16/11/2023
နဂါးမောက်သီးဆိုတာဆေးဖက်ဝင်တယ်ကင်ဆာကာကွယ်တယ်လို့လူသိများတဲ့အသီးတစ်မျိုးပါ။
ထူးခြားတဲ့အသွင်အပြင်နဲ့ အရသာကြောင့်ကြိုက်နှစ်သက်သူလည်းများကြပါတယ်။
နဂါးမောက်သီးမှာ Vitamin-C ၊ Vitamin-B အုပ်စုဝင်များဖြစ်ကြတဲ့ (B1,B2,B3) များပါဝင်ပြီး သံဓာတ်၊ ကယ်လ်ဆီယမ်နှင့် ဖော့စပရက် နှင့်အမျှင်ဓာတ်များပါဝင်ပါတယ်။ Vitamin-C အဓိကပါဝင်တဲ့အတွက် ကိုယ်ခံအားကောင်းစေပြီး ကူးစက်ရောဂါနဲ့ ဖျားနာခြင်းအမျိုးမျိုးမှလည်းကာကွယ်ပေးပါတယ်။ အမျှင်ဓာတ်ပါဝင်ခြင်းကြောင့် ဝမ်းချုပ်ခြင်းကင်းကာ အစာအိမ်နှင့်အူလမ်းကြောင်းကိုကျန်းမာစေပါတယ်။
ကိုယ်ခန္ဓာအိုမင်းရင့်ရော်မှုနဲ့ လေထုညစ်ညမ်းမှုအဆိပ်အတောက်များကိုပြေလျော့စေတဲ့ ဓာတ်တိုးဆန့်ကျင်ဂုဏ်သတ္တိပါဝင်တဲ့အသီးတစ်မျိုးလည်းဖြစ်ပါတယ်။ သွေးတွင်းကမကောင်းတဲ့အဆီပိုများ(ကိုလက်စထရော)ကိုလျော့ကျစေပြီး နှလုံးနှင့်ပတ်သက်တဲ့ရောဂါတွေမဖြစ်အောင်လည်းကာကွယ်တားဆီးပေးပါတယ်။
နဂါးမောက်သီးဟာ သွေးတွင်းသကြားဓာတ်ကိုထိန်းညှိပေးနိုင်တဲ့အာနိသင်ရှိလို့ ဆီးချိုသွေးချိုဝေဒနာရှင်များစားသုံးဖို့သင့်တော်တဲ့အသီးတစ်မျိုးလည်းဖြစ်ပါတယ်။
သံဓာတ်ကြွယ်ဝတဲ့ နဂါးမောက်သီးဟာ သွေးအားနည်းခြင်းကိုကာကွယ်ပေးပြီး သွေးအားနည်းခြင်းကြောင့်ဖြစ်တတ်တဲ့ မူဝေခြင်း၊ အားနည်းခြင်းများကိုလည်းသက်သာစေပါတယ်။ နောက်ထပ်ဓာတ်တစ်မျိုးဖြစ်တဲ့ beta-carotene ဟာခန္ဓာကိုယ်ထဲရောက်ရှိသွားချိန်မှာ Vitamin-A အဖြစ်ပြောင်းလဲသွားတဲ့အတွက်ကြောင့် မျက်လုံးကျန်းမာရေးအတွက်ပါအားထားရတဲ့အသီးတစ်မျိုးလည်းဖြစ်ပါတယ်။
အရည်ရွှမ်းတဲ့အသီးတစ်မျိုးဖြစ်တာကြောင့်လည်း ခန္ဓာကိုယ်ရေဓာတ်ဖြည့်စွက်ရာမှာအထောက်အကူဖြစ်စေပါတယ်။ အမျှင်ဓာတ်ကြွယ်ဝပြီးကယ်လိုရီနည်းပါးတဲ့သစ်သီးတို့ရဲ့ထုံးစံအတိုင်း စားသုံးသူကို အဆာပြေစေပြီး ကိုယ်အလေးချိန်တိုးမလာအောင်ပါ ထိန်းညှိပေးပါတယ်။
ဒါကြောင့်ကျန်းမာရေးရှုထောင့်အရကောင်းကျိုးများစွာပါဝင်တဲ့ နဂါးမောက်သီးကိုမကြာခဏစားသုံးပေးခြင်းဖြင့် ကျန်းမာတဲ့ဘဝတွေကိုပိုင်ဆိုင်နိုင်ကြပါစေလို့ Widya Herbal မှဆန္ဒပြုဆုတောင်းပေးလိုက်ပါတယ်။
