What are the opening hours?

Monday 08:00 - 11:00 16:00 - 20:00 Tuesday 08:00 - 11:00 16:00 - 20:00 Wednesday 08:00 - 11:00 16:00 - 20:00 Thursday 08:00 - 11:00 16:00 - 20:00 Friday 08:00 - 11:00 16:00 - 20:00 Saturday 08:00 - 11:00 16:00 - 20:00 Sunday 08:00 - 11:00 16:00 - 20:00

https://www.facebook.com/106873388474836/

Myint Mo Oo Clinic - မြင့်မိုရ်ဦး အထွေထွေရောဂါကုဆေးခန်း, No 205, Arthar Waddy Street, Northokkalapa Township, Yangon (2026)

01/07/2022

#ကလေးကျန်းမာ သိကောင်းစရာ

#အဖျားနှင့် ပါရာစီတမော

ကလေးတွေကိုယ်ပူတာ ကိုယ်ခန္ဓာတုံ့ပြန်မှုတစ် ခုဖြစ်လို့ ကိုယ်နည်းနည်းပူတိုင်း ပါရာစီတမောတိုက်စရာမလိုပါဘူး။ ဒါပေမဲ့ ကိုယ်ပူချိန်တအားတက်ပြီး ကလေး နုံးမယ် မှိန်းမယ် ဂျီကျမယ်ဆိုရင်တော့ ကိုယ်ပူချိန်ကျအောင် ပါရာစီတမောတိုက်နိုင်ပါတယ်။တချို့ ကလေးတွေဟာ ဖျားပေမဲ့ လန်းနေ ဆော့နေရင် ဆေးမလိုပါ။ ဖျားမှာစိုးလို့ ကြိုတိုက်တာမျိုး၊ ၄နာရီတိုင်း တိုက်နေတာမျိုး ရှောင်သင့်ပါတယ်။၅-၆ နာရီတစ်ခါလောက်ပဲတိုက်သင့်ပါတယ်။ ပါးစပ်ကတိုက်နိုင် သောက်နိုင် သားနဲ့ စအိုထဲ ထည့်တာမျိုးတော့လုံးဝရှောင်သင့်ပါတယ်။

ပါရာစီတမောကြောင့်အဖျားဟာလုံးဝအမြစ် ပြတ်သွားနိုင်တာမဟုတ်ဘဲ ကလေးယာယီသက်သာအောင်ပေးရတာသာဖြစ်တဲ့အတွက် သက်သာနေတဲ့ကလေးကို ဆေးတိုက်စရာမလိုပါဘူး။

ပါရာစီတမောလိုဆေးတွေတိုက်ရာမှာ သတိပြုသင့်တာ နောက်တစ်ခုက ဆေးရည်တွေရဲ့ပါရာစီတမောပါဝင်မှု အမျိုးအစားပါ။ ပါရာစီတမောတိုင်းကို ပုံသေမှတ်ပြီး ပမာဏ အတူတူ မသောက်သင့်ပါဘူး။ ညှစ်ပြီး အစက်ချတိုက်ရတဲ့ အမျိုးအစားကပါရာစီတမောပါဝင်မှု ပိုများလို့ နည်းနည်းပဲ တိုက်ရပါတယ်။ 1 ml မှာ 100mg ပါပါတယ်။ အခြားပုလင်းကြီးတွေ က 125/5 ml, 250/5ml စသည်ဖြင့် မျိုးစုံ လာပါတယ်။ 125 အားဆိုရင် 1 ml မှာ 25 mg ပါပြီး 250 အားဆိုရင် 1ml မှာ 50mg ပါပါတယ်။ ဒါ့ကြောင့် ပါရာစီတမောမြင်တိုင်း ရမ်းမတိုက်သင့်ပါဘူး။ ဆေးပုလင်းမှာရေးထားတဲ့ အသက်အလိုက် တိုက်တာလဲ မှားနိုင်ပါတယ်။

အမှန်ကန်ဆုံးကတော့ ကလေးရဲ့ ကိုယ်အလေးချိန်နဲ့ ချိန်ဆပြီး တိုက်တာပါ။ အောက်မှာ ကလေးရဲ့ ကိုယ်အလေးချိန်၊ ပါရာစီတမော အမျိုးအစားနဲ့
တိုက်သင့်တဲ့ ပမာဏ တွေ ပူးတွဲပြထားပါတယ်။

Ibuprofen လို့ လို့ခေါ်တဲ့ဆေးတစ်မျိုးကိုလည်းအဖျားကျဖို့သုံးပါတယ်။အထူးသဖြင့်နိုင်ငံခြားတွေမှာပိုသုံးပါတယ်။ မြန်မာပြည်မှာတော့ကျွန်တော်တို့သုံးရတာနည်းနည်း ကြောက်ပါတယ်။ဘာဖြစ်လို့လဲဆိုတော့သွေးလွန်တုတ်ကွေးမှာသုံးမိရင် အန္တရာယ်ရှိလို့ပါ။ဒါကြောင့် သွေးလွန်တုပ်ကွေးမဟုတ်မှန်းသေချာမှသုံးသင့်ပါတယ်။

ေးကျန်းမာသိကောင်းစရာ

29/06/2022

#ကလေးကျန်းမာ သိကောင်းစရာ

#နှာခေါင်းသွေးလျှံခြင်း

ကလေးတွေမှာနှာခေါင်းသွေးလျှံတာဟာ အဖြစ်များတဲ့အခြေအနေတစ်ခုဖြစ်ပါတယ်။ အများစုမှာ အန္တရာယ်လည်းမရှိပါဘူး။နှာခေါင်းသွေးလျှံတယ်ဆိုတာနှာခေါင်းအတွင်းပိုင်းနံရံကသွေးကြောငယ်လေးများပေါက်ထွက်တာဖြစ်ပါတယ်။ ကလေးငယ်တွေရဲ့နှာခေါင်းအတွင်းနံရံဟာအင်မတန်နူးညံ့ပါးလွှာပြီးတော့ သွေးကြောလေးတွေကအပေါ်ယံမျက်နှာပြင်မှာရှိနေတဲ့အတွက်အလွယ်တကူပေါက်ထွက်လွယ်ပါတယ်။ သာမန်အားဖြင့် နှာခေါင်းသွေးလျှံတာဟာအလွန်ဆုံးငါးမိနစ်ဆယ်မိနစ်အတွင်းမှာဘဲ သူ့အလိုလိုရပ်သွားတဲ့အတွက် ဆရာဝန်ဆီသွားစရာမလိုပါဘူး။ မိမိအိမ်မှာပဲရှေးဦးသူနာပြုစုနည်းနဲ့ကုသပေးလို့ရပါတယ်။

👉 နှာခေါင်းသွေးလျှံနိုင်တဲ့ အကြောင်းအရင်းတွေကတော့ -

၁၊ နှာခေါင်းခဏခဏကလော်ခြင်း၊
၂၊ နှာခေါင်းကိုထိခိုက်မိခြင်း၊
၃၊ ရာသီဥတုခြောက်သွေ့ပူပြင်းခြင်း၊
၄၊ နှာခေါင်းအတွင်းပိုးဝင်ခြင်း၊
၅၊ ဓာတ်မတည့်ခြင်း၊
၆၊ နှာခေါင်းအတွင်းပစ္စည်းတစ်ခုခုဝင်ခြင်း၊
၇၊ ဝမ်းတအားချုပ်၍ တအားညှစ်ရခြင်း၊
၈၊ အချို့သောဆေးဝါးများ၊
၉၊ ခန္ဓာကိုယ်မှာ ရောဂါတစ်ခုခုရှိနေခြင်း (ဒါဟာအလွန်ရှားပါတယ်) စသည်တို့ကြောင့် ဖြစ်ပါတယ်။

👉 ရှေးဦးသူနာပြုစုခြင်း

နှာခေါင်းသွေးလျှံတဲ့အတွက်ကလေးမှာ နာကျင် မှုဝေဒနာမရှိပါဘူး။ ဒါပေမဲ့ သွေးကိုမြင်ရတဲ့အတွက်၊ သွေးထွက်နေတာသိတဲ့အတွက် ကလေးဟာအထိတ်တလန့်ဖြစ်နေနိုင်ပါတယ်။

ဒါကြောင့်ကလေးကိုချော့မော့နှစ်သိမ့်ပေးပါ။ပိုငိုရင်ပိုပြီးတော့သွေးထွက်တတ်ပါတယ်။ပြီးရင်တော့အောက်ဖော်ပြပါရှေးဦးသူနာပြုစုနည်းများအတိုင်း လုပ်ဆောင်ပါ။

၁၊ ကလေးငယ်ကို ပုံပါအတိုင်း သူ့ဖာသူဖြစ်စေ၊လူကြီးပေါင်ပေါ်မှာဖြစ်စေ၊ သက်သောင့်သက်သာ ထိုင်ခိုင်းပြီးအရှေ့ကို အနည်းငယ်ငိုက်ထားပေးပါ။

