13/10/2025
သည်းခြေကျောက်တည်ခြင်း ( Gallstones Disease)
သည်းခြေ ကျောက်တည် ရောဂါဆိုတာ သည်းခြေအိတ်/သည်းခြေပြွန် အတွင်းမှာ သည်းခြေရည်တွေ စုပြီး ကျောက်ဖြစ် သွားတဲ့ ရောဂါ တစ်မျိုးဖြစ်ပါတယ်။ သည်းခြေကျောက်တွေဟာ အမြဲတမ်းတော့ ဒုက္ခမပေးတတ်ပါဘူး။ ဒါပေမယ့် သည်းခြေကျောက်လေးတွေ သည်းခြေပြွန်တွေထဲမှာ ပိတ်ခဲ့ရင်တော့ အစာခြေရည် ( သည်းခြေရည်) တွေ ပုံမှန်လမ်းကြောင်းအတိုင်း ကောင်းကောင်း မဆင်းတော့ပါဘူး။ သည်းခြေကျောက်တည် ရောဂါ လက္ခဏာ ပြပြီဆိုရင်တော့ သည်းခြေအိတ်ကို ကျောက်တွေနဲ့အတူ ဖယ်ရှားပစ်ရတဲ့ ခွဲစိတ်မှု လိုတတ်ပါတယ်။
သည်းခြေကျောက်တည် ရောဂါ လက္ခဏာများ
သည်းခြေပြွန် လမ်းတလျောက် ကျောက် မပိတ်မချင်း ကျောက်ရှိတဲ့ လက္ခဏာ ပြလေ့မရှိပါဘူး။ ကျောက်နဲ့ ပိတ်တဲ့အခါ ပျို့အန်ချင်တာ၊ ဝမ်းဗိုက် အပေါ်ပိုင်း နာတာ စတဲ့ လက္ခဏာတွေ ခံစားရလေ့ရှိပါတယ်။ ဒီလက္ခဏာတွေဟာ ဖြစ်လိုက် ပျောက်လိုက်နဲ့ ကာလအတန်ကြာ တတ်ပါတယ်။ အခြားလက္ခဏာများ
🍀ဖျားခြင်း
🍀ရင်တုန်ခြင်း
🍀ချွေးစေး ပြန်ခြင်း
🍀ဗိုက်နာခြင်း
🍀မျက်စေ့ နှင့် အသားဝါခြင်း၊
🍀ဆီးအရောင် ရင့်ခြင်း၊ ဝမ်း အရောင် ဖျော့ခြင်း တို့ဖြစ်တတ်ပါတယ်။
သည်းခြေ ကျောက် နာခြင်း
များသောအားဖြင့် ဝမ်းဗိုက် အပေါ်ပိုင်း ညာဘက်အခြမ်းမှာ တခါ တခါ ဆုတ်စွဲ ထားသလို စူးစူးရှရှ နာတတ်ပါတယ်။ တခါတရံ ညာဘက်လက်ပျဉ် အောက်နားက နာတတ်ပါတယ်။ အထူးအစာ စားပြီးချိန်တွေမှာ ပိုဖြစ်တတ်ပါတယ်။ အစာ စားလိုက်ချိန် အစာခြေရန်အတွက် သည်းခြေအိတ်က အစာခြေရည် ထုတ်ရန် ညှစ်တဲ့အခါမှာ ကျောက်နဲ့ ပိတ်နေတဲ့အတွက် သည်းခြေ စနစ်ထဲ ဖိအားများကာ နာခြင်း ဖြစ်ပါတယ်။
ဘယ်အချိန်မှာ ပို နာတတ်လဲ
သည်းခြေကျောက် ရောဂါရှိသူတွေဟာ အစာအများကြီး စားတာနဲ့ အဆီများတဲ့ အစားအသောက်တွေကို စားတဲ့အခါ အဆီတွေကို ခြေဖျတ်ဖို့သည်းခြေအိတ်က သာမာန်ထက် ပိုပြီး ညှစ်ရပါတယ်။ ဒီအချိန်မှာ နာတတ်ပါတယ်။ ထိုကဲ့သို့ သည်းခြေအိတ် ကြိမ် ဖန်များစွားနာလိုက်၊ ပျောက်လိုက်ဖြစ်နေတာကို Biliary Colic လို့ ခေါ်ပါတယ်
သည်းခြေကျောက်တည်ရောဂါ နောက်ဆက်တွဲ ရောဂါများ
🔥သည်းခြေအိတ် ရောင်ခြင်း
🔥မုတ်ချို အိတ် ရောင်ခြင်း
🔥သည်းခြေပြွန် ရောင်ခြင်း
🔥အသည်းရောင်ခြင်း
🔥အသားဝါခြင်း
🔥သွေးဆိပ် တတ်ခြင်း တို့ ဖြစ်တတ်ပါတယ်။
ဘယ်အချိန်မှာ ဆရာဝန် ပြရမလဲ
အစာ စားပြီးချိန် ရုတ်တရက် ဝမ်းဗိုက် အပေါ်ပိုင်း ညာဘက်အခြမ်းက နာလာတဲ့အခါ ဆရာဝန်၊ သူနာပြု တစ်ဦးဦးနှင့် ဆွေးနွေးဖို့ လိုတယ်ဆိုတာ မမေ့သင့်ပါဘူး။
ယခင်က နာခဲ့ဖူးသည့်တိုင် မပေါ့ဆပဲ ဆရာဝန် သူနာပြုတို့နှင့် တိုင်ပင်ပါ။
#ကျန်းမာရေး
