01/04/2026
ဧပြီလ (၁) ရက်နေ့မှ (၇) ရက်နေ့အထိ မြန်မာနိုင်ငံတစ်ဝန်းတွင် အပူရှိန်အလွန်အမင်း မြင့်တက်လာနိုင်သည့် အပူလှိုင်း (Heat Wave) အန္တရာယ် ရှိနေပါသည်။
ထို့ကြောင့် နွေရာသီရဲ့ ပြင်းထန်တဲ့ အပူရှိန်ကြောင့် ဖြစ်ပေါ်တတ်တဲ့ ကျန်းမာရေးပြဿနာတွေကို ကြိုတင်သိရှိပြီး အသက်အန္တရာယ်ကင်းဝေးအောင် ဂရုစိုက်ကြရန် နှိုးဆော်အပ်ပါသည်။
⚠️ အပူဒဏ်ကြောင့် ဖြစ်ပေါ်တတ်သော ရောဂါ နှင့် လက္ခဏာများ
၁။ အပူကြောင့် ဖောယောင်ခြင်း (Heat Edema)
လက္ခဏာ: ခြေကျင်းဝတ်၊ ခြေဖမိုးနှင့် လက်များ ရောင်ရမ်းလာခြင်း။
ဖြေရှင်းရန်: အနားယူပါ၊ ခြေရင်းကို မြှင့်အိပ်ပါ၊ ဓာတ်ဆားရည် သောက်ပါ။
၂။ အပူကြောင့် မိတ်နှင့် ယားဖုများထွက်ခြင်း (Heat Rashes)
လက္ခဏာ: ချွေးထွက်များပြီး အနီရောင်အဖုငယ်များနှင့် အင်ပြင်များ ထွက်လာခြင်း။
ဖြေရှင်းရန်: ချည်ထည်ပွပွများ ဝတ်ဆင်ပါ၊ ချွေးထွက်နည်းအောင် နေထိုင်ပါ။
၃။ အပူဒဏ်ကြောင့် ကြွက်တက်ခြင်း (Heat Cramps)
လက္ခဏာ: ခြေသလုံး၊ ပေါင်နှင့် ပုခုံးတို့တွင် နာကျင်စွာ ကြွက်တက်ခြင်း။
ဖြေရှင်းရန်: အေးမြသောနေရာတွင် နားပါ၊ ဓာတ်ဆားရည် (ORS) တိုက်ပါ၊ ကြွက်သားကို အသာအယာ ဆွဲဆန့်နှိပ်နယ်ပါ။
၄။ အပူကြောင့် မူးမေ့ခြင်း (Heat Syncope)
လက္ခဏာ: နေပူထဲ အကြာကြီး မတ်တတ်ရပ်ခြင်းကြောင့် သွေးစုပုံကာ မူးလဲခြင်း။
ဖြေရှင်းရန်: အေးမြသောနေရာသို့ ရွှေ့ပါ၊ ခြေထောက်ကို မြှင့်ထားပြီး အနားယူစေပါ၊ ဓာတ်ဆားတိုက်ပါ။
၅။ အပူကြောင့် ပင်ပန်းနွမ်းနယ်ခြင်း (Heat Exhaustion)
လက္ခဏာ: အလွန်အမင်း ချွေးထွက်ခြင်း၊ မူးဝေခြင်း၊ ပျို့အန်ခြင်း၊ အသားအရေ အေးစိုပြီး အရောင်ဖျော့လာခြင်း။
သတိပြုရန်: ချက်ချင်း မကုသပါက အပူလျှပ်ခြင်း (Heat Stroke) အထိ ဖြစ်နိုင်သဖြင့် လူနာကို အေးသောနေရာသို့ ရွှေ့ကာ ရေများများ တိုက်ပေးပါ။
၆။ အပူလျှပ်ခြင်း (Heat Stroke) ‼️ [အရေးပေါ် အသက်အန္တရာယ်ရှိ]
လက္ခဏာ: ကိုယ်အပူချိန် 103°F နှင့် အထက်တက်ခြင်း၊ သတိလစ်ခြင်း၊ နှလုံးခုန်မြန်ခြင်း၊ ချွေးလုံးဝမထွက်တော့ခြင်း။
အရေးပေါ် ဆောင်ရွက်ရန်: မိမိပတ်ဝန်းကျင်တွင် တွေ့ရှိပါက အချိန်မဆိုင်းဘဲ နီးစပ်ရာ ဆေးရုံ/ဆေးခန်းသို့ ချက်ချင်း ပို့ဆောင်ပါ။
✅ အပူဒဏ်ကို ဘယ်လိုကာကွယ်ကြမလဲ?
နေထိုင်မှု: နံနက် (၁၀) နာရီမှ ညနေ (၅) နာရီအတွင်း အပြင်ထွက်ခြင်း၊ နေပူထဲ အလုပ်လုပ်ခြင်းနှင့် အားကစားလုပ်ခြင်းများကို တတ်နိုင်သမျှ ရှောင်ပါ။
အစားအသောက်: ရေနှင့် ဓာတ်ဆားရည်ကို လုံလောက်စွာ သောက်ပါ။ အရက်၊ သကြားများသော အချိုရည်နှင့် ကော်ဖီ/လက်ဖက်ရည်များကို ရှောင်ကြဉ်ပါ။
ဝတ်စားဆင်ယင်မှု: ချည်ထည်ပွပွများ ဝတ်ဆင်ပါ။ အပြင်သွားပါက အနည်းဆုံး Sunscreen (SPF 30+) လိမ်းပါ၊ ထီးနှင့် ဦးထုပ် ဆောင်းပါ။
အထူးသတိပြုရန်: ကလေးငယ်များ၊ သက်ကြီးရွယ်အိုများနှင့် အိမ်မွေးတိရစ္ဆာန်များကို ကားထဲတွင် လုံးဝ ထားမခဲ့ပါနှင့်။
မိမိတို့၏ ပတ်ဝန်းကျင်ရှိ သူများကိုလည်း ဤအသိပေးနှိုးဆော်ချက်အား ပြန်လည်မျှဝေပေးခြင်းဖြင့် ကူညီပေးကြပါရန် တိုက်တွန်းအပ်ပါသည်။