လှဲမနေပါစေနဲ့။ ကလေးဦးခေါင်းကိုနောက်လှန်မနေပါစေနဲ့။ နောက်လှန်နေမယ်ဆိုရင် သွေးဟာနှာခေါင်းအနောက်ဖက်ကနေ လည်ချောင်းအထိပြန်ဆင်းပြီးတော့ ပြန်အန်နိုင်တယ်။ အန်ရင် နှာခေါင်းသွေးထွက်တာပိုဆိုးနိုင်တယ်။အသက်ရှူတာကိုပါအနှောင့်အယှက်ဖြစ်နိုင်ပါတယ်။

၂၊ ပုံပါအတိုင်း နှာခေါင်းပေါက်နှစ်ခုရဲ့အထက် နား နှာတံအောက်ဖက် ပျော့နေတဲ့ နေရာကိုလက်နဲ့ ခပ်ဖွဖွဆယ်မိနစ် လောက်ဖိညှစ်ထားပေးပါ။

၃၊ ဒီလိုဖိညှစ်ထားချိန်မှာသွေးတိတ်ပြီလားဆိုတာသိချင်လို့လက်ကိုဖယ်မကြည့်ပါနဲ့။ သွေးခဲဖို့အချိန်ပေးပါ။ကလေးကိုအာရုံပြောင်းတဲ့အနေနဲ့ သူစိတ်ဝင်စားတာတစ်ခုခု ပေးကြည့်ထားပေးပါ။

၄၊ ဆယ်မိနစ်ပြည့်ရင် လွှတ်ကြည့်ပြီးသွေးထွက်မထွက်စစ်ဆေးပါ။ တကယ်လို့သွေးဆက်ထွက် မယ်ဆိုရင်နောက်ထပ်ဆယ်မိနစ်ဆက်ပြီးတော့ဖိညှစ်ပေးပါ။

အထက်ပါနှာခေါင်းကိုဖိညှစ်ပေးတာအပြင် အောက်ပါတို့ကိုလည်း လုပ်ပေးနိုင်ပါတယ်။

ရေခဲအဝတ်ဒါမှမဟုတ်ရေခဲအိတ် ကိုကလေး နှာတံအပေါ် (သို့) လည်ပင်းအနောက်နဲ့ ဘေးဖက်မှာ အုပ်ပေးပါ။

ပါးစပ်ထဲမှာ သွေးရှိနေရင် ထွေးထုတ်ခိုင်းပါ။ ပလုတ်ကျင်းပေးပါ။အေးတဲ့အရည်တစ်ခုခုတိုက်ပေးပါ။

👉 သွေးတိတ်သွားပြီးလျှင် -

၁၊ နာရီအနည်းငယ် ပေးနားပါ။
၂၊ ပူတဲ့အစားအသောက်၊ ရေနွေးနဲ့ရေချိုးတာစသည်တို့ကို နောက်တစ်ရက်လောက်ရှောင်ကြဉ်ပါ။
၃၊ ကလေးနှာခေါင်းကိုမနှိုက်ပါစေနဲ့၊မကလော်ပါစေနှင့်၊
၄၊ ဝမ်းချုပ်မခံပါနဲ့။

👉 အောက်ပါအခြေအနေများရှိလာမယ်ဆိုရင်ဆရာဝန်နဲ့ပြပါ။

၁၊ အထက်ပါ ရှေးဦးသူနာပြုစုနည်းနဲ့ သွေးမတိတ်/ သွေးထွက်အရမ်းများ/ ကလေးမူးမေါ် အသက်ရှူကြပ်လျှင်
၂၊ နေ့စဉ်သို့မဟုတ်အပတ်စဉ်သွေးထွက်လျှင်
၃၊ နှာခေါင်းသွေးသာမက သွားဖုံးသွေးထွက်မယ် အရေပြားမှာအညိုအမည်းအနီစက်ထွက်မယ်ဆိုလျှင်
၄၊ မိသားစုထဲမှာသွေးမတိတ်ရောဂါရှိလျှင်

ခြုံပြီးပြောရမယ်ဆိုရင် ကလေးတွေမှာနှာခေါင်းသွေးလျှံတာဟာအဖြစ်များတဲ့၊ အန္တရာယ်မရှိတဲ့အခြေအနေတစ်ခုဖြစ်ပါတယ်။ အများစုဟာဆေးရုံဆေးခန်းကိုသွားစရာမလိုဘဲအိမ်မှာပဲရှေးဦးသူနာပြုစုနည်းနဲ့ကုသနိုင်ပါတယ်။

ေးကျန်းမာသိကောင်းစရာ

14/02/2022

Metformin မက်ဖော်မင်

"Metformin က ကျောက်ကပ် ပျက်စေနိုင်လား???"

Metformin ကြောင့် ကျောက်ကပ် မပျက်ပါ။

ဒါပေမယ့် ကျောက်ကပ် အားနည်းနေသူတွေ/ ဆီးဆိပ်တက်နေသူတွေမှာတော့ Metformin ကို မသုံးသင့်ပါ။

ဒါကြောင့် Metformin ကို စမသုံးခင်မှာ ကိုယ့်လူနာမှာ ကျောက်ကပ် ဆိပ်/ဆီးဆိပ် တက်နေလား စစ်ဆေးကြည့်သင့်ပါတယ်..
(Serum Creatinine & eGFR ) ကို အရင်စစ်ပါ။

eGFR < 45 ml/min/1.73 m2 (45 အောက်မှာ စ မသုံးပါနဲ့.... တခါမှ မသောက်ဖူးသေးရင် စ မတိုက်ပါနဲ့... သောက်လက်စ ဆိုရင်တော့ ဆက်တိုက်လို့ရပါတယ်)

eGFR < 30ml/min/1.73 m2 ( 30 အောက်မှာ ဆိုရင်တော့ ဆေးကို ရပ်လိုက်ပါ)။

Metformin က တကယ်တော့ သွေးချိုကျရုံတင်မကပါဘူး... ကိုယ်အလေးချိန်လည်း ကျစေပြီး သွေးတွင်း အဆီကိုလည်း ကျစေလို့ ဆေးကောင်း တစ်ခုပါ...

Metformin ကို ခန္ဓာကိုယ်က ဆီးကနေ စွန့်ထုတ်ရပါတယ်... ဆီးကနေ ပြန်စွန့်ထုတ်ရတဲ့ ဆေးဖြစ်နေလို့ ကျောက်ကပ်မကောင်းရင် သောက်လို့မရတာပါ..
ကျောက်ကပ်မကောင်းတဲ့သူမှာ သောက်မိရင်
(eGFR < 30 ml/min/1.73 m2) Lactic acidosis ဆိုတဲ့ side effect ရဖို့ ၂ ဆ များသွားပါတယ်...

Metformin သောက်နေတဲ့သူရော / မသောက်နေတဲ့ ဆီးချိုရှိသူတွေမှာ ကျောက်ကပ်ဆိပ်ကို တစ်နှစ် (၂) ခါ စစ်သင့်ပါတယ်

“ Metformin က ကိုယ်ဝန်ဆောင် မှာ သုံးလို့ ရပါသလား??? "

ကိုယ်ဝန်ဆောင် ဆီးချို ဆိုတာ ကိုယ်ဝန်ဆောင်ပြီး ၂၄ ပတ်ကျော် / ၆ လကျော် ( 24 weeks gestation ) မှာ ဖြစ်တတ်ပါတယ် - Gestational Diabetes Mellitus လို့ ခေါ်ပါတယ်

Metformin ကို ပေးရင် အများဆုံး dose က 1500 mg/day ပေးလို့ရပါတယ်

Insulin ထိုးဆေးနဲ့ တွဲပေးလည်း ရပါတယ်

ကလေးကိုရော/ အမေကို ရော ဘေးထွက် ဆိုးကျိုး မရှိပါ

နဂို ဆီးချို ရှိတဲ့ လူနာကနေ ကိုယ်ဝန်ဆောင်ရင်တော့ ကိုယ်ဝန် စ ရှိကတည်းက Metformin ကို စသောက်မိတတ်ပါတယ်...
( ကလေးရဲ့ ကိုယ်လက် အင်္ဂါ တွေ ဖွဲ့စည်းတဲ့ ပထမ ၃ လ) မှာတော့ ဘေးထွက်ဆိုးကျိုး မရှိဘူးလို့ ရေးထားကြပေမယ့် သေချာတဲ့ သုတေသန မရှိသေးပါ...
ဒါကြောင့် ပထမ (၃) လ မှာ ဆိုရင် insulin ကို ပို သုံးသင့်ပါတယ်...

