12/01/2023
၃ ခေါက်ဖတ် စာဖတ်နည်း
---------
ကိုယ်တိုင် စာဖတ်ရင်း အကျိုးများများ ထွက်ဖို့အတွက် သုံးလေ့ရှိတဲ့နည်းလမ်း တချို့ကို ပြောပြချင်ပါတယ်။
“စိတ်ကူးတွေရဖို့အတွက်ဆိုရင် စာအုပ်ဖတ်ပါ။
ကိုယ့်စိတ်ကူးတွေကို ရှင်းလင်းသွားဖို့အတွက်ဆိုရင် ချရေးပါ။
စိတ်ကူးတွေ လက်တွေ့အကောင်အထည်ဖော်လာဖို့အတွက် တစ်ဆင့်ချင်း အစီအစဥ်ဆွဲပါ။ ရလဒ်ထွက်ဖို့အတွက်ဆိုရင် ပန်းတိုင်လေးတွေ သတ်မှတ်ပြီး စတင်လုပ်ဆောင်ပါ။” လို့ ဆိုပါတယ်။
“၃ ခေါက်ဖတ်” စာဖတ်နည်း မပြောခင်မှာ သိထား၊ သတိထားသင့်တဲ့အချက်လေးတွေ ရှိပါတယ်။
ဘာကြောင့် ဖတ်မှာလဲ။
စာဖတ်တဲ့အခါမှာ အဓိက အကြောင်းအရင်း နှစ်ခုဘဲ ရှိတယ်လို့ ဆိုနိုင်ပါတယ်။ စိတ်အပန်းဖြေဖို့ နဲ့ လိုအပ်ချက်တစ်ခုကို ဖြည့်ဆည်းနိုင်မယ့် အသိပညာတိုးဖို့ ရည်ရွယ်ချက်။ စိတ်အပန်းဖြေဖို့အတွက် ရသစာပေတွေကို ဖတ်ကြတယ်။ အသိပညာအတွက် သုတ စာပေတွေဖတ်ကြပါတယ်။ သုတ ဦးစားပေးဆိုပေမယ့် ရသနဲ့ တွဲရေးတာမျိုးတွေရှိတတ်သလို၊ ရသဆိုပေမယ့်လဲ သုတ သဘောပါတဲ့စာအုပ်တွေလဲရှိပါတယ်။
အရင်ဆုံးကိုယ်တိုင် ရှင်းလင်းရမှာကတော့ စိတ်အပန်းဖြေဖို့လား။ အသိပညာအတွက်လားဆိုတာ အရင်ရှင်းလင်းအောင် လုပ်သင့်ပါတယ်။
ဘာစာအုပ်တွေ ဖတ်ရမလဲ။
စာများများဖတ်တာကောင်းတယ် လို့ ယေဘုယျအားဖြင့် ပြောနိုင်ပါတယ်။ ဒါပေမယ့် ကျွန်တော်တို့မှာ အချိန်တွေအများကြီးမရှိဘူး။ ဒီတော့ စာအုပ်ရွေးသင့်တယ်။ အထူးသဖြင့် သုတနဲ့ ပတ်သက်ပြီးတော့ ဖတ်တဲ့အခါမှာ ကိုယ်နဲ့ တကယ်ကိုက်ညီတဲ့ စာအုပ်၊ ကိုယ့်လိုအပ်ချက်ကို ဖြည့်ဆည်းနိုင်မယ့်စာအုပ်တွေ ဖြစ်ဖို့လိုပါတယ်။ စာအုပ်သေချာရွေးပါ။
ဘယ်နှစ်အုပ် ဖတ်ရမလဲ။ ဘယ်လောက်ဖတ်ရမလဲ။
အပေါ်က အချက်နဲ့ သဘောတရားဆင်တယ်။ ကျွန်တော် စာအုပ်စင်မှာရယ်၊ Kindle App မှာဝယ်ထားတာတွေပေါင်းရင် စုစုပေါင်း ၇၀၀ နီးပါးလောက်ရှိတယ်။ တော်တော်များများက ကိုယ်တိုင်ဝယ်ထားတာတွေ၊ တချို့က ရုံးက ဝန်ထမ်းတွေ ဝယ်ပြီးတော့ Pro Nit Library စာရင်းမှာထည့်ထားတာတွေဖြစ်ပါတယ်။
ဒီစာအုပ်တွေအားလုံးထဲမှာ တစ်ကြိမ်ဖတ်ပြီးတဲ့ စာအုပ် အရေအတွက်ဟာ ၄၀% လောက်ရှိတယ်။ ၂ ကြိမ် လောက် ဖတ်ထားဖူးတဲ့ စာအုပ် ၁၀% လောက်ရှိပါတယ်။ ၃-၄ ကြိမ် ဖတ်ဖြစ်တဲ့ စာအုပ် ၁% လောက်ဘဲ ရှိမယ်။ အကုန်မဖတ်နိုင်ဘူး။
ကျွန်တော် အရင်က စာအုပ်များများ ဖတ်တာကို ဂုဏ်ယူမိတယ်။ သဘောတရားလောက် သိလာတယ်။ ဒါပေမယ့် စာအုပ်က တကယ်ပေးတဲ့ အနှစ်သာရတွေကို မရခဲ့ဘူး။
နားလည်လာတာက “စာများများ ဖတ်” ဆိုတာထက် “စာနာနာ ဖတ်” တာမျိုးဟာ ပိုထိရောက်ပါတယ်။
