်ရတာလဲ။
အိပ်စက်တဲ့အခါ လည်ချောင်းကြွက်သားတွေ ပျော့တွဲကျလာပြီး လေပြွန်ကျဉ်းသွားတာကြောင့် နှာခေါင်းကနေတဆင့် အဆုတ်ထဲကို လေဝင်တဲ့ ပမာဏ နည်းသွားပါတယ်။ အဲဒီအချိန်မှာ ဟောက်သံ (Snorting) စထွက်လာပါတယ်။ ဒီလိုလေဝင်နည်းတော့ ကာဗွန်ဒိုင်အောက်ဆိုဒ်ပမာဏ ပိုမိုများပြားလာပြီး ဦးနှောက်ကိုသတိပေးလိုက်တဲ့အခါ ကြွက်သားတွေ ရုတ်တရက် ပြန်တောင့်တင်းသွားပြီးတော့ လေပြွန်ပြန်ပွင့်တာကြောင့် ဟောက်သံရပ်သွားတတ်ပါတယ်။ တချို့သူတွေမှာ လန့်နိုးတတ်ပါတယ်။
အခုလိုမျိုး အိပ်နေရင်း လေပြွန် ပိတ်/ပွင့်တစ်လှည့်စီဖြစ်တဲ့ ရောဂါကို Obstructive Sleep Apnea (OSA) လို့ ခေါ်တာပါ။
🔶 ဘယ်လိုလူတွေမှာ OSA ပိုဖြစ်တတ်လဲ။
☑️ အသက်အရွယ်ကြီးသူ
☑️ အဝလွန်သူ
☑️ ဆီးချိုသွေးချို ရောဂါရှိသူ
☑️ သွေးတိုးရောဂါရှိသူ
☑️ မိသားစုထဲတွင် OSA မျိုးရိုးရှိသူ
☑️ ဆေးလိပ်သောက်သူ
☑️ ပန်းနာရင်ကြပ်နဲ့ အသက်ရှုလမ်းကြောင်းရောဂါအခံရှိသူတွေမှာ ဒီရောဂါဖြစ်လေ့ရှိသလို ထူးထူးခြားခြားအနေနဲ့
အမျိုးသားတွေက အမျိုးသမီးတွေထက် OSA ဖြစ်နှုန်း ၃ဆလောက် ပိုများတယ်လို့ သုတေသနတွေအရ သတ်မှတ်ထားပါတယ်။
🔶 OSA ကြောင့် တခြားဘာပြဿနာတွေကြုံရနိုင်လဲ။
ညဘက်အိပ်ရင်း ဟောက်တာကနေ လန့်လန့်နိုးတာကြောင့် အိပ်မပျော်တာများလာတဲ့အခါ
❗ နေ့ခင်းဘက် အမြဲအိပ်ငိုက်ခြင်း
❗ မနက်ခင်းခေါင်းကိုက်၊ စိတ်မကြည်၊ မူးမော်ခြင်း
❗ စိတ်ဓာတ်ကျခြင်း၊ စိတ်တိုလွယ်ခြင်း
❗ ဆီးချို၊ သွေးချိုနှင့် သွေးတိုးရောဂါအခံရှိသူများ ရောဂါတိုးလာခြင်း
❗ အိမ်ထောင်ရေးသုခ မပြည့်ဝခြင်းတို့လို ပြဿနာတွေ ဖြစ်လာနိုင်ပါတယ်။
🔶 ဒါဆို OSA ကို ဘယ်လိုကုလို့ရနိုင်မလဲ။
1️⃣ ကိုယ်အလေးချိန်လျှော့ပါ။
2️⃣ စိတ်ဖိစီးမှုလျှော့ပါ။
3️⃣ ဆေးလိပ်နှင့် အရက်ကိုရှောင်ပါ။
4️⃣ ပက်လက်အိပ်သည့်အလေ့အကျင့်ကိုဖျောက်ပြီး ဘေးစောင်းအိပ်စေခြင်းက OSA ကို သက်သာစေပါတယ်။
5️⃣ နောက်ဆုံးတစ်ချက်ကတော့ ညအိပ်တော့မယ်ဆို လေပြွန်တွင်းဖိအားတိုးစက်ကိရိယာ (CPAP)တပ်ပြီး အိပ်စက်ခြင်းက OSA လူနာများအတွက် အကျိုးထူးစေတယ်လို့ ကုသချက်မှတ်တမ်းတွေအရ သိရပါတယ်။
ဒါကြောင့် အရမ်းဟောက်တတ်သူ၊ ဟောက်နေရင်းအသက်ရှုရပ်ပြီးလန့်နိုးတတ်သူ၊ OSAကြောင့် နိစ္စဓူဝကိစ္စတွေမှာ ခက်ခဲလာရပြီဆိုရင်တော့ အမြန်ဆုံး တတ်ကျွမ်းနားလည်တဲ့ဆရာဝန်နဲ့ပြသဖို့ တိုက်တွန်းပါရစေရှင်။
⚕️ 𝙇𝙪𝙢𝙗𝙞𝙣𝙞 ... 𝙇𝙚𝙖𝙙𝙞𝙣𝙜 𝙔𝙤𝙪 𝙏𝙤 𝘽𝙚𝙩𝙩𝙚𝙧 𝙃𝙚𝙖𝙡𝙩𝙝 ⚕️