"Metformin ကို နို့တိုက်မိခင်တွေမှာ သုံးသင့် ပါသလား"

Metformin သောက်နေတဲ့ နို့တိုက်မိခင်တွေမှာ မိခင်နို့မှ တဆင့် Metformin အလွန်နည်းသော ပမာဏ သာလျှင် ကလေးဆီ ရောက်နိုင်ပါတယ်...
နို့တိုက်မိခင်တွေမှာ စိတ်ချစွာ သောက်နိုင်ပါတယ်။

Credit : Endocrine Department

19/12/2021

ကလေးချက်စူတိုင်းတော့ စိတ်မပူရပါ
*****************************

👶🏼ပုံမှန်တွင် ကလေး ၄ ယောက်မှာ ၁ ယောက် ချက်စူပြီး မွေးလာကြတတ်ကြပါသည်။ မွေးကင်းစ ကလေးများ၏ ဝမ်းဗိုက်ရှေ့နံရံက ကြွက်သားများ လုံလုံလောက်လောက် မတောင့်တင်းသေး၍ အတွင်းက အူခွေက ကြွက်သားကြားထဲမှ အပြင်ကျွံထွက်ခြင်း ဖြစ်ပါသည်။ ချောင်းဆိုးချိန်၊ ဝမ်းညှစ်ချိန်တွင် ပိုသိသာသည်။

👶🏼လမစေ့ဘဲ မွေးသောကလေးများ၊ Down's Syndrome ရှိသောကလေးများ၊ သိုင်းရွိုက်ဟော်မုန်းချို့တဲ့ပြီးမွေးလာသော ကလေးများတွင် ပိုအဖြစ်များသည်။

👶🏼ချက်စူသော ကလေး ၁၀ ယောက်တွင် ၉ ယောက်က အသက်၂ နှစ်ဝန်းကျင်၌ ဝမ်းဗိုက် ကြွက်သားများသန်မာလာသည်နှင့်အမျှ အူခွေများကို အတွင်းသို့ပြန်တွန်း၍ ချက်စူခြင်း ပျောက်သွားပါလိမ့်မည်။

👶🏼အရေးကြီးသော အချက်မှာ ချက်စူသော ကလေးကို နံမယ်ပြောင်ပေးပြီး မစပါနှင့်။

👶🏼အဝတ်နဲ့ ကျပ်ထုပ်၍၊ ဗိုက်စည်းများစည်းပေး၍၊ အကြွေစေ့နှင့် ဖိကပ်၍ ချက်စူခြင်း မပျောက်နိုင်ပါ။ ကလေး အနေရကျပ်ခြင်း၊ အရေပြားအဖိခံရလွန်း၍ ရောင်ရမ်းခြင်းသာရှိပါမည်။

👶🏼စူသောချက် အရွယ်ကြီးလွန်းလျှင်၊ ကလေးက ဗိုက်မကြာခဏနာလျှင်၊ အသက် ၃-၄ နှစ်ကျော်လို့ မပျောက်လျှင် ကလေးခွဲစိတ် ဆရာဝန်နှင့်ပြသပါ။ ကျွံနေသော အနေအထား၊ အတိမ်အနက်နှင့် နောက်ဆက်တွဲပြဿနာများရှိမရှိပေါ်မူတည်ပြီး မေ့ဆေးသုံး၍ခွဲစိတ်ဖို့လိုနိုင်ပါသည်။

နေနေမိုးဆွေ (Child Health Myanmar)
Photo Credits to Google
Reference- RCH guidelines, Better Health Channel, Victoria Health, Australia

18/12/2021

💉💉မေးခိုင်ကာကွယ်ဆေး ဘာကြောင့်ထိုးဖို့လိုအပ်သလဲ။💉💉

💊💊 မေးခိုင်ကာကွယ်ဆေး (ATT) ဆိုတာ ကျွန်တော်တို့နဲ့ အလွန်ပဲ ရင်းနှီးကျွမ်းဝင်ပြီးသား ကြားဖူးပြီးသား အရာတစ်ခုဖြစ်ပါတယ်။ ဒဏ်ရာ အနာတရ တစ်ခုခုဖြစ်ရင် မေးခိုင်ကာကွယ်ဆေး ထိုးရမယ်ဆိုတာ သိပေမယ့် လူတော်တော်များများက ဘာကြောင့်ထိုးရလဲ။ ရောဂါက ဘယ်လောက်ထိ ပြင်းထန်လဲ။ ဘယ်နှကြိမ်ထိုးရမလဲ ဆိုတာမသိသလို ထိုးတဲ့ သူတွေကလဲ ထိုးရမယ့် အကြိမ်အရေအတွက် ပြည့်အောင် မထိုးကြတဲ့ သူတွေ များပါတယ်။ ဒါကြောင့် မေးခိုင်ရောဂါဆိုတာ တစ်ချိန်တစ်ခါ တုန်းက ဘယ်လောက်ဆိုးဝါးခဲ့လဲ ဆိုတာ ပြောပြပါမယ်။

💊💊(၁) မေးခိုင်ရောဂါ (Tetanus) ဆိုတာဘာလဲ။

မေးခိုင်ရောဂါဆိုတာ Clostridium tetani လို့ ခေါ်တဲ့ ဘက်တီးရီးယားပိုးကြောင့်ဖြစ်ပွားတဲ့ ရောဂါ ဖြစ်ပါတယ်။ ဒီရောဂါပိုးတွေဟာ မြေကြီး၊ အမှိုက်တွေနဲ့ တိရစ္ဆာန် အညစ်အကြေးတွေမှာ နေထိုင်တတ်ပြီး တစ်ခုခုနဲ့ ထိခိုက်မိတဲ့အခါမှာ ထိခိုက်မိတဲ့ ဒဏ်ရာကနေတစ်ဆင့် ကိုယ်ခန္ဒာတွင်းသို့ ဝင်ရောက်ကာ tetanospasmin ဆိုတဲ့ အဆိပ်တွေ ထုတ်လွှတ်ပြီး အာရုံကြော စနစ်တွေကို တိုက်ခိုက်ပါတယ်။ ဒီအခါမှာ အလွန်နာကျင်သော ကြွက်သားကျုံခြင်း (အထူးသဖြင့် လည်ပင်းနှင့် မေးရိုး) ဖြစ်ပေါ်ပြီး အသက်ရှုမရပဲဖြစ်ကာ အသက်ဆုံးရှုံးတဲ့ အထိဖြစ်နိုင်ပါတယ်။
ဒီရောဂါဟာ ကာကွယ်ဆေးမပေါ်ခင်က လူအသက်ပေါင်းများစွာကို နုတ်ယူခဲပေမယ့် ကာကွယ်ဆေး ပေါ်လာတဲ့အခါမှာတော့ ကျွန်တော်တို့ ပတ်ဝန်းကျင်မှာတောင် ရောဂါဖြစ်တဲ့လူ သိပ်မတွေ့ရတော့ သလောက်ပါပဲ။ ဒါပေမယ့် ရောဂါမဖြစ်အောင် ကာကွယ်ဆေးထိုးလို့ပဲရပါတယ်။ တကယ်ဖြစ်လာရင် ကုသနည်း မရှိပါဘူး။ ဖြစ်တဲ့ ပြဿနာကို စောင့်ကြည့်ပြီး သေမင်းနဲ့ အသက်လုရတဲ့ ရောဂါလို့ ပြောရင် မမှားနိုင်ပါဘူး။

💉💉(၂) မေးခိုင်ရောဂါ (tetanus) ရောဂါလက္ခဏာတွေက ဘာလဲ။

ရောဂါလက္ခဏာတွေဟာ ရောဂါပိုးကူးစက်ခံရပြီး ရက်အနည်းငယ်မှ ရက်သတ္တပတ်အတွင်းမှာ စတင်ပါတယ်။ လက္ခဏာတွေကတော့
🚩🚩(၁) မေးရိုးကိုထိန်းချုပ်ထားသော ကြွက်သားများတောင့်တင်းကျုံလာခြင်း (Trismus)
🚩🚩(၂) လည်ပင်းကြွက်သားများ တောင့်တင်းနေခြင်း
🚩🚩(၃) အစာ၊ရေ မြိုချရန်ခက်ခဲလာခြင်း
🚩🚩(၄) ကိုယ်ခန္ဒာအနှံကြွက်သားများပါ တောင့်တင်းလှုပ်ရှားလာခြင်း စတဲ့ လက္ခဏာတွေနဲ့အတူတူ ဖျားခြင်း၊ ချွေးထွက်ခြင်း၊ သွေးပေါင်တက်ခြင်း၊ နှလုံးခုန်နှုန်းမြန်ခြင်း စတာတွေပါ ခံစားရနိုင်ပါတယ်။

📌📌(၃) မေးခိုင်ရောဂါက ဘယ်လိုလူမျိုးတွေမှာ ပိုမိုဖြစ်ပွားနိုင်သလဲ။

အဓိကကတော့ ကာကွယ်ဆေးမထိုးထားပဲ ဒဏ်ရာရသောသူ အားလုံးမှာ ဖြစ်နိုင်ပါတယ်။ အပေါ်ယံဒဏ်ရာ လေးနဲ့တောင် ဖြစ်နိုင်တယ်လို့ ဆိုပါတယ်။ အထူးသဖြင့် ဒဏ်ရာရလွန်းသော အလုပ်ကြမ်းသမားများ၊ အလေးအပင်မရသူများ၊ အမြင့်တက်ရသူများ၊ ယာဉ်မတော်တဆမှု ဖြစ်ဖူးသောသူများ စတဲ့ သူတွေမှာဖြစ်နိုင်ပါတယ်။

