28/03/2026
မျက်စိတွင်းအမှုန်များမြင်ခြင်း (Floaters)
ရောဂါလက္ခဏာ
မျက်စိမြင်ကွင်းတွင် ပုံမှန်ကြည်လင်မှုမရှိပဲအမှုန် အစက်များပေါ်လာခြင်း၊ အမျှင်တန်းများမြင်ရခြင်း၊ ပင့်ကူအိမ်ကဲ့သို့ အရာများတွေ့လာခြင်းများဖြစ်ပေါ်လာတတ်ပါသည်။များသောအားဖြင့်ထိုအမှုန်များသည်ရွှေ့မျောနေတတ်ပြီးပေါ်လာလိုက်ပျောက်သွားလိုက်လဲဖြစ်တတ်ပါသည်။
အလင်းရောင်ကိုကြည့်ချိန်၊အဖြူရောင်စက္ကူ ၊ ပြာလွင်သောကောင်းကင် စသည်တို့ကိုကြည့်သည့်အခါတွင်အမှုန်များကိုပိုမြင်တွေ့ရတတ်သည်။
သို့ရာတွင် ထိုသို့အမှုန်များစွာရုတ်တရက်မြင်ရခြင်းသည်တခါတရံတွင် အရေးကြီးသောမျက်စိရောဂါ၏ရှေ့ပြေးလက္ခဏာဖြစ်တတ် သဖြင့် မျက်စိအထူးကုဆရာဝန်နှင့်ပြသစစ်ဆေးရန်လိုအပ်ပါသည်။
ဖြစ်နိုင်ခြေများသူများ
အများအားဖြင့်အသက်အရွယ်ကြီးရင့်ခြင်းကြောင့်ဖြစ်ပေါ်တတ်သော်လည်း ဖြစ်နိုင်ခြေပိုများသူများမှာ အဝေးမှုန်ပါဝါများသူများ၊ ဆီးချိုရောဂါရှိသူများ၊ မျက်စိအတွင်းတိမ်ခွဲရန်လိုအပ်နေသူများဖြစ်သည်။
ဖြစ်စေသောအကြောင်းရင်း
ပုံမှန်အားဖြင့်မျက်တွင်းဂျယ်လီတွင်းရှိသေးငယ်သောအမျှင်လေးများသည် အချင်းချင်းပေါင်းသွားပြီးအမှုန်အစက်များအဖြစ်မြင်ရခြင်းဖြစ်သည်။ အရေးကြီးသောအခြားအကြောင်းရင်းများမှာ မျက်စိတွင်းပိုးဝင်ခြင်း၊ မျက်စိထိခိုက်ဒဏ်ရာရခြင်း၊မျက်လုံးအတွင်းပိုင်းရောခြင်း၊ မျက်စိမြင်လွှာပြဲခြင်းကွာခြင်း ၊ မျက်လုံးတွင်းသွေးထွက်ခြင်းတို့ကြောင့်ဖြစ်တတ်သည်။
အန္တရာယ်ရှိသောလက္ခဏာ
မျက်စိတွင်းရှိမြင်လွှာကွာခြင်းဖြစ်လျှင်လဲအမှုန်များစွာရုတ်တရက်မြင်ရခြင်းများဖြစ်တတ်သည်။ထို့ကြောင့်
- အမှုန်အစက်များစွာရုတ်တရက်မြင်ခြင်း
- အလင်းရောင်များတလက်လက်မြင်ခြင်း
- ခန်းစီးအမည်းကျလာသကဲ့သို့မြင်ကွင်းကွယ်လာခြင်း စသည့်အန္တရာယ်ရှိသောလက္ခဏာပေါ်လာပါကချက်ချင်းမျက်စိဆရာဝန်နှင့်အရေးပေါ်ပြသရန်အရေးကြီးပါသည်။
ကုသမှု
ဖြစ်ပေါ်စေသောအကြောင်းရင်းများပေါ်မူတည်၍လိုအပ်သောကုသမှုမျိုးခံယူရပါသည်။အသက်အရွယ်ကြောင့်အမှုန်များမြင်ခြင်းဖြစ်ပြီး နေ့စဉ်လှုပ်ရှားမှုကိုမထိခိုက်ပဲစစ်ဆေးချက်များကောင်းမွန်နေပါကကုသရန်မလိုပဲ ပုံမှန်စစ်ဆေးမှုပြုလုပ်ရန်သာလိုပါသည်။
#မျက်စိကျန်းမာရေးစောင့်ရှောက်နိုင်ကြပါစေ။
#လင်းစေသော်မျက်စိဆေးခန်း