စာအုပ်ဆယ်အုပ်လောက်ကို အပေါ်ယံလောက် ပြီးမြောက်အောင် ဖတ်တာထက်ကို တစ်အုပ်၊ နှစ်အုပ်ကို ကျေညက်နေအောင် ဖတ်တာမျိုး၊ ပြန်သုံးတာမျိုးဟာ ပိုထိရောက်တယ်။
“၃ ခေါက်ဖတ်” စာဖတ်နည်း ဆိုတာ
စာအုပ်လဲ ရွေးထားတယ်။ ကိုယ့်ရည်ရွယ်ချက်လဲရှင်းနေပြီဆိုပါတော့။
ပထမတစ်ကြိမ် - ဘာမှမတွေးဘဲ စိတ်ကို ဖွင့်ထားပြီး ဖတ်ပါ။
ဘာအကြောင်းအရာဘဲ ဖြစ်ဖြစ်၊ ဘယ်သူရေးတဲ့ စာဘဲ ဖြစ်ဖြစ်၊ စိတ်ကို ဖွင့်ပြီး စာရဲ့ ဆိုလိုရင်းကိုဘဲ နားလည်အောင် ဖတ်ပါ။ ပထမ အကြိမ်မှာ ဘာမှတ်စုမှ ထုတ်ဖို့လဲ မလုပ်ပါနဲ့။ ဘာမှလဲ လိုက်မစဥ်းစားဘဲ ဆိုလိုရင်းကို သိအောင် ဖတ်ပါ။
ဒုတိယအကြိမ် - ငြင်းတဲ့ပုံစံ၊ ဆွေးနွေးတဲ့ပုံစံ ဖတ်ပါ။
ဒုတိယအကြိမ်ဟာ အချိန် ပိုကြာမယ်။ ဘာကြောင့်လဲဆိုရင် စာထဲမှာ ပါတဲ့အကြောင်းအရာတွေကို ကိုယ့်အနေနဲ့ စာရေးသူနဲ့ပြန်ဆွေးနွေးတဲ့ ပုံစံမျိုး ဖတ်ရမှာဖြစ်ပါတယ်။ အကြောင်းအရာတစ်ခုကို သူပြောနေတဲ့ ရှု့ထောင့်ကို တခြား ရှုထောင့်ကနေ မြင်ကြည့်ပြီး ငြင်းတာမျိုး၊ လိုက်ဆွေးနွေး၊ တွေးခေါ်ကြည့်တာမျိုးလုပ်ပြီးဖတ်တာမျိုးပါ။
ဒီလိုလုပ်ခြင်းဟာ ဘာဖြစ်လဲဆိုရင် စာရေးသူရဲ့ လွှမ်းမိုးကိုလဲ ကာကွယ်ပြီးသား ဖြစ်သလို ကိုယ်တိုင် ကျယ်ကျယ်ပြန့်ပြန့် စဥ်းစားတတ်လာပါတယ်။
အရာရာတိုင်းကို လိုက်ငြင်းနေတာမျိုးမဟုတ်ဘူး။ တချို့အကြောင်းအရာတွေမှာ ကိုယ့်အတွေ့အကြုံ၊ သိထားခဲ့တာတွေနဲ့ လွဲနေတာမျိုးတွေ၊ မပြည့်စုံဘူးထင်တာမျိုးတွေကို သူနဲ့ ပြန်လည်ဆွေးနွေး ငြင်းခုန်တဲ့ ပုံစံမျိုး ဖတ်ပါ။
တတိအကြိမ်ကို မသွားခင်မှာ မေးစရာ တစ်ခုရှိနိုင်တယ်။
ပထမအကြိမ် ဘာမှမတွေးဘဲ ဖတ်တာကို ကျော်ပြီးတော့ တခါတည်း ငြင်းတဲ့ပုံစံ၊ ဆွေးနွေးတဲ့ ပုံစံ တန်းဖတ်လို့ မရဘူးလား ဆိုတဲ့ မေးခွန်းမျိုး။
တဖက်လူရဲ့ ဆိုလိုရင်းကို နားလည်အောင် မကြိုးစားထားဘဲ ငြင်းခုန်ချင်တာ၊ ဆွေးနွေးချင်တာမျိုးဆိုတာ မဖြစ်သင့်ဘူး မဟုတ်လား။ ဒါကြောင့်ပါ။
တတိယအကြိမ် - အသုံးပြုဖို့ ဖတ်ပါ။
ဆိုလိုရင်းကိုလဲ နားလည်အောင်ဖတ်ပြီးပြီ။ ငြင်းခုန် ဆွေးနွေးကြည့်ပြီးပြီဆိုရင် နောက်ဆုံးတစ်ခေါက်ဟာ ကိုယ့်အတွက် အသုံးပြုမယ့် အိုင်ဒီယာတွေ၊ စိတ်ကူးတွေ၊ နည်းလမ်းတွေ ထုတ်ဖို့ အချိန်ဖြစ်ပါပြီ။ ဒီတစ်ကြိမ်ဟာ ဖတ်တဲ့အချိန်ပိုမြန်သွားလိမ့်မယ်။ ပြန်အသုံးချမယ့် နည်းလမ်းတွေ ရွေးထုတ်တာ၊ ပြန်ဆင်တဲ့ အချိန် နည်းနည်း ကြာတတ်ပါတယ်။
ပြီးရင် လက်တွေ့လုပ်ပါ။
“စာနာနာ ဖတ်” ပြီး ပိုကောင်းတဲ့ ရလဒ်တွေ ရယူနိုင်ကြပါစေ။
-----------
နောက်တစ်ဆင့်တက်လှမ်းနိုင်ဖို့အတွက် Better Version ရှိပါတယ် ။