🚩🚩(၄) မေးခိုင်ရောဂါကာကွယ်ဆေးကို ဘယ်လိုထိုးကြမလဲ။

ကျွန်တော်တို့ အသက် ၂လ၊ ၄လ၊ ၆လ၊ ၁၈ လ၊ ၅ နှစ်တို့မှာ မေးခိုင်ကာကွယ်ဆေးကို (ဆုံစို့ + ကြက်ညာ + မေးခိုင်) ဆိုပြီး (၅)ကြိမ် တိတိ ထိုးရပါတယ်။ ဒီပုံစံအတိုင်းဆေးကို ပြည့်စုံစွာထိုးခဲ့ရင်တော့ အသက် ၁၀ နှစ်အတွင်း ဘာဒဏ်ရာပဲ ရရ ထိုးထားတဲ့ ကာကွယ်ဆေးတွေက ကာကွယ်ပေးပြီး သားဖြစ်တဲ့အတွက် ထပ်ထိုးစရာ မလိုပါဘူး။လူတိုင်းဟာ မေးခိုင်ရောဂါကာကွယ်ဆေးကို (၁၀)နှစ်တစ်ကြိမ် booster ထိုးထားခြင်းက ရုတ်တရက် ထိခိူက်မိလျှင်လည်း မေးခိုင်ပိုးဝင်ခြင်းမှ ကာကွယ်နိုင်ပါတယ်။ အောက်ဖော်ပြပါ ပုံလေးမှာ မေးခိုင်ကာကွယ်ဆေးထိုးနည်းကို စနစ်တကျဖော်ပြထားပါတယ်။

Credit I am your doctor

17/12/2021

အသည်းရောင်အသားဝါ (ဘီ) ရောဂါအကြောင်း

အသည်းရောင်အသားဝါရောဂါပိုးများအနက် (ဘီ) ပိုးကြောင့်ဖြစ်ပွားသည့် အသည်းရောဂါတစ်မျိုးဖြစ်ပြီး ရုတ်တရက် အသည်းရောင်ရောဂါနှင့် နာတာရှည်အသည်းရောဂါဖြစ်စေနိုင်သည့် အသက်အန္တရာယ်ရှိစေနိုင်သော ရောဂါတစ်မျိုးဖြစ်သည်။

ထို့ပြင်အသည်းရောင်အသားဝါရောဂါ (ဘီ) သည် ကျန်းမာရေးစောင့်ရှောက်မှုပေးနေသော ကျန်းမာရေးဝန်ထမ်းများအတွက် အရေးကြီးသော အန္တရာယ်ရှိသည့် လုပ်ငန်းခွင်ရောဂါတစ်မျိုးလည်း ဖြစ်ပါသည်။

လက်ရှိတွင် စိတ်ချရ၍ အရည်အသွေးကောင်းမွန်သော ကာကွယ်ဆေးများဖြင့် ၎င်းရောဂါအား (၉၅%) ကာကွယ်နိုင်ပါသည်။ နာတာရှည်အသည်းရောဂါခံစားနေရသောလူနာများသည် အသည်းကင်ဆာရောဂါအဆင့်သို့ လျင်မြန်စွာရောက်ရှိတတ်ပြီး လအနည်းငယ်အတွင်း အသက်သေဆုံးနိုင်ပါသည်။

#ရောဂါလက္ခဏာများ

ဖျားခြင်း၊
မောပန်းနွမ်းနယ်ခြင်း၊
ပျို့အန်ခြင်း၊ ဗိုက်အောင့်ခြင်း၊
ဆီးအရောင်ရင့်ခြင်း၊ အသားဝါခြင်း၊ မျက်လုံးဝါခြင်း၊
အစားအသောက်ပျက်ခြင်း၊
အဆစ်အမြစ်ကိုက်ခဲခြင်း၊

#ကူးစက်နိုင်သည့်_နည်းလမ်းများ

မိခင်မှကလေးသို့ ကလေးမွေးဖွားစဉ်တွင် ကူးစက်နိုင်ခြေအများဆုံးဖြစ်ပါသည်။
ရောဂါပိုးရှိသူနှင့် လိင်ဆက်ဆံခြင်း
ရောဂါပိုးပါဝင်နေသောသွေး၊ ခန္ဓာကိုယ်မှထွက်သော အရည်များ၊ တံတွေးများ၊ ရာသီသွေးများနှင့် ထိတွေ့ကိုင်တွယ်မှုရှိခြင်း
ရောဂါပိုးပါဝင်သော သွေးသွင်းခြင်း ၊
ရောဂါပိုးပါဝင်သော ကိုယ်ခန္ဓာအစိတ်အပိုင်းများ အစားထိုးကုသခြင်း
ကျန်းမာရေးဝန်ထမ်းများအနေဖြင့် ရောဂါရှိသူလူနာအား ကုသမှုပေးနေစဉ် မတော်တဆအပ်စူးမိခြင်း (သို့) အကြောတွင်းသို့ မူးယစ်ဆေးထိုးသွင်းလေ့ရှိသူများတွင် အပ်နှင့်ဆေးထိုးပြွန်များအား တစ်ဦးနှင့် တစ်ဦးဝေမျှ အသုံးပြုခြင်း၊ တစ်ခါသုံးဆေးထိုးပြွန်အား အသုံးမပြုခြင်း
အကျဉ်းကျနေသူများ၊ မူးယစ်ဆေးဝါးအသုံးပြုလေ့ရှိသူများ၊ လုပ်ငန်းခွင်တွင် သွေး(သို့) သွေးနှင့်ဆက်စပ်ပစ္စည်းများနှင့် ထိတွေ့မှုများရှိသော ကျန်းမာရေးဝန်ထမ်းများ၊ အသည်းရောင်အသားဝါရောဂါ (ဘီ) အဖြစ်များသော နိုင်ငံများသို့ ခရီးသွားလေ့ရှိသူများတွင် ပိုမို ဖြစ်ပွားနိုင်ပါသည်။

#ကာကွယ်နိုင်မည့် နည်းလမ်းများ

အသည်းရောင် အသားဝါရောဂါ (ဘီ) ပိုး ကူးစက်ခြင်းမခံရအောင် ကြိုတင်ကာကွယ်ဆေး အကြိမ်ပြည့်ထိုးနှံခြင်းသည် အကောင်းဆုံးဖြစ်ပါသည်။
ကလေးမွေးဖွားပြီး (၂၄)နာရီအတွင်း မွေးကင်းစကလေးအား အသည်းရောင်အသားဝါရောဂါ (ဘီ) ကာကွယ်ဆေး ထိုးနှံသင့်ပါသည်။
လူတိုင်း အသည်းရောင်အသားဝါ ကာကွယ်ဆေး (၃)ကြိမ် ထိုးနှံခြင်းဖြင့် ရောဂါပိုးကူးစက်ခံရမှုမှ ကာကွယ်နိုင်ပါသည်။
သွေးမလှူမီ သွေးလှူရှင်အား အိပ်ခ်ျအိုင်ဗွီ၊ ဆစ်ဖလစ်၊ အသည်းရောင်အသားဝါရောဂါ (ဘီ) နှင့် (စီ) ရှိ / မရှိ စစ်ဆေးခြင်းများ ပြုလုပ်ရပါမည်။

16/12/2021

ကလေးနှင့်သန်ကောင်
******************
💩(၁) သန်ကောင်ပေးတဲ့ ပြဿနာ

အစာလမ်းကြောင်းမှ သန်ကောင်က ကပ်ပါးကောင်ဖြစ်သည်။ ကပ်ပါးကောင်များက ကလေးရသင့်သည့် အသားဓာတ်, သန်ဓာတ်နှင့် အချို့ဗိုက်တာမင်ကို စုပ်ယူသောကြောင့်
-ကလေးကြီးထွားမှုနှေးခြင်း
-သံဓာတ်အားနည်း၍ ဉာဏ်ရည်နိမ့်ခြင်း
-ကလေး အစားအသောက်ပျက်ခြင်း
-ပင်ပန်းနွမ်းနယ်ခြင်းများ
-မကြာခဏ ဗိုက်နာခြင်း
-နာတာရှည်ဝမ်းသွားခြင်း ဖြစ်နိုင်သည်။

တုတ်ကောင်ကြောင့် ကလေးစအိုဝ ညဘက်တွင် အလွန်ယားခြင်း၊ အိပ်ရေးပျက်ခြင်းတို့လည်း ဖြစ်နိုင်သည်။

💩(၂) သန်ကောင်ဆိုတာ ဘာလဲ။

သန်လုံးကောင်၊ တုတ်ကောင်၊ သန်ချိတ်ကောင်စသည်ဖြင့် အမျိုးမျိုးရှိသည်။ တိရိစ္ဆာန်၏ မစင်မှ သန်ဥများက မြေမှုန့်များတွင် ရှိနိုင်သည်။ မြေကြီးတွင်စိုက်သော ဟင်းသီးဟင်းရွက်များတွင် သန်ဥများ စွန်းပေတတ်သည်။

💩(၃) သန်ကောင် ဘယ်လိုရသလဲ။

မစင်ထဲမှ သန်ကောင်နှင့် သန်ဥများက လူုကြီးကလေးလက်မှတဆင့် ပါးစပ်ထဲသို့ တိုက်ရိုက် ရောက်နိုင်သည်။ သန်ရနိုင်သော အခြားနည်းလမ်းများမှာ
-သန်ဥပါလာပြီး သေချာမဆေးဘဲ စားမိသော အစိမ်းစားသည့် ဟင်းသီးဟင်းရွက် တို့စရာများ
-ကျက်အောင်မချက်ပြုတ်မိသော အသားများ
-မြေကြီးနှင့်ဆော့သော ကလေး၏ လက်မှ သန်ဥများက ကလေး အူလမ်းကြောင်းထဲရောက်ရှိသည်။

💩(၄) အူထဲမှသန်ကောင်ကို ဘယ်လိုရှင်းမလဲ။

ကမ္ဘာ့ကျန်းမာရေးအဖွဲ့အစည်းက မြန်မာနိုင်ငံကဲ့သို့သော ဖွံဖြိုးဆဲ နိုင်ငံများမှ ကလေးများကို ၆ လတစ်ကြိမ် ပုံမှန်သန်ချရန် တိုက်တွန်းသည်။ တစ်ကြိမ်သန်ချပြီးလျှင် အူထဲတွင် သန်ဥများကျန်ပြီး သန်ကောင်များပြန်လည်ပေါက်ပွားနိုင်သောကြောင့်ဖြစ်သည်။

Albendazole ဆေးက အဖြစ်များသည့် သန် အမျိုးအစားများကို နိုင်သည်။ကိုယ်လေးချိန် ၁၀ ကီလို အောက်ကလေးကို ၂၀၀ mg တိုက်၍ ၁၀ ကီလိုထက်များလျှင် ၄၀၀ mg တိုက်ပါ။ ဆေးကို ဝါးစားခိုင်းလို့ရသည့် အရွယ်ဆို ဝါးခိုင်းပါ။ အူလမ်းကြောင်းမှ သန်ကိုတိုက်ဖျက်ရန် အစာနှင့် ဝေးဝေးတိုက်လျှင် ကောင်းသည်။

💩(၅) သန်ချဖို့ လိုသလား။

ကမ္ဘာ့ကျန်းမာရေးအဖွဲ့အစည်းက ဖွံ့ဖြိုးဆဲနိုင်ငံများမှ ၄ နှစ်အထက် ကလေးများကို ပုံမှန်သန်ချခိုင်းပါသည်။

၄ နှစ်အောက်ကလေးများမှာ သန်ရှိရင်၊ သန်ရှိတယ်လို့ ဆရာဝန်က သံသယရှိလျှင် သန်ချသင့်ပါသည်။ ဝမ်းထဲသန်ကောင်တွေ့လျှင်တော့ နေပူပူ မိုးရွာရွာ သန်ချပါ။

💩(၆) သန်ကောင်ကို ဘယ်လို ကာကွယ်မလဲ။

၁။ ကလေးအပါအဝင် တစ်အိမ်သားလုံး ရေနှင့်ဆပ်ပြာသုံး၍ လက်မှန်မှန် ဆေးပါ။ ကလေးအနှီး (သို့)diaper လဲချိန်, အိမ်သာတက်ပြီးချိန်, စားသောက်ဖွယ်ရာ ပြင်ဆင်ချိန်များ လက်သေချာဆေးပါ။

၂။ မြေကြီးပေါ်ဆော့ကစားပြီးတိုင်း ကလေးလက်ကို သေချာဆေးပေးပါ။လက်သည်းမှန်မှန်ညှပ်ပေးပါ။ လက်သည်း ကိုက်ခြင်းကို တားမြစ်ပါ။ တစ်နေ့ ၁ကြိမ်၂ ကြိမ် ရေပုံမှန်ချိုးပေးပါ။

၃။ အိမ်သာသန့်ရှင်းရေး မှန်မှန်လုပ်ပါ။

၄။ အစိမ်းစားသော ဟင်းသီးဟင်းရွက်တို့စရာများကို သေချာဆေးကြောပါ။ အသားအမျိုးမျိုးကို ကျက်အောင်ချက်ပါ။

၅။ အ်ိမ်သားတစ်ဦးတွင် သန် မကြာခဏရှိလျှင် တစ်အိမ်လုံး သန်ချဆေးသောက်ပါ။

👩🏻‍⚕️မိမိကလေးကို သန်ချသင့်မချသင့် ဒွိဟဖြစ်နေလျှင် မိသားစုဆရာဝန် (သို့) ပြနေကျ ကလေးဆရာဝန်နှင့် ဆွေးနွေးပါ။

#နေနေမိုးဆွေ ( Child Health Myanmar Page)
Reference- WHO
Photo Credits to Google

15/12/2021

👶SIDS = Sudden Infant Death Syndrome

(တစ်နှစ်အောက် ကလေးငယ် အိပ်နေစဉ် ရုတ်တရက် မမျှော်လင့်ဘဲ သေဆုံးရခြင်း)

ကို ကာကွယ်နိုင်ရန် အစွမ်းကုန် ကြိုးစားပေးကြပါ။

🙏🙏🙏🙏🙏🙏🙏🙏🙏🙏🙏🙏🙏🙏🙏🙏

Australia နိုင်ငံက အကြံပြုထားတဲ့ SIDS ကာကွယ်ရေးနည်းလမ်းများကို လိုက်နာကျင့်သုံးနိုင်ရန် ပုံများကို ကြည့်၍ လေ့လာမှတ်သားပါ။

Australia ရှိ မြန်မာများအတွက် Australia အစိုးရမှ တရားဝင် မြန်မာဘာသာသို့ ပြန်ဆိုပေးထားသော လက်ကမ်းစာစောင် ဖြစ်သည်။ တင်ပေးလိုက်သည်။

credit
Child Health Myanmar

14/12/2021

ဗိုက်ခွဲမွေးဖူးတယ်၊ ရိုးရိုးမွေးချင်လို့ ရဦးမလား။
"""""""""""""""""""""""""""""""""""""""

အမေးလွယ်ပြီး အဖြေခက်ပါတယ်။ တစ်ခါခွဲမွေးဖူးပြီးမှ နောက်ကို ရိုးရိုးမွေးသင့်မမွေးသင့်ကို အကြံပေးဖို့ အခြေအနေအများကြီးပေါ် မူတည်ပါတယ်။ ဒီအခြေအနေတွေအားလုံးကို မိခင်တွေအနေနဲ့လည်း ကောင်းစွာနားလည် သဘောပေါက်ထားသင့်ပါတယ်။

ဘာကြောင့်လဲဆိုတာ ရှင်းပြပါ့မယ်။ မြန်မာနိုင်ငံမှာ ကျင့်သုံးနေတဲ့ ဆေးဝါးကုသရေးဝန်ဆောင်မှု အများစုဟာ doctor-centred လို့ခေါ်တဲ့ ဆရာဝန်ကသာ ကုသမှုတွေကို ရွေးချယ်ဆုံးဖြတ်ပြီး လူနာက ဘာမှ ဝင်ရောက်ဆုံးဖြတ်ပိုင်ခွင့် မရှိတဲ့ ပုံစံမျိုးဖြစ်ပါတယ်။ နိုင်ငံ တိုးတက်ပြောင်းလဲအောင် ကြိုးစားနေတဲ့ အချိန်မှာ ပညာရေးအဆင့်အတန်းတွေ ကျန်းမာရေးစောင့်ရှောက်မှု အဆင့်အတန်းတွေ မြင့်မားလာဖို့လိုပါတယ်။ ကျန်းမာရေးစောင့်ရှောက်မှု အဆင့်ကို မြှင့်တင်ပေးရင် လူတွေရဲ့ ကာယဉာဏတွေ ကောင်းမွန်လို့ အလုပ်ကောင်းကောင်းလုပ်နိုင်ပြီး တိုင်းပြည်တိုးတက်စေပါတယ်။ မြန်မာနိုင်ငံရဲ့ကျန်းမာရေး အဆင့်အတန်း နိုင်ငံတကာနဲ့ ရင်ပေါင်တန်းနိုင်ဖို့ ကျန်းမာရေးဝန်ဆောင်မှု အနှစ်သာရကို patient-centred လို့ခေါ်တဲ့ လူနာက ကုသရေးမှာ ဝင်ရောက် ဆွေးနွေးဆုံးဖြတ်ပိုင်ခွင့်ရှိတဲ့ ပုံစံအဖြစ်သို့ ပြုပြင်ပြောင်းလဲဖို့ လိုပါတယ်။ ဒီလိုပြောင်းလဲနိုင်ဖို့ ပြည်သူလူထုမှာလည်း တိကျမှန်ကန်တဲ့ ကျန်းမာရေး ဗဟုသုတတွေ ရှိထားဖို့ လွန်စွာအရေးကြီးပါတယ်။ ဒါမှ ကုသရေးမှာ ဆရာဝန်နဲ့အတူ ပါဝင်ဆွေးနွေးပြီး ရွေးချယ်ဆုံးဖြတ်နိုင်မှာ ဖြစ်ပါတယ်။ ဒီလို ဗဟုသုတတွေ ဖြန့်ဝေဖို့ ကျွန်တော်တို့ ပရဟိတဆရာဝန်တွေ ပူးပေါင်းပြီး Child Health Myanmar page လေးကို ပြုစုပျိုးထောင်ခဲ့တာ အခုဆိုရင် follower ပေါင်းများစွာ ရရှိနေပြီး အထူးအားရ ဝမ်းသာဖွယ် ဖြစ်ပါတယ်။ အားပေးဖတ်ရှုသူ၊ ထပ်ဆင့်ဖြန့်ဝေပေးသူများကိုလည်း ကျွန်တော်တို့က အထူးပင် ကျေးဇူးတင်ရှိပါတယ်။

တစ်ခါခွဲမွေးဖူးပြီးမှ နောက်ကိုယ်ဝန်မှာ ရိုးရိုးမွေးချင်ရင် မွေးလို့ရနိုင်ပါတယ်။ အင်္ဂလိပ်လို vaginal birth after Caesarean section (VBAC) သို့မဟုတ် trial of scar လို့ ခေါ်ပါတယ်။ ဆရာဝန်တွေ ဆေးရုံတွေဘက်ကလည်း လူနာရဲ့ဆန္ဒကို ဖြည့်ဆည်းပေးနိုင်အောင် မိခင်ရောကလေးပါ အန္တရာယ်ကင်း ဘေးရှင်းအောင် ကြိုးစားပေးထား သင့်ပါတယ်။ လုပ်ထားသင့်တာတွေက မနည်းတော့ အတော်ကြိုးစားကြရပါမယ်။

VBAC ကိုကြိုးစားရာမှာ အန္တရာယ်ရှိနိုင်တယ် ဆိုတာကို မငြင်းပယ်နိုင်ပါဘူး။ ဒါဆို ဘာလို့ ပေးလုပ်နေသေးလဲလို့ အမေးမစောလိုက်ပါနဲ့။ အကျိုးကျေးဇူးတွေလည်းရှိလို့ အချို့မိခင်များက ကြိုးစားဖို့ စိတ်အားထက်သန်နေကြတာပါ။

VBAC ၏အကျိုးကျေးဇူးများ
------------------------
* Caesarean section (ခွဲမွေးခြင်း) ရဲ့အန္တရာယ်တွေကို ရှောင်ဖယ်နိုင်ပါမယ်။
- CS ဟာ major surgery (အကြီးစားခွဲစိတ်မှု) ဆိုတာ မေ့ထားလို့မရပါဘူး။ ခွဲစိတ်စဉ် သွေးထွက်လွန်ခြင်း၊ ဆီးအိမ်နှင့် အူများကို မရည်ရွယ်ဘဲ ပေါက်သွားစေခြင်း၊ ခွဲပြီး သားအိမ်နှင့် ခွဲရာအနာ ပိုးဝင်ခြင်း၊ ခြေသလုံး အတွင်းနက်နက်ရှိ သွေးပြန်ကြောတွင် သွေးခဲခြင်း၊ ထိုသွေးခဲ ရွေ့လျားပြီး အဆုတ်တွင် သွားပိတ်၍ အသက်အန္တရာယ် ဖြစ်နိုင်ခြင်း၊ ဆေးရုံတွင် နေရရက်ပိုကြာခြင်း ဆိုတဲ့ဆိုးကျိုးတွေရှိပါတယ်။
- မွေးကင်းစ၏ အဆုတ်ထဲမှ ရေမြွှာရည် အထွက်နှေး၍ အသက်ရှုမြန်ခြင်း (TTN - transient tachypnea of newborn) - အထူးသဖြင့် ၃၈-၃၉ ပတ်ထက်စောပြီး ခွဲမွေးရင်၊ မိခင်မှကလေးကို သံယောဇဉ်နှောင်ဖွဲ့ဖို့ နှောင့်နှေးစေခြင်း၊ အစောပိုင်းရက်များတွင် နို့တိုက်ရခက်နိုင်ခြေများခြင်းတို့ ဖြစ်နိုင်ပါတယ်။
- နှစ်ခါခွဲမွေးပြီးရင် သုံးကြိမ်မြောက်နဲ့နောက်ပိုင်း ကိုယ်ဝန်တွေမှာတော့ ခွဲပဲမွေးသင့်ပါတယ်။ သုံးလေးကြိမ်အထက် ခွဲစိတ်ရတာတွေက ခက်ခဲလို့ အန္တရာယ်ရှိနိုင်လို့ သုံးခါခွဲမွေးပြီးရင် ကလေးထပ်မယူဖို့ OG အများစုက ပြောတတ်ပါတယ်။ ကလေး လေးယောက် ငါးယောက် ထပ်ယူချင်သူတွေက တစ်ခါခွဲပြီးနောက်မှာ VBAC ကို ကြိုးစားကြည့်မှ ကလေးများများ ယူနိုင်ပါမယ်။
- ခွဲတဲ့အကြိမ်များလေ အခြင်းက သားအိမ်အမာရွတ်မှာ အရမ်းကပ်နိုင်ခြေ ပိုများလေပါပဲ။ အရမ်းကပ်နေရင် သွေးထွက်လွန်နိုင်ပါတယ်။
* အချို့မိခင်တွေက ကိုယ်ကိုယ်တိုင် ဗိုက်နာ ကလေးကို ကိုယ်ကိုယ်တိုင် အောင်အောင်မြင်မြင် ညှစ်မွေးထုတ်လိုက်ရတာကိုမှ အားရဂုဏ်ယူချင်တာမျိုးလည်း ရှိတတ်ပါတယ်။ ဆေးပညာရဲ့ နီတိမှာ လူနာရဲ့ ခံစားချက် မျော်လင့်ချက်တွေကို လေးစားရမယ်လို့ ဆိုထားပါတယ်။

VBAC ၏ အန္တရာယ်များ
---------------------
* အဆိုးဆုံး၊ အန္တရာယ်အကြီးဆုံးကတော့ သားအိမ်ညှစ်နေတုန်း သားအိမ်ရဲ့ အမာရွတ်ကွဲထွက်ပြီး သားအိမ်ပေါက်သွားခြင်း ဖြစ်ပါတယ်။ VBAC တစ်ရာမှာ တစ်ယောက် နီးပါး ဖြစ်နိုင်ပါတယ်။ ရှားပေမယ့် ဖြစ်လာရင် အချိန်မှီ ခွဲမမွေးနိုင်ရင် ကလေး အသက်ရှင်ဖို့မလွယ်ပါဘူး။ ဆိုးရွားလွန်းရင် သားအိမ် ထုတ်လိုက်ရတာ၊ မိခင်ရဲ့ အသက် အန္တရာယ်ကို ခြိမ်းခြောက်နိုင်တာတွေအထိ ဖြစ်နိုင်ပါတယ်။
* အရင်ခွဲတုန်းက သားအိမ်ပေါ်မှာ vertical (အထက်အောက်) ခွဲတဲ့ classical CS ကိုသုံးခဲ့ရင် သားအိမ် ပေါက်နိုင်ခြေ ပိုများလို့ ရိုးရိုးပေးမမွေးတော့ပါဘူး။ ဘယ်လိုခွဲခံရခဲ့ဖူးလဲ ကိုယ်ကသိထားဖို့လိုပါတယ်။ Classical CS ကို မလိုဘဲ မသုံးတော့လို့ ဒီလိုခွဲခံရဖူးသူ အလွန်ရှားပါလိမ့်မယ်။
* သားအိမ်ခေါင်း အပွင့်နှေးရင် (failure to progress)၊ ကလေး နှလုံးခုန်နှုန်းတွေကျရင် ပုံမမှန်ရင် (fetal distress) အချိန်ကြာကြာ မဆွဲဘဲ အရေးပေါ်ခွဲရနိုင်ပါတယ်။ အရေးပေါ်ခွဲရင် (emergency CS) ကြိုတင်ပြင်ဆင်ခွဲခြင်း (elective CS) ထက် ပိုခက်ပြီး ဘေးထွက်ဆိုးကျိုး (complication) အနည်းငယ် ပိုများနိုင်ပါတယ်။
* VBAC ကို ကြိုးစားတဲ့သူ တစ်ဝက်လောက်က မအောင်မြင်ပါဘူး။
* VBAC အောင်မြင်နိုင်ခြေ ပိုများစေတဲ့အချက်များ
- ခွဲပြီး နှစ်နှစ်ကြာမှ မွေးရင် (သားအိမ်အမာရွတ် ပိုခိုင်တယ်လို့ ယူဆလို့ပါ)
- အဝ မလွန်ရင် (BMI

04/12/2021

ပိုးတွေ့နိုင်ငံတွေပိုတိုးလာနေတဲ့ အိုမီခရွန် ပိုးသစ်ကို တခြားဗီဇပြောင်းပိုး ၄ မျိုးလိုပဲ စိုးရိမ်ရတဲ့
ဗီဇပြောင်းပိုးလို့ ကမ္ဘာ့ကျန်းမာရေးအဖွဲ့ WHO က သတ်မှတ်လိုက်ပါတယ်။

COPY Burmese News

30/11/2021

‼️ ပန်းနာရင်ကျပ်ရောဂါ ‼️

ပန်းနာရင်ကျပ်ရောဂါဆိုသည်မှာ အသက်ရှူလမ်းကြောင်းနှင့် လေပြွန်များရောင်ရမ်းပြီး သာမန်ထက်ပို၍ တုန့်ပြန်မှု များပြားမြန်ဆန်နေခြင်း ဖြစ်သည်။

❓ ဖြစ်ပွားရခြင်း အကြောင်းရင်းများ ❓

- မျိုးရိုးဗီဇဆိုင်ရာ အကြောင်းရင်းများ
- ဓာတ်မတည့်မှုများ
- အိမ်တွင်း၊ အိမ်ပြင် ဖုန်မှုန့် အခိုးအငွေ့များ
- ဆေးလိပ်သောက်ခြင်း
- လေထုညစ်ညမ်းမှုများ
- ကပ်ပါးရောဂါနှင့် အခြားအသက်ရှူလမ်းကြောင်းဆိုင်ရာ ကူးစက်ရောဂါများ
- ပန်းနာဖြစ်စေသော ဆေးဝါးသောက်သုံးမှုများ
- ပန်းနာရင်ကျပ်ရောဂါ၏ လက္ခဏာများ

💢💢 ရောဂါလက္ခဏာများ 💢💢

- အသက်ရှူစဉ် ရွှီရွှီမြည်ခြင်း
- ချောင်းခြောက်ဆိုးပြီး အသက်ရှူမဝခြင်း
- မောပန်းလွယ်ခြင်း စူးရှသော အနံ့ရလျှင်၊ စိတ်လှုပ်ရှားလျှင်၊ အားခွန်စိုက်၍အလုပ်လုပ်လျှင် မောကျပ်ချောင်းဆိုးလာခြင်း
- ဖြစ်နေကျအချိန်တွင် ပုံမှန်ဖြစ်ခြင်း (ဥပမာ – နွေ၊ မိုး၊ ဆောင်း စသည်ဖြင့်)
- ညအိပ်ပျော်နေစဉ် ချောင်းဆိုးခြင်း၊ ကျပ်ခြင်း
အကိုက်အခဲပျောက်ဆေး၊ သွေးတိုးကျဆေး အချို့ သုံးစွဲလျှင် ရင်ကျပ်လာခြင်း

❤️ ကာကွယ်ကုသရေး နည်းလမ်းများ ❤️

❌ ဆေးလိပ်သောက်တတ်လျှင် ဆေးလိပ်ဖြတ်ပါ။
❌ ဓာတ်မတည့်သော အရာများ ရှောင်ရှားပါ။ (အိမ်မွေးတိရစ္ဆာန်များ၊ ဖုန်မှုန့်၊ အငွေ့ ၊ အနံ့အသက်၊ ဆေးဝါး၊ အစားအစာ စသည်ဖြင့်)
✔️ တတ်ကျွမ်းနားလည်သူများနှင့် ပြသကာ ကုသမှုခံယူပါ။
✔️ ကျန်းမာရေးနှင့် ညီညွတ်အောင် နေထိုင်ပါ။
✔️ အခြားရောဂါများ (ဥပမာ – ဆီးချို၊ သွေးတိုး၊ အဝလွန်ရောဂါများ) ရှိနေပါက ပုံမှန်စစ်ဆေး ကုသမှုခံယူပါ။
ညွှန်ကြားသည့်အတိုင်း ဆေးဝါးမှန်ကန်စွာ သုံးစွဲပြီး အခြားရှောင်ရန်၊ ဆောင်ရန်အချက်များကို လိုက်နာပါ။
ပန်းနာရင်ကျပ်ရောဂါသည် နာတာရှည်ရောဂါဖြစ်၍ ကုသမှုခံယူရာတွင် စိတ်ရှည်သည်းခံရန်လိုပါသည်။

#ပန်းနာရင်ကျပ် #ရင်ကျပ်ရောဂါ

29/11/2021

လစေ့၍ စုဘူး မပေါက်သေးသော်
🚼🚼🚼🚼🚼🚼🚼🚼🚼🚼

နောက်ဆုံးရာသီရဲ့ ပထမဆုံး သွေးဆင်းရက်မှ စတွက်ရင် အပတ် ၄၀ ပြည့်နေ့ကို ကိုယ်ဝန်ရဲ့ due date လို့ (ရက်စေ့) သတ်မှတ်တဲ့အတွက် ရက်စေ့တဲ့အခါ မေမေ ဖေဖေများက ကလေးကို တွေ့ချင်လွန်းလို့ မစောင့်နိုင် ဖြစ်တတ်ကြတာ သဘာဝပါ။ ဒီထက် ပိုအရေးကြီးတဲ့ ရက်ကျော်ခြင်းရဲ့ ပြဿနာတွေကို မသိသေးတဲ့ မိဘလောင်းများ ရှိကောင်းရှိနိုင်လို့ သတိပေးဖို့ ဒီ post ကို ရေးဖြစ်ပါတယ်။

များသောအားဖြင့် ၃၇ ပတ်မှ ၄၂ ပတ် ကြားမွေးပြီး ဒီအတောအတွင်းမွေးတဲ့ ကလေးကို term baby လို့ ခေါ်ပါတယ်။ အပတ် ၄၀ ကျော်လို့မှ မမွေးသေးရင် post date လို့ (ရက်ကျော်နေပြီ) ခေါ်ပါတယ်။

ဘာ အန္တရာယ်တွေ ရှိလဲ
⚜️⚜️⚜️⚜️⚜️⚜️⚜️
- ၄၂ ပတ်ကျော်မှ မွေးရင် (overdue) ကလေး အဖတ်မတင်နှုန်း မြင့်တက်လာခြင်း
- သားအိမ်ညှစ်ဒဏ်ကို ကလေး မခံနိုင်ခြင်း
- ခေါင်းထွက်ပြီးမှ ပခုံးတစ်နေခြင်း
- အရေးပေါ် ခွဲမွေးဖို့ လိုနိုင်ခြေ မြင့်လာခြင်း

ဖြစ်စေတဲ့ အကြောင်းကတော့ ကလေးအတွက် အောက်စီဂျင်နဲ့ အာဟာရတွေ ပံ့ပိုးပေးနေတဲ့ အချင်းက တာဝန်ပြီးဆုံးပြီဖြစ်၍ ပင်စင်ယူသွားတော့မှာမို့ ဖြစ်ပါတယ်။

ရက်ကျော်ရင် ဘာလုပ်သင့်လဲ
⚜️⚜️⚜️⚜️⚜️⚜️⚜️⚜️⚜️
- Due date က တိကျမယ်၊ မိခင် ကိုယ်ဝန် အချင်း (သို့) ကလေးမှာလည်း ဘာပြဿနာမှ မရှိဘူးဆိုရင် ၄၁ ပတ်နဲ့ ၃ ရက် ရောက်တာနဲ့ မွေးဖို့ ကြိုးစားသင့်ပါတယ်။
- ပြဿနာရှိရင် ပိုစောစော မွေးရပါတယ်။ ကလေး အလှုပ်နည်းရင်လည်း မစောင့်ဘဲ မွေးရပါမယ်။
- Induction of labour လို့ခေါ်တဲ့ ဆေးရုံမှာ ဆေးသွင်းမွေးခြင်း လုပ်လို့ရပါတယ်။
- အကြောင်း အမျိုးမျိုးကြောင့် ဆေးသွင်းမွေးခြင်း မလုပ်ပေးနိုင်တဲ့ ဆေးရုံ (သို့) ဆရာဝန်တွေကတော့ ခွဲမွေးဖို့ အကြံပေးလေ့ရှိပါတယ်။

ဆေးသွင်းမွေးခြင်းက ဘာလဲ
⚜️⚜️⚜️⚜️⚜️⚜️⚜️⚜️⚜️
- သားအိမ်ကို ညှစ်စေတဲ့ Syntocinon ဟော်မုန်းကို သွေးကြောထဲ အစက်ချ သွင်းပေးခြင်းပါ။ Infusion pump စက်နဲ့ ချိန်ပေးရင် ပိုတိကျပြီး ပိုအန္တရာယ်ကင်းပါတယ်။
- ဒီ ဟော်မုန်း မပေးခင် ရေမြွှာ အရင် ဖောက်သင့်ပါတယ်။
- အချို့မှာ ရေမြွှာဖောက်ပေးလိုက်ရုံနဲ့ သားအိမ် စညှစ်တတ်ပါတယ်။ ဟော်မုန်းတောင် မလိုပါ။
- ရေမြွှာဖောက်ဖို့ သားအိမ်ခေါင်း အနည်းငယ် ပွင့်နေဖို့လိုပါတယ်။
- သားအိမ်ခေါင်းကို ဆရာဝန်က လက်ချောင်းနဲ့ စမ်းကြည့်ရင် favourable (မွေးဖို့ အဆင်သင့်) ဖြစ်မဖြစ် သိနိုင်ပါတယ်။ ပွင့်နေ၊ တိုနေ၊ ပျော့နေ၊ အရှေ့လှည့်နေ၊ ကလေးခေါင်း ခပ်နိမ့်နိမ့်ရှိနေရင် favourable ဖြစ်ပါတယ်။
- သားအိမ်ခေါင်းက အဆင်သင့် မဖြစ်သေးရင် ဖြစ်အောင် အရင်လုပ်ပေးရလို့ အနည်းငယ်ပို ခက်ခဲပါတယ်။

သားအိမ်ခေါင်း အဆင်သင့်ဖြစ်အောင် ဘာလုပ်ပေးနိုင်လဲ
⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️
- မြန်မာပြည်မှာ Prostaglandin ဟော်မုန်းဆေးပြား တစ်ဝက် ယောနိထဲ တစ်ည ထည့်ခြင်း သုံးလေ့ရှိပါတယ်။
- စျေးကြီးတဲ့ Prostin လို့ခေါ်တဲ့ Prostaglandin ဟော်မုန်း ဂျယ်လီရည်ကတော့ ပိုကောင်းပါတယ်။
- ဒီထက် ပိုအန္တရာယ်ကင်းတာက သားအိမ်ထဲကို သားအိမ်ခေါင်းမှတစ်ဆင့် ဆီးပိုက်ထည့်၊ ပိုက်ထိပ်က ဘောလုံးကို အပြင်ကနေ ရေထိုးထည့် ဖောင်းစေပြီး ၁၂ နာရီကြာ ထားထားခြင်းပါ။ ဒီနည်းကို လုပ်တတ်အောင်၊ ပိုသုံးဖြစ်အောင် ဆရာဝန်တွေ ကြိုးစားသင့်ပါတယ်။

ဆေးသွင်းမွေးခြင်းရဲ့ ကောင်းကျိုးက ဘာလဲ
⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️
- ၄၂ ပတ်ကျော်ကြာအောင် စောင့်နေလို့ ဗိုက်ထဲ ကလေး ဆုံးသွားနိုင်ခြေကို ကာကွယ်နိုင်ပါတယ်။
- အကြီးစား ခွဲစိတ်ခြင်း ဖြစ်တဲ့ ဗိုက်ခွဲမွေးခြင်းကြောင့် ဖြစ်နိုင်တဲ့ အန္တရာယ်တွေ ရှောင်နိုင်ပါမယ်။

ဆိုးကျိုးရော ရှိလား
⚜️⚜️⚜️⚜️⚜️⚜️
- ရှိနိုင်ပါတယ်။ ဟော်မုန်းတွေ အပေးလွန်လို့ သားအိမ် သိပ်ညှစ်ရင် ကလေးက ကြာကြာမခံနိုင်ဘဲ ဒုက္ခရောက်နိုင်ပါတယ်။ သားအိမ်ညှစ်နေချိန်မှာ အချင်းကို သွေးမလျှောက်လို့ ကလေးက အောက်စီဂျင်မရပါ။ ဆယ်မိနစ်မှာ ညှစ်တာ ၅ ခါ ထက်ပိုရင် ပြန်လျှော့ရပါတော့မယ်။
- ဒါကြောင့် CTG လို့ ခေါ်တဲ့ ကလေးနှလုံးခုန်နှုန်းနဲ့ သားအိမ်ညှစ်နှုန်းတွေကို စာရွက်ပေါ် ရေးခြစ်ပြတဲ့စက်ကို သုံးကိုသုံးသင့်ပါတယ်။ မြန်မာပြည်မှာတော့ နေရာတော်တော်များများမှာ ဒီစက်မျိုး မရှိဘူး/မသုံးဘူးလို့ ထင်ပါတယ်။ သုံးနိုင်အောင် ကြိုးစားရပါမယ်။
- CTG စက်မရှိရင်၊ အနည်းဆုံး လက်ကိုင် doptone/doppler စက်တော့ ရှိရပါမယ်။ ကလေးနှလုံးခုန်အသံ ချဲ့စက်ပါ။

ဆေးသွင်းမွေးခြင်းအပြင် အခြား ဘာလုပ်ပေးနိုင်လဲ
⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️
- Stretch and sweep ဆိုတာလုပ်နိုင်ပါတယ်။ သားအိမ်ခေါင်းက နည်းနည်းပွင့်နေရင် ဆရာဝန်က လက်ချောင်း နှစ်ချောင်းနဲ့ ချဲ့ပေးခြင်း၊ ရေမြွှာ အမြှေးပါးကို သားအိမ်နံရံမှ ကွာအောင် လက်ချောင်းဖြင့် တွန်းခွာပေးခြင်းတွေပါ။
- လုပ်ပြီး တစ်ပတ်အတွင်း အလိုအလျောက် ရိုးရိုးမွေးနိုင်ခြေ တက်လာပါတယ်။
- ၃၉ ပတ်မှစ အပတ်တိုင်း လုပ်နိုင်ပါတယ်။

ကိုယ့်ဟာကိုယ် စမ်းလုပ်ကြည့်နိုင်တာ ရှိလား
⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️
- ကိုယ့်ဟာကိုယ် စမ်းကြည့်နိုင်တာ အချို့ရှိပါတယ်။ ထိရောက်မှုက မသေချာပါ။
- လမ်းလျှောက်ခြင်း (ကလေးခေါင်းစိုက်အောင် ကူပါတယ်)
- အမျိုးသားနဲ့ ဖိုမ ဆက်ဆံခြင်း (အမျိုးသမီးမှာ နို့သီးခေါင်းကို နှိုးဆွရင်၊ သာယာမှု အထွတ်အထိပ်ရောက်ရင် ထွက်တဲ့ ဟော်မုန်းက မွေးဖို့ ကူညီတယ်လို့ ယူဆပါတယ်။ အမျိုးသားရဲ့ သုတ်ရည်ကလည်း ကူတယ်လို့ ပြောကြတာ ရှိပါတယ်။)
- အချို့က တရုတ်အပ်စိုက်တွေ၊ တိုင်းရင်းဆေးတွေ စမ်းကြပါတယ်။ ဆေးပညာကတော့ အားမပေးပါ။

စာရေးသူ့ အာဘော်
✳️✳️✳️✳️✳️✳️

- မြို့ပေါ်က OG အများစုက ခွဲပဲမွေးနေကြတဲ့ အကြောင်းရင်းတစ်ခုက intrapartum fetal monitoring လို့ခေါ်တဲ့ သားအိမ်ညှစ်နေတုန်း သားဖွားဆရာမမှ ကလေးနှလုံးခုန်နှုန်း စောင့်ကြည့်မှုအပိုင်းမှာ အားနည်းချက်တွေရှိလို့ ဖြစ်နိုင်ပါတယ်။ ပုံမှန် ရိုးရိုးမွေးလည်း စောင့်ကြည့်ဖို့ လိုပါတယ်။ ဆေးသွင်းမွေးရင် ပိုလိုပါတယ်။ ပိုကောင်း ပိုတိကျ ရပါတယ်။ ဒီအပိုင်း တိုးတက်အောင် လုပ်ဖို့လိုပါတယ်။ မလိုအပ်ဘဲ မခွဲရအောင်ပါ။
- တောရွာတွေမှာ ကလေး အဖတ်မတင်နှုန်း မြင့်ခြင်းရဲ့ အကြောင်းရင်း တစ်ခုကလည်း ဒီအပိုင်း အားနည်းလို့ ဖြစ်တယ်လို့ WHO က မှတ်ချက်ပြုပါတယ်။ တောရွာတွေရဲ့ သားဖွားဆရာမတွေဆီမှာ doptone/doppler စက် မရှိသေးရင် ရန်ပုံငွေကောက်ပြီး ဝယ်ပေးလိုက်ကြပါ။ တစ်သိန်းလောက်ပဲ ကျမယ် ထင်ပါတယ်။ ဒါကို ကောင်းကောင်း သုံးတတ်ရင် ကလေးအသက်ပေါင်းများစွာ ကယ်တင်နိုင်ပါတယ်။

~~~~~~~~~~~~**~~~~~~~~~~~~**~~~~~~~~~~~~

Intrapartum fetal monitoring တိုးတက်လာပြီး သန္ဓေသား သေဆုံးနှုန်း ကျဆင်းလာအောင် ကြိုးစားနိုင်ကြပါစေ။

Photo credit to google image
Reference to guidelines from Royal Australian and Newzealand College of Obstetricians and Gynaecologists

Credit
ကျော်စန်းလွင် (Child Health Myanmar)
www.childhealthmyanmar.com

Myint Mo Oo Clinic - မြင့်မိုရ်ဦး အထွေထွေရောဂါကုဆေးခန်း

01/07/2022

29/06/2022

14/02/2022

19/12/2021

18/12/2021

17/12/2021

16/12/2021

15/12/2021

14/12/2021

04/12/2021

30/11/2021

29/11/2021

Address

Opening Hours

Telephone

Website

Alerts

Contact The Practice

Shortcuts

Share

Category

Monday	08:00 - 11:00
	16:00 - 20:00
Tuesday	08:00 - 11:00
	16:00 - 20:00
Wednesday	08:00 - 11:00
	16:00 - 20:00
Thursday	08:00 - 11:00
	16:00 - 20:00
Friday	08:00 - 11:00
	16:00 - 20:00
Saturday	08:00 - 11:00
	16:00 - 20:00
Sunday	08:00 - 11:00
	16:00 - 20:00